Read Babanki Jems 4 Bible Online

Jems 4 - Babanki bible

Jems 4

¹A vì nə̀ ghò vì nə̀ ghoŋə bènə̀ soynə à ghə̀ŋ a ntìntìn a? Gaʼa kò nyʉ̀ avenə chò tò byìʼàndo kəmbàŋbàŋ kə soynə kwòʼtə̀ ə təŋtə nè la ghə̀ŋ ə nyɨŋə fa bàm ə̀fo nse.

²Ghə̀ŋ bàŋbàŋ fa bàmə fo, ne dìʼ ke kiʼi, ghə̀ŋ mù zhwi. Ghə̀ŋ ə shəmə, nè fàŋ ke kiʼi, ghə̀ŋ mù sə taŋmə̀ be soynə. Ghə̀ŋ ko kiʼì byìʼàndo ghə̀ŋ ko ə bèmə̀ à Nyìngòŋ.

³Ghə̀ŋ ə bèmə̀ kò və lu nku à ghə̀ŋ byìʼàndo ghə̀ŋ ə bèmə̀ a ji shwe. Ghə̀ŋ ə bèmə̀ ənè nyʉ̀ ngəŋsə ghə̀ŋ tsu.

⁴Viʼi venə a vəwenə ko ghʉ tətyɨm tə vəwenə à Nyìngòŋ lə̀, ghə̀ŋ ə be kò kɨ̀ la wìʼ a ghə̀ kòŋə̀ fo nse dìʼ wù kəbàyn à Nyìngòŋ? Kə lì dìʼì la no ndò a ghə̀ kòŋə̀ ndiʼ ndoŋ wenə̀ fo nse dìʼ wù kəbàyn ə̀ Nyìngòŋ.

⁵Mu ghə̀ŋ ə lyɨ̀ la ŋwàʼlə̀ Nyìngòŋ ə gàʼà tò kədyàŋ la, “Nyìngòŋ ə kòŋə̀ kəzhwì kì a ghə̀ ne li kə sə diʼ à vəghəŋ a təwèn lo?” Kəshi akènkə gàʼà tò nəmwèʼè.

⁶Alì boŋə tyɨm ə̀ wen à vəghəŋ ə kwi dyʉ̀ tò nə̀ mbì. Ŋwàʼlə̀ Nyìngòŋ ə mu sə gàʼà la, “Nyìngòŋ ə ko kòŋ viʼi a və kuʼsə̀ təwen tə vəwenə, alì kiʼ boŋə tyɨmə à viʼi a və shiʼsə̀ təwen tə vəwenə.”

⁷Ghə̀ŋ ku lì təwen təŋtə à Nyìngòŋ. Ghə̀ŋ tyen Deblə̀ a ghə̀ a bwènə̀ fà ghə̀ŋ a bàm.

⁸Ghə̀ŋ vìtə̀ boʼsə Nyìngòŋ a ghə̀ a vìtə̀ ə boʼsə ghə̀ŋ. Ghə̀ŋ shʉ avu a ghəŋə fa nyʉ̀ byɨvə ghə̀ŋ ə viʼi nè nyʉ̀ byɨvə venə. Ghə̀ŋ shʉ tətyɨm ə təŋtə fa nyʉ̀ byɨvə ghə̀ŋ a viʼi tətyɨm tə̀ bò venə.

⁹Ghə̀ŋ nsùtə̀ diʼ nə̀ kumə wèn be diʼ tò a nshinsə a nshinsə. Kə ghə̀ŋ be a ə̀ nchəʼə, ghə̀ŋ ə mbòŋsə̀ dì di. Kə ghə̀ŋ be a ə̀ nsaŋlə̀, ghə̀ŋ ə mbòŋsə̀ diʼ tò a nshinsə a nshinsə.

¹⁰Ghə̀ŋ nshiʼsə təwen təŋtə a shɨ Bobo a ghə̀ a kuʼsə ghə̀ŋ a kàŋ.

¹¹Kə ghə̀ŋ a ngàʼà mbyɨ byìʼì vəlèmə̀ vəŋə a vəlèmə̀ vwomə. No ndò a ghə̀ gàʼà mbyɨ byìʼì lèmə̀ wen, ko a ghə̀ soʼo lèmə̀ wen, ə gàʼà mbyɨ byìʼì soʼ be soʼo soʼ ayi. A sətsèn wù soʼò soʼ mu wù ko nè kənyʉ̀ a soʼ ayi ə gàʼà, alì bòŋsə̀ diʼ wu soʼo.

¹²Wù ku soʼ nə̀ wu soʼo diʼ tò mùʼ, à diʼ tò wen a ghə̀ zì ghə̀ bwoŋsə viʼi à be diʼ tò wen a ghə̀ zì ghə̀ byɨsə. Wù sə diʼ ndò ə nsoʼo viʼi vətsenvə a?

¹³Ghə̀ŋ vi a ghə̀ŋ ə gàʼà la, “Yès a lù lan kò a boʼòngə̀ŋ ə dyʉ̀ a ntə̀ʼ ə tsen ə tsi tsu ngwʉ̀ʼ mpfen ə ne mbaʼlə̀ ə kiʼi se.” Ghə̀ŋ zhʉtə a!

¹⁴Ghə̀ŋ ə ko kɨ̀ kənyʉ̀ kùmə̀ mətsi ghə̀ŋ a mbi. Ghə̀ŋ dìʼ tò nə̀ kəzhwì a kə fʉ̀ tò fəshitə̀ fə zhʉ kə bè lè.

¹⁵Ghə̀ŋ bòŋsə̀ diʼ ə ngàʼà la, “Bobo sətsèn kòŋ, yès à tsitə nè kənyʉ̀ kèn ko kì.”

¹⁶Alì luwèn, ghə̀ŋ ə bòŋsə̀ kùmə̀ dyʉʼ vəŋə, kuʼsə̀ təwen ə̀ təŋtə. Əkumə kədyùʼ bènə̀ kuʼsə wèn aghenə diʼ mbyɨ.

¹⁷No ndò a ghə̀ kɨ kənyʉ̀ kə jùŋ kə nè, fàŋ ke ne kənyʉ̀ akì ə ne li mbyɨ.