Read Bafia MATYOO 12 Bible Online

MATYOO 12 - Bafia bible

MATYOO 12

¹Ɓi cààmɛ̀n kiǹ, yɛ̀ɛ Yeesus à ghaghàghìyà ɓi dɛmi nyas[2] ŋwosi Saɓàt, nni zày ì kɔ̀ngà ɓɛ̀yilàg ɓii, ɓɛ tumɛ̀n rìsòsòrì ɗi nyas di ɓɛɛ̀ ɗiɗì.

²Yɛ̀ɛ Ɓɛ̀fàrìzyɛŋ ɓɛ ghɛngà fɔlɔɔ, ɓɛ kpaa Yeesus lɛ, ù ghɛɛ yɛ̀ɛ ɓɛ̀yilàg ɓɔɔ ɓɛɛ̀ kìki com ki ɓìdɔ̀gsɛna ɓis ɓi gherɛɛ ɓi lɛ mum a ki ŋwosi Saɓàt?

³Nni Yeesus à ɓàkà ɓɔ lɛ: Ɓì ɓàlà ɓi com ki Davit à kìghà di zày ì kɔ̀ni lɛ rì nyi rì ɓum ɓii?

⁴À ɗiŋìghà ɓi naà-Bɛ̀ll rì ɓum, ɓɛ ɗi bìrɛs yi ɓɛ faghà ɓisuu Bɛ̀ll, kɔm̀ lɛ ɓɛ ghɛɛ̀sɛ̀ngà ɓi ki ɗiì bìrɛs yiǹ lɛ, ɓìdɔ̀gsɛna ɓyɛɛ kpaaghi lɛ: Lɔŋ ɓɛ̀pìrɛɛtìrɛ̀ cɛ̀ncaa ɓɛɛ ghɛɛ̀sɛɛ yɔ kì ɗiì.

⁵Ǹsoò lɛ, ɓì ɓàlà ɓi ɓi ɓìdɔ̀gsɛna ɓi Moyis lɛ ŋwosi Saɓàt, ɓɛ̀pìrɛɛtìrɛ̀ ɓɛ ɓɛɛ̀ kìki kisay ɓi naà-Bɛ̀ll ɓɛ ti ɓɛ̀ kɛɛ̀ ɓèŋ kicèlì ki Saɓàt, ɓɛ̀ kɛɛ̀ ki ɓa rì bɛ̀lɛn ɓi kìɓan kiǹ?

⁶Nni mɛ̀ ǹkalii mìni lɛ, com ki ki cee naà-Bɛ̀ll, ki ri fɛ̀.

⁷I ɓyàa yii azi anɛ ɓi jɛ̀ɛ̀ ìnɛ ɓɛ kangà lɛ: Mɛ̀ ǹkeesii nɗem wu nyìighnyìg, à cee ɓìfùna ɓi ɓituwe, di ɓi yin lɛ ɓi fa ɓumɓɛ ɓɛ ri kɛ̀ɛ̀ bɛ̀lɛn, zɔɔ.

⁸Ɓisuulɛ Man à mum yɛɛ lamii Saɓàt.

⁹Yɛ̀ɛ à pɛ̀sɛ̀ngà foo, à kɛ̀n ɓi naà-bɔ̀ŋzɛ̀n ìnɛ wɔ̀ɔ̀.

¹⁰Ŋwaàdɛŋ à ɓaghà wɔɔ ri kìɓɔmà ki càg; nni ɓɛ tɔkà Yeesus lɛ: Ɓìdɔ̀gsɛna ɓis ɓi gherɛɛ nya lɛ ɓɛɛ wɔɔ̀zi mum ŋwosi Saɓàt? Ɓɛ tɔkà fɔlɔɔ lɛ, di ɓɛɛ sɔmɛn nyi.

¹¹Yeesus à ɓàg ɓɔ lɛ: Ghɛn anɛ ɓi mìni yɛɛ ri lɛ à kì lɛ, i à rì rì jɔ̀ɔ̀ yìì bog, nnɛ ì kpìi ɓi rìɓee ŋwosì Saɓàt, à rɔ̀ɓ kɛ̀ɛ ɗiŋi ɓi rìɓee ɗiǹ lɛ a sɔŋi yɔ̀?

