Read Bafia MATYOO 23 Bible Online

MATYOO 23 - Bafia bible

MATYOO 23

¹Fɔɔnnɛ Yeesus à kalìghà gwìy ì ɓum rì ɓɛ̀yilàg ɓii lɛ:

²Ɓɛ̀rèsàg-ɓìdɔ̀gsɛna ri Ɓɛ̀fàrìzyɛŋ, ɓɛ ri ri ǹtɛ̀g wulɛ, ɓɛɛ resag ɓum ɓìdɔ̀gsɛna ɓi Moyis.

³Fɔɔnnɛ ɓì ghɛ̀ɛ̀sɛɛ lɛ, ɓì wog, ɓì ki ɓèŋ ɓiɓan ɓìcèm ɓi ɓɛ kpaa mìni; kìɓan kifog, kɛ̀ ɓi nɔ̀ɔ̀ti mɛkìkìì maa, ɓisuulɛ, ɓɔɔ̀ kakali ri ŋwɔm, ɓɛ̀ kɛɛ̀ kì com ki ɓɛɛ̀ kpaakpàà.

⁴Ɓɛ ti ɓɛ kagì ɓìrìirìɗ ɓi mɛtɛ̀g di ɓɛɛ̀ tɛ̀ɛghtɛgsì ɓumkifog, ɓɔmiɗ ɓɛ̀ kɛɛ̀ gherɛn lɛ di ɓaa nyɛ̀ŋi mɛ̀tɛ̀g mɛǹ nsoò rì man à càg.

⁵Ɓìɓan ɓìcèm ɓi ɓɛɛ̀ kìkì ɓi ri lɔŋ lɛ ɓum ɓɛɛ ghɛn bɔ; ɓɛ ti ɓɛ sinàg ɓɛ̀kànɗa ɓɛ pògpòg ɓi mɛ̀to rì ɓi ɓyàg, ɓɛ ki ràɓsag mɛkeɓ maa mɛ ɓìlàà.

⁶Ɓɛ ti ɓɛ keesàg mɛ̀kɔ̀ɔ̀ mɛ asu, di ɓɛ kɛɛ kìsɛ̀nɛ̀, ɓi naa yi bɔ̀ŋzɛ̀n, ɓɛ kɔràg ɓi mɛ̀kɔ̀ɔ̀ mɛ ǹtonto.

⁷Ki kɔngì girig ɓɔ lɛ, ɓɛɛ toòtògsì ɓɔ rì coo nyaasɛ̀n ɓi gwìy, ɓɛ ki rereŋi ɓɔ lɛ: Ɓɛ̀rèsàg.

⁸Wɔ̀lɛ mìnii ghɛɛ̀sɛɛ ɓi ki gherɛɛ lɛ, ɓɛɛ rereŋi mìni lɛ ɓɛ̀rèsàg ɓisuulɛ, ɓì rì lɔŋ ri ǹɗèsàg bog, miniìcèm ɓì ki ɓa ti ɓi rìgeni.

⁹Kɛ̀ ɓi reŋi ŋwaàdɛŋ fɛ ɓi ziinɛ lɛ tààta wìn, ɓisuulɛ, ɓì rì lɔŋ Seŋi bog lɛ roànɛ à rì aɗyòò.

¹⁰Kɛ̀ ɓi ki gherɛn lɛ, ɓɛɛ reŋi mìni lɛ, ɓɛ̀kɛ̀ɛ̀sì ɓisuulɛ ɓì rì lɔŋ ri ǹkɛ̀ɛ̀sì wìn bog nnyɛɛ ri lɛ Kiris.

¹¹Ŋwaànɛ à rì ɓiì ɓaà ǹɗɛlì-asù ɓi nɗaŋ win, a ghɛ̀ɛ̀sɛɛ kì ɓaà ǹkìì-kìsay wiǹ.

¹²Mum ǹcèm ànɛ à rì ɓiì ɓɔgsii nyimiɗ, ɓɛ ri nyi ɓiì sɛɛ̀dii; roànɛ à sɛɛ̀dii nyimiɗ ɓi zi, ɓɛ ɓɔgsì nyi.

