Read Babanki Jems 5 Bible Online

Jems 5 - Babanki bible

Jems 5

¹Ghə̀ŋ ə viʼi və ghoʼkəvə, ghə̀ŋ zhʉtə a! Ghə̀ŋ ə nzɨmə̀ dì no mwèʼè mwèʼè byìʼì ngəʼ ə ghoʼo ə ghə̀ ne vì à ghə̀ŋ.

²Ghoʼ ə̀ ghəŋə ne fwe, mənjɨtàtʉ̀ʼ be pfìʼ vədàlə vəŋə.

³Kəmbàŋ kə lu ghaʼ ə̀fo gol bènə̀ ə̀fo silva ə̀ ghə̀ŋ. Kəmbàŋ akènkə lu bòʼtə nàʼà vəŋə be pfiʼ kətsoʼ kə wèn ə̀ ghə̀ŋ tò nə̀ zhiʼ. Ghə̀ŋ ə ghʉ li ghoʼ a mətsì mə̀ kəmwetə alì ghə̀ lu vì nə̀ ngəʼ à ghə̀ŋ.

⁴Ghə̀ŋ zhʉtə a! Viʼi a və shwèʼè təsɨm təŋtə ghə̀ŋ zhɨ təko tə vəwenə dì no a gɨ to, di vəwenə aghenə diʼ mu ghə̀ zaʼa li a tiʼitiʼi Bobo yì a ghə̀ ŋaŋtə li nkwʉʼ.

⁵Ghə̀ŋ zhɨ li təwen ə̀ təŋtə a mbi a shèn, ə nghoʼkəsə diʼ to nə̀ vəmbòŋ ə və shyə.

⁶Ghə̀ŋ ə ne li la və soʼ ə̀ byɨ̀sə viʼi ntosə, ə̀ byɨ̀sə vəwenə kèn la vəwenə soyn li ghə̀ŋ.

⁷Ghə̀ŋ ə nwensə̀ lì a vəlèmə̀ vwomə, ə zaʼa fa tʉʼ a Bobo lu vì. Ghə̀ŋ kwoʼtə ando wù shyèʼè sɨ̀m lu nkə̀ʼtə̀ la fo sɨm ə̀ wen ku ə̀ ndiʼ a mə̀ kəŋ. Ghə̀ lu wensə ə zaʼa fa zhʉ a mbì ghʉ̀ nə̀ kəmwètə̀ kə ghʉ̀ kə nə̀ vi əfo wen ə̀ kwi.

⁸Nkàntə̀ ghə̀ŋ bè diʼi ə nwensə̀ tò a lì. Ghə̀ŋ ghaʼ tətyɨm ə təŋtə tə to byìʼe məbwènə̀ vì Bobo boʼsə li.

⁹Kə ghə̀ŋ a nghàmə̀ vəlèmə̀ vəŋə a vəlèmə̀ vwomə ndi kə və lù soʼ ghə̀ŋ. Wù soʼò nsòʼ sə ti tò a chʉ ngə̀ŋ.

¹⁰Ghə̀ŋ lyɨ nshə̀ʼtə̀sə ghoʼkəsə nə̀ nchwi məwensə̀ a zhʉ ngəʼsə a vəlèmə̀ vwomə. Vəwenə nshə̀ʼtə̀ ntɨm ə̀ Bobo no tè ando vəwenə nyènə ngəʼ.

¹¹Gaʼa kò vəghəŋ yenə la Nyìngòŋ bwaʼsə̀ viʼi vyi a və wensə lì. Ghə̀ŋ ə zhʉ li byìʼì ghaʼa tyɨm Job nə̀ kənyʉ̀ kì a Bobo ə̀ ne a wen. Bobo kìʼ tyɨm ə̀ bwaʼmə ghə̀ bè kusə̀ nshinsə à viʼi.

¹²A kwi nyʉ̀ no tsèm a ma gaʼà li a vəlèmə̀ vwomə, kə wìʼ à kàyn kənyʉ̀. Kə wìʼ a kàyn a zhiʼ Nyìngòŋ ko a zhiʼ ə̀ kəfo kətsenkə a nse ko kàyn tè məkàyn məntsenə. Alì kənyʉ̀ kə ndiʼ ə wìʼ byɨmə, ghə̀ ə byɨmə tò byɨmə, ə ndiʼ ə wìʼ tensə, ghə̀ tensə tò tensə ndi kə və lù soʼ ə̀ byɨ̀sə ghə̀ŋ.

¹³A sətsèn wìʼ ə ndiʼ à ghə̀ŋ a ntìntìn a ghə̀ yenə ngəʼ. Ghə̀ jɨ̀mə. A sətsèn wìʼ ndiʼ à ghə̀ŋ a ntìntìn a ghə̀ saŋlə̀. Ghə̀ nzhɨmə ndzàŋsə ghoʼsə Nyìngòŋ.

¹⁴A sətsèn wìʼ ndiʼ à ghə̀ŋ a ntìntìn a ghə̀ kwaʼà. Ghə̀ dzàŋə vəchəʼ və ngə̀ŋ Nyìngòŋ və vi ə̀ jɨ̀m à wen à kətʉ ə̀ zuʼu wen nə̀ məzhiʼ a zhiʼ Bobo.

¹⁵Vəwenə sətsèn ə nè jɨ̀m aghenə byɨmə, Nyìngòŋ à chʉʼ wu kwaʼa ayì, Bobo be lùsə wen fa kwaʼa. A be ndiʼ la ghə̀ ne li mbyɨ, Bobo à lyèsə̀ mbyɨ wen ayì.

¹⁶Ghə̀ŋ ə nshə̀ʼtə̀ lì mbyɨsə sə̀ŋsə à ghə̀ŋ a ntìntìn be jɨ̀mə̀ à no ndò à ghə̀ŋ a ntìntìn ndi və chʉʼ ghə̀ŋ. Jɨmə wù kənyʉ̀ kə tɨməkə kiʼ kədyòʼ kə ghoʼokə a nyʉ̀ a jɨ̀m ayi nè.

¹⁷Elijà ndìʼ wìʼ tò nə̀ vəghəŋ ə̀ jɨ̀m nə̀ tyɨm ə wen no tsèm la kə ghʉ à vì kò ghʉ lù vì a tì ngwʉ̀ʼsə sətaʼ nə̀ kəbweʼkə a nse.

¹⁸Ghə̀ bè jɨ̀m, ə̀ kaŋ ə ku ghʉ, nsə bè ku fozhɨvə.

¹⁹Vəlèmə̀ vwomə, wìʼ fà ghə̀ŋ sətsèn dyʉ̀ kəghaf fa nəmwèʼè, wutsen ne la ghə̀ bwènə̀ vì tsu,

²⁰ghə̀ nkɨ la à bwènsə̀ visə tè ndò ə̀ vìsə̀ wù ne nyʉ̀ byɨvə fà wen a ji byɨ, mu ghə̀ a bwòŋsə kəzhwì kə wen fa pfʉ ə be chiʼtə nyʉ̀ byɨvə no ghoʼo.