Read Babanki 1 Bità 2 Bible Online

1 Bità 2 - Babanki bible

1 Bità 2

¹Nyìngòŋ sə diʼ mù ghə̀ ku li ntsìnə̀ ə fi a ghə̀ŋ. Ghə̀ŋ maʼa li tətyɨm təbyɨtə nə̀ kənlobtəkə nə̀ kəmbàŋmbàŋ kə, nə̀ kəghəʼ kə nə̀ gaʼa ə əbyɨghə.

²Ghə̀ŋ ə boŋsə diʼ to nə̀ vunə və bwaʼ və, nyʉ̀ʼ no zhʉ̀ko kəŋ ə nyoŋ nkàyntə̀ zhwin, a diʼ kənyʉ̀ kə Nyìngòŋ, ndiʼ ghə̀ŋ faŋ ə kwi to kwi zaʼa fa tʉʼ a ghə̀ŋ lù kiʼi əbwòŋ.

³Ghə̀ŋ dìʼ ə nè alə byìʼì ando ghə̀ŋ sə diʼ mù ghə̀ŋ yen li a ghə̀ŋ a ntsìnə̀sə la Bobo ə tùʼmə̀.

⁴Ghə̀ŋ vi boʼsə Bobo Yesò Klistò. Ghə̀ diʼi ngùʼ, ghə̀ tsi mu viʼi ə ntemə maʼa la ghə̀ ko bòŋ, ali Nyìngòŋ ə yen la ghə̀ kuʼmə kwʉ̀ʼʉ̀ ə tsuʼ wen ə ghʉ.

⁵Ghə̀ŋ be boŋsə diʼ to nə̀ nguʼsə a sə tsi. Kə le diʼi la və diʼ ə lyɨ̀ ghə̀ŋ ə bwòm ngə̀ŋ Nyìngòŋ tsu, la ghə̀ŋ ə diʼ vəpfèm ngə̀ŋ Nyìngòŋ və laynəvə, ku kəku kə kəzhwì a Nyìngòŋ a kə kʉʼʉ, chò fa a Yesò Klistò.

⁶Kə diʼ alə̀ byìʼì ando və nyòʼo li a Ŋwàʼlə̀ Nyìngòŋ la: “Ghə̀ŋ yen a! Ma ghʉ ngùʼ a ntə̀ʼ Zayòn, a diʼ ngùʼ bù ə ngə̀ŋ a mà tsuʼ li, ghə̀ kuʼmə kʉʼʉ. No ndò a ghə̀ byɨmə a wen, mu ghə̀ ko lu kiʼi kətʉ kə diʼikə.”

⁷A diʼ a ghə̀ŋ vi a ghə̀ŋ byɨmə li, ngùʼ na ghèn ə boŋ no nànto, ali a diʼ a viʼi vyi a və ko byɨmə mu: “Ngùʼ na yì a viʼi kə mbwom nə̀ ə temə maʼa kaʼkə li a ngùʼ bù ə ngə̀ŋ.”

⁸Və be ə nyòʼo a Ŋwàʼlə̀ Nyìngòŋ la: “A diʼi ngùʼ, viʼi kaŋtə tsu, a diʼ təwu, diʼ ə nè la viʼi ə foŋkə”. Viʼi ə kaŋtə tsu byìʼì ando vəwenə ko zhʉ tebè ntɨmə Nyìngòŋ, a diʼ kənyʉ̀ ki a Nyìngòŋ ə ghʉ̀ li la vəwenə nè.

⁹Alì, fa ghə̀ŋ, ghə̀ŋ diʼ viʼi a Nyìngòŋ ə tsuʼ li. Ghə̀ŋ diʼi a nə̀ vəpfèm və ngə̀ŋ Nyìngòŋ, shyèʼè a fòyn. Ghə̀ŋ diʼ viʼi və laynəvə mu Nyìngòŋ ə lyɨ̀ li ghə̀ŋ a viʼi wen ndiʼ ghə̀ŋ ə shə̀ʼtə̀ nyʉ̀ ə kaynəvə vi a ghə̀ nè. Ghə̀ dzàŋə li ə shisə ghə̀ŋ fa a ntìntìn kəbəŋ kəfenəkə ə kwensə ghə̀ŋ a ntìntìn əbayn ə kaynəghə ə wen.

¹⁰Ghə̀ŋ ko tə ndiʼ viʼi Nyìngòŋ fa ambì, ali sə diʼ luwen. Nyìngòŋ ə ko ə nkusə shinsə a ghə̀ŋ, ali sə kusə luwen.

¹¹Viʼi ndoŋsə ə mò, ghə̀ŋ diʼ viʼi ghayn chò a diʼ jì, ghə̀ŋ ko diʼ viʼi mbyi ashen. A le kənyʉ̀ ki a ma sensə ghə̀ŋ la, kə ghə̀ŋ a nè nyʉ̀ vyi a njòsə əwen ə ghə̀ŋ sə ə kəŋ byìʼì ando nyʉ̀ a venə ə soynə kəzhwì ə kəŋkə̀.