¹³Nyìighnyìg rì mìni ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ ɓì rì lɛ, fyɛɛ̀fyɛɛ̀ ɓì ŋwɔm ìghèy ɓi ɗùm, ɓisuulɛ ɓi ghegheg ɓum lɛ ɓɛ̀ kɛɛ ɗiŋi ɓi kìlɔ̀ŋ ki aɗyòò; mìniìɓɔmiɗ kɛ̀ ɓi ɗiŋi miì, kɛ̀ ɓi ki gherɛn lɛ, ɓumɓɛ ɓɛɛ̀ kɔ̀nkɔn lɛ ɓɛɛ ɗiŋi miì, ɓɛɛ ɗiŋì. [

¹⁴Nyìighnyìg rì mìni Ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ ɓì rì lɛ fyɛɛ̀fyɛɛ̀ ɓi ŋwɔm ìghèy ɓi ɗùm ɓisuulɛ ɓi pùupumzì mɛɛ mɛ mɛkpɔɓ, ɓì kìkì ɓyoo bɔ̀ŋzɛ̀n lɛ ɓum ɓɛɛ feki lɛ, ɓì rì ɓɛsyeesyee ɓɛ ɓum; kìɓan kiǹ kɛɛ̀ki ɓì rì ɓiì terì ɓìtèetèɗ ɓi deɓ.]

¹⁵Nyìighnyìg rì mìni ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ ɓì rì lɛ, fyɛɛ̀fyɛɛ̀ ɓi ŋwɔm ìghèy ɓi ɗùm, ɓisuulɛ ɓi rereni jàŋ lɛ, ri ɓi rìɓày rì ɓi zi ì zɛy lɛ ɓi syoŋ mum ànɛ ɗiŋi ɓi nɗaŋ win nsoò bogtɛ̀n. Nni yɛ̀ɛ ɓi ki syòŋi mum lɔɔ, ɓì kì lɛ ŋwaànɛ̀n a ɓa ŋwaànɛ à ghɛ̀ɛ̀sɛɛ rì ɗuu ɗi fiɗyàɓ fikɔ̀ɔ̀, à cee mìni ɓi kìɓeɓtàg ki ǹɗem.

¹⁶Nyìighnyìg rì mìni ɓumɓɛ ɓì rì lɛ: mìni rì tìɗyaŋ, ɓi ki kɛ̀ɛkɛɛ̀sì ɓɛ̀ro ɓum. Ɓì ti ɓì kpaaghì lɛ: I ŋwaà kànɛɛ bɛ̀ɗ ri naà-Bɛ̀ll, di à kìi ɓi com, wɔ̀lɛ i ŋwaà kànɛɛ bɛ̀ɗ ri gol ìnɛ ɓi naà-Bɛ̀ll, fɔlɔɔ a rèsì lɛ, à rì ǹsììrɛn ɗi kìɓan ki à kànɛɛ bɛ̀ɗ miì.

¹⁷Mìni ɓumɓɛ ɓì rì lɛ: mìni lɛ dùŋdùŋ, ɓì ki ɓa ti rì tìɗyaŋ, rì gol rì naà-Bɛ̀ll ìnɛ yɛ̀ɛ kìkì lɛ gol yɛ̀ɛ ɓa kìcèlì, cɛ kɛɛ cee kimbog?

¹⁸Ɓì ti ɓì kalàg tì lɛ, i ŋwaà kànɛɛ bɛ̀ɗ ɗi rìkùna, di à kìi ɓì com; kìɓan kifog, i ŋwaà kànɛɛ bɛ̀ɗ ri kìtuwe ki ɓɛ saghii ɓi rìkùna di à rì ǹsììrɛn ɓi kìɓan ki à kpaa.

¹⁹Mìni ɓɛ̀ɗyaŋɗyàŋ ɓɛ! Rì com ki ŋwaà faa ɓi rìɓɔgsì ɗi Bɛ̀ll, rì rìkùna ɗi ɗyɛɛ̀ kìki lɛ com kiŋcèm kɛɛ ɓa kìcèlì, cɛ kɛɛ cee kimbog?

²⁰I ŋwaà kànɛɛ bɛ̀ɗ ɗì rìkùna, di à kànɛɛ bɛ̀ɗ yɛɛ lɔɔ lɛ, ɗì rìkùna ɗyɔmiɗ, rì com kìcèm ki ki sasaghii miì aɗyòò.

²¹Ŋwaànɛ à kànɛɛ bɛ̀ɗ rì naà-Bɛ̀ll, di à kìi lɛ, à kànɛ̀n bɛ̀ɗ rì naà-Bɛ̀ll yɔ̀miɗ, à ki kànɛn ɗi roànɛ à kɔ̀kɔrii ɓi naà-Bɛ̀ll.

