Read Bafia MATYOO 22 Bible Online

MATYOO 22 - Bafia bible

MATYOO 22

¹Yeesus à tòòghrɛ̀ngà tì rì ɓɔ ɓi dàɗkì à kpaa lɛ:

²Kìlɔ̀ŋ ki aɗyòò ki pisɛɛ rì rìfòm ɗidɛŋ ɗi ɗi reŋɗɛ̀ngà kìsɛ̀nɛ̀ ɓi rìwɛy ɗi dɛlì yìì.

³Rìfòm ɗiǹ ɗi romgà ɓɛ̀kìì-ɓìsay lɛ ɓɛɛ reŋiì ɓumɓɛ à reŋìghà a kìsɛ̀nɛ̀ kiǹ, kìɓan kifog ɓɛ̀roɓɛ̀n ɓɛ kɔngà ɓi lɛ ɓɛɛ yu.

⁴Fɔɔnnɛ à romdìghà tì ɓɛ̀kìì-ɓìsay ɓɛdɛŋ à kpaa ɓɔ lɛ: Kaliina ɓumɓɛ mɛ̀ɛ nɗeŋii lɛ: M̀mɛ lamgi gɛcom; ɓɛ̀sanìnya ɓɛ̀m, rì ɓìtuwe ɓyɛm̀ ɓi fɔmɛn ɓi ti ɓì wolɛn, ɓiɓan ɓìcèm ɓi ti ɓì pègsɛn, yùuna kìsɛ̀nɛ̀.

⁵Kìɓan kifog, ɓumɓɛ à reŋɗɛ̀ngà ɓɛǹ ɓɛ sɛɛtìghà nɗeèghreŋi wii ɓɛ ghaaghràg. Roànɛ à kɛ̀n a dɛm yiì, roàmbog à kɛ̀n nyi dùne.

⁶Ɓɛ̀ro ɓɛmbog ɓɛ sɛn ɓi ɓɛ̀kìì-ɓìsay ɓɛ rifòm, ɓɛ ɓog ɓɔ, ɓɛ ki cuusi ɓɔ.

⁷Nni rìfòm ɗi wokà bim, ɗi rom ɓɛ̀sujàà ɓii ɓɛ cuusì ɓɛ̀wolì-ɓum ɓɛ̀n, ɓɛ ki ɗigsi bàn yàà.

⁸Fɔɔnnɛ rìfòm ɗi kpaaghà ɓɛ̀kìì-ɓìsay ɓii lɛ: Ɓyom ɓi kisɛ̀nɛ̀ ɓi ti ɓì pègsɛn, wɔ̀lɛ àa ɓumɓɛ mɛ̀ɛ nɗeŋii, ɓɛɛ̀ɓɛ mɛ̀ɛ ghɛ̀ɛ̀sɛɛ kì reŋii.

⁹Nni kɛ̀ɛna ɓi mɛ̀tanag mɛ ɓiɓàà, ɓi reŋiì ɓum ɓɛ̀cèm ɓɛ ɓì tanɛɛ wɔɔ, ɓɛɛ yu kìsɛ̀nɛ̀ kɛm̀.

¹⁰Fɔɔnnɛ ɓɛ̀kìì-ɓìsay ɓii ɓɛǹ, ɓɛ saàtɛ̀ngà ɓi ɓìɓàà, ɓɛ taŋzɛ̀n ɓum ɓɛ̀cèm ɓɛ ɓɛ ghɛngày, lɛ rì ɓìɓeɓtàg ɓi ɓum, rì ɓum ɓɛ syeesyee; fɔlɔɔ nnɛ ɓɛ̀kèn ɓɛ rongà ɓi naa ì kìsɛ̀nɛ̀ lɛ pisa.

¹¹Yɛ̀ɛ rìfòm ɗi ɗiŋìghày ɓi naa lɛ ɗyɛɛ ghɛǹ ɓɛ̀kèn, nni ɗi ghɛngà ŋwaàdɛŋ wɔɔ, kɛ̀ɛ̀ kìlàà ki riwɛy.

¹²Ɗi tɔg ŋwaànɛ̀n lɛ: Reŋkàŋ wɛ̀m! Lannɛ wàa kìi lɛ u ɗiŋiì fɛ, kɛ̀ɛ̀ kìlàà ki riwɛy? Ŋwaànɛ̀n à rɔ̀ɓ kɛ̀ɛ̀ com ki a kpaà.

¹³Fɔɔnnɛ rìfòm ɗi kpaaghà ɓɛ̀kìì-ɓìsay ɓii lɛ: Kàŋina mɛ̀ ŋwaànɛ lɛ, rì mɛ̀kòò rì ɓyàg, ɓi pig nyi ɓi birìm ìnɛ ɓi dan, jàŋ ìnɛ ɓum ɓɛ ri ɓiì rèereèdɛ̀n ɓɛ ŋaàŋààdì min.

¹⁴Ɓisuulɛ, ɓum lɛɛ̀gwey ɓɛ ri ɓɛ̀reŋiyɛn, kìɓan kifog, lɛsàg ɓɛɛ ri ɓɛ̀ɓɔ̀nɛn.