¹²Ghə̀ŋ ə ntsi ətsìnə̀sə jùŋsə ndiʼ viʼi vyi a və tsi a ghə̀ŋ a ntìntìn, a vəwenə ko kɨ Nyìngòŋ ne sə nkumə ghàm tèbe ghə̀ŋ, ali yenə nyʉ̀ ə jùŋə və vyi a ghə̀ŋ nè, a lù ndiʼ ando Nyìngòŋ ə bwenə vi a kətsi kə ə nsòʼ, vəwenə ə nkuʼsə wen.

¹³Ghə̀ŋ ə nshiʼsə təwenə təŋtə a no ndò yi a və ghʉ la ghə̀ ə nsoʼo ghə̀ŋ. Ghə̀ŋ ə nè alə̀ byìʼì ando ghə̀ŋ əfwanə Nyìngòŋ. Ghə̀ŋ be ə zhʉ fa fòyn ə ghoʼo yi a ghə̀ soʼo viʼi və tsèm,

¹⁴zhʉ no tèbe vətiʼi və ntə̀ʼ vyi a ghə̀ tsùʼtə ə ghʉ və sə soʼo, ku ngəʼ a viʼi vəŋə a və nè nyʉ̀ ə byɨvə, bwomsə viʼi a və tsi ə ntsìnə̀sə tɨməməsə.

¹⁵Ghə̀ŋ ə tsi a ji na ghèn ndiʼ kə nkoyn ə viʼi vyi a və kumə gaʼa to gaʼa be a kiʼi kənyʉ̀ ə gàʼ kumə ghə̀ŋ. Nakènkə ə diʼ kənyʉ̀ ki a Nyìngòŋ ə kəŋ.

¹⁶Ghə̀ŋ ə tsi to nə̀ viʼi vyi a və tsi to fa vəwenə a ngeŋ, ko və diʼ kəkòs a wìʼ. Alì, kə ghə̀ŋ lyɨ nakènkə chò fa yi a bàm ə nlyomtə mbyɨ a ghə̀ŋ ntsìnə̀sə. Ghə̀ŋ ə boŋsə tsi to nə̀ viʼi vyi a və shyèʼ a Nyìngòŋ.

¹⁷Ghə̀ŋ ə gumlə viʼi vətsèm no nkayn, kòŋ vəlemə vəŋə ə viʼi və byɨməvə, fwaynə Nyìngòŋ, be gumlə fòyn ghoʼo yi a ghə̀ soʼo ghə̀ŋ.

¹⁸A ghə̀ŋ a viʼi shyèʼ, ghə̀ŋ ə nzhʉ to fa vətiʼi və shyèʼ ghə̀ŋ, gumlə vəwenə to no nəmwèʼè. Kə ghə̀ŋ a gumlə to viʼi a və tuʼmə nə̀ ghə̀ŋ be bwaʼmə, ghə̀ŋ ə gumlə no tèbe viʼi a və choblə.

¹⁹Ghə̀ŋ kɨli la Nyìngòŋ ə ne saŋlə kumə wìʼ azhʉ̀ a və zəʼtə wen, ku ngəʼ a wen to kədyàŋ, ghə̀ wensə to wensə byìʼì ando ghə̀ kɨli Nyìngòŋ.

²⁰Alì, wìʼ sətsen ə ne wensə azhʉ̀ a və ghomə wen mu ghə̀ nèli byɨbsə kənyʉ̀, se yi na ndiʼ no ghò? Ghə̀ sətsen ə wensə ando ghə̀ yenə ngəʼ mu ghə̀ boŋsə nè njùŋ, Nyìngòŋ a bwàʼsə wen.

²¹A diʼ kəshi ə kəŋkə̀ ghə̀ŋ yenə ngəʼ na ghèn byìʼì ando Yesò ə yen li to ndə̀ŋndəŋ ə ngəʼ byìʼì ghə̀ŋ ə diʼ nchwi a ghə̀ŋ la ghə̀ŋ be yenə ngəʼ to nə̀ wen.

²²Və nyòʼò li a Ŋwàʼlə̀ Nyìngòŋ la, “Ghə̀ nko ne kənyʉ̀ kə kəbyɨkə kə tsen kə, ko wìʼ ə lù zhʉ la ghə̀ zhò li ndzɨŋ no fa mpfen.”

²³A ndiʼ no tèbe ando və ntelə wen, ghə̀ nko bwensə. A ndiʼ ando və kù ngəʼ a wen, ghə̀ nko ə kàyntə̀ kənyʉ̀. Ghə̀ mbòŋsə ku wen ə wen a Nyìngòŋ yi a ghə̀ soʼo a ji ə tɨmə.

²⁴Ghə̀ ə mbyèʼè li mbyɨsə vəghəŋ a wen a wèn, a kəntò. Ghə̀ ə nè alə ndiʼ vəghəŋ ə boŋsə tsi ətsìnə̀sə tɨməsə, ko mbyɨ ə be ə kiʼi to kənyʉ̀ ə ne a vəghəŋ a ntsìnə̀sə. A nè tə chʉtəshi wen la ghə̀ŋ to,

²⁵byìʼì ando ghə̀ŋ ə nkumə jèʼe to nə̀ ə byisə və njɨ̀ a sə le li jì, ali luwen sə diʼ mù Nyìngòŋ ə bwensə li lyɨ̀ ə vi nə̀ ghə̀ŋ a Ntsɨŋ byisə, à wìʼ yi a ghə̀ tsɨŋ əzhwì ə vəŋə.