²²Nni Ŋwaànɛ à kànɛɛ bɛ̀ɗ ɗi ɗyoo, à kìi lɛ, à kànɛ̀n bɛ̀ɗ rì ìkɔ̀ɔ̀ wu rilàmì wu Bɛ̀ll, à ki kànɛn ti rì roànɛ à kɔ̀kɔrii ɓi-kɔ̀ɔ̀ wiǹ.

²³Nyìighnyìg rì mìni ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ ɓì rì lɛ, fyɛɛ̀fyɛɛ̀ ɓi ŋwɔm ìghèy ɓi ɗùm, ɓisuulɛ ɓì ti ɓì falàg gàɓ ì kìntɛ̀ɗ ìnɛ ɓi ɓyom ɓi ɓi dɛm fɛlɛ yɛ̀ɛ kìzòò rì bààzì, rì gèg, ɓì sɛɛtì ɓɛ̀lem ɓɛ ɓiɓan ɓɛ ɓi ɓìdɔ̀gsɛna ɓɛ ɓɛ ri lɛ: rì saaɗ, rì nɗem wu nyìighnyìg, ɗì rìroòzì ɗi mɛkàg, kɔm̀ lɛ, ɓìɓan ɓìǹ ɓyɛɛ̀ɓi mum à ghɛ̀ɛ̀sɛɛ kì kìi, kɛ̀ɛ ki sɛɛti ɓimbog.

²⁴Mìni ɓɛ ɓì rì lɛ, mìni rì tìɗyaŋ, ɓì ki kɛ̀ɛkɛɛ̀sì ɓɛ̀ro ɓum, ɓì ti ɓì cakì mɛ̀rɔ̀g min lɛ ɓi pisi fìnyuŋnyuŋ fi fi ri miì lɛ kɛ̀ ɓi mìn fyɔ, wɔ̀lɛ ɓi ghaàgh fɛ, ɓì mìn syam à bimiɗ.

²⁵Nyìighnyìg rì mìni ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ ɓì rì lɛ, fyɛɛ̀fyɛɛ̀ ɓi ŋwɔm, ìghèy ɓì ɗùm, ɓisuulɛ ɓi sòòsoo lɛ, rì jɛ̀m ì ɓɛ̀ɓeŋ rì jɛ̀m ì ɓɛ̀taasà, kɔm̀ lɛ ɓyom ɓìn ɓi ri ɓì rònɛn ɓi ɗùm lɛ, rì wii, rì kìnɔli ki ɓiɓeɓtàg ɓi ɓiɓan.

²⁶Wɔ̀ Fàrìzyɛŋ ànɛ à rì rì tìɗyaŋ! ka logha kì sòo ɗùm ɗi ɓèŋ, rì ɗùm ɗi taasà, di fɔɔnnɛ jɛ̀m yɛ̀ɛ ɓa girig ǹtɛnɛn.

²⁷Nyìighnyìg rì mìni ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ ɓì rì lɛ, fyɛɛ̀fyɛɛ̀ ɓi ŋwɔm, ìghèy ɓi ɗùm! Lɛ ɓì rì yɛ̀ɛ zɔ̀ŋ yi yi ri yì puɓsiyɛn, yi rɔɔtàg ɓi dan, kɔm̀ lɛ, yì ri yi ronɛn ɓi ɗùm lɛ, rì ɓìwoɓ ɓi ɓilòŋ, rì tìfin mɛ̀kuu mɛ̀kuu.

²⁸Fɔlɔɔ nnɛ mìnii ri girig ɓɛ̀syeesyee ɓɛ ɓum ɓi rìseèsèèrɛ̀n kìɓan kifog wɔɔ ɓi ɗùm, ɓì rì ɓɛ̀ ronɛn lɛ, rì mɛ̀ghèy rì kìtɛ̀ŋtɛ̀ŋ.

