Read Bafia MATYOO 10 Bible Online

MATYOO 10 - Bafia bible

MATYOO 10

¹Nni Yeesus à reŋìghà ɓɛ̀yilàg ɓii ǹtɛ̀ɗ rì ɓɛɓɛɛ̀, à fa ɓɔ ìtèɗ wu ɓɛɛ kiki lɛ, ɓɛ nanàɓ ɓìɓeɓtàg ɓi mɛghay, ɓɛ wɔɔ̀wɔ̀ɔ̀zì tìroɓ rì ɓìlɛm mɛ̀kuu mɛ̀cèm.

²Mii mɛ ɓumɓɛ à romgà ɓɛǹ ǹtɛ̀ɗ rì ɓɛɓɛɛ̀ mɛ ri lɛ: Ǹtonto, Simɔn ànɛ ɓɛɛ̀ regi lɛ Pyɛɛri rì Andire à geni; Zyag, man à Zeɓede rì geni ànɛ lɛ Zyaŋ;

³Filiɓ rì Batelemi, Tomas, rì Matyoo à ǹterì làmpoŋ̀. Zyag à man à Alfe rì Tadee

⁴Simɔn ànɛ àa ǹti à cakàg rì kìlòŋ kii, rì Zyudas Iskariyot, ŋwaànɛ à kàɓkà Yeesus.

⁵Ɓumɓɛ̀n ɓɛɛ̀ɓɛ Yeesus à romgà ɓɛ̀sɛ̀ɛ̀ ǹtɛ̀ɗ rì ɓɛɓɛɛ̀, à siitàg ɓɔ lɛ:

⁶Kɛ̀ ɓi kɛ̀n a ɓumɓɛ ɓɛ yii ɓi Bɛ̀ll, kɛ̀ ɓi ki ɗiŋi ɓi bàn yi a Samari, kɛ̀ɛna lɔŋ a ɓɔni jɔ̀ɔ̀ ɓɛ Isirayɛl ɓɛ ɓɛ ɗimgà.

⁷Kɛ̀nkɛnina di ɓi kakali ɓum bee bimiɗ lɛ, kìlɔ̀ŋ ki aɗyoo ki mɛ yù ɓɔ jàŋbog.

⁸Wɔ̀ɔ̀ziina ɓɛ̀roroɓ, ɓì ghèèghèmzì ɓìloŋ, ɓì kì lɛ ɓɛ̀kukwiy ɓɛɛ ɓa ti lɛ syeesyee ɓi nyoo yàà, ɓi ki nànaɓ ɓiɓeɓtàg ɓi mɛghày; Yɛ̀ɛ ɓì làagh ɓi itèɗ wiǹ, ghɛɓsiina girig ɓum, kɛ̀ ɓi tɔg ɓɔ com.

⁹Kɛ̀ ɓi teɗ nsoò gol, nsoò mɔ̀ɔ̀ni lɛ ɓi sɔy ɓi ɓɛ̀ɓàm;

¹⁰kɛ̀ ɓi ki teɗ nsoò ɓɛ̀ɓàm ɓɛ rikɛ̀ɛ̀, nsoò buɓi yiɓɛɛ̀, nsoò gòò, nsoò kìgeŋ, ɓisuulɛ ǹkìì-kìsay a ghɛ̀ɛ̀sɛɛ lɛ ɓɛ fa nyi ɓìɗilàg ɓii.

¹¹Ɓi bàn bimiɗ, rì ɓi kìlɔ̀ŋ ki ɓì kpaŋi wɔɔ, tɔɔghna ǹkòo ŋwaànɛ à rì lɛ à ghàɓ mìni à rì wɔɔ, kɔ̀riina yɛ̀ɛ ŋ̀waànɛ̀n à kpaŋ cààmɛ̀n ki ɓì ɓiì pɛ̀sɛɛ ɓi jàŋ inɛ̀n.

¹²I ɓì ti ɓiì ɗiŋii ɓi naa ì mum, kaliina lɛ: Fyòoog a ɓa rì mìni.

¹³I ɓumɓɛ ɓi naa ìnɛ̀n ɓɛ ghaɓi mìni, fyòoog ànɛ ɓi rìì ɗì nyi à ɓa ɓi ɓɔ, wɔ̀lɛ ì ɓɛ ghaɓi ɓi mini, fyòoog wìn a sugtìì mìni ɓi nyòò.

¹⁴I ɓɛ ɓeni mìni kì ghàɓi, nsoò lɛ ɓɛ ɓeni kì woògh ɓìɓan ɓi ɓi kpaakpàà, kpaŋina ɓi naa nsoò lɛ ɓi bàn ìnɛ ɓɛ ɓeni mìni ìnɛ̀n wɔɔ, ɓi kwiɗ kùrùɓu ànɛ mìni ɓi mɛ̀kòò.

