Read Bafia MATYOO 24 Bible Online

MATYOO 24 - Bafia bible

MATYOO 24

¹Yɛ̀ɛ Yeesus à kpagày ɓi naà-Bɛ̀ll à tumɛ̀n rìghaàgh, ɓɛ̀yilàg ɓii ɓɛ yughày nyì a nyoo lɛ ɓɛɛ kali nyi lɛ, a ghɛǹ kisay ki ɓum ɓɛ kighà ɓi rìtoŋ ɗi naà-Bɛ̀ll ìnɛn.

²Wɔ̀lɛ, Yeesus à ɓàkà ɓɔ lɛ: Aa ɓì ghɛɛ kìtoŋ kiǹ kìcèm yɛ̀ɛ ki ri? Ǹkalii mìni ɓi saaɗ lɛ: mɛɛ mɛ, mɛ ri ɓiì wààrɛɛ mɛcèm, nsoò gɔ̀g bog yàa ɓa ti ɓi ǹsasaghiyɛn ɓi ìdɛŋ aɗyoo ɓi jàŋ ìnɛ.

³Nni à kɔ̀rìghà ɓi dòn ì ɓɛ̀òlìvyee, ɓɛ̀yilàg ɓii ɓɛ yu nyi kìtɔɔ̀gh a dwìɗ lɛ: Kali ɓìsi fin innɛ kìɓan kiǹ ki ɓiì kìlɛɛ, ù ki fa ɓisi kìrèmzɛnà ki ɓi rìsugtìì ɗyɔɔ, rì rìlèg ɗi zi.

⁴Fɔɔnnɛ Yeesus à ɓàkà ɓɔ lɛ: Ɓì konàg lɛ mum kɛ̀ɛ yègsi mini.

⁵Ɓisuulɛ ɓum lɛɛ̀gwey ɓɛ ɓiì yùu ri ɗii ɗyɛ̀m, ɓɛ kpaakpàà lɛ: Mɛ̀ yɛɛ ri Kiris; fɔɔnnɛ ɓɛ ri ɓiì syoŋi ɓum lɛɛ̀gwey.

⁶Ɓì rì ɓiì woògh di ɓɛɛ̀ kakali ɓiɓan ɓi mɛ̀y mɛ mɛɛ̀ ɗùuɗuùrɛ̀n, rì mɛ mɛɛ̀ pèeghpegsɛ̀n yì, konaaghna lɛ, ìris wɛ̀ kɛɛ̀ ɓan mini, ɓisuulɛ ki ghɛɛ̀sɛɛ kì kìlɛɛ fɔlɔɔ; nni àa rìlèg ɗi zi ɗyɛɛ ri ɓiì ɓaà lɔɔ.

⁷Ki ɓiì ɓaà lɛ: ɓumɓɛ ɓì tum a zi anɛ ɓɛ ram wɛ̀y ri ɓɛ ɓi tum àmbog; ɓɛ ɓi kìlɔ̀ŋ ki ɓɛ ram wɛ̀y ri ɓɛ ɓi kimbog; fɔɔnnɛ zày ì ɓiì kìi jàŋ jàŋ, zi ì ki nyɛ̀ɛnyɛŋɗɛ̀n lɛ rì foo ì nyɛ̀ŋɗɛ̀n, rì foo ì nyɛ̀ŋɗɛ̀n.

⁸Ɓìɓan ɓiǹ ɓìcèm ɓi ri ɓa lɔŋ ritumɛ̀n ɗi rikɛŋ ɗi ɓi riyay.

⁹Fɔɔnnɛ ɓɛ ri mìni ɓiì ɓangii, ɓɛ ki lɛ ɓi woòg mɛ̀tɔɓ, ɓɛ weeyì mìni, ɓìlɔ̀ŋ ɓìcèm ɓi ri mìni ɓiì ɓèèzɛɛ ɓisu wɛ̀m.

¹⁰Kìɓan kiǹ ki ɓiì kɛ̀ɓtii ɓum lɛɛ̀gwey fiɓàg, ɓɛ tɔɔ̀tɔ̀kɛ̀n ɓɔ rì ɓɔ, ɓɛ ki ɓigti bènà ɓi nyìinyìm wàà.

