Read Bafia MATYOO 20 Bible Online

MATYOO 20 - Bafia bible

MATYOO 20

¹Kìlɔ̀ŋ ki aɗyòò ki pisɛɛ rì ŋwaàdɛm adɛŋ, ànɛ à pongà kì kaà ɓumɓɛ ɓɛɛ kɛǹ kìsay ɓi dɛm yiì.

²Nni à wooghrɛ̀ngà jɛ̀ɛ̀ rì ɓumɓɛ à tekà ɓi kìsay lɛ, à rì ɓɔ ɓiì peeghii dolà bog ɓi bimiɗ à ŋwos. Fɔɔnnɛ à romgà min ɓɔ a dɛm yiì.

³Yɛ̀ɛ mɛ̀kɛ̀ɛ̀ taànìn à kpagà, nni à kɛ̀ɛ̀dìghà kì kaatii ɓɛ̀kìì-ɓìsay, à ghɛn ɓum ɓɛdɛŋ di ɓɛ rɛrɛrii ɓi kìɓàà, kɛ̀ɛ̀ com ki ɓɛɛ̀ kìkì.

⁴À kpaa ɓɔ lɛ: Kɛ̀ɛna kì salì ɓi dɛm yɛm̀, ǹɗi mìni ɓiì lèɓi yɛ̀ɛ ki ghɛɛ̀sɛɛ.

⁵Ɓɛ̀roɓɛ̀n ɓɛ pɛsɛ̀n ɓɛ kɛǹ ɓi dɛm. Nni ŋwaàdɛm anɛ̀n à kɛ̀ɛ̀dìghà kì kaà ɓɛ̀kìì-ɓìsay ɓi cààmɛ̀n à toroɓ, rì cààmɛ̀n à mɛ̀kɛ̀ɛ̀ mɛraa, à rom ɓɔ a dɛm yiì, à kàg lɔŋ ɓɔ mɛ̀lèɓ mɛ à kàkà ɓɛ̀ro ɓɛmbog.

⁶Di mɛ̀kɛ̀ɛ̀ mɛtaǹ à cɛŋkò à ti jàŋbog nni à kɛ̀ɛ̀dìtìghà kì kaà ɓɛ̀kìì-ɓìsay ɓɛdɛŋ, à tanɛ̀n ɓum ɓɛdɛŋ di ɓɛ rɛrɛrii girig ɓi kìɓàà, à tɔg ɓɔ lɛ: Ɓisuucɛ nnɛ ɓì ghagsii bimiɗ à ŋwos fɛ, kɛ̀ ɓi say?

⁷Ɓɛ̀roɓɛ̀n ɓɛ pɛɛ̀zì nyi lɛ: Mum àa reŋii ɓi ɓisi lɛ ti ki nyi kìsay. Fɔɔnnɛ à kpaaghà ɓɔ lɛ: Kɛ̀ɛna girig kìsalì ɓi dɛm yɛm̀.

⁸Yɛ̀ɛ cɛŋkò ki kpagà, ŋwaàdɛm a kpaa ŋwaànɛ àa m̀ɓègì ìkum wii lɛ: Regi ɓɛ̀kìì-ɓìsay ɓɛ̀cèm, u fa ɓɔ mɛ̀lèɓ maa, ù tumɛ̀n ɓi ɓɛ̀roɓɛ siitòn, ù siitɛ̀n ɓi ɓɛ̀roɓɛ ǹtonto.

⁹Fɔɔnnɛ ɓumɓɛ ɓɛ tumɛ̀ngà kìsay mɛkɛ̀ɛ̀ mɛtaǹ à cɛŋkò ɓɛ yughà, ɓɛ peeghi ɓɔ dolà, dolà.

¹⁰Yɛɛ ɓɛ̀kìì-ɓìsay ɓɛ ŋwaànɛ̀n à lokà kì terì ɓɛ yughà lɛ ɓɛɛ teɗ mɛ̀lèɓ maa, ɓɛ fekì lɛ, mɛ̀lèɓ maa mɛ ri ɓiì ceè mɛ ɓɛro ɓɛmbog; kìɓan kifog, ɓɛ falàkà lɔŋ ɓɔ dolà, dolà.

¹¹Yɛ̀ɛ ɓɛ tekàkà dolà ìnɛn, ɓɛ tumɛ̀n rìŋɔ̀ŋɔ̀ŋì ɗi ŋwaàdɛm,

¹²ɓɛ kpaa lɛ: Ɓumɓɛ ɓaa siitɛɛ yì ɓɛ, ɓɔɔ sali lɔŋ hawò bog, wɔ̀ɔ̀ ki pee ɓɔ com kìfog rì ɓìsi ɓɛ tyàa cenɛɛ lɛ, rì kìfɔli, rì rìtɔ̀n ɓi bimiɗ à ŋwos!

¹³Nni ŋwaànɛ̀n à ɓàkà kìbog ki ɓi ɓɛ̀kìì-ɓìsay ɓɛǹ lɛ: Reŋkàŋ! Ǹkìi ɓì wɔ kìɓeɓtàg ki ǹɗèm. Mɛ̀ɛ ǹti, tyàa wooghrɛɛ jɛ̀ɛ̀ lɛ ǹɗì wɔ̀ ɓiì peè dolà?

¹⁴Wɔ̀ɔ̀ tera ɓà loò mɛ̀lèɓ mɔɔ, u ghaàgh wɔ̀ com kɔɔ. Mɛ̀ yɛɛ kɔni lɛ m̀peè ǹkìì-kìsay anɛ àa siitɛɛ kì yùu lɔŋ yɛ̀ɛ m̀pee wɔ̀.

¹⁵Ki ghɛɛ̀sɛɛ ɓì nya lɛ, ǹki rì ìkum wɛ̀m yɛ̀ɛ ki kɔni mɛ̀? Gìn ki ɓeɓi wɔ̀ yɛ̀ɛ ǹɗɔɔtɛɛ nɗem?

¹⁶Fɔlɔɔ nnɛ ɓum ɓɛ siitòn ɓɛ ɓiì ɓaà ɓum ɓɛ beèbɛ̀y, ɓɛ̀roɓɛ beèbɛ̀y ɓɛ ghay ɓum ɓɛ siitòn.

¹⁷Di Yeesus à ti lɛ a ɓɔg a Yorisalɛm, à tekà ɓɛ̀yilàg ɓii ǹtɛ̀ɗ rì ɓɛɓɛɛ̀ a dwìɗ, à kpaa ɓɔ di ɓɛ ti ɓi bee lɛ:

¹⁸Tì ɓɔɔgh yɛɛ lɛ a Yorisalɛm, jàŋ inɛ ɓɛ ɓiì faà Man à mum rì ɓɛ̀pìrɛɛtìrɛ̀ ɓɛgwey rì ɓɛ̀rèsàg-ɓìdɔ̀gsɛna, ɓɛ ren lɛ, ɓɛɛ wey nyi

¹⁹ɓɛ ki rì nyi ɓiì kàɓi ri ɓumɓɛ ɓɛ yin Ɓɛ̀yudɛ̀n lɛ ɓɛɛ ki lɛ ɓɛ fengì nyi, ɓɛ ɓog nyi kìtòn, ɓɛ ki kpan nyi ɓi kɔrɔs; kìɓan kifog, à ɓiì ghèmɓɛɛ ɓi ŋwos a kìraa.

²⁰Fɔɔnnɛ jɛɛ ɓɔn ɓɛ Zeɓede à tyòŋdɛ̀ngà Yeesus a nyoo ri ɓɔn ɓii, à ɓag mɛ̀ɗu ɓi zi lɛ a tɔg nyi kìɓan.

²¹Yeesus à tɔg nyi lɛ: La yɛɛ ri? Giɓ anɛ̀n à ɓàg nyi lɛ: Gherɛn lɛ kìɓɛ̀ɛ̀ kɛm̀ ki ɓɔɓti ki kɛɛ ki lɛ roànɛ à kɔ̀rì wɔ̀ ɓi weèlem, roàmbog à kɔ̀rì wɔ̀ ɓi kìmɛŋ yɛ̀ɛ ù rì ɓiì ɓaà ɓi kìlɔ̀ŋ kɔɔ.

²²Yeesus à pɛ̀ɛ̀zì lɛ: Ɓi yii ɓi com ki ɓi tɔtɔg mɛ kìn. Ɓì rì lɛ ɓì cenɛ̀n lɛ ɓi nɔ ɓeŋ ànɛ mɛ̀ ǹɗì ɓiì nɔɔ̀? Ɓɛ̀roɓɛ̀n ɓɛ ɓaàg lɛ: Tì rì lɛ tì nɔ.

²³Nni Yeesus à ɓàkà ɓɔ lɛ: Ki ri lɔŋ saaɗ lɛ ɓì rì ɓiì nɔɔ̀ ɓeŋ wɛ̀m, kìɓan kifog àa mɛ̀ yɛɛ ghɛɛ̀sɛɛ kì kalii ghɛn yɛɛ rì mɛ̀ ɓiì kɔ̀rii ɓi weèlem nsoò lɛ ɓi kìmɛŋ; mɛ̀kɔ̀ɔ̀ mɛǹ mɛ ri mɛ̀kɔ̀ɔ̀ mɛ ɓumɓɛ Tààta à pègsɛ̀ngà mɔ ɓisu wàà.

²⁴Yɛ̀ɛ ɓɛ̀yilàg ɓɛmbog ǹtɛ̀ɗ ɓɛ wokà fɔlɔɔ, ɓɛ wog bim ri kìɓɛ̀ɛ̀ ki ɓɔn ɓɛ Zeɓede.

²⁵Nni Yeesus à reŋìghà ɓɛ̀yilàg ɓɛ̀sɛ̀ɛ̀ ɓɛ̀cèm, à kpaa ɓɔ lɛ: Ɓi yii lɛ, mɛ̀fòm mɛ ɓilɔ̀ŋ mɛ ti mɛ pyèngì ɓum mis ɗì ǹcììzɛ̀n; ɓɛ̀rɛli-asu ɓaa ɓɛ lamɓàg ɓɔ, ɓɛ ceesàg gin mɔ̀ɔ.

²⁶Ki ghɛɛ̀sɛɛ ɓi ki ɓaà fɔlɔɔ ɓi nyìinyìm wìn, kìɓan kifog, ŋwaànɛ ki kɔni lɛ a ɓa nlàmì ɓi nyìinyìm wìn, à ghɛ̀ɛ̀sɛɛ kì ɓaà ǹkìì-kìsay a ɓɛ̀ro ɓɛmbog.

²⁷Fɔɔnnɛ ŋwaànɛ ki ɓiì kɔ̀ni lɛ a ɓa mìni ǹɗɛlì ànɛ asu, à ghɛ̀ɛ̀sɛɛ kì ɓaà ǹkpàn wiǹ.

²⁸Fɔlɔɔ nnɛ Man à mum à yùghà ɓi ziinɛ, àa lɛ ɓum ɓɛɛ kiki nyi ɓìsay, à yùghà lɔŋ lɛ, a say ɓum, à ki fa cɛɓ kii lɛ, a kweɗ ɓum lɛɛ̀gwey.

²⁹Yɛɛ ɓɛ pɛsɛngày a Zyeriko, coo kìtuu ki ɓum ki nɔɔ̀tìghà Yeesus.

³⁰Nni ɓɛ̀ɗyaŋɗyàŋ ɓɛɓɛɛ̀rɛn ɓɛ ɓɛ kɔkɔ̀rìghà ɓi ŋwɔŋì wu bee, ɓɛ wokà lɛ Yeesus yɛɛ ri ɓi rìghaàgh, ɓɛ tumɛ̀n rìkpaa jɛ̀ɛ̀ aɗyòò lɛ: Wɔ̀ Man a Davit, wogha ɓà ɓisi nyiìghnyìg Kan.

³¹Gwìy ì ɓum ìnɛn ì kpɔmdɛ̀ngà ɓɔ lɛ, ɓɛɛ maàrɛn, kìɓan kifog ɓɔɔ teŋzì tì jɛ̀ɛ̀ aɗyòò ɓɛ kpaakpaa lɛ: Wɔ̀ Man à Davit wogha ɓà ɓisi nyìighnyìg Kan!

³²Fɔɔnnɛ Yeesus à rɛlìghà, à regì ɓɔ, à tɔg lɛ: Ɓì kɔ̀ngi lɛ, ǹki mìni cɛ?

³³Ɓɛ̀ɗyaŋɗyaŋ ɓɛ̀n ɓɛ kpaa nyi lɛ: Kan, ti kɔ̀ngi lɛ, ti ghɛnɛ̀n.

³⁴Nni Yeesus à wokà ɓɔ nyìighnyìg, à kòm mis maa, ɓɛ ghas kì ghɛnɛɛ, ɓɛ ki nɔ̀ɔ̀ti nyi.