Read Babanki Filimùyn 1 Bible Online

Filimùyn 1 - Babanki bible

Filimùyn 1

¹A nyòʼò mò Bol nyoʼtə ŋwàʼlə̀ ghèn a wù a Filimùyn. Ma diʼ a ngə̀ŋ nfɨŋ byìʼì ando ma tə shwèʼè a Yesò Klistò. Yo Lèmə̀ vəghəŋ wu byɨmə Timotì ə tɨmə ə toŋtə ə wù. Wù diʼ wù ndoŋ ə yès, Yès ə kòŋ wù no nànto, wù shwèʼè a Yesò ndə̀ŋndəŋ to nə̀ yès.

²Yes ə be toŋtə lèmə̀ ə vəghəŋ Afiyà a diʼ wù byɨmə, be nə̀ Akibùs a ghə̀ shə̀ʼtə̀ ntɨm ə jùŋ no nə̀ kədyoʼkə ndə̀ŋndəŋ to nə̀ vəghəŋ. Yès ə be tɨmə ətoŋtə a ənòyn ə viʼi və byɨməvə vi a və tsèntə kuʼsə Nyìngòŋ a wù a ngə̀ŋ.

³Nyìngòŋ a diʼi Tìʼ ə vəghəŋ, nə̀ Bobo vəghəŋ Yesò Klistò ə diʼi ətyɨm ə jùŋə a ghə̀ŋ, ə be kù mbwaʼmə a ghə̀ŋ.

⁴Filimùyn, ma zhʉsə ə njɨ̀mə̀ no zhʉ̀ko ma sə toŋtə əzhiʼ ə wu, ku kəzòŋ a Nyìngòŋ.

⁵Ma nə̀ ku kəzòŋ a Nyìngòŋ byìʼì ando ma zhʉ li jì yì a wù byɨmə a Bobo vəghəŋ Yesò fa tsù ə bè sə kòŋə̀ viʼi Nyìngòŋ no və tsèm.

⁶Ma jɨ̀mə̀ la ntsèntə̀ yì a wù kiʼi nə̀ viʼi byɨməvə ne ghə̀ŋ tuʼtə kɨ əfo ə jùŋ və vi a Nyìngòŋ ə ku a vəghəŋ. Kənyʉ̀ a kì kwʉʼ ndiʼ viʼi nku ghoʼsə a Klistò.

⁷Lèmə̀ ghom, ə koŋə yì a wù kiʼi a viʼi Nyìngòŋ nə̀ ji yi a wù nè vəwenə saŋlə fa tsù ə nè li ma sə saŋlə no nànto, tyɨm ə ghomə be sə totə.

⁸Ando wù nè nyʉ̀ venə lə, ma yi zi ma ku a nə̀ soʼ a zhiʼ Klistò la wù ne kənyʉ̀ a wù ndiʼ ə nè

⁹Ali ma boŋsə sensə wù sensə byìʼì ə koŋə yi a ma kiʼi a wù. Mò Bol, a diʼ nə̀ wù to be diʼ a ngə̀ŋ nfɨŋ byìʼì ando ma shwèʼè a Yesò Klistò.

¹⁰Ma sensə la wù diʼi tyɨm ə jùŋ ghə̀ a Onesimùs a ghə̀ sə diʼ a mò to nə̀ wàyn ə ghom. Ando mà diʼ a ngə̀ŋ nfɨŋ a shə lə ghə̀ tə vi ma gyàmtə̀ wen ghə̀ byɨmə Yesò.

¹¹A tə ndiʼ fa ambì, ghə̀ diʼ to nə̀ kəfo kəmaʼakə a wù, ali luwen sə diʼ, ghə̀ diʼ to no wìʼ a ghə̀ gyàmtə̀ yowù.

¹²Ma bwensə tɨmə wen a wù luwèn lə, kòŋə̀ wen no nə̀ ətyɨm ə ghomə no tsèm.

