Read Bafia MATYOO 13 Bible Online

MATYOO 13 - Bafia bible

MATYOO 13

¹Ŋwos anɛ̀n, Yeesus à pɛ̀sɛ̀ngà a mɛɛ, à kɛ̀n kì kɔ̀rii ɓi bèn ì rìɓày.

²Fɔɔnnɛ ɓyoo ɓìtuu ɓi ɓum ɓi taŋzɛ̀ngà nyi a nyoo, lèg ànɛ lɛ nyii ɓɔkà kì kɔ̀rii ɓi kìkɔm, ɓumɓɛ̀n ɓɛ̀cèm ɓɛ rɛlìì ɓi bèn ì rìɓày.

³A kurɛ̀ngà rì ɓɔ lɛɛ̀gwey ɓi dàɗkì à kpaakpàà ɓɔ lɛ:

⁴Ŋwaàdɛŋ yɛɛ pɛsɛ̀ngà lɛ à kɛ̀ɛ kì mìsi boo ì ɓyom ɓi dɛm; nni yɛ̀ɛ à mìmìskà, gàɓ ì boo ìdɛŋ ì kpì ɓi bee aɗyoo, tììlì ti yu ti ɗi yɔ̀ bimiɗ.

⁵Gàɓ ìmbog ì kpì ɓi tìcɔg jàŋ inɛ zi i ɓìɓkà ɓi, ì ghàs kì ròo ɓisuulɛ zi i fɔmgà ɓi ɓi jàŋ inɛ̀n.

⁶Wɔ̀lɛ yɛ̀ɛ ŋwos à kpagày, à ɗigsì ɓyom ɓi ɓi roòghà ɓiǹ, mɛ̀ɗyèm mɛ womdàg lɛ ɓi ɓaghà ɓi ri gàŋ.

⁷Gàɓ ì boo ìmbog ì kpìghà ɓi ɓìkàrag; ɓìkàrag ɓi tɔɓ, ɓi laatàg boo ìnɛ̀n, ì wu.

⁸Fɔɔnnɛ boo ìdɛŋ ì kɛ̀ngà kì kpìi ɓi syeesyee à zi. Yɛ̀ɛ ì rɔ̀ɔ̀ghà, ì tɔɔ, ì kì lɛ, ǹɗyèm wu, wu wum ɓìɗùn mɛ̀tin mɛtaǹ, wumbog ɓìɗùn mɛ̀tin mɛraa, wudɛŋ ɓìɗùn rìtin ɗì ǹtɛ̀ɗ.

⁹Ŋwaànɛ à rì rì mɛ̀reè, à wog.

¹⁰Nni ɓɛ̀yilàg ɓɛ tyondɛ̀ngà Yeesus a nyoo ɓɛ tɔg nyi lɛ: Ɓisuucɛ nnɛ u tòtog ri ɓɔ ɓi dàɗkì?

¹¹Yeesus à ɓàg ɓɔ lɛ: Ntòtog ri ɓɔ ɓi dàɗkì lɛ mìniìɓɛ ki ri kì fayɛn lɛ ɓi yi ɓìɓan ɓi ɓi kìlɔ̀ŋ ki aɗyoo ɓi ɓi ri ɓìnyamɛn, wɔ̀lɛ ɓi ɓɛg wàa, ki yin ɓɔ kì fayɛn lɛ ɓɛɛ yi ɓìɓan ɓiǹ.

¹²Ɓisuulɛ ŋwaànɛ à rì rì ɓyom innɛ ɓɛ ɓiì fatii lɛ a ɓa rì ɓyɔ lɛɛ̀gwey, wɔ̀lɛ roànɛ à rì kɛ̀ɛ̀ com, innɛ ɓɛ ɓiì ɓàtɛɛ maa gàɓ ànɛ à rì rì nyi.

¹³Azi anɛ ǹtòtog ri ɓɔ ɓi dàɗkì innɛ̀n lɛ kɛɛ ɓa lɛ nsoò ɓaa seesèè ɓɛ̀ kɛɛ̀ ghɛn, nsoò ɓaa wowòg, ɓɛ̀ kɛɛ̀ wog, ɓɛ̀ kɛɛ̀ ki yi.