²⁹Nyìighnyìg rì mìni ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ ɓì rì lɛ, fyɛɛ̀fyɛɛ̀ ɓì ŋwɔm ìghèy ɓi ɗùm, ɓisuulɛ ɓi kìki ɓisyeesyee ɓi zɔ̀ŋ ɓisuu ɓɛ̀kpaŋzì-ɓìɓan, ɓì ki rɛ̀ŋɗɛŋ zɔ̀ŋ yi ɓumɓɛ ɓɛ ghɛghɛ̀ɓkà ɓi saaɗ,

³⁰ɓì ki kakali lɛ: I tì ɓa ɓi mɛ̀ru mɛ ɓɛ̀seŋi ɓis ɓɛ ɓɛ sɛ̀ɛ̀mɛn ɓɛ ghɛghɛ̀ɓkà miì, di tì ɗiŋìghà ɓi dàŋ rì ɓɔ, lɛ ti yogsi bwaɓ yi ɓɛkpaŋzì-ɓìɓan.

³¹Fɔlɔɔ a rèsii lɛ: mìniìɓɔmiɗ ɓì yii lɛ, ɓì rì ɓɔn ɓɛ ɓumɓɛ ɓɛ wowòlà ɓɛ̀kpaŋzì-ɓìɓan.

³²Nni kɛ̀ɛna min asu, ɓi wɔmɓɛn kìsay ki ɓɛ̀seŋi ɓin ɓɛ ghɛlɛ̀ngà.

³³Nyoo yi lɛ mìni, ɓìgòm ɓi lɛ mìni ɓì! lannɛ ɓì ɓiì kìi lɛ ɓi ghɛ̀ɓ rìkɛ̀n ɗi ɓi ɗuu ɗi fìɗyàɓ fikɔ̀ɔ̀?

³⁴Kìɓan kiǹ kɛɛ̀ki ǹɗì mìni ɓiì romiì lɛ: rì ɓɛ̀kpaŋzì-ɓìɓan, rì ɓum ɓɛ ɗyomzɛ̀n, rì ɓɛ̀yiì-ɓìɓan; ɓì ɓiì kìi lɛ: ɓì wey ɓɛ̀roɓɛ, ɓì ghɛ̀rì ɓɔ ɓi ɓɛ̀kɔrɔs, ɓi ɓog ɓɛ̀ro ɓɛmbog ɓi kìtòn ɓi naa yin yi bɔ̀ŋzɛ̀n, ɓì ki kìki ti ɓɛ̀ro ɓɛmbog ǹtɔɓ lɛ i ɓì pɛ̀sɛɛ ɓi bàn ìnɛ, ɓì cee ɓi ìmbog.

³⁵Lɛ di bwaɓ yi ɓum ɓɛ̀cèm ɓɛ ɓaà wowèy fɛ ɓi ziinɛ, kɛ̀ɛ̀ kìɓan ki ɓɛ kiì, yɛɛ kɛǹ mìni ɓi ǹto; à tumɛ̀n ɓi bwaɓ yi Aɓɛl ànɛ à ɓaghà saaɗ à mum à kpaŋ ɓi bwaɓ yi Zakarii ànɛ à ɓaghà man à Berekya, innɛ ɓì wolà ɓi nyìinyìm ànɛ lɛ, rì naà-Bɛ̀ll, rì rìkùna.

³⁶Ǹkalii mìni ɓi saaɗ lɛ, ɓìɓan ɓin ɓiǹ ɓìcèm, ɓi ri siŋ ri ɓumɓɛ ɓi gbàà ìnɛ.

³⁷Yorisalɛm! Yorisalɛm! wàànɛ u kìki lɛ: Ù cuùcùùsì ɓɛ̀kpaŋzì-ɓìɓan, ù ki roorogì ɓumɓɛ ɓɛ romiì a lɔ̀ŋkɔɔ gɔ̀g, m̀mɛ kaa bee inɛ ǹtaŋzɛn ɓɔn ɓɔɔ, fɛlɛ yɛ̀ɛ jɛɛ à zag a taŋzag ɓɔn a mɛ̀keɓ mii-zi, bɔ̀ɓ, lɛ bɔ̀ɓ wɔ̀lɛ kɛ̀ kɛɛ̀ kɔ̀n mini fɔlɔɔ.

³⁸Nni yiina lɛ, ɓɛ ri ɓiì rinii mɛɛ min zɛy kɛ̀ɛ̀ com.

³⁹Nni ǹkalii mìni lɛ: ɓyàa ghɛɛ̀di ɓi mɛ nsoò ŋwos bog, à kpaŋ yɛ̀ɛ ɓì ɓiì kalii lɛ: Rìkem ɗyɛɛ ɓa rì roànɛ à yùu yì ɓi ɗii ɗi Kan.