Read Babanki 1 Bità 1 Bible Online

1 Bità 1 - Babanki bible

1 Bità 1

¹A nyòʼo mò ə Bità, ə wù ə ntɨm ə Yesò Klistò nyòʼo ŋwàʼlə̀ ghèn a ghə̀ŋ ə viʼi Nyìngòŋ vi a ghə̀ ntsùʼ li, mu və dzɨ̀m li shisə vəwenə, vəwenə nsaykə̀ nkaʼ alòʼ ə Bontùs nə̀ Gàlesìyà nə̀ Kàbàdosìyà nə̀ Esìyà nə̀ Bìtinìyà ə sə tsi tsu a nə̀ viʼi a və chò ji.

²Nyìngòŋ, ə Tìʼ sə diʼ mù ghə̀ ghʉ̀ li ə tsuʼtə ghə̀ŋ a viʼi və laynə və wen chò fa əshyèʼ kəzhwì kə Ŋwoʼkə. Ghə̀ nè ali ndiʼ ghə̀ŋ ə zhʉ to fa Yesò Klistò, mənlyuŋ mə wen ə shʉ̀ laynsə ghə̀ŋ. Nyìngòŋ ə diʼi ətyɨm ə jùŋə ghə̀ a ghə̀ŋ no nànto ə be kù mbwaʼmə a ghə̀ŋ.

³Vəghəŋ ə kuʼsə Nyìngòŋ, ə Tìʼ Bobo vəghəŋ Yesò Klistò! Ghə̀ nkusə li shinsə a vəghəŋ no nànto, ə kù ntsìnə̀ ə fi a vəghəŋ a ji la ghə̀ lusə li Yesò Klistò fa pfʉ, vəghəŋ ə sə tsi kɨ nəmwèʼè la vəghəŋ lu kiʼi ə ntsìnə̀ yì a ghə̀ ko lu mè;

⁴ə be kiʼi əghoʼ a kàŋ to ando Nyìngòŋ ə nghʉ̀ li mu ghə̀ zizi ko ghə̀ lu fwè, ko byɨf, ko kwitə əkə̀ʼ. Ə ghoʼ na ghənə ə diʼ a ghə̀ŋ ə viʼi Nyìngòŋ.

⁵Nyìngòŋ ə kəŋə ghə̀ŋ nə̀ kədyòʼ kì a ghə̀ kiʼi. Ghə̀ ne kəŋə byìʼì ə byɨmə ə ghəŋə, ghə̀ŋ diʼ lù kiʼi əbwòŋ yì a ghə̀ baʼtə̀ li ə lu ku a ghə̀ŋ a ndayn a tʉʼ bàm.

⁶Ghə̀ŋ ə nsaŋlə̀ li kumə nyʉ̀ a venə no tèbe ando à diʼi luwen təmwòmsə̀ vì a ghə̀ŋ to a jisə a jisə.

⁷Təmwòmsə̀ na tentə ə vi a ghə̀ŋ ə ne la viʼi yen əkɨ la ghə̀ŋ kiʼi no nkàyntə̀ əbyɨmə. Və nə̀ mwomsə gul nə̀ zhiʼ ali a diʼ kəfo a kə ko kuʼmə zàʼa tebè a nə̀ əbyɨmə, mu kə zi kə byɨf. Kə le diʼi la, və diʼ mwomsə əbyɨmə ə ghəŋə byìʼì ando à diʼ kəfo a kə kuʼmə chò gul ndiʼ à lù ndiʼ a kətsi a Yesò Klistò bwenə vì, Nyìngòŋ ə bwomsə ghə̀ŋ ə be ku əghoʼ ə wen a ghə̀ŋ.

⁸Ghə̀ŋ nkòŋ wen no tèbe ando ghə̀ŋ ə ko tɨmə yènə wen, ghə̀ŋ be ə byɨmə a wen, ko ghə̀ŋ lu yenə tèbe wen luwen. Ghə̀ŋ ə saŋlə no nànto, a ji ə kaynə ə yì a wìʼ zizi ko ghə̀ lu shə̀ʼtə̀.

⁹Ghə̀ŋ ə saŋlə alə̀ byìʼì ando Nyìngòŋ ə ku əbwòŋ a ghə̀ŋ, a diʼ kənyʉ̀ kì a ghə̀ŋ byɨmə byìʼì kəwenkə.

¹⁰Nshə̀ʼtə̀sə ghoʼkəsə ə diʼ mù sə ə ngaʼa kumə ətuʼmə əkaynə ghə̀ na ghenə a Nyìngòŋ ə baʼtə̀ ghʉ a ghə̀ŋ lə. Vəwenə ə nshɨtə kəŋ to kəŋ ə kɨ kənyʉ̀ kumə əbwòŋ na ghenə,

¹¹be kəŋ la kəzhwì kə Yesò kì a kə diʼi a vəwenə diʼ zhʉ̀ nə̀ ji yi a Yesò ə ndiʼ lù yenə ngəʼ fa tsù ə be diʼ kədyòʼ kə wen.

