Read Babanki Jems 2 Bible Online

Jems 2 - Babanki bible

Jems 2

¹Vəlèmə̀ vwomə, ando ghə̀ŋ ə diʼì viʼi vəbyɨməvə à Yesò Klistò ə Bobo kanə vəghəŋ, ghə̀ŋ ko diʼ nlyɨ̀ la wìʼ ə chò ghətsen.

²Lyɨ la viʼi vəbò vi ə̀ kwèn à ghə̀ŋ a ntsèntə̀, wù muʼ diʼ wu ghoʼo mu ghə̀ shɨtə̀ li ə nlaf ə̀ nwe fənkwenkwen à wen a kəvu. Ghətsen diʼ wù kəmfem mu ghə̀ mòʼ təsòʼ tə ndisə.

³Wù mu lye wìʼ yì a ghə̀ shɨtə̀ ə̀ nlaf ə̀ gàʼ à wen la, “Ŋwʉʼʉ a kəshi kə jùŋ kə ashə̀”, alì ə̀ gàʼ à wù kəmfem yì la, “Tɨmə a fàʼà, ko la ŋwʉʼʉ boʼsə kəshi kèn a mà ə tomtə̀ aghʉ ghomə tsu lə̀.”

⁴Mu kə dìʼì la viʼi vətsenvə chò vətsenvə à ghə̀ŋ a ntìntìn. Kə be dìʼì la ghə̀ŋ ə kaʼkə li sə soʼo, nə̀ təkwòʼtə̀ tə byɨtə.

⁵Ghə̀ŋ zhʉtə a vəlèmə̀ və kòŋə̀ mò! Nyìngòŋ ntsùʼ li viʼi vi a viʼi mbyi lyɨ̀ la à dìʼ viʼi kəmfem ə̀ nlyɨ̀ la à dìʼ viʼi vəghoʼkəvə a byɨmə mbe ghʉ la vəwenə lu zhɨ soʼ fòn Nyìngòŋ yi a Ghə̀ nghʉ li la yì lu ku à viʼi vyi a və kòŋə̀ wen.

⁶Ghə̀ŋ ə bòŋsə̀ chasə viʼi kəmfem. Gaʼa kò à diʼ viʼi vəghoʼkəvə a və zəʼtə̀ ghə̀ŋ be lyɨ̀ ghə̀ŋ dyʉ̀ nə̀ ghə̀ŋ a kəbòʼ kə nsoʼ?

⁷A kò à dìʼ vəwenə a və gàʼà nyʉ̀ byɨvə byìʼì zhiʼ jùŋghə wìʼ yì a ghə̀ ə kiʼì ghə̀ŋ lì?

⁸Soʼ toghə a ghə̀ diʼì a ŋwàʼlə̀ Nyìngòŋ dìʼ la, “Wù diʼì əkòŋ lèmə̀ wù ando wù kòŋə̀ wen ə̀ wu.” Ghə̀ŋ sətsen ə nsù nè a lì mu ghə̀ŋ nè à nkàyn.

⁹Ghə̀ŋ sətsèn ə mbòŋsə̀ lyɨ̀ la viʼi vətsenvə chò vətsenvə mu ghə̀ŋ ə ne li mbyɨ, soʼ be à ghàʼ ghə̀ŋ tò ndə̀ŋndəŋ ando ghə̀ ghaʼa viʼi a və kwaʼà soʼ.

¹⁰Na kènkə dìʼì la no ndò sətsèn ə nghʉ təsoʼ tə tsèm alì ə̀ kwàʼ ghə̀ mùʼ mu ghə̀ kwaʼa li no tətsèm.

¹¹Byìʼàndo ndə̀ŋndəŋ ə̀ wìʼ a ghə̀ ngaʼà la, “Kə wìʼ à tsì nə̀ wì wìʼ ko nə̀ lɨm ə̀ wìʼ.” Mbe gàʼ la, “Kə wìʼ à zhwì wìʼ.” Wù sətsèn dìʼ ke tsi nə̀ wì wìʼ ko nə̀ lɨm ə̀ wìʼ alì ə̀ zhwi wìʼ mu wu lì kwaʼà li təsoʼ no tətsèm.

¹²Ghə̀ŋ ə ngàʼà lì be nè a nə̀ viʼi vyi a və lu soʼ vəwenə nsoʼ yì a ghə̀ shìsə̀ viʼi fa əkòs.