¹⁴Fɔlɔɔ a rì ɓiì roòzii kìɓan ki Ezayii à kpaŋzìghà yɛ̀ɛ à kpaaghà lɛ: Ɓì ɓiì konaagh ki ramì mɛ̀reè lɛ syeesyee lɛ ɓi wog, wɔ̀lɛ ɓyàa ki wog ɓi com, ɓì konag ki zyɛ̀ɛ̀dii mis lɛ ɓi ghɛǹ, wɔ̀lɛ ɓyàa ki ghɛn ɓi.

¹⁵Ɓisuulɛ nɗem wu ɓumɓɛ ɓi kìlɔ̀ŋ ki wu kɛsii tì ɓi, lɛ ɓɛ nkìi lɛ, ɓɛ simgì mɛ̀ree maa, ɓɛ ki ɓuusi mis maa lɛ, mis maa mɛ̀ kɛɛ̀ ghɛɛ̀di, mɛ̀reè maa mɛ̀ kɛɛ̀ ki wog ti, mɛ̀rem maa mɛ̀ kɛɛ̀ ki yi kìɓan, lɛ ɓɛ̀ kɛɛ̀ ki lɔ̀ɔ̀ghrɛn mɛrem lɛ ǹwɔɔ̀zi ɓɔ.

¹⁶Wɔ̀lɛ mìnii ri rì ɓɛ̀mààgh lɛ, mis min mɛɛ ghɛɛghɛnɛ̀n, mɛ̀reè min mɛ woòghwòòghrɛ̀n.

¹⁷Ǹkalii mìni ɓi saaɗ lɛ, ɓɛ̀kpaŋzì-ɓìɓan lɛɛ̀gwey rì ɓum ɓɛ saaɗ ɓɛ ɓaghà rì zày ìnɛ ɓɛɛ ghɛn ɓìɓan ɓi mìnii seesee ɓi, wɔ̀lɛ ɓɛ ghɛngà ɓi, ɓɔ tì rì zày ìnɛ ɓɛɛ wog ɓiɓan ɓi mìnii wowog ɓi, wɔ̀lɛ ɓɛ wokà ɓi.

¹⁸Nni wooghna min azi ànɛ ɓi dàɗkì ì m̀mìsì boo ì ɓyom.

¹⁹I ŋwaà woogh di ɓɛɛ̀ kakali kìɓan ki kilɔ̀ŋ ki aɗyòò, à rɔ̀ɓ kɛ̀ɛ yi com ki ɓɛɛ̀ kpaakpàà: Ghèghey à mum à yù kì pisii boo ìnɛ ɓaa mìsi ɓi nɗem wu ŋwaànɛ̀n; ŋwaànɛ̀n à rì fɛlɛ yɛ̀ɛ boo ìnɛ ì kpìghà ɓi bee aɗyoo.

²⁰Roànɛ à ghàɓkà boo ì ɓyom ɓi tìcɔg, nnyɛɛ rì roànɛ à ti lɛ, i à woogh jɛ̀ɛ̀ ì Bɛ̀ll, à ghàs yɔ̀ ki ghàɓi ri kìnyàà;

²¹kìɓan kìfog jɛ̀ɛ̀ yɛ̀ kɛɛ̀ ɓag gàŋ ɓi ǹɗem wìì; i à ɓèŋi yɔ̀ ɓi maa cààmɛ̀n, i mɛ̀tɔɓ rì ǹ-yeesɛ̀n ɓi ghɛnɛɛ a lɔ̀ŋkii ɓisuu jɛ̀ɛ̀ ìnɛn, lɔŋ lɛ à kɛ̀ɓtɛɛ fìɓàg.

²²Ŋwaànɛ à ghaɓkà boo ì ɓyom ɓi nyìinyìm à ɓìkàrag yɛɛ ri roànɛ à woogh jɛ̀ɛ̀ ì Bɛ̀ll, kìɓan kifog, cɛɛ̀-ǹɗem à cɛɓ ki ɓi ziinɛ, ɗì rìyɛ̀y ɗi ikum ɓi laatàg jɛ̀ɛ̀ ìnɛn, ɓi ki lɛ, yɛ̀ kɛɛ̀ wum ɓiɗùn.