¹¹Ɓɛ̀pwààpwaà ɓɛ ɓɛkpaŋzì-ɓìɓan ɓɛ ri ɓiì yùu lɛɛgwey, ɓɛ syoŋ ɓum kìtuu.

¹²Ǹkɔ̀nɛ̀n à ɓum lɛɛ̀gwey a ri fɔy, ɓisuulɛ kìtɛ̀ŋtɛ̀ŋ ki ri ɓa di ki mɛ ɓyɔ̀ɔ̀.

¹³Wɔ̀lɛ ŋwaànɛ à rì ɓiì sììrɛɛ ɓi rìgherɛ̀n à kpaŋ a rìsugtɛ̀n, à ɓiì ghɛɛ̀ cɛɓ.

¹⁴Syeesyee à Ɓɔlɛ à kìlɔ̀ŋ ki Bɛ̀ll ànɛ, à ɓiì kalɛɛ zi bimiɗ, lɛ kìɓan ki Ɓɔlɛ ànɛ̀n kɛɛ yilɛn ɓi ɓìlɔ̀ŋ ɓìcèm, ajɛ̀m ìnɛn nnɛ rìsugtɛ̀n ɗi zi ɗi ri ɓa.

¹⁵Yɛ̀ɛ ɓi ɓiì ghɛɛ̀ di ɓum ɓɛ ti ɓiì kìkii ɓiɓe ɓi ɓi ri koŋnyoo ɓi jàŋ inɛ ì rì kìcèlì yɛɛ Daniyɛl à kpaaghà, ŋwaànɛ a ɓàɓay ɓìɓan ɓi Bɛ̀ll, à ghɛ̀ɛ̀sɛɛ kì kɔ̀rii ɗyomzɛ̀n.

¹⁶Fɔɔnnɛ ɓumɓɛ ɓɛ ri ɓa a Zyude, ɓɛ ghɛɛ̀sɛɛ kì ghɛŋii ɓi dòn aɗyòò;

¹⁷ŋwaànɛ à ri ɓa ɓi mɛɛ aɗyòò, kɛ̀ɛ sɛɛdiì tì lɛ a teɗ ɓyom ɓi ɓi ri nyi ɓi naa.

¹⁸Fɔɔnnɛ ŋwaànɛ à ri ɓa ɓi dɛm, kɛ̀ɛ sugti a mɛɛ lɛ a teɗ kìlàà kii.

¹⁹Nyìighnyìg rì ɓɛ̀yiɓ ɓɛ ɓɛ rì ɓa ri mem, rì ɓɛ̀gɛɓyɛ̀y ɓɛ ɓi mɛ̀ru mɛ̀n.

²⁰Ɓɔ̀ŋzaaghna Bɛ̀ll lɛ, cààmɛ̀n ki lɛ ɓi ghɛŋi, kɛ̀ kɛɛ̀ ɓa cààmɛ̀n à bùmà nsoò lɛ ŋwosi Saɓàt.

²¹Ɓisuulɛ, ɓi cààmɛ̀n kiǹ ǹtɔɓ wu wu ri ɓiì ghɛnɛɛ wu ɓiì tèghɛɛ wu cee mɛ̀tɔɓ mɛ̀cèm mɛ maa ghɛɛ̀ghɛ̀nɛ̀n à tumɛ̀n yɛ̀ɛ zi i kìlɛ̀ngà, à kpaŋ ɓi cààmɛ̀n ki, fɔɔnnɛ ǹtɔɓ wu kpaŋdiyɛn yɛ̀ɛ wiǹ waa ghɛnɛɛ gɛ tì ɓi.

²²I mɛ̀ru mɛ̀n mɛ̀ kɛɛ̀ ɓa kìden, di nsoò mum bog à yin lɛ à ghɛɓ; wɔ̀lɛ ɓisuu ɓumɓɛ ɓɛ ri ɓɛ̀rɔ̀tɛn nnɛ mɛ̀ru mɛ̀n maa finɛn ɓi.

²³Nni i mum à kalii min mini lɛ: Kiris à rì fɛ, nsoò lɛ, à rì fɛnii, kɛ̀ ɓì wog.