¹³Ma zizi mà ə koŋə ghʉ̀ la ghə̀ faŋ to ashə ndiʼ ghə̀ lyɨ̀ kəshi ə kyəkə ə gyàmtə̀ mò, ando mà sə diʼ a ngə̀ŋ nfɨŋ lə byìʼì ando ma tə nshə̀ʼtə̀ ntɨm ə jùŋ,

¹⁴Alì, ma ko kòŋə̀ ne kənyʉ̀ alə̀ a bwen la wu byɨmə li, ndiʼ kə ndiʼi la no tèbe jùŋ ko a wù nè a mò ə ndiʼ mu wù nè ando wù koŋə, kə ko diʼ la mà ghaʼtə wù ghaʼtə.

¹⁵Kə zizi kə ndiʼ la, a nè Nyìngòŋ la Onesimùs moʼtə ghə̀ŋ to kəlɨŋkə zhʉ̀ ndiʼ ghə̀ ne sə bwenə ə vì a wù, ə vì to ghayn əmùʼ.

¹⁶Ə zìtə̀ fa luwen, ghə̀ ko be diʼ a wù to nə̀ kəkòs kə, ghə̀ a ndiʼ a yowù to nə̀ lèmə̀ yowù a yowù ə kòŋ byìʼì ando vəghəŋ vəwenə ə kiʼi əbyɨmə ə mùʼ. Ma kòŋ wen, ali wù diʼ ə ne kòŋə̀ wen chò ando ma kòŋ. Wù ne kòŋ wen to nə̀ kəkòs ə kyəkə, be kòŋ wen to nə̀ wìʼ yi a ghə̀ əbyɨmə li a Bobo.

¹⁷Wù sətsen nkɨ la yowù shwèʼè to kənyʉ̀ kə mùʼ, wù shisə Onesimùs ndə̀ŋndəŋ ando wù ə zizi a wù shisə mo.

¹⁸Ghə̀ sətsen ndiʼ mù ghə̀ nè li no tèbe kənyʉ̀ kə kəbyɨkə kə kò a wù, kò ghə̀ kiʼi kəfo ə lòʼ a wù, ma bwensə a wù.

¹⁹A nyòʼo to no mò nə̀ kəvu ə komkə a wù la, “Mò Bol na lòʼ no tèbe ghò a wù a Onesimùs ə lòʼ a wù.” Wu kɨ la no nkayn wù diʼ sə wù kiʼ kənyʉ̀ ə nè a mò ando mà tə ne wù sə diʼ wù ə byɨmə.

²⁰Lèmə̀ ghom, sensen nè kənyʉ̀ kènkə a ma gàʼà a wù lə a zhiʼi Bobo. Nè mà ə saŋlə a zhiʼi Klistò.

²¹Ma kɨli no nəmwèʼè la to ando ma tɨmə ŋwàʼlə̀ ghèn a wù lə, la wù a nè to ando mà gàʼà, ə sə nè, ə nè chò tebè ando ma kəŋə.

²²Ə kwʉ̀ʼsə, ma sensə la wù shətə kəshi a wù ngə̀ŋ a mò byìʼì ando ma kiʼi əkwòʼtə̀ la, Nyìngòŋ ə na zhʉ jɨ̀mə̀ ə ghəŋə ə nè ə və shisə mo fa nfɨŋ mà be vì vəghəŋ ə ndiʼ.

²³Ebafàlàs əgàʼa la mà toŋtə ə wù. Ghə̀ diʼ a ngə̀ŋ nfɨŋ yo wen byìʼì ando ghə̀ shwèʼè a Yesò Klistò.

²⁴Viʼi venə ə be tɨmə ətoŋtə a wù. A yi Mak nə̀ Alistakùs nə̀ Demàs nə̀ Luk. Yo vəwenə shwèʼè a kənyʉ̀ kə mùʼ.

²⁵Bobo Yesò Klistò ə ndiʼi ətɨm ə jùŋ ghə̀ ə wen a ghə̀ŋ.