Read Bafia MATYOO 19 Bible Online

MATYOO 19 - Bafia bible

MATYOO 19

¹Yɛ̀ɛ Yeesus à lègsìghà ɓìtòkì ɓiǹ, nni à pɛ̀sɛ̀ngà a Galile à kɛ̀n ɓi kìden ki zi ki a Zyude ki ki ri cɛcɛɗ ki Zyuridɛŋ.

²Ɓìtuu ɓi ɓum lɛɛ̀gwɛy ɓi nɔɔ̀tìghà nyi wɔɔ, à ki wɔ̀ɔ̀zi ɓyɔ.

³Nni Ɓɛ̀fàrìzyɛŋ ɓɛ kɛngà nyi jàŋbog rì fèg ànɛ lɛ, ɓɛɛ puri nyi càg ɓi ɗùm. Fɔɔnnɛ ɓɛ tɔkà nyi lɛ: Ɓìdɔ̀gsɛna ɓis ɓi kpaa nya lɛ mum àrì lɛ à nàɓ giɓ wiì nsoò ɓi ǹtoo-kiɓan aɗi?

⁴Yeesus à ɓàg lɛ: Ɓi ka ɓalà ɓi yɛ̀ɛ ki ri kì kànɛn lɛ: A rìtumɛ̀n Ǹkìì-ɓyom ɓìcèm à kìghà lɛ rì giɓ rì baŋì,

⁵à ki kpaa lɛ: Kìɓan kiǹ kɛɛ̀ki baŋì ì rì ɓiì càriì lɛ rì seŋi rì jɛɛ, ì ràrɛ̀n ɓɛɛ giy, kìɓɛ̀ɛ̀ ki ɓum ki ghay com kìfog.

⁶Fɔlɔɔ nnɛ ɓɛ yiìdi ɓum ɓɛɓɛɛ̀, ɓɛ tì com kìfog. Mum à ghɛ̀ɛ̀sɛɛ ɓi min ki ghasii com ki Bɛ̀ll à ràri.

⁷Nni Ɓɛ̀fàrìzyɛŋ ɓɛ tɔkà Yeesus lɛ: Ɓisuucɛ nnɛ Moyis à kalìghà min lɛ, ɓɛɛ falag giɓ kaàtà à gasɛ̀n di ɓɛ ti nyi ɓiì nàɓi?

⁸Yeesus à ɓàg lɛ: Moyis à gherɛ̀ngà lɛ, ɓi naɓkag ɓɛ̀yiɓ ɓin, ɓisuulɛ ɓì tèri mɛ̀rem. Wɔ̀lɛ a rìtumɛ̀n, ki ɓaghà ɓì fɔlɔɔ.

⁹Kìɓan kifog mɛ̀ ǹkalii mìni lɛ, ŋwaànɛ à ɓiì nàɓi giɓ wiì, di ki yin lɛ giɓ anɛ̀n à kìi fìsɔ̀mɔ̀g, i à wɔɔtii giɓ adɛŋ, di à kìi fìsɔ̀mɔ̀g.

¹⁰Ɓɛ̀yilàg ɓii ɓɛ kpaa nyi lɛ: I fɔlɔɔ nnɛ rìɓa ɗi baŋì ɗi ɓɛɛ gil ɗi ri, ki ɓa min kirɔɔ lɛ, mum kɛ̀ɛ wɛy giɓ.

¹¹Yeesus à pɛ̀ɛ̀zì ɓɔ lɛ: Ɓum ɓɛ̀cèm ɓɛ yin lɛ ɓɛ wog rìkpaa ɗiǹ, i ki cee ɓi lɛ, ɓɛ̀roɓɛ ki ri kì fayɛn lɛ ɓɛɛ wog ɗyɔ.

¹²Ɓisuulɛ ɓum ɓɛdɛŋ ɓɛ ri wɔɔ, ɓɛ ri myɛg à tumɛ̀n ɓi mùm mɛ ɓɛ̀jɛɛ ɓaa, ɓɛ̀ro ɓɛdɛŋ ɓɛ ɓa lɛ ɓum ɓɛɛ kii ɓɔ fɔlɔɔ, ɓɛ̀ro ɓɛmbog, ɓɛ ghaasì ɓɔmiɗ myɛg ɓisuu kilɔ̀ŋ ki aɗyòò. Ŋwaànɛ à rì lɛ à wog, à ghɛ̀ɛ̀sɛɛ kì woògh.

¹³Nni ɓum ɓɛ yughày Yeesus rì ɓɔɓti ɓɛsàg, lɛ a saagh ɓɔ ɓyàg ɓi nyoo, à ki ɓɔŋzi Bɛ̀ll ɓisu wàà, wɔ̀lɛ ɓɛ̀yilàg ɓii ɓɛ nyɛɛdɛ̀ngà ɓumɓɛ̀n.

¹⁴Yeesus à kpaa lɛ: Càrina ɓɔɓti ɓɛsàg, kɛ̀ ɓi règ ɓɔ rìyù ɗi a lɔ̀ŋkɛm̀, ɓisuulɛ kìlɔ̀ŋ ki aɗyòò ki ri ɓisuu ɓumɓɛ ɓɛ ri yɛ̀ɛ ɓɔ.

¹⁵Fɔɔnnɛ à ɓaghà lɛ, à mɛ saaghrag ɓɔ ɓyàɓ ɓi nyoo, à pɛ̀sɛ̀n à ghaàgh.

¹⁶Ŋwaàdɛŋ yɛɛ kɛngà Yeesus a nyoo à tɔg nyi lɛ: Ǹɗèsàg! cɛ ki syeesyee kɛɛ̀ki ǹghɛ̀ɛ̀sɛɛ kì kiì ɓi ɗi lɛ mɓa rì cɛɓ ki fiɗyàɓ fikɔ̀ɔ̀?