¹²Ǹtoò mum wu kɛŋi wu cee jɔ̀ɔ̀ lɛ vɔ̀ɔ̀m; fɔɔnnɛ ɓìdɔ̀gsɛna ɓis ɓi gherɛɛ lɛ ɓɛ ri lɛ ɓɛ ki mum kìrɔɔ ŋwosi Saɓàt.

¹³Yeesus à kpaa min ŋwaànɛ à ɓaghà rì kìɓɔmà ki càg lɛ: Nàma càg. Ŋwaànɛ̀n à nàm; càg kii kiǹ ki sugtì lɛ syeesyee yɛ̀ɛ kim̀bog.

¹⁴Nni Ɓɛ̀fàrìzyɛŋ ɓɛ kpagà, ɓɛ kɛǹ dwìɗ lɛ ɓɛɛ kaà bee inɛ lɛ ɓɛɛ wey Yeesus.

¹⁵Yɛ̀ɛ Yeesus à wokà fɔlɔɔ, à pɛ̀sɛ̀n ɓi jàŋ inɛ̀n à ghaàgh. Ɓum lɛɛ̀gwey ɓɛ nɔɔ̀tì nyi, à ki wɔ̀ɔ̀zi ɓɔ ɓɛ̀sɛ̀ɛ̀ ɓɛ̀cèm.

¹⁶À rɔ̀gsɛ̀ngà ɓumɓɛ̀n lɛ, ɓɛ̀ kɛɛ̀ kì lɛ ɓum ɓɛɛ yi nyi.

¹⁷A kìghà fɔlɔɔ lɛ a roozi jɛ̀ɛ̀ ìnɛ ǹkpaŋzì-ɓìɓan Ezayii à kàngà lɛ:

¹⁸Ǹkìì-kìsay wɛm̀ ànɛ ǹɗɔ̀tɛ̀ngà innɛ̀n, nyi nnɛ ǹkeesàg, kìnyàà kɛm̀ kìcèm ki ri ɓi nyi. Ǹɗì ɓiì foŋì Nghay wɛ̀m ɓi nyi, fɔlɔɔ nnɛ à ɓiì kpaa ɓìlɔ̀ŋ saaɗ wɛ̀m.

¹⁹Àa kaa ɓi mum kìɓan, kɛ̀ɛ rɔŋ kikiŋ, mum kɛ̀ɛ ki wog jɛ̀ɛ̀ yìì ɓi kìɓàà

²⁰Àa ɓun ɓi kisyòŋ ki ki ti kì tuŋiyɛn, kɛ̀ɛ ki ɗimzi filàà fi fyɛɛ̀ ka syoosyòò, à kpaŋ yɛ̀ɛ à rì ɓiì lègsii ki kìi lɛ, saaɗ a yagsag.

²¹Fɔɔnnɛ ɓìlɔ̀ŋ ɓìcèm ɓi saghii gɛ ǹtyweeyi waa ɓi ɗii ɗìì.

²²Nni ɓɛ yughày Yeesus rì ɗyaŋɗyàŋ àdɛŋ ànɛ à ɓaghà rì kìɓeɓtàg ki nghay, àncèm tì mùm-mùm, Yeesus à ki wɔ̀ɔ̀zi nyi ɓi lèg ànɛ lɛ ŋwaànɛ̀n à kìghà lɛ, à tòòghrɛ̀n, à ki ghɛnɛn.

²³Gwìy inɛ ì ɓaghà wɔɔ ì kuughràkà lɛɛ̀gwey, ì tɔɔtɔ̀ɔ̀ghrɛ̀n lɛ: Ki rì lɛ ki ɓa lɛ à rì, Man à Davit gìn?

