Read Bafia MATYOO 14 Bible Online

MATYOO 14 - Bafia bible

MATYOO 14

¹Ɓi cààmɛ̀n kiǹ, Eroodɛ ànɛ à ɓaghà gɔmìnà a Galile à wokà di ɓɛɛ ɓùŋɓuŋ Yeesus, à ki kpaa ɓɛ̀kìì-ɓìsay ɓii lɛ:

²Zyaŋ Bàɓtis yɛɛ ri, à ghèmɓɛɛ yì a nyɔ̀ɛ̀y, fɔlɔɔ nnɛ à rì miì rì ìtèɗ wu kìkiyɛn dàm.

³Lɛ Eroodɛ à reɓsìghà lɛ ɓɛɛ ɓaǹ Zyaŋ ɓɛ kaŋ̀ bɛn ri mɛ̀sɛ̀ŋi ɓɛ pìg ɓi naà-zày ɓisuu kiɓan ki Eroɗyaadɛ à gili Filiɓ à gèni wìì.

⁴Lɛ Zyaŋ à kpaakpààghà Eroodɛ lɛ: Kighɛɛ̀sɛɛ ɓi lɛ ù teɗ Eroɗyaadɛ lɛ a ɓa giɓ wɔɔ̀.

⁵Ki kɔ̀nkɔ̀ngà Eroodɛ lɛ a wey Zyaŋ kìɓan kifog à rirìsìghà gwìy ì ɓum, lɛ ɓum ɓɛ gherɛ̀ngà lɛ Zyaŋ à rì ǹkpaŋzì-ɓìɓan.

⁶Wɔ̀lɛ, ɓi kìsɔ̀g ki gòn i rìyalɛ̀n ɗi Eroodɛ, gɔ̀n ì Eroɗyaadɛ ì ɗyengà rìdɛlì ɓi mis mɛ ɓumɓɛ à reŋɗɛ̀ngà ɓi kìsɔ̀g kiǹ, ki rɔɔ Eroodɛ

⁷lèg ànɛ lɛ, à kànɛ̀ngà bɛ̀ɗ lɛ nyii ri ɓiì faà mutyàà gɔ̀n ànɛn com kìcèm ki à tɔɔgh nyì.

⁸Yɛ̀ɛ jɛɛ gɔ̀n ìnɛn à reɓsàkà yɔ̀ nnɛ ì kpaaghà Eroodɛ lɛ: Kɛɛ̀ kɔ̀nkɔn mɛ lɛ, u fa mɛ̀ ǹto wu Zyaŋ Bàɓtis lɔŋ fɛ ɓi taasà.

⁹Rìfòm ɗi wokà bim, kìɓan kifog ɗi tɔg lɛ ɓɛɛ fa gɔ̀n ìnɛn ǹto wu Zyaŋ, ɓisuulɛ ɗi ɓaghà di ɗi mɛ kànɛn bɛ̀ɗ, rì ɓisuu ɓumɓɛ ɗi reŋìghà ɓɛǹ;

¹⁰ɗi rom min lɛ, ɓɛɛ kɛǹ kì reni Zyaŋ ǹto ɓi naà-zày.

¹¹Fɔɔnnɛ ɓɛ yughày rì ǹto wu Zyaŋ ɓi taasà, ɓɛ fa rì gɔ̀n ìnɛn, yɔ̀ɔ̀ kɛ̀n kì faà rì jɛɛ.

¹²Ɓɛ̀yilàg ɓɛ Zyaŋ ɓɛ yughà kì terì kìloŋ kii, ɓɛ ɓom̀; ɓɛ ki kɛ̀n ki kpaà Yeesus ɓɔlɛ ànɛ̀n.