²³Ŋwaànɛ à ghàɓkà boo ɓi syeesyee à zi à rì ŋwaànɛ à woogh jɛ̀ɛ̀ ì Bɛ̀ll, à ki wog com ki ì kpaa; ŋwaànɛ̀n a ti à wumgì ɓìɗùn fɛlɛ yɛ̀ɛ boo ìnɛ ì kìi lɛ ǹɗyèm wu, wu fa ɓìɗùn mɛ̀tin mɛtaǹ, wumbog ɓìɗùn mɛ̀tin mɛraa, wudɛŋ ɓìɗùn rìtin ɗì ǹtɛ̀ɗ.

²⁴Nni Yeesus à teɗtìghà ɓɔ dàɗkì ìdɛŋ à kpaa lɛ: Kìlɔ̀ŋ ki aɗyoo ki pisɛɛ rì ŋwaàdɛŋ ànɛ à mis̀kà syeesyee à boo ì ɓyom ɓi dɛm yiì.

²⁵Wɔ̀lɛ bènàbena wiì à yùghày di ɓum ɓɛ ri ɓi fìlo, à mìs kìɓeɓtàg ki caaɓi ɓi dɛm i gèŋ ìnɛ̀n, a ghaàgh.

²⁶Yɛ̀ɛ gèŋ inɛ̀n ì rɔ̀ɔ̀ghà, ì tɔɔ, ì fogì ɓìsaa, kìɓeɓtàg ki caaɓi kì roò girig.

²⁷Nni ɓɛ̀kìì-ɓìsay ɓɛ ŋwaànɛ̀n ɓɛ yughà nyi kì tɔɔ̀gh lɛ: Tààta, ɓìsiì fèki nya lɛ boo ì syeesyee yɛ̀ɛnnɛ wɔ̀ɔ m̀mìsì ɓi dɛm yɔɔ̀, nni kìɓeɓtàg ki caaɓi kɔɔ ɓaa yì fe?

²⁸Nni à ɓàkà ɓɔ lɛ: Bènàbena wɛm̀ àdɛŋ yɛɛ ǹkìi kìsay kiǹ; fɔɔnnɛ ɓɛ̀kìì-ɓìsay ɓɛ kpaaghà nyi lɛ i ki kɔni wɔ̀, ti rì lɛ ti kɛ̀n kì rùɓii kiɓeɓtàg ki caaɓi kiǹ.

²⁹Ŋwaànɛ̀n à kpaa ɓɔ lɛ: Àg, mɛ̀ ǹgherɛɛ ɓi; lɛ yɛ̀ɛ ɓì rì ɓiì rùruɓii caaɓi kiǹ, ɓì rì lɛ, ɓì rùɓ lɛ rì gèŋ miì.

³⁰Càrina lɛ rì gèŋ rì caaɓi kiǹ ɓyɛɛ tɔɔ̀ nɗaŋ, ɓi cààmɛ̀n à mɛ̀saŋ nnɛ ǹɗì ɓiì kalii ɓɛ̀kìì-ɓìsay lɛ, ɓɛɛ ka rùɓi kiɓeɓtàg ki caaɓi kiǹ, ɓɛ kagi kɔ ɓi ɓìɓiŋ lɛ ɓɛɛ tɔn, fɔɔnnɛ ɓɛ taŋzɛ̀n min gèŋ ɓi zarò yɛ̀m.

³¹Nni Yeesus à teɗtìghà ɓɔ dàɗkì ìdɛŋ à kpaa lɛ: Kìlɔ̀ŋ ki aɗyoo ki ri fɛlɛ yɛ̀ɛ zàm ì mùtarìdɛ̀ ìnɛ mum à tekà, à ɓɛ̀y ɓi dɛm yiì.

³²Zàm ìnɛ̀n yɛ̀ɛ ɓisɛɛ kì ɓaà lɛsàg ɓi boo yi ɓite yicèm, kìɓan kifog, i ì mɛ ròò ì ceeghì ɓyom ɓìcèm ɓi ɓi dɛm, ì ghay kìte ɓi lèg ànɛ lɛ tììlì ti aɗyoo tyɛɛ yuyu kì toŋtoŋi ɓilaa ɓi myaɓ mii.

³³Yeesus à teɗtì tì ɓɔ dàɗkì ìdɛŋ lɛ: Kìlɔ̀ŋ ki aɗyoo ki rì fɛlɛ yɛ̀ɛ nwìɗ ànɛ giɓ a teri, à foŋ ɓi ɓɛ̀kilò ɓɛ̀ fàriǹ ɓɛraa lɛ di fàriǹ ànɛ̀n bimiɗ a nurɛ̀n.