¹⁵Fɔɔnnɛ Ɓɛ̀fàrìzyɛŋ ɓɛ kɛngà dwìɗ lɛ ɓɛɛ ghɛǹ ìghèy wu ɓɛɛ wɔɔ̀si Yeesus ɓi ɓìɓan ɓi nyimiɗ a kalii.

¹⁶Nni ɓɛ romgà ɓum ɓɛdɛŋ ɓɛ ɓi ǹɗaŋ waa rì ɓɛ ɓi ǹɗaŋ wu Eroodɛ, lɛ ɓɛɛ kali Yeesus lɛ: Ǹɗèsàg, tì yii lɔŋ lɛ ù rì ŋwaànɛ a kpaakpaa saaɗ, à ki rèresi ɓum bee inɛ yɛ̀ɛ Bɛ̀ll lɛ tɛntɛ̀ɛ̀n kɛ̀ɛ risi bimiɗ à mum, ɓisuulɛ, ù yin ɓiì seesee riɓa ɗi mum.

¹⁷Wɔ̀ɔ̀ kali ɓà ɓisì, nkòo ɓi rìghɛn ɗyɔɔ, ɓìdɔ̀gsɛna ɓis ɓi gherɛɛ lɛ ti peeghi làmpoŋ̀ rì Kaaza?

¹⁸Wɔ̀lɛ yɛ̀ɛ Yeesus à yighà lɛ ɓɛ purii nyi càg yɛɛri ɓi ɗùm, nni à kpaaghà ɓɔ lɛ: Mìni ɓum ɓɛ fyɛɛ̀fyɛɛ̀ ɓi ŋwɔm ìghèy ɓi ɗùm ɓɛ! Ɓi fèeghfeèghrɛ̀n mɛ̀ lɛ cɛ?

¹⁹Rèsiina mɛ̀ mɔ̀ɔ̀ni mɛ ɓɛ ti ɓɛ peeghì làmpoŋ̀ miì; fɔɔnnɛ ɓɛ ceesìghà nyi mɔ̀ɔ̀ni mɛ firaŋ̀.

²⁰À tɔg ɓɔ lɛ: Kìfèèghrɛnà ki, rì ɗii ɗi, ghɛn yɛɛ ri rì ɓyɔ?

²¹Ɓɛ̀roɓɛ̀n ɓɛ ɓaàg lɛ: Kaaza yɛɛ ri rì ɓyɔ. Nni Yeesus à kpaaghà min ɓɔ lɛ: Pɛ̀ɛ̀ziina lɔŋ ɓyom ɓi Kaaza ɗì Kaaza, ɓì pɛ̀ɛ̀zì ɓi Bɛ̀ll ɗì Bɛ̀ll.

²²Yɛ̀ɛ ɓɛ wokà rìɓàg ɗiǹ, nni ɓɛ kuuràkà lɛɛ̀gwey, ɓɛ caɗ Yeesus, ɓɛ ghaaghràg.

²³Ŋwos ancèm ànɛn, Ɓɛ̀sàdùsyɛŋ ɓɛ ɓɛɛ kpaaghi lɛ, com kidɛŋ ki yin lɛ, rìghèmɓɛ̀n ɗi ɓilòŋ, ɓɛ yughày Yeesus a nyoo, ɓɛ tɔg nyi lɛ:

²⁴Nɗèsàg! Moyis à kalìghà lɛ, i ŋwaà wii, kɛ̀ɛ càɗ man, geni à baŋì à teɗ ǹkpɔɓ wii, à yay ɓɔn ɗì wɔ ɓi ɗii ɗi geni ànɛ à wii.

²⁵Wɔ̀lɛ ɓìsii ǹɗì fɛ rì ɓum ɓɛdɛŋ ɓɛ ɓɛ ǹɗì ɓi rìgeni ɗyaa, ɓɛsɛ̀ɛ̀ taàɓɛ̀ɛ̀, baŋì rì baŋì. Roànsɛ̀ɛ̀mɛn a wɔlɛ̀ngà, à ki wu; yɛ̀ɛ à ɓaghà ɓi ri man, nni à càɗkà ǹkpɔɓ wii ri geni.

²⁶Fɔɔnnɛ geni à kìɓɛ̀ɛ̀ a wughà, kɛ̀ɛ̀ man roàkìraa gìrig; à kɛ̀n kì kpaŋì ɓi roà kìtaàɓɛ̀ɛ̀.

²⁷Ajɛ̀m ì kìtaàɓɛ̀ɛ̀ ki ɓum kìn, nnɛ giɓ anɛ̀n à wughà girig.

²⁸Nni ŋwosi righèmɓɛ̀n ɗi ɓilòŋ, giɓ anɛ̀n a ɓaa gɛ gili ghɛ̀n anɛ ɓi kìtaàɓɛ̀ɛ̀ ki ɓum kìn? Yɛ̀ɛ ɓɛ̀sɛ̀ɛ̀ ɓɛ̀cèm ɓɛ ɓaghà ɓɛ̀yii ɓii?