¹³Nyìngòŋ ko lu nkiʼ kusə nshinsə a zhʉ a ghə̀ soʼo no tè ndò a ghə̀ ko dìʼì kusə nshinsə à viʼi, alì wìʼ yì a ghə̀ dìʼì kusə nshinsə ko diʼ ə mfànə̀ nsoʼ.

¹⁴Vəlèmə̀ vwomə, wìʼ ə lè sətsèn ə ngàʼà la ghə̀ kìʼ byɨmə alì kò byɨmə ayi lu ndìʼì à wen à shwèʼ, se yi nè ndiʼ ghò? Byɨmə wen ayi lè zì ghə̀ bwoŋsə wen a?

¹⁵Lyɨ la lèmə̀ tsen dìʼ kò ghə̀ lu nkiʼ ndisə mòʼ be gho kəfo əzhɨ.

¹⁶Ghə̀ŋ ə lè sətsèn mù gàʼ à wen la, “Wù jeʼ tò a nkàyn. Wù dyʉ̀ wù ə mòʼò kəfo kəlɨmtəkə be ə zhɨ no a nkàyn.” Alì fàŋ ə̀ ke ku kəfo fa ntìntìn fo avenə à wen, se yi ne ndiʼ ghò?

¹⁷A bè dìʼ tò ndə̀ŋndəŋ ando byɨmə sətsèn ə ndiʼ tò wenə ghə̀ kènə̀ shyèʼè mu à dìʼ kəmpfʉ kə byɨmə.

¹⁸Wutsen a gàʼ la, “Wù kìʼ byɨmə mà kiʼ shyèʼ. Dìʼi ji à mò a wù zì wù kiʼi tò byɨmə kènə̀ shwèʼè, mà diʼ byɨmə ghomə chò fà mò a shwèʼ à wù.”

¹⁹Ghə̀ŋ ə nè a nkàyn ando ghə̀ŋ ə byɨmə la Nyìngòŋ dìʼ tò mùʼ. No tè zhwì byɨvə byɨmə be tsɨŋtə̀ nə̀ fanə.

²⁰Kəngwʉ̀ʼ kə kəfo kèn! Wù kəŋə la və dìʼ à wù la byɨmə kènə̀ shyèʼè dìʼ kənzɨm kə byɨmə mu?

²¹Nyìngòŋ ə̀ lè ko nlyɨ Ablaham ə tìʼ vəghəŋ la ghə̀ dìʼ wù kənyʉ̀ kə tɨməkə chò fà wen a shwèʼ ando ghə̀ nku wàyn wen ə Izìk a kəchiʼ kə kəku a?

²²Ghə̀ŋ ə yenə la byɨmə wen ə̀ njèʼè a kənyʉ̀ kə mùʼ nə̀ shwèʼè wen. A ne shyèʼè wen la byɨmə wen ə lwin.

²³Kə nchò a lì mù lwinsə kəshi kì a ŋwàʼlə̀ Nyìngòŋ a kə gàʼà la, “Ablaham ə mbyɨmə li Nyìngòŋ. Byìʼì byɨmə wen ayì, Nyìngòŋ lyɨ̀ wen a nə̀ wù nəmwèʼè.” Nyìngòŋ mu sə̀ dzàŋə̀ Ablaham nə̀ wù ndoŋ ə̀ wen.

²⁴Ghə̀ŋ ə yenə la Nyìngòŋ ə lyɨ̀ wìʼ a nə̀ wù kənyʉ̀ kə tɨməkə byìʼì shyèʼè wen, à ko diʼ tò byìʼì byɨmə zɨmghə wen.

²⁵A lè nko bè ndìʼ tò ndə̀ŋndəŋ ə̀ jì a Nyìngòŋ ə̀ nlyɨ wùwì njèʼtə̀ yì a və ndzàŋə̀ wen nə̀ Lahàb a nə̀ wù kənyʉ̀ kə tɨməkə, byìʼàndo ghə̀ nshisə viʼi ntɨm ə̀ Joshùwà bè nè nyɨŋsə vəwenə, və chò fa jì kədyàŋ a?

²⁶Kə mù sə diʼ la ando ə̀ kətsoʼ kə wèn kènə̀ kəzhwì kə diʼ mu kə pfʉ li, à bè dìʼ tò ndə̀ŋndəŋ ando byɨmə kènə̀ shyèʼè diʼ kəmpfʉ kə byɨmə.