²⁴Yɛ̀ɛ Ɓɛ̀fàrìzyɛŋ ɓɛ wokà fɔlɔɔ, ɓɛ kpaa lɛ: Ŋwaànɛ a nànaɓ ɓiɓeɓtàg ɓi mɛghay rì ìtèɗ wu Bɛlzeɓul ànɛ à rì rìfòm ɗi ɓiɓeɓtàg ɓi mɛghay.

²⁵Yɛ̀ɛ Yeesus à yìghà lɛ fɔlɔɔ nnɛ ɓɛɛ̀ fèfèg, nni à kpaaghà ɓɔ lɛ: Kìlɔ̀ŋ kìcèm ki ɓumɓɛ miì ɓɛ ramzɛɛ wɛ̀y ɓɔ rì ɓɔ, ki ti ki lekì; bàn bimiɗ nsoò lɛ naa ì ɓum ìnɛ ɓumɓɛ miì ɓɛ ramzɛɛ wɛ̀y ɓɔ rì ɓɔ, ì yin lɛ ì kɛ̀n asu ì ghɛghɛ̀ɓ.

²⁶I Satàn a nàɓi Satàn, di à ramzɛɛ wɛ̀y ri nyimìɗ yɛɛ lɔɔ, nni lannɛ kìlɔ̀ŋ kii ki rì min ɓiì kɛ̀ɛ asu ki ɓaɓà?

²⁷I mɛ̀ɛ ǹki nànaɓ ɓiɓeɓtàg ɓi mɛghay rì ìtèɗ wu Bɛlzeɓul, ɓɔn ɓin ɓɔɔ nànaɓ ɓyɔ rì ìtèɗ wu ghɛn? Kìɓan ki kɛɛ̀ki ɓɔn ɓin ɓɛɛ ri yɔ̀mi gɛ mìni ɓɔmiɗ.

²⁸Kìɓan kìfog, i ki ri lɛ mɛ̀ɛ nànaɓ ɓiɓeɓtàg ɓi mɛghay rì Ǹghay à Bɛ̀ll, fɔlɔɔ a rèsii lɛ kìlɔ̀ŋ ki Bɛ̀ll ki mɛ kpaŋ a lɔ̀ŋkin.

²⁹Ŋwaà yin lɛ à ɗiŋì ɓi naa ì tèteɗ à mum, à sàŋ ìkum wu roànɛ̀n di ki yin lɛ, àa loogh nyi kì kàŋi bɛn, wɔ̀lɛ i à mɛ kàŋ nyi, bɛn, à rì lɛ à sàŋ ɓyom ɓi ɓi naa ì ŋwaànɛ̀n.

³⁰Ŋwaànɛ à yin ɓi gàm yɛ̀m, à rì mɛ̀ gàm-cɛcɛɗ, ŋwaànɛ à ki taŋzɛɛ ɓi nɗaŋ rì mɛ̀, a tyàatyaŋzì.

³¹Kìɓan kiǹ kɛɛ̀ki ǹkalii mìni lɛ, ɓɛ ɓiì cenɛɛ ɓum lɛ rì ɓìɓe ɓìcèm ɓi ɓɛ kiì, ɗì tìfena ti ɓɛ fengii Bɛ̀ll; kìɓan kifog, ì ɓɛ feni Ǹghay à Bɛ̀ll, ɓɛ yin lɛ ɓɛ cenɛ̀n ɓɔ kìɓan kiǹ.

³²I ŋwaà tòogh Man à mum kìɓe, ɓɛ cenɛ̀n nyi, kìɓan kifog ŋwaànɛ à ɓiì tòogh Kitɛntɛ̀ɛ̀n ki Nghay kìɓe nsoò ɓi cɛɓ ki gɛɛ̀nɛ, nsoò ɓi cɛɓ ki ki riì, ɓaa cenɛn ɓi nyi kìɓan kiǹ.

³³I ɓì kpaa lɛ kìte ki rɔɔtɛɛ, di ɓìɗùn ɓi kite kiǹ ɓi rɔɔtɛɛ; ì ɓì kpaa lɛ, ki ɓeɓtɛɛ di kìte kiǹ ki ɓeɓtaagh ɓìɗùn, lɛ ɓɛɛ̀ yilag lɛ kìte ki rɔɔtɛɛ nsoò lɛ ki ɓeɓtɛɛ, ɓi ɓìɗùn ɓi ki wumi.