³⁴Yeesus à kakàlìghà gwìy ì ɓum ɓìɓan ɓiǹ ɓìcèm ɓi dàɗkì; àa ǹti kɛ̀ɛ kpaa ɓɔ kìɓan kìdɛŋ à rɔ̀ɓ lɛ à teri ɓi ɓɔ dàɗkì,

³⁵lɛ a roozi jɛ̀ɛ̀ ìnɛ ǹkpaŋzì-ɓìɓan a kpaaghà lɛ: Ǹɗì ɓiì pinii ŋwɔm ǹtòòghrɛ̀n ɓi dàɗkì, ǹki wogsi ɓɔ ɓìɓan ɓi ɓi ɓaghà a rìnyam à tumɛ̀n yɛ̀ɛ zi i kpìghà.

³⁶Yɛ̀ɛ Yeesus à càɗkà gwìy ì ɓum ìnɛ̀n, à ɗiŋì ɓi naa. Nni ɓɛ̀yilàg ɓii ɓɛ tyoŋdɛ̀ngà nyi a nyoo, ɓɛ kpaa nyi lɛ: Rèsi ɓìsi azi anɛ ɓi dàɗkì ì boo ì kìɓeɓtàg ki caaɓi ki ki ɓaghà ɓi dɛm.

³⁷Fɔɔnnɛ à ɓàkà ɓɔ lɛ: Ŋwaànɛ à mìskà syeesyee à boo yɛɛ ri Man à mum.

³⁸Ziinɛ yɛ̀ɛ ri dɛm inɛ̀n; syeesyee à boo à rì ɓumɓɛ ɓɛ wooghrɛɛ rì kìlɔ̀ŋ ki aɗyoo; boo ì kìɓeɓtàg ki caaɓi ì rì ɓɛ̀roɓɛ ɓɛ wooghrɛɛ rì Ghèghey à mum.

³⁹Bènàbena anɛ à mìskà kìɓeɓtàg ki boo yɛɛ rì Satàn; mɛ̀saŋ mɛɛ ri rìlèg ɗi zi, ɓɛ̀saŋì-mɛ̀saŋ ɓɛɛ ri ɓum ɓɛ titòm.

⁴⁰Fɛlɛ yɛ̀ɛ ɓɛ ti ɓɛ ruɓkì kìɓeɓtàg ki caaɓi lɛ ɓɛɛ pig kɔ ɓi ɗuu, fɔlɔɔ nnɛ ki ɓiì ɓaà ŋwosi rilèg ɗi zi.

⁴¹Man à mum à romigɛy ɓum ɓii ɓɛ titom lɛ ɓɛɛ pisi lɛ, rì ɓyom ɓi kɛ̀ɛkɛɓtìyɛ̀n ɓum fìɓàg, rì ɓɛ̀kìì-kìɓe ɓɛ̀cèm ɓi kìlɔ̀ŋ kii.

⁴²Ɓɛ pig lɛ, rì ɓyom ɓìn, rì ɓɛ̀kìì-kìɓe ɓɛǹ ɓi kìgɛ̀ŋ kì ɗùù; jàŋ inɛ ɓum ɓɛ rèèreedɛɛ gɛ, di ɓɛɛ̀ ŋàaŋaàdì min.

⁴³Fɔɔnnɛ ɓum ɓɛ saaɗ ɓɛ lònlomi gɛ yɛ̀ɛ kìsaa ki ŋwos, ɓi kìlɔ̀ŋ ki Seŋi wàà. Ŋwaànɛ à rì rì mɛ̀reè à wog.

⁴⁴Kìlɔ̀ŋ ki aɗyoo ki pisɛɛ tì rì ìkum wu wu ri wù nyamɛn ɓi dɛm ìdɛŋ. I ŋwaà ghɛɛ wɔ à konàg tì wɔ kì nyamì, fɔɔnnɛ à ɓiì woògh kìnyàà à kɛ̀n à kàɓkì ɓyom ɓii ɓicem, à ki làg dɛm inɛ̀n.

⁴⁵Kìlɔ̀ŋ ki aɗyoo ki pisɛɛ tì rì ǹkìì-dùne ànɛ a kaakaa ticaka ti syeesyee.