¹⁷Yeesus à ɓàg nyi lɛ: Ɓisuucɛ nnɛ ù tɔɔgh mɛ̀ lɛ nɗeɓ wɔ̀ kìɓan ki syeesyee? Syeesyee à mum à rì lɔŋ bogtɛ̀n. Uù kɔ̀ni lɛ u ghɛǹ cɛɓ, ɓèŋa ɓìdɔ̀gsɛna; ŋwaànɛ̀n à tɔg lɛ: Ɓi be?

¹⁸Yeesus à ɓàg lɛ: Kɔ̀ɔ wey mum, kɔ̀ɔ kì fisɔ̀mɔ̀g, kɔ̀ɔ yii com ki mum, kɔ̀ɔ pwàà mum kìɓan ɓi nyoo;

¹⁹ù nyaasì soŋi ɓɛɛ̀ gaa, ù ki keesi romum ànɛ wɔ̀ jàŋbog yɛ̀ɛ wɛ̀ɛmiɗ.

²⁰Dɛlì ì mum ìnɛ̀n ì kpaa Yeesus lɛ: M̀mɛ ɓèŋ ɓidɔ̀gsɛna ɓiǹ ɓìcèm nni cɛ kidɛŋ kɛɛ̀ki ǹghɛ̀ɛ̀sɛɛ tì kì kiì?

²¹Yeesus à kpaa nyi lɛ: Uù kɔ̀ni lɛ ù ɓa syeesyee à mum lɛ kɔɔ̀kɔɔ̀, kɛ̀na, u kaɓ ɓyom ɓyɔɔ ɓìcèm u kaɓsi mɔ̀ɔ̀ni mɛ miì rì ɓɛ̀soghàsogha fɔɔnnɛ ù ɓiì ɓa rì ìkum aɗyòò. Ajɛ̀m ìnɛn u yu u nɔɔ̀ti mɛ̀.

²²Nni yɛ̀ɛ dɛlì ìnɛn ì wokà fɔlɔɔ, nni ì ghaghìghà rì bim, ɓisuulɛ ì ɓaghà rì ìkum lɛɛ̀gwey.

²³Fɔɔnnɛ Yeesus à kpaaghà ɓɛ̀yilàg ɓii lɛ: Nkalii mìni saaɗ lɛ, ki ri kìtèetèɗ ki kiɓan lɛ guŋgum a ɗiŋi ɓi kìlɔ̀ŋ ki aɗyòò.

²⁴Ǹkalii tì mìni lɛ, ki ri lɛ fɛnfɛn lɛ syàmoo a ɗiŋi ɓi ɗyas ɗi bààtà à cee lɛ guŋgum a ɗiŋi ɓi kìlɔ̀ŋ ki aɗyòò.

²⁵Yɛ̀ɛ ɓɛ̀yilàg ɓɛ wokà fɔlɔɔ, ɓɛ kuuràg lɛɛ̀gwey, ɓɛ kpaa lɛ: Ghɛn yɛɛ ri min lɛ à ghɛn cɛɓ?

²⁶Fɔɔnnɛ Yeesus à pɛɓsɛ̀ngà ɓɔ, à kpaa ɓɔ lɛ: Kìɓan kiǹ ki yin ɓi rìkì ɗi ɓum, wɔ̀lɛ ɓi ɓɛg ànɛ yɛ̀ɛ Bɛ̀ll, com ki lɛ ki yaaghrɛ̀n rìkì ki yin.

²⁷Nni Pyɛɛri à tekà jɛ̀ɛ̀ à kpaa Yeesus lɛ: Ghɛna lɛ, ɓìsii rinìghày ɓyom ɓìcèm tì nɔ̀ɔ̀tì wɔ̀, mɛ̀lèɓ mis mɛ rì ɓaa gɛ cɛ?

²⁸Yeesus à ɓàg ɓɔ lɛ: Ǹkalii mìni ɓi saaɗ lɛ, yɛɛ Man à mum à kɔ̀rii gɛ ɓi-kɔ̀ɔ̀ wii wu rilàmì wu rikem, ɓi cààmɛ̀n ki ɓyom ɓìcèm ɓi sugtii gɛ ɓɛ̀nyɔɔnyɔn ɓɛ ɓyom, mìni ɓɛ ɓì nɔ̀ɔ̀tìghà mɛ̀, ɓì kɔ̀rii gɛ girig ɓi mɛ̀kɔ̀ɔ̀ mɛ rilàmì ǹtɛ̀ɗ rì mɛɓɛɛ̀, lɛ ɓi yɔm̀ mɛ̀pwìɗ mɛ Isirayɛl ntɛ̀ɗ ɗì mɛɓɛɛ̀.

²⁹Fɔɔnnɛ mum ǹcèm ànɛ à rinìghày mɛɛ mii, nsoò lɛ ɓɛ̀geni ɓii ɓɛ ɓɛbaŋì rì ɓɛ ɓɛ̀yiɓ, nsoò seŋi, nsoò jɛɛ, nsoò giy, nsoò ɓɔn, nsoò zi yii, à rì ɓiì fɔ̀ni ɓyom ɓidɛŋ ɓi ɓi cee ɓiǹ, gɛ̀n hɔnɗɛ̀ɗ, à ki fɔ̀ɔ̀di cɛɓ ki fiɗyàɓ fikɔ̀ɔ̀.

³⁰Kìgwey kì ɓi ɓumɓɛ ɓɛ ɓaghà asu ki ɓaa gɛ ajɛ̀m; kìgwey ki ɓi ɓɛ̀roɓɛ ajɛ̀m; ki ghay ɓum ɓɛ beèbɛ̀y.