Read Babanki Jems 1 Bible Online

Jems 1 - Babanki bible

Jems 1

¹A nyòʼò mò ə Jems ə wù shyèʼ ə̀ Nyìngòŋ wenə̀ Bobo Yesò Klistò nyòʼò ŋwàʼlə̀ ghèn: Mà toŋtə̀ viʼi Islel vəbyɨməvə no vətsèm a və saykə li ə̀ ndyʉ̀ a tyì mbyi.

²Vəlemə vwomə ghə̀ŋ nlyɨ̀ a nə̀ saŋlə ghoʼo ghə̀ a zhʉ a təmwòmsə̀ tə vì à ghə̀ŋ a jisə a jisə.

³Gaʼa kò ghə̀ŋ ə kɨ la və sətsèn ə mwòmsə̀ byɨmə ghəŋə, ghə̀ a nè la ghə̀ŋ nkɨ əghaʼ tyɨm.

⁴Ghə̀ŋ tuʼmə la əghaʼa tyɨm ghə̀ŋ aghenə shyèʼ əshyèʼ wen ə zaʼa fa kəmwètə̀ ndi ghə̀ŋ ə nlansə̀ diʼ viʼi və juŋəvə a nyʉ̀ tsèm kò a ndiʼ la ghə̀ŋ ə̀ gho kəfo.

⁵No te ndo a ghə̀ gho ətof fà ghə̀ŋ a ntìntìn, ghə̀ jɨm ə̀ bèm à Nyìngòŋ a ghə̀ a ku à wen. Nyìngòŋ ə ku à viʼi vətsèm nə̀ kəvu kə boʼtəkə bènə̀ boŋə tyɨm.

⁶Ghə̀ŋ sə njɨ̀mə̀ bèmə̀, ghə̀ŋ ə nkiʼ byɨmə. Kə ghə̀ŋ a momə̀ mwòmsə. No ndò a ghə̀ momə̀ dìʼ tò nə̀ mu mə mbyɨmtəmə̀ a mù mə nghoʼomə̀ a fwof ə̀ chò nə̀ʼə̀.

⁷Nki wìʼ aghenə, kiʼ tətyɨm təbò benə a ji a ghə̀ nè nyʉ̀ fa tsu, kò a ndiʼ la Bobo zì ghə̀ ku kəfo kì a ghə̀ bèmə̀ lì.

⁹Wu byɨmə a ghə̀ femə diʼ ə nànə̀ la Nyìngòŋ ghʉ li wen a kəshi kə ŋaŋtəkə,

¹⁰yì a ghə̀ kiʼi ghoʼ be nànə̀ la Nyìngòŋ ə shiʼsə li wen a nse. Kə diʼ alə̀ byìʼàndo wu ghoʼo chò cho tò ndə̀ŋndəŋ ando dzudzu agəŋ ə chò.

¹¹Chwìchwì lu mbanə to, ghə̀ nyùʼù agəŋ, dzudzu vi ə zàʼa ngòyn ə yi mù lè. A diʼ tò ndə̀ŋndəŋ ando wu ghoʼo lu sə njèʼè tsuʼtə̀ nyʉ̀ wen ə bvʉ̀tə pfʉ.

¹²Mbwaʼmə̀ dìʼ à wìʼ yì a ghə̀ ghaʼa tyɨm a zhʉ a təmwòmsə̀ tə vì à wen. Byiʼàndo ghə̀ sətsèn ə̀ to chò təmwòmsə̀ a tèntə, ghə̀ a kiʼi əzhùʼtə̀ yi a Nyìngòŋ ə nghʉ li la ghə̀ a ku à viʼi a və kòŋə̀ wen.

¹³Kə wìʼ à gàʼ a zhʉ a mwòmsə̀ vi à wen la, “A mwòmsə̀ Nyìngòŋ mwòmsə̀ mò la mà ne mbyɨ.” Kənyʉ̀ kə ko zì kə tentə Nyìngòŋ la ghə̀ ne mbyɨ, kò a ndiʼ la nkàntə̀ wen zì ghə̀ mwòmsə̀ wìʼ.

¹⁴Mwòmsə̀ lu mbòŋsə̀ vì à wìʼ à zhʉ a təkwòʼtə̀ tə byɨtə wen ə tentə wen la ghə̀ ne nyʉ̀ byɨvə.