⁴⁶I à tanɛɛ fìcaka fi fi ri fì kɛŋɛn lɛɛ̀gwey, à kɛ̀n kì kàɓkii ɓyom ɓii ɓìcèm, à làg fyɔ.

⁴⁷Kìlɔ̀ŋ ki aɗyoo ki ri tì fɛlɛ yɛ̀ɛ dam ìnɛ ɓɛ piigh ɓi rìɓày, ì koŋìì ɓìzɛn mɛ̀kuu lɛ mɛ̀kuu.

⁴⁸I dam ìnɛ̀n ì mɛ ron, ɓɛ syoŋ yì yɔ̀ a cɛɗ ɓɛ kɔrì min ɓi rìɓɔ̀ngì ɗi ɓìzɛn ɓi syeesyee di ɓɛɛ foŋfoŋ ɓyɔ ɓi ɓìkàɗ, ɓɛ mag ɓi ɓeɓtakɛn.

⁴⁹Fɔlɔɔ nnɛ ki ɓaa gɛ ɓi rìlèg ɗi zi; ɓum ɓɛ titom ɓɛ yùu gɛ kì ghasii ɓìɓeɓtàg ɓi ɓum rì ɓum ɓɛ saaɗ;

⁵⁰ɓɛ pig ɓìɓeɓtàg ɓì ɓum ɓiǹ ɓi kìgɛ̀ŋ ki ɗuu jàŋ inɛ ɓɛ reèrèèdɛɛ gɛ di ɓɛɛ̀ ŋàaŋaàdì min.

⁵¹Nni Yeesus à tɔkà ɓɔ lɛ: Ɓì woogh ɓìɓan ɓiǹ ɓìcèm? Ɓɔɔ pɛɛ̀zì nyi lɛ: Ɛ̀ɛ̀ tì woogh.

⁵²Nni à kpaaghà ɓɔ lɛ: Kìɓan kiǹ kɛɛ̀ki ǹɗèsì-ɓìdɔ̀gsɛna bimiɗ ànɛ à mɛ yilag ɓiɓan ɓi ɓi kìlɔ̀ŋ ki aɗyoo, à rì fɛlɛ yɛ̀ɛ ŋwaàmɛɛ, ànɛ à ti à sɔ̀ŋɗag yì ɓɛ̀nyɔɔnyɔn ɓɛ ɓyom, rì tìɗyàɓ ti ɓyom, ɓi jàŋ inɛ ìkum wii wu ri wu nyamɛn.

⁵³Yɛ̀ɛ Yeesus à lègsìghà ɓɔ kì tekii dàɗkì yiǹ, nni à pɛ̀sɛ̀ngà wɔɔ.

⁵⁴À kɛ̀ngà ɓi kìlɔ̀ŋ kii à ki tumɛn ɓum rìrèèrèsàg ɓi naa yaa yi bɔ̀ŋzɛ̀n; rìrèsì ɗii ɗi kìghà lɛ ɓum ɓɛɛ kuùghrag, ɓɛ ki tɔɔghtɔɔ̀ghrɛ̀n lɛ: Ɗyomzɛ̀n ɗi, rì ìtèɗ wu kìkiyɛn dàm miì, ɓi riì nyi fe?

⁵⁵Àa man à kaminɗà yɛɛ ri lɛ? Jɛɛ à yin ɗii lɛ Marii? Ɓɛ̀geni mii lɛ: Zyag rì Yoosɛɓ rì Simɔn rì Zyuudɛ?

⁵⁶Ɓɛ̀geni ɓii ɓɛ ɓɛ̀yiɓ ɓɛ yin fɛ rì ɓìsi? Nni fe nnɛ nyii riì min ri ɓìɓan ɓi ɓìcèm?

⁵⁷A ɓaghà com ki kɛɛ kɛɓti ɓɔ fìɓàg; fɔɔnnɛ Yeesus à kpaaghà ɓɔ lɛ: Ɓɛɛ̀ sɛɛtag lɔŋ ǹkpaŋzì-ɓìɓan lɛ, rì ɓi kìlɔ̀ŋ kii, rì ɓi naa yìì i ɓum.

⁵⁸Yeesus à kìghà ɓi dàm wɔɔ lɛɛ̀gwey, lɛ ɓumɓɛ̀n ɓɛ ɓaghà kɛ̀ɛ̀ rìgherɛ̀n.