³⁴Mìni ɓumɓɛ ɓì pìsɛɛ ɓìgòm ɓɛ! lannɛ ɓi rì lɛ ɓì kalì syeesyee à kìɓan, di mìniìɓɔmiɗ ɓi ɓeɓtɛɛ fɛlɛ? Lɛ ɓìɓan ɓi ɓi roni mum ǹɗem ɓyɛɛ̀ɓi ŋwɔm wu ti wu kpaaghì.

³⁵Syeesyee à mum à ti à sɔ̀ŋɗàg yì ɓɛ̀syeesyee ɓɛ ɓiɓan, ɓi buŋ yìì i ɓìɓan ɓi syeesyee; kìɓeɓtàg ki mum kɔɔ sɔŋdàg yì ɓìɓeɓtàg ɓi ɓiɓan, ɓi buŋ yìì i ɓìɓan ɓi ɓeɓtɛn.

³⁶Ǹkalii mìni lɛ: Ŋ̀wosi ɓɛyɔ̀m ɓɛ Bɛ̀ll, ɓum ɓɛ ɓiì rèsii ɓisuucɛ nnɛ ɓɛ kpaakpààghà ɓìɓan ɓi kɛ̀ɛ̀ ìsu.

³⁷Lɛ ɓìtòkì ɓyɔɔ ɓyɛɛ ri ɓiì kìi lɛ u kpaŋ ɓɛ̀yɔ̀m kɛ̀ɛ̀ bɛ̀lɛn, nsoò lɛ u kpi ɓɛ̀yɔ̀m.

³⁸Fɔɔnnɛ ɓɛ̀rèsàg-ɓìdɔ̀gsɛna ɓɛɗɛŋ rì Ɓɛ̀fàrìzyɛŋ ɓɛ pɛsìghà jɛ̀ɛ̀, ɓɛ tɔg Yeesus lɛ: Ǹɗèsàg, kɛɛ̀ kɔ̀nkɔn ɓisi lɛ, ù ki dàm, ti ghɛǹ.

³⁹Yeesus à ɓàg ɓɔ lɛ: Gbàà ì ɓum ì gɛɛ̀nɛ ìnɛ, ì rì lɛ, yɔ̀ ɓìɓeɓtàg ɓi ɓum, ì ki falɛn ɓi tìsɔ̀mɔ̀g yɛ̀ɛ tɔɔgh kìrèmzɛnà? Ɓaa rèsi ti ɓi mini kìrèmzɛnà kìdɛŋ ì ki yin lɛ kìrèmzɛnà ki ǹkpaŋzì-ɓìɓan Zyonas.

⁴⁰Ɓisuulɛ, lɔŋ yɛ̀ɛ Zyonas à lalà mɛ̀ru mɛ̀ra rì ɓɛ̀ŋwos ɓɛraa ɓi ɗùm ɗi coo kìzɛn, fɔɔnnɛ Man à mum à ɓiì ghagsii girig mɛ̀ru mɛraa rì ɓɛ̀ŋwos ɓɛraa ɓi zi ɓiɗùm.

⁴¹Ŋwosi ɓɛyɔ̀m ɓɛ Bɛ̀ll, ɓumɓɛ a Niniivɛ ɓɛ rɛlii gɛ ǹɗaŋ ri ɓɛ̀roɓɛ ɓi gbàà ì ɓum ìnɛ, ɓɛ ki fa ɓumɓɛ ɓi gbàà ìnɛ bɛ̀lɛn, lɛ ɓɔɔ lɔɔ̀ghrɛ̀ngà mɛ̀rem yɛ̀ɛ ɓɛ wokà ɓìɓan ɓi Zyonas à kpaaghà ɓɔ. Nni ŋwaànɛ à cee Zyonas yɛɛ ri lɛ fɛ.