¹²Nyìngòŋ ə ndiʼi li làynsə a nshə̀ʼtə̀sə ghoʼokəsə na sensə la vəwenə ə shə̀ʼtə̀ ntɨm na ghèn ko vəwenə shəʼtə̀ a və wenə təwen, la vəwenə ə boŋsə shyèʼ a ghə̀ŋ. Nyìngòŋ ə sə diʼ mù ghə̀ tɨm li Kəzhwì kə Ŋwoʼkə a viʼi mu kə lù fa kàŋ, və shə̀ʼtə̀ nyʉ̀ na venə a ghə̀ŋ chò fa a ntɨm ə jùŋ, a diʼ nyʉ̀ a no tèbe ətsɨŋsə Nyìngòŋ əkòŋ ə kɨ.

¹³Ghə̀ŋ baʼtə̀ li tə wen ə təŋtə, bvɨtə ə nè shyèʼ yì a Nyìngòŋ ə kəŋ. Ghə̀ŋ ə shɨtə ghaʼa təwen ə təŋtə, ghʉ̀ tə kwoʼtə təŋtə a bwaʼmə a ghèn a Nyìngòŋ ə diʼ lù ku a ghə̀ŋ a tʉʼ a Yesò Klistò lu bwenə vì.

¹⁴Ghə̀ŋ ə nzhʉ to fa Nyìngòŋ. Kə ghə̀ŋ be ne nyʉ̀ vyi a njòsə wen ə ghə̀ŋ sə ə kəŋ la ghə̀ŋ ə nè to ando ghə̀ŋ ə nè a tʉʼ a ghə̀ŋ nko tɨmə kɨ Nyìngòŋ.

¹⁵Ghə̀ŋ kɨli la Nyìngòŋ ghə̀ŋ a ghə̀ tə tsùʼtə ghə̀ŋ la ghə̀ŋ ə diʼ viʼi wen diʼ nə̀ laynə, ghə̀ŋ be diʼ ə̀ laynə no nyʉ̀ tsèm a ghə̀ŋ ə nè.

¹⁶To ando və nyòʼo li a Ŋwàʼlə̀ Nyìngòŋ la, “Ghə̀ŋ ə tsi ətsìnə̀sə laynəsə byìʼì ando ma làynsə.”

¹⁷A zhʉ a ghə̀ŋ ə jɨ̀mə̀ a Nyìngòŋ, ghə̀ŋ sə toŋtə wen la Tìʼ, a diʼ wen yi a ghə̀ soʼo viʼi vətsèm, soʼo ali, soʼo no ndò to ndə̀ŋndəŋ. Kə le diʼi la ghə̀ŋ diʼ ə gumlə wen no nànto ando ghə̀ŋ bo tsitə a nse ashen.

¹⁸Ghə̀ŋ kɨli la Nyìngòŋ ə loʼ li shisə ghə̀ŋ fa ntsìnə̀ ə mu yi a vətiʼi və vəghəŋ ə ntsi. Nyìngòŋ ə nko ə zen ghə̀ŋ nə̀ kəfo kə to nə̀ əko mu ghə̀ zizi ghə̀ byɨf.

¹⁹Ghə̀ ə nzen ghə̀ŋ to no ə mənlyuŋ mə Yesò, a diʼ mənlyuŋ kiʼi kədyòʼ. Yesò ə ndiʼ to nə̀ wàyn Njɨ̀, ghə̀ nko kiʼi kəluʼ no fa mphen.

²⁰Nyìngòŋ ə diʼ mù ghə̀ ntsuʼ li wen ə ghʉ̀ mibu fa tʉʼ ghə̀ shɨtə mbi, ə sə diʼ mù ghə̀ diʼi li wen a mətsi mə kəmwètə a ghə̀ŋ a jùŋ.

²¹A diʼ byìʼì Yesò na ghèn a ghə̀ŋ byɨmə a Nyìngòŋ a ghə̀ ə lùsə wen fa pfʉ, ə ghʉ̀ wen akəshi kə ŋaŋtəkə, kənyʉ̀ na kì ə nè, ghə̀ŋ ə sə kiʼi əbyɨmə, be ki kə̀ʼtə̀ to Nyìngòŋ.

²²Ghə̀ŋ sə diʼ mù ghə̀ŋ shʉ li tətyɨm təŋtə tə layn byìʼì ando ghə̀ŋ zhʉ̀ li kənyʉ̀ kə Nyìngòŋ kì a kə diʼi nəmwèʼè ə sə kòŋ təwen ə təŋtə. Ghə̀ŋ ə kòŋmə li təwen ə təŋtə to nə̀ vəlemə no nəmwèʼè nə̀ ətyɨm ə muʼ.

²³Kə diʼ ə ndiʼ alə byìʼì ando və bwensə li bwi ghə̀ŋ a nfi chò fa kənyʉ̀ kə Nyìngòŋ yi a ghə̀ŋ tsi, mu kə faŋ li to ghayn ə mùʼ. A ko bwi wìʼ bwi ghə̀ŋ a ghə̀ zizi a ghə̀ pfʉ.

²⁴Kə diʼ to ndə̀ŋndəŋ ando və nyòʼo li a Ŋwàʼlə̀ Nyìngòŋ la: “Viʼi vətsèm diʼ to nə̀ agəŋ ə toʼ, əboŋ ə vəwenə diʼ to nə̀ flawà kəfʉʼkə nə̀ pfʉ, flawà fəŋkə,

²⁵ali kənyʉ̀ kə Nyìngòŋ kə diʼ mù kə faŋ li to nəmwèʼè.” Na ken kə diʼ ntɨm ə jùŋ yì a və nshə̀ʼtə̀ a ghə̀ŋ.