²⁴Ɓisuulɛ ɓɛ̀kiris ɓɛ ɓɛpwàà, rì ɓɛ̀pwààpwaà ɓɛ ɓɛkpaŋzì-ɓìɓan ɓɛ ɓiì yùu, ɓɛ kikì ɓyoo dàm rì ɓɛ̀koŋnyoo ɓɛ ɓiɓan ɓi lèg ànɛ lɛ, i kaa rì lɛ ki kilɛ̀n, di ɓɛ ri lɛ ɓɛ syoŋ̀ nsoò ɓumɓɛ ɓɛ ri ɓɛ̀ɓɔ̀nɛn.

²⁵Kɛɛ̀ki ǹloogh mìni kì wogsii lɔɔ.

²⁶I ɓɛ kalii mìni lɛ: Ghɛɛna, à rì fɛnii ɓi-reɓ, kɛ̀ ɓi kɛ̀n wɔɔ, nsoò ɓɛ kpaa mìni lɛ, à rì nyamzɛn fɛnii, kɛ̀ ɓi wog.

²⁷Ɓisuulɛ, rìyù ɗi Man à mum ɗi ri ɓa yɛ̀ɛ ŋwaàŋwàɗ ànɛ à ti lɛ, i à ŋwàriì a rìpɛ̀sàg ɗi ŋwos, kìtɛɛtɛn kii ki kpaŋ a rìnɔ̀ŋɗàg ɗì ŋwos.

²⁸Jàŋ ìnɛ kiloŋ ki com ki nɔnɔŋii yɛɛ̀nɛ tìgheèghèè ti ri ɓiì sùùrɛɛ wɔɔ.

²⁹Ajɛ̀m ì ɓìɓeɓtàg ɓi mɛru ɓìn, kisaa ki ŋwos ki ri ɓiì ghàsi ki lɔ̀ɔ̀ghrɛɛ birìm, ŋwii kɛ̀ɛ lòmdi, tyɔɛy ti kɔɔ̀kɔ̀sɛ̀n yì aɗyòò di tyɛɛ̀ kpìkpì; mɛ̀tèɗ mɛ ɓi ɗyoo mɛ nyɛŋɗɛ̀n.

³⁰Fɔɔnnɛ kìfèèghrɛnà ki Man à mum ki ɓiì resɛɛ yi aɗyòò, mɛ̀kuu mɛ ɓum mɛ̀cèm mɛ ɓi ziinɛ mɛ ɓiì seeghkɛɛ mɛ ki ghɛn di Man à mum a sɛnsɛn yi aɗyòò ɓi ɓìkwìɗ, ǹɗonɛn rì coo ìtèɗ, rì coo rikèm.

³¹À romi gɛ ɓum ɓii ɓɛ titom rì ɗyam ɗigwey, ɓi mɛ̀fon mɛ zi mɛnin, lɛ ɓɛɛ taŋzɛn ɓum ɓii ɓɛ ɓɛ ri ɓɛ̀ ɓɔ̀nɛn ɓi zi bimiɗ rì ɓi ɓɛ̀tum ɓɛ zi ɓɛ̀cèm.

³²Terina kìfèèghrɛnà ɓi fìgyee: cààmɛ̀n kìcèm ki ɓɛ ghɛɛ di myaɓ mɛɛ̀ wòowomzɛ̀n, tyɛn ti tɔtɔ̀ɓ ɓɛ ti ɓɛ yilàg lɛ: Kìlòm ki yùu.

³³Fɔlɔɔ nnɛ mìni girig ɓì ghɛ̀ɛ̀sɛɛ kì yiì lɛ: Man à mum à ti jàŋbog ɗì rìyù di ɓì ghɛɛ ɓìɓan ɓiǹ ɓìcèm.

³⁴Nkalii mìni ɓi saaɗ lɛ, bɔ̀ɓ i ɓum ìnɛ, yàa lèg ɓi bimiɗ, di ɓìɓan ɓi ɓìcèm ɓi kaka kɛ̀ɛ̀ kì kìlɛɛ.

³⁵Ɗyoo rì zi ɓi ri ɓiì ghaghii, kìɓan kifog ɓìɓan ɓyɛm̀ ɓyaa ghaagh ɓi.

³⁶Wɔ̀lɛ, ɓi kìɓan ki gòn, nsoò lɛ cààmɛ̀n kiǹ, ŋwaàdɛŋ à yii ɓì; nsoò ɓum ɓɛ titom ɓɛ aɗyòò, nsoò Man, lɔŋ Tààta cɛ̀ncii yɛɛ yii.

³⁷Kìɓan ki ki kìlɛ̀ngà ɓi mɛ̀ru mɛ Nowe, kɛɛ ri kìlɛn ɓi rìsugtìì ɗi Man à mum.

³⁸Ɓisuulɛ ɓi mɛ̀ru mɛ mɛ ghaghìghà, di don ì ka tumɛn ɓi, ɓum ɓɛ kikìghà lɛ, ɓɛ ɗiɗi, ɓɛ nɔnɔ, ɓɛ wɔwɛ̀y ɓɛ̀yiɓ, ɓɛ ki fafa ɓɛgɔ̀n a mɛ̀wɛy, à kpaŋ ŋwos anɛ Nowe à ɗiŋìghà ɓi kìkɔm,

³⁹ǹɗem wu kɛsìghà ɓi ɓɔ ri kìɓan kidɛŋ à kpaŋ yɛ̀ɛ don i yùghà, ì teɗ ɓɔ ɓɛ̀sɛ̀ɛ̀ ɓɛcèm; folɔɔ nnɛ ki ri ɓa ɓi rìsugtìì ɗi Man à mum.

⁴⁰Fɔɔnnɛ ki rì ɓa lɛ: i ɓum ɓɛ ri a dɛm ɓɛsɛ̀ɛ̀ ɓɛɓɛɛ̀, ɓɛ teɗ bog, ɓɛ caɗ àmbog.

⁴¹Nsoò lɛ i ɓɛ̀yiɓ ɓɛ ri ɓi rìwɔ̀g ɗi ɓyom ɓi gɔ̀g ɓɛ̀sɛ̀ɛ̀ ɓɛɓɛɛ̀, ɓɛ teɗ bog ɓɛ caɗ bog.

⁴²Fɔɔnnɛ kɔ̀riina cem, lɛ ɓi yii ɓi fin ìnnɛ masà wìn a rì ɓiì yùu.

⁴³Nni yiina lɛ, i ŋwaàmɛɛ àa ti à yilàg cààmɛ̀n ki wiiwìì à rì lɛ à yù nyi ki yii ɓyom miì rì ìru, di à rì lɛ à kɔ̀rì cem, lɛ ɓɛ̀ kɛɛ̀ ɓɛg nyi mɛ̀ɛ̀.

⁴⁴Fɔlɔɔ nnɛ mìni girig, kɔ̀riina cem, lɛ Man à mum à ɓiì yùu ɓi cààmɛ̀n kɔm̀ ki ɓì yii ɓi lɛ, à ri ɓiì kpaŋì miì.

⁴⁵Nkìì-kìsay anɛ à rì lɛ: nyi rì mɛ̀wog, nyi rì ɗyomzɛ̀n, nnyɛɛ rì ǹkìì-kìsay anɛ masà wìì a ɓɔgsìghà rìfòm ɗi ɓɛ̀kìì-ɓìsay ɓii ɓɛmbog, lɛ a falag ɓɔ ɓìɗilàg ɓi ɓyààmɛ̀n ɓi ɓi ghɛɛ̀sɛɛ.

⁴⁶Mààgh rì ǹkìì-kìsay anɛ̀n di masà wìì a sughiì à tanɛ̀n nyi di a kìki kisay kiǹ.

⁴⁷Ǹkalii mìni ɓi saaɗ lɛ, masà wìì à rì ɓiì reɓsɛɛ ɓyom ɓii ɓìcèm rì nyi.

⁴⁸Kìɓan kifog, i à rì kìɓeɓtàg ki ǹkìì-kìsay, nnɛ à fèegh wɔɔ ɓɛɛ̀ nyimiɗ lɛ, masà wɛ̀m àa sug yi ɓi lɛ fyɛ̀ɗ,

⁴⁹à tumɛ̀n rìkwiy ɗi ɓɛ̀kìì-ɓìsay ɓɛmbog, à kì lɛ: à ɗi, à nɔ, bas rì ɓɛ̀nɔɔ̀-mɛ̀rɔ̀g.

⁵⁰Fɔlɔɔ nnɛ masà à ǹkìì-kìsay anɛ̀