Read Bafia MATYOO 2 Bible Online

MATYOO 2 - Bafia bible

MATYOO 2

¹Yɛ̀ɛ Yeesus à yalɛ̀ngà a Bɛtilɛhɛm ɓi ziì Zyude, ɓi cààmɛ̀n ki Eroodɛ à ɓaghà rìfòm, nni ɓɛ̀yiì-ɓìɓan ɓɛ Pɛsɛ̀ngày ɓi jàŋ ìnɛ ŋ̀wos a kpagii, ɓɛ yuiy a Yorisalɛm

²ɓɛ tɔg lɛ: Rìfòm ɗi Ɓɛ̀yudɛ̀n ɗi ɗi n-yalɛɛ fɛ ɗi ri fe? Tìi ǹghɛɛ fyɛy fi man ànɛ̀n a rìkpagìì ɗi ŋwos di fyɛɛ̀ lònlòm, fɔɔnnɛ tì yùu yì fɛ lɛ, ti ɓɔgsi nyi.

³Yɛ̀ɛ rìfòm ɗi lɛ Eroodɛ ɗi wokà kìɓan kiǹ, ki ɓuùsì nyi ǹto, ki ɓuùsì girig ɓum ɓɛ̀cèm ɓɛ a Yorisalɛm.

⁴Fɔɔnnɛ à taŋzɛ̀ngà ɓɛ̀pìrɛɛtìrɛ̀ ɓɛgwey ɓɛ̀cèm rì ɓɛ̀rèsàg-ɓìdɔ̀gsɛna ɓɛ ɓi kìlɔ̀ŋ à tɔg ɓɔ jàŋ inɛ Kiris à ghɛ̀ɛ̀sɛ̀ngà kì yalɛɛ.

⁵Ɓɛ̀roɓɛ̀n ɓɛ ɓàg nyi lɛ: A Bɛtilɛhɛm ɓi ziì Zyude, lɛ ǹkpaŋzì-ɓìɓan a kàngà lɛ:

⁶Wɔ̀ Bɛtilɛhɛm, ɓi kìden ki zi ki a Zyuda, ù yin loo maa bàn à zɛy rì zɛy ɓi nyìinyìm à bàn yi a Zyuda, lɛ a lɔ̀ŋkɔɔ ìnnɛ rìfòm ɗi ɗi ɓiì kɛ̀ɛ̀sii kilɔ̀ŋ kɛm̀ ki lɛ Isirayɛl, ɗi ɓiì kpaŋìì.

⁷Fɔɔnnɛ Eroodɛ à reŋìghà min ɓɛyiì-ɓìɓan ɓɛǹ a dwìɗ, à tɔg ɓɔ lɛ ɓɛɛ konag nyi kì kpaà fin innɛ fyɛy fiǹ fi tumɛ̀ngà rìlòm.

⁸Nni à romgà min ɓɔ a Bɛtilɛhɛm, à kpaa ɓɔ lɛ: Kɛ̀ɛna kì kaà jàŋ inɛ man ànɛ̀n à rì lɛ tiɓ-tiɓ, i ɓì ghɛɛ nyi, ɓì yù mɛ̀ kì wogsii lɛ, mɛ̀ɛ ǹkɛǹ girig nyi kì ɓɔgsii.

⁹Yɛ̀ɛ ɓɛ wokà ɓìɓan ɓi rìfòm ɗi kpaaghà ɓɔ ɓìn, nni ɓɛ kɛngà, ɓɛ ki sìgmɛn lɛ, fyɛy fi ɓɛ remzìghày a rìkpagìì ɗi ŋwos, fi ti ɓɔ ɓiì syòŋsyoŋi bee, a kpaŋ yɛ̀ɛ fi kɛngà kì rɛlii ɓi jàŋ inɛ man ànɛ̀n à ɓaghà.

¹⁰Yɛ̀ɛ ɓumɓɛ̀n ɓɛ ghɛngà fyɛy fiǹ, ɓɛ wokà kìnyàà lɛɛ̀gwey.

¹¹Fɔɔnnɛ ɓɛ ɗiŋìghà ɓi naa, ɓɛ ghɛn man à m̀ɓwɛɗ rì Marii à jɛɛ, ɓɛ ɓag mɛ̀ɗu ɓi zi, ɓɛ ɓɔgsì man ànɛ̀n. Ɓɛ fumì min mɛtɛ̀g maa, ɓɛ fa nyi lɛ; rì gol rì àŋsaŋ rì miìr.

¹²Ajɛ̀m ìnɛn Bɛ̀ll à kalìghà ɓɔ a ɓìdɛ̀ndɛm̀ lɛ, ɓɛ̀ kɛɛ̀ sugti yɛ̀ɛ Eroodɛ. Fɔɔnnɛ ɓɛ sukà ɓi kìlɔ̀ŋ kaa ɓi bee ìdɛŋ.

¹³Yɛ̀ɛ ɓɛ̀yiì-ɓìɓan ɓɛ ɓaghà di ɓɛ mɛ sug, nni ŋwaà-fìtom a Kan à rèsɛ̀ngà Yoosɛɓ a ɓìdɛ̀ndɛm̀, à kpaa nyi lɛ: Pɛ̀sɛn aɗyoo, ù teɗ lɛ rì maa man ànɛ, rì jɛɛ, ù ghɛŋi rì ɓɔ a Egiɓtɛn, u ki kɔ̀ri wɔɔ, à kpaŋ yɛ̀ɛ ǹɗì wɔ̀ ɓiì kalii lɛ, u sugtiì, ɓisuulɛ Eroodɛ à ɓiì kaakaa man ànɛ, lɛ a wey.

¹⁴Nni Yoosɛɓ à pɛ̀sɛ̀ngà aɗyoo, à teɗ lɛ rì maa man ànɛ̀n rì jɛɛ, ɓɛ ghɛŋì lɔŋ ri ìru wìn a Egiɓtɛn.

¹⁵À kɔ̀rìghà wɔɔ à kpaŋ yɛ̀ɛ Eroodɛ à wughà, lɛ kɛɛ kilɛn lɔŋ yɛ̀ɛ Kan à kpaaghà ɓi ŋwɔm wu ǹkpaŋzì-ɓìɓan lɛ: Mɛ̀ɛ ǹɗegii man wɛm̀ lɛ a kpaŋdɛn a Egiɓtɛn.

¹⁶Nni yɛ̀ɛ Eroodɛ à ghɛngà lɛ, ɓɛ̀yiì-ɓìɓan ɓɛ m̀pwàa nyi, fɔɔnnɛ à wokà bim lɛɛ̀gwey, à ki rom ɓum lɛ ɓɛɛ kɛǹ kì cuusii ɓɔn ɓɛ̀cèm ɓɛ a Bɛtilɛhɛm à tumɛ̀n ɓi ɓɔn ɓɛ bèg yiɓɛɛ̀rɛn à sɛn, lɔŋ yɛ̀ɛ ɓɛ̀yiì-ɓìɓan ɓɛ reɓkà nyi, cààmɛ̀n ki fyɛy fi tumɛ̀ngà rìlòm.

¹⁷Kìɓan kiǹ kɛɛ roozìghà rìkpaa ɗi ǹkpaŋzì-ɓìɓan Zyeremii ɗi lɛ:

¹⁸Ɓɛ ǹwooghiì di ɓìkiŋ ɓi riì a Rama, rì mɛ̀kɛɛ̀gh, rì ɓìɓààsì, Rasyɛl nnyɛɛ rènɗen ɓɔn ɓii, kɛ̀ɛ gherɛn lɛ mum a fɔɔ̀si nyi ǹɗem ɓisuulɛ, ɓɔn ɓii ɓɛ mɛ cùù.

¹⁹Yɛ̀ɛ Eroodɛ à wughà, nni ŋwaà-fìtom a Kan à rèsɛ̀ngà Yoosɛɓ a ɓìdɛ̀ndɛm̀ a Egiɓtɛn;

²⁰à kpaa nyi lɛ: Pɛ̀sɛn aɗyoo, u teɗ lɛ rì man ànɛ rì jɛɛ, u sugti rì ɓɔ ɓi ziì Isirayɛl, lɛ ɓumɓɛ ɓɛ kaakàghà lɛ ɓɛɛ wey man ànɛ, ɓɛ mɛ cùù.

²¹Fɔɔnnɛ Yoosɛɓ à pɛ̀sɛ̀ngà aɗyoo, à teɗ lɛ rì man ànɛ̀n rì jɛɛ, ɓɛ sug ɓi zi ì Isirayɛl.

²²Kìɓan kifog, yɛ̀ɛ Yoosɛɓ à wokà lɛ, Arikelawus yɛɛ ǹteri ìkɔ̀ɔ̀ wu rilàmì wu seŋi ànɛ lɛ Eroodɛ ɓi ziì Zyude, nni à risìghà lɛ a kɛǹ kì kɔ̀rii wɔɔ. Bɛ̀ll à reɓ nyi a ɓìdɛ̀ndɛm̀ lɛ a kɛǹ kì kɔ̀rii a Galile.

²³Fɔɔnnɛ à kɛ̀ngà kì kɔ̀rii ɓi bàn ìdɛŋ ɗii lɛ Naazarɛt, lɛ kɛɛ kilɛn lɔŋ yɛ̀ɛ ɓɛ̀kpaŋzì-ɓìɓan ɓɛ lokà kì kalii lɛ: Ɓɛ regii gɛ nyi lɛ muu Naazarɛt.