¹⁵Təkwòʼtə̀ tə byɨtə a tèntə mù kwì à wìʼ a tyɨm ə̀ vì nə̀ nyʉ̀ byɨvə. Nyʉ̀ byɨvə avenə nè kwi ə̀ kwʉ̀ʼ və mù vì nə̀ pfʉ.

¹⁶Kə ghə̀ŋ be ghʉsə la viʼi vətsenvə lobtə ghə̀ŋ a vəlèmə̀ və kòŋ mò.

¹⁷No kəku kə jùŋ kə kò a kə bòŋə̀ ə lù fà kàŋ mu à ku Tìʼ a ghə̀ ə nshɨtə bayn. Tìʼ ayì ko lu nkwitə kò ghə̀ lu nè la vəghəŋ ndiʼ a tì mfɨnə̀ byìʼàndo ghə̀ ko lu kwitə.

¹⁸A ntsùʼ tò wen fà wen a ngə̀ŋ ənè la vəghəŋ ndiʼ vunə wen, ghə̀ ə ngaʼà li ndi vəghəŋ ndiʼ mbì fa ntìntìn fo tsèm a ghə̀ nshɨ̀tə̀.

¹⁹Ghə̀ŋ kɨ kènkə a vəlèmə̀ və kòŋə̀ mò: Ghə̀ŋ ntùʼù zhʉtə̀ kənyʉ̀ a mà gàʼà no a nkàyn, kə ghə̀ŋ a zàŋsə̀ gàʼà, kə ghə̀ŋ a zàŋsə̀ fwisə tin.

²⁰A sətsèn ghə̀ŋ ə mfwisə̀ tin, kò ghə̀ŋ a ə ne nyʉ̀ vyi a Nyìngòŋ kəŋə la ghə̀ŋ ə nè lì.

²¹Kə mu sə diʼ la ghə̀ŋ maʼa ntsìnə̀sə byɨsə bènə̀ ntsìnə̀sə kəmɨ̀ŋ ghə̀ŋ ə̀ shìʼsə təwen təŋtə shi ntɨm yì a Nyìngòŋ ə we à ghə̀ŋ a tətyɨm a ghə̀ zì ghə̀ bwòŋsə ghə̀ŋ.

²²Kə ghə̀ŋ a nzhʉtə̀ kənyʉ̀ kə Nyìngòŋ tò zhʉtə. Ghə̀ŋ diʼi ə nè kənyʉ̀ a kə gàʼà a bwen a lì mu ghə̀ŋ ə lobtə̀ təwen təŋtə.

²³Wìʼ a ghə̀ zhʉtə̀ kənyʉ̀ kə Nyìngòŋ tò zhʉtə̀ ke ə nè ando kə gàʼà dìʼ tò nə̀ wìʼ a ghə̀ ki wen ə wen a kənki kə ashɨ.

²⁴A dìʼ no a zhʉ̀ kò a ghə̀ lu fa benə kənki kə ashɨ ghə̀ bè lyèsə̀ jì a ghə̀ yi nkə̀ʼə̀ fa tsu.

²⁵No ndò a ghə̀ zhʉ soʼo Nyìngòŋ a diʼi ngesə̀ soʼ a ghə̀ shìsə̀ viʼi fa mbyɨsə bènə̀ fa pfʉ, ə̀ faŋ ə nè ando ə̀soʼ ayi ə kəŋ mu Nyìngòŋ ne bwaʼsə wen no a gho yì a ghə̀ nè. Nki wìʼ aghèn ko zhʉtə̀ kənyʉ̀ kə Nyìngòŋ tò zhʉtə̀ alì ghə̀ mwòmsə̀ ə nghʉ a kəne.

²⁶No ndò sətsèn ə nkwòʼtə̀ la ghə̀ dìʼ wu byɨmə ke nkɨ jì ə tisə kəlyɨmə kə wen mu ghə̀ lobtə̀ wen ə wen kò a ndiʼ la byɨmə wen ə kwʉʼʉ̀ tè a kənyʉ̀ kətsenkə.

²⁷Əbyɨmə a ghə̀ nè la Nyìngòŋ tìʼ vəghəŋ ə lutə̀ su saŋlə no a nkàyn dìʼ la, wù diʼi ə ntùʼmə̀ nə̀ vunə mpfʉ bènə̀ ki mpfʉ a və yenə ngəʼ, be nyɨŋsə wen ə wu fa nyʉ̀ ə mbi.