¹³Yɛ̀ɛ Yeesus à wokà ɓɔlɛ ànɛ̀n, à pɛ̀sɛ̀n ɓi jàŋ inɛ̀n ɓi kìkɔm, à kɛ̀n kìpàs ɓi kìlɛŋ ki jàŋ. Yɛ̀ɛ ɓum ɓɛ wokà fɔlɔɔ, ɓɛ pɛɛ̀pɛ̀sɛ̀n yì ɓi bàn, ɓɛ nɔɔ̀tàg nyi wɔɔ ri mɛ̀kòò.

¹⁴Yɛ̀ɛ à kpagày ɓi kìkɔm, à ghɛn coo gwìy ì ɓum, nyìighnyìg ì kì nyi rì ɓumɓɛ̀n, à ki wɔ̀ɔ̀zi ɓɛlɛnlɛm ɓɛ ɓɛ ɓaghà ɓi gwìy ìnɛn.

¹⁵Yɛ̀ɛ cɛŋkò ki kpagà, ɓɛ̀yilàg ɓii ɓɛ tyoŋdɛ̀n nyi a nyoo, ɓɛ kpaa nyi lɛ: Cààmɛ̀n ki mɛ cee, jàŋ inɛ ì ki ɓa kilɛŋ ki jàŋ, kali ɓumɓɛ lɛ, ɓɛɛ kɛǹ kì làagh ɓyom ɓi ɗiyɛn ɓi ɓìlɔ̀ŋ.

¹⁶Yeesus à ɓàg ɓɔ lɛ: Ki ghɛɓsii ɓì com lɛ ɓɛɛ ghaaghràg, mìniìɓɔmiɗ, faana ɓɔ ɓìɗilàg.

¹⁷Wɔ̀lɛ ɓɛ̀yilàg ɓɛ kpaa Yeesus lɛ: Tì rì lɔŋ fɛ lɛ, rì bìrɛs yitaǹ, rì ɓìzɛn ɓiɓɛɛ̀.

¹⁸Yeesus lɛ: Yùunay mɛ̀ fɛ rì ɓyom ɓìn.

¹⁹Fɔɔnnɛ à kpaaghà ɓum lɛ ɓɛɛ kɔri ɓi ɓyaaɓì; à teɗ min bìrɛs yi kitaǹ rì kìɓɛ̀ɛ̀rɛn ki ɓìzɛn, à ɓegsì mis aɗyoo, à fa Bɛ̀ll ɓìtògsɛ̀n, à ɓɛkì min bìrɛs, à fa rì ɓɛ̀yilàg, ɓɛ̀yilàg ɓɛ kaɓsì gwìy ìnɛn.

²⁰Ɓum ɓɛ̀cèm ɓɛ ɗighà, ɓɛ wuràg, nni ɓɛ̀yilàg ɓɛ ɓadàkà lɛ rì ɓìɓɛghà ɓi bìrɛs rì ɓìzɛn, ɓɛ roòzì ɓìkàɗ ǹtɛ̀ɗ rì ɓiɓɛɛ̀.

²¹Ɓumɓɛ ɓɛ ɗìghà ɓyom ɓìn ɓɛ ɓaghà nunùg ɓum ɓɛ̀tɔɔsìm ɓɛtaǹ, kɔ̀ɔ ɓày ɓɛyìɓ rì ɓɔɓtì.

²²Ajɛ̀m ìnɛn Yeesus à kìghà lɛ ɓɛ̀yilàg ɓii ɓɛɛ teɗ kìkɔm, ɓɛɛ lolog cɛcɛɗ kimbog, cààmɛ̀n ki nyiì ka gheeghesɛ̀n ɓum lɛ ɓɛɛ sukì.

²³Yɛ̀ɛ à ɓaghà di à mɛ ghesɛn ɓɔ, ɓɛ sukì nyii ɓɔg ɓi dòn aɗyoo lɛ a ɓɔŋzag wɔɔ kipàs, ìru wu fin di à rì lɔŋ wɔɔ cɛ̀ncii.

²⁴Kìkɔm ki ɓaghà di ki mɛ ràɓsɛn ri bèn ì rìɓày gàɓ, ɓikus ɓi riɓày ɓi yeèyèèsì kɔ, ɓisuulɛ bɛ̀ɓ ì susùkày ɓɔ ɓi nyòò.

