Read Babanki Jems 3 Bible Online

Jems 3 - Babanki bible

Jems 3

¹Kə nghoʼo ghə̀ŋ à ndiʼ ndìʼsə̀sə a vəlèmə̀ vwomə. Ghə̀ŋ ə kɨ la Nyìngòŋ lu soʼ vəghəŋ vi a və diʼì ndìʼsə̀sə chò viʼi vətsenvə.

²Vəghəŋ vətsèm lu nè shwè. No ndò sətsèn ə ngàʼà ke nshwè mu ghə̀ dìʼ wù kənyʉ̀ kə tɨməkə, be diʼ mu ghə̀ zì ghə̀ tuʼmə nə̀ sò kətʉ wen.

³Vəghəŋ ə we mfɨŋ a chʉ̀ lyəŋ ndi ntensə wen ghə̀ dyʉ̀ no fe a vəghəŋ kəŋə.

⁴Ghə̀ŋ be lye əbaŋ a mù ghoʼkəvə a no tè bè ando və ghoʼkə no nànto, à be tenə fwof toghə tenə wenəvə, ngùfə shisə li mbòŋsə̀ tisə̀ tò nə̀ membàŋ mə ntyetəmə̀ la və dyʉ̀ no fe a vəwenə kəŋə.

⁵A bè dìʼ tò ndə̀ŋndəŋ ando kəlyɨmə kə dìʼ kəshi kə wèn wìʼ tyetə nànto alì gàʼà nyʉ̀ fansəvə. Ghə̀ kwoʼtə ando fəsèsè fə zhìʼ fə zì fə nyùʼ ku ghoʼoghə.

⁶Kəlyɨmə kə wìʼ kə diʼ tò nə̀ fəsèsè fə zhìʼ. Kə diʼ ntuʼ nyʉ̀ byɨvə à wìʼ a wèn no tsèm. Kə byɨsə̀ wen ə wìʼ no tsèm, kə diʼ əzhiʼ, nyùʼù no te ghò à tì mbi nəzhiʼ mu ghə̀ lù fa zhiʼ a ghə̀ ko lu mè.

⁷Wìʼ zì ghə̀ ghaʼtə nyamsə a mù, nə̀ sə toʼsə bènə̀ mənyin ə̀ dìʼsə̀ vəwenə ntsi a ngə̀ŋ. Adìʼ kənyʉ̀ mu və ne li,

⁸alì wìʼ kə zì ghə̀ ghaʼ kəlyɨmə dìʼsə̀. Kə diʼ kəfo kə byɨkə a kə ko zhʉ̀tə̀ be kiʼ ləʼ ə̀ byɨghə.

⁹Vəghəŋ ə ghoʼsə̀ Bobo bènə̀ Tìʼ vəghəŋ nə̀ kəwenkə be telə̀ viʼi a Nyìngòŋ nshɨ̀tə̀ a wen a kəmfʉsə̀ tò nə̀ kəwenkə.

¹⁰Vəghəŋ ə ghoʼsə̀ nə̀ əchʉ be telə̀ tò nə̀ wenə ghə̀. Vəlèmə̀ vwomə kə ko yi diʼ ndiʼ alə̀.

¹¹Mu mə njùŋmə̀ nə̀ mə mbyɨmə̀ ə lè zì mə mfʉ̀ tò fa fədyàn fə mùʼ a?

¹²Fəkòʼ fə figs lè zì fə kumə lamsə̀ a, a vəlèmə̀ vwomə mu la fəkòʼ fə lamsə̀ fə zì fə kumə ashɨ figs lo? A bè dìʼ tò ndə̀ŋndəŋ ando mu mə nghoʼomə̀ a mə kiʼi fəmbvaŋ ko zì mə mbe kù mu mə fədyàn.

¹³A dìʼ ndo à ghə̀ŋ a ntìntìn a ghə̀ tofə be zhɨ kɨ nyʉ̀ a? A zhʉ a ghə̀ diʼì, ghə̀ diʼi dìʼ ənyʉ̀ a ghə̀ nè nə̀ gumlə̀ byìʼì tof.

¹⁴A sətsèn ghə̀ŋ ə nkiʼ kənghə̀ʼ kə byɨkə a ghə̀ŋ a tətyɨm nə̀ kənywi, kə ghə̀ŋ a nkuʼsə̀ təwen təŋtə zhò ndzɨ̀ŋsə la ghə̀ŋ kiʼi tof.

¹⁵Nki tof aghenə ko lù fà kàŋ. Ghə̀ lù fa nse ashə̀, kenla àdìʼ ə tof ə kəzhwì kəŋwoʼəkə, adìʼ tof ə Deblə̀.

¹⁶Kəshi a kənghə̀ʼ nə̀ kòŋ kənywi diʼì tsu, kənsàlə̀ bènə̀ nyʉ̀ byɨvə tsenəvə be dìʼ tsu.

¹⁷Tof a ghə̀ lù fà kàŋ ə chò mbì ŋwòʼə̀, kòŋə̀ mbwaʼmə̀, kòŋ əzhʉtə nyʉ̀ ə viʼi vətsenvə, kiʼ kusə nshinsə be nè nyʉ̀ juŋəvə no ghoʼo. Ghə̀ lyɨ̀ viʼi vətsèm tò ndə̀ŋndəŋ ko a ndiʼ la ghə̀ kiʼ kəmbɨ̀lə̀.

¹⁸Viʼi a və kòŋə̀ mbwaʼmə̀, ə ghʉ mbwaʼmə̀. Nakènkə nè viʼi tsi ntsìnə̀ ə jùŋ.