⁴²Ŋwosi ɓɛyɔ̀m ɓɛ Bɛ̀ll, rìfòm ɗi giɓ ɗi ɓi kìlɔ̀ŋ kidɛŋ ki duŋzi, ɗi rɛlii gɛ ǹɗaŋ ri gbàà ì ɓum ìnɛ, ɗi ki fa yɔ̀ rinàn, ɓisuulɛ ɗyɔɔ pɛsɛ̀ngày fìràɓ lɛ ɗyɛɛ yu kìwoògh ɓìtòkì ɓi Salomɔŋ ɓi ɓi ɓaghà ɓì ronɛn ri ɗyomzɛ̀n, Nni ŋwaànɛ à cee Salomɔŋ yɛɛ ri lɛ fɛ.

⁴³Cààmɛ̀n ki kìɓeɓtàg ki nghay ki pɛsɛɛ ɓi mum, ki kɛǹ kì kɛ̀ɛ̀kɛɛ ɓi jaŋ yi yi ri rì kìwomi, ɓi rìkaakàà ɗi jàŋ i rìfɔɔsɛ̀n, kìɓan kìfog, kɛ̀ kɛɛ̀ ghɛn.

⁴⁴Fɔɔnnɛ ki ri min ɓiì kpaà lɛ: Ǹɗì ɓiì sugtii ɓi naa yɛ̀m ìnɛ mɛ̀ɛ m̀pɛ̀sɛɛ yì miì; yɛ̀ɛ ki sugtii ki tanɛ̀n yɔ̀ zɛy, ǹfyɔnɛn, ì ki ɓa ti ri mɛ̀rɛ̀ŋ.

⁴⁵Kìɓeɓtàg ki nghay kìn ki kɛǹ yì kì terì ɓìɓeɓtàg ɓi mɛ̀ghay ɓidɛŋ ɓi ɓi nyɛni ɓi cee kɔ taàɓɛ̀ɛ̀, ɓi ɗiŋì ɓi naa ìnɛ̀n ɓi kɔrì miì. Fɔlɔɔ nnɛ rìsyɔn ɗi ŋwaànɛ̀n ɗiǹ ɗi ri ɓiì ɓeɓtɛɛ ɗi cee rìɓa ɗii ɗi ǹtonto; com kìn kɛɛ ri ɓiì ghɛnɛɛ a ɓìɓeɓtàg ɓi ɓum ɓi ɓi gbàà ì ɓum ìnɛ.

⁴⁶Yɛ̀ɛ Yeesus à ɓaghà di a ka tòtog ri gwìy ì ɓum, nni jɛɛ wìì rì ɓɛ̀geni ɓii ɓɛ rɛlìghày ɓi dan, ɓɛ kaakàà lɛ di ɓaa tòòghrɛɛ rì nyi.

⁴⁷Fɔɔnnɛ ŋwaàdɛŋ à kpaaghà nyi lɛ: Gaa rì ɓɛ̀goni ɓɛ rì fɛnii ɓi dan ɓɛ ki kaakaa lɛ, di ɓaa tòòghrɛɛ rì wɔ̀.

⁴⁸Wɔ̀lɛ Yeesus à ɓàkà ŋwaànɛ à kpaaghà nyi ànɛ̀n fɔlɔɔ lɛ: Ghɛn yɛɛ ri jɛɛ wɛ̀m, ɓɛ̀ghɛn ɓɛɛ ri ɓɛ̀geni ɓɛ̀m?

⁴⁹Fɔɔnnɛ à nàmgà càg ɓi ɓɛ̀yilàg ɓii, à kpaa lɛ: Jɛɛ wɛ̀m rì ɓɛ̀geni ɓɛ̀m ɓɛɛ̀ɓɛ.

⁵⁰Ɓisuulɛ ŋwaànɛ à kìi rìkɔ̀n ɗi Seŋi wɛ̀m ànɛ a rì aɗyoo, nnyɛɛ ri geni wɛ̀m à baŋì, nyi geni wɛ̀m à giɓ, nyi jɛɛ wɛ̀m.