²⁵Di ɓyom ɓi duri ɓi tiì, nnɛ Yeesus à yùyùghày ɓɔ a nyoo, di a kɛ̀ɛ̀kɛɛ yi ɓi rìɓày aɗyòò.

²⁶Nni yɛ̀ɛ ɓɛ ghɛngày nyi fɔlɔɔ di a kɛ̀ɛ̀kɛɛ yi ɓi mɛ̀nig, ɓɛ risì, ɓɛ tumɛ̀n rìkpaakpàà lɛ nyɔ̀ɛ̀y yɛ̀ɛ rì; ɓɛ rɔŋɗɔ̀ŋ ɓìkiŋ lɛ ìris wu ɓangà ɓɔ.

²⁷Wɔ̀lɛ Yeesus à ghàs ɓɔ kì kalii lɛ: Kɔ̀riina lɛ fyòoog, mɛ̀ yɛɛ ri, kɛ̀ ɓi risi.

²⁸Nni Pyɛɛri à ɓàkà nyi lɛ: Kan, i ki ri saaɗ lɛ, wɔ̀ yɛɛ ri, gherɛn lɛ, nkɛɛ̀ghiì ɓi mɛ̀nig, n-yu wɔ̀ a nyòò.

²⁹Yeesus à ɓàg nyi lɛ: Yuiy! Pyɛɛri à kpaŋ ɓi kìkɔm, à tumɛ̀n rìkɛ̀ɛ̀ghì ɓi mɛ̀nig lɛ a kɛǹ yɛ̀ɛ Yeesus.

³⁰Wɔ̀lɛ yɛ̀ɛ à ghɛngà lɛ bɛ̀ɓ yɛ̀ɛ fɛɛfɛɓsì rì ìtèɗ nnɛ à risìghà; yɛ̀ɛ à ghɛngà lɛ, à ti ɓiì sɛnsɛni ɓi mɛ̀nig lɛ fyɔ̀ɔ̀ɓ, à nyàm jɛ̀ɛ̀ aɗyoo lɛ: Kan, ghɛɓsi mɛ̀.

³¹Yeesus à ghàs ki nàmi càg, à ɓan nyi, à ki kpaa nyi lɛ: Wɔ̀ mum à maa rìgherɛ̀n lɛsàg ànɛ, wàa teri nyoey lɛ cɛ?

³²Fɔɔnnɛ ɓɛ ɓɔkà ɓi kìkɔm, bɛ̀ɓ ì maarɛ̀n.

³³Ɓumɓɛ ɓɛ ɓaghà ɓi kìkɔm ɓɛ ɓakà Yeesus mɛ̀ɗu asu ɓɛ kpaa nyi lɛ: Ù rì lɔŋ Man à Bɛ̀ll a tààkaà.

³⁴Fɔɔnnɛ ɓɛ ratɛ̀ngà kì syàa riɓày ɓɛ kɛǹ kì kpaŋì ɓi kìlɔ̀ŋ ki lɛ Zyenezarɛt.

³⁵Ɓum ɓɛ wɔɔ ɓɛ remìghà Yeesus, ɓɛ pɛsì ɓum, ɓɛ romgì ɓi ɓɛ̀kòdò ɓɛ wɔɔ jàŋbog, fɔɔnnɛ ɓɛ yughày nyi rì ɓɛ̀roroɓ ɓɛ wɔɔ mɛ̀kuu mɛ̀cèm.

³⁶Ɓɛ ɓɔ̀ŋzàkà nyi lɛ, a gherɛn lɛ, ɓɛɛ kom̀ nsoò rìkeɓ ɗii ɗi kilàà; nni ɓum ɓɛ̀cèm ɓɛ ɓɛ komgà rìkeɓ ɗii ɗi kilàà, ɓɛ wɔ̀ngàkà.