¹⁵Ǹkalii mìni ɓi saaɗ lɛ, ŋwosi ɓɛyɔ̀m ɓumɓɛ a Sɔdɔm rì Gɔmɔɔr ɓɛ ri ɓaa gɛ tì rì ziŋ à cee ɓumɓɛ ɓi bàn ìnɛn.

¹⁶Nni mɛ̀ ǹɗomi lɔŋ mini yɛ̀ɛ ɓɔni jɔ̀ɔ̀ ɓi nyìinyìm à ɓìmonɗo, fɔɔnnɛ ɓaana rì ɗyomzɛ̀n yɛ̀ɛ nyoo, ɓì ki ɓa ri mɛ̀rem mɛ tɛ̀tɛ̀rɛ̀ɛ̀ yɛ̀ɛ ɓɛ̀kuùkuù.

¹⁷Konaaghna rì ɓum ɓisuulɛ, ɓɛ ri ɓiì kɛ̀ɛ ri mìni ɓi naa yi ɓɛyɔ̀m, ɓɛ ki ɓog mini kìtòn ɓi naa yaa yi bɔ̀ŋzɛ̀n.

¹⁸Ɓi rì ɓiì rɛlii mɛkpaà ɓi mis mɛ ɓɛ̀gɔmìnà, rì mɛ mɛfòm ɓisu wɛ̀m lɛ di ɓi ɓa ɓɛ̀tɛɛzì kiɓan kɛm̀ lɛ rì ɓi mis maa rì ɓi mis mɛ ɓɛroɓɛ ɓɛ yii ɓi Bɛ̀ll.

¹⁹Kìɓan kifog, i ɓɛ ɓani mìni, mɛ̀rem min mɛ̀ kɛɛ̀ cɛɛcɛɛ̀rɛ̀n rì com ki ɓì rì lɛ ɓì kpaa, nsoò lɛ lannɛ ɓì ɓiì pɛ̀sii ɓitòkì; ɓìɓan ɓi ɓì ghɛ̀ɛ̀sɛɛ kì kpaà ɓi ri mìni ɓiì ɓɔghìì ɓi mɛ̀rem ɓi cààmɛ̀n kɔm̀ kiǹ.

²⁰Ɓisuulɛ àa mìniì ɓɔmiɗ yɛɛ ɓiì tòtoogh, lɔŋ Nghay à Seŋi wìn nnyɛɛ ri ɓiì tòtoogh ɓi mɛ̀rem min.

²¹Ki ri ɓa lɛ, mum à tɔ̀kɛ̀n geni lɛ ɓɛɛ wey, seŋi à tɔ̀kɛ̀n man, ɓɔn ɓɛ ram wɛ̀y ri ɓɛ̀yalì ɓaa, ɓɛ ki cuusi ɓɔ.

²²Ɓum ɓɛ̀cèm ɓɛ ri ɓèèzɛn mini ɓisuu ɗii ɗyɛ̀m; wɔ̀lɛ ŋwaànɛ à sììrɛɛ à kpaŋ a rìsugtɛ̀n nnyɛɛ ɓiì ghɛɛ̀ cɛɓ.

²³I ɓɛ kii mìni ǹtɔɓ ɓi bàn ìdɛŋ, ɓì ghɛŋì ɓi bàn ìmbòg; ǹkalii mìni ɓi saaɗ lɛ, ɓyàa pumzɛn ɓi bàn yi a Isirayɛl yìcèm di Man à mum à ka yuiy ɓi.

²⁴Mutyàà cilag a cee ɓi ǹɗèsàg wìì, ǹkìì-kìsay kɛ̀ɛ ki cee masà wìì.

²⁵Kɛɛ tɔtɔg lɔŋ lɛ, n-yilàg a kpaŋ̀ ɓi ǹɗɛli wu ǹɗèsàg wìì, ǹkìì-kìsay girig, à kpaŋ ɓi nɗɛli wu masà wìì; i ɓɛ mɛ ròò ŋwaàmɛɛ ɗii lɛ: Bɛlzeɓul, ɓɛ ɓiì ròo ɓum ɓii mii mɛ mɛ ɓeɓtaagh mɛ cee fɔlɔɔ.

²⁶Kɛ̀ ɓi risi ɓɔ, ɓisuulɛ kìɓan kidɛŋ ki a rìnyam kaa rɔ̀ɓ ɓi lɛ, ki kpagii ɓi dan, nsoò dwìɗ idɛŋ yàa rɔ̀ɓ ɓi lɛ ì yilɛɛ ɓi.

²⁷Nni com ki mɛ̀ ǹkɔ̀ŋdɛɛ mìni ɓi birìm, kaliina kɔ rì ŋ̀wos, ki ǹŋwɔ̀ŋii mìni ɓi-reè, làmɓɛɛna kɔ ɓi bwèy aɗyòò.

²⁸Kɛ̀ ɓi risi ɓumɓɛ ɓɛ ri lɛ i ɓɛ woli mɛ̀mùù, ɓɛ̀ kɛɛ̀ ɓa ti ri bee ìnɛ ɓɛɛ wey ǹghay; risiina lɔŋ roànɛ à rì rì ìtèɗ wulɛ, à wey lɛ, rì mɛ̀mùù rì ǹghay ɓi ɗuu ɗi fiɗyàɓ fikɔ̀ɔ̀.

²⁹Ɓɛ ti ɓɛ̀ kɛɛ̀ kàɓ nya ɓɛ̀fyas ɓɛɓɛɛ̀rɛn ɓi dolà bog? Nni nsoò fyas bog à ti kɛ̀ɛ kpì zi di Seŋi wìn a gherɛɛ ɓi lɛ à kpi.

³⁰Nsoò tyòŋ ti mìni ɓi ǹto, ti ri tìɓàlɛn ticèm.

³¹Fɔɔnnɛ kɛ̀ ɓi risi com, lɛ rìɓa ɗi mum ǹcèm ànɛ ɓi mìni ɗi cee com ki ɓɛ̀fyas lɛɛ̀gwey ɓɛ ri lɛ ɓɛ tɔn.

³²Fɔlɔɔ nnɛ ŋwaànɛ à gherɛɛ mɛ̀ ɓi gwìy ì ɓum, mɛ̀ ngherɛɛ gɛ girig nyi ɓi mis mɛ Tààta wɛ̀m ànɛ à rì aɗyòò.

³³Kìɓan kifog ì ŋwaà roòzɛɛ mɛ̀ ɓi gwìy ì ɓum, mɛ̀ ǹɗoòzɛɛ gɛ girig nyi ɓi mis mɛ Tààta wɛ̀m ànɛ à rì aɗyòò

³⁴Kɛ̀ ɓi fèg lɛ, ǹ-yùghà lɛ ǹfa fyòoog ɓi ziinɛ; ǹ-yùghà ɓì lɛ ǹfa fyòoog, ǹ-yùghà lɔŋ lɛ, m̀ɓigtì wɛ̀y.

³⁵Lɛ ǹ-yùghà kì naŋì gasɛ̀n ɓi nyìinyìm ànɛ lɛ, rì man rì seŋi, rì ɓi yìinyìm ànɛ lɛ rì man à giɓ rì jɛɛ, rì ɓi nyìinyìm ànɛ lɛ, rì gili man rì kèegh wìì.

³⁶Ɓɛ̀bènàbena ɓɛ mum ɓɛ ɓiì ɓaà ɓum ɓɔm̀ ɓɛ ɓi naa yìì.

³⁷I ŋwaà keesii ɓi mɛ à cee lèg ànɛ à keesii lɛ rì seŋi, rì jɛɛ, à yin lɛ à ɓa mum wɛm̀. Roànɛ à ɓiì keessii dɛlì yìì nsoò lɛ gɔ̀n yìì à cee lèg ànɛ à keesii mɛ̀, à yin lɛ à ɓa mum wɛm̀.

³⁸Ŋwaànɛ à ɓèni kì tɛ̀ɛgh kɔrɔs wìì, à ki ɓèn mɛ kì nɔ̀ɔ̀tii, à yin mum wɛm̀.

³⁹Ŋwaànɛ à kàmɛɛ rì cɛɓ kii nnyɛɛ ri kɔ ɓiì mɛ̀mi, wɔ̀lɛ roànɛ à ɗimzii cɛɓ kii lɛ mɛ̀, à rì kɔ ɓiì ghɛɛ̀dii.

⁴⁰Ŋwaànɛ à ghàɓi mìni, à ghàɓi mɛ̀; i ŋwaà ki ghàɓi mɛ̀ di à ghàɓi roànɛ à romgày mɛ̀.

⁴¹I ŋwaà ghàɓi ǹkpaŋzì-ɓìɓan ɓi ɗii ɗi lɛ ǹkpaŋzì-ɓìɓan, à rì ɓiì terì mɛ̀lèɓ mɛ ɓɛ̀kpaŋzì-ɓìɓan ɓɛ ti ɓɛ tekì; nni ŋwaànɛ à ki ghàɓi ŋwaànɛ à rì lɛ saaɗ ɓi mis mɛ Bɛ̀ll, ɓisuulɛ à rì lɛ saaɗ ɓi mis mɛ Bɛ̀ll, à rì ɓiì terì mɛ̀lèɓ mɛ ɓumɓɛ ɓɛ ri lɛ saaɗ ɓi mis mɛ Bɛ̀ll ɓɛɛ̀ tekì.

⁴²Ǹkalii mìni ɓi saaɗ lɛ ŋwaànɛ à rì ɓiì faà kìbog ki ɓi ɓɔɓti ɓɛ nsoò gìras ì mɛ̀nig mɛ kèeŋkèeŋ ɓi ɗii ɗi lɛ ǹ-yilàg wɛm̀ àa mɛ̀m ɓi mɛlèɓ mii.