²⁹Yeesus à ɓàg ɓɔ lɛ: Ɓi pwààrɛɛ; ɓisuulɛ ɓi kìi lɛ, kɛ̀ ɓi wog ɓiɓan ɓi ɓi ri ɓì kànɛn, kɛ̀ ɓi ki yi itèɗ wu Bɛ̀ll.

³⁰Lɛ ŋwosi righèmɓɛ̀n ɗi ɓilòŋ, ɓɛ̀baŋì ɓaa wɔɔti ɓi ɓɛ̀yiɓ, ɓɛ̀yiɓ ɓɛ̀ kɛɛ̀ ki wɔɔti ɓɛbaŋì; ɓɔɔ̀cèm ɓɛ ɓaa gɛ yɛ̀ɛ ɓum ɓɛ titom ɓɛ ɓɛ ri aɗyòò.

³¹Ɓi kìɓan ki righèmɓɛ̀n ɗi ɓiloŋ, ɓì ɓàlà ɓi kiɓan ki Bɛ̀ll à kalìghà mìni lɛ:

³²Ǹɗì Bɛ̀ll à Abiraham, Bɛ̀ll à Isag rì Bɛ̀ll à Yakɔɓ? Bɛ̀ll à yin Bɛ̀ll à ɓìloŋ à rì Bɛ̀ll à ɓumɓɛ ɓɛ rì cem.

³³Yɛ̀ɛ gwìy ì ɓum ì wòkà ɓìtòkì ɓi Yeesus ɓiǹ, rìrèsì ɗii ɗi komgà ɓɔ mɛ̀rem.

³⁴Nni Ɓɛ̀fàrìzyɛŋ ɓɛ taŋzɛ̀ngà di ɓɛ mɛ wog lɛ, Yeesus àa sìmi Ɓɛ̀sàdùsyɛŋ ŋwɔm.

³⁵Fɔɔnnɛ kìbog ki ɓi ɓɔ, ki ki ɓaghà coo ǹ-yiì ɓìdɔ̀gsɛna, ki yughà ki fèèghrɛɛ Yeesus rì ntɔɔ̀tɔɔgh lɛ:

³⁶Ǹɗèsàg, ɓi ɓìdɔ̀gsɛna ɓì Bɛ̀ll ɓìcèm, kibe kɛɛ cee?

³⁷Yeesus à ɓàg nyi lɛ: Kìdɔ̀gsɛna ki kɛɛ kalag lɛ: Keesi Kan Bɛ̀ll wɔ̀ɔ̀, rì ǹɗem wɔɔ wucèm, rì ǹghay wɔɔ wucèm, rì mɛ̀yitì mɔɔ mɛcèm.

³⁸Kɛɛ ri kìdɔ̀gsɛna ki asu, ki ki cee ɓìdɔ̀gsɛna ɓimbog ɓìcèm.

³⁹Ki kiɓɛ̀ɛ̀ ki ki pisɛɛ kiǹ ki ri lɛ: Keesi romum ànɛ wɔ̀ jàŋbog yɛ̀ɛ wɛ̀ɛmiɗ.

⁴⁰Ɓi kìɓɛ̀ɛ̀ ki ɓidɔ̀gsɛna kiǹ, nnɛ rìrèsàg ɗi Moyis ɗìcèm, rì mɛ ɓɛkpaŋzì-ɓìɓan, mɛ sasaghii.

⁴¹Yɛ̀ɛ Ɓɛ̀fàrìzyɛŋ ɓɛ ɓaghà ɓɛ̀taŋzɛn, Yeesus à tɔkà ɓɔ ǹtɔɔ̀tɔɔgh lɛ:

⁴²Mìnii kpaaghi la ɓi kìɓan ki Kiris? À rì man à ghɛn? Ɓɛ ɓakà nyi lɛ: À rì man à Davit.

⁴³Fɔɔnnɛ Yeesus à kpaaghà ɓɔ lɛ: Nni lannɛ Davit à reŋìghà nyi lɛ Kan, di Ǹghay à Bɛ̀ll à faa nyi ɗyomzɛ̀n, yɛ̀ɛ à kpaaghà lɛ:

⁴⁴Kan àa ǹkpaa Kan wɛ̀m lɛ: Kɔ̀ri mɛ̀ fɛ ɓi weèlem, à kpaŋ yɛ̀ɛ ǹɗì ɓiì foŋì ɓɛ̀bènàbena ɓɔɔ a mɛ̀kòò mɔɔ zi.

⁴⁵Nni i Davit à mɛ regi nyi lɛ Kan, lannɛ à rì lɛ à ɓa tì man à Davit?

⁴⁶Ŋwaànɛ à ɓaghà lɛ à ɓàg nyi ntɔɔ̀tɔɔgh wiǹ à ɓaghà ɓi. Fɔlɔɔ nnɛ à tumɛ̀n ɓi ŋwos anɛ̀n ŋwaàdɛŋ à ghɛɛsìghà tì ɓi lɛ a tɔg nyi ǹtɔɔ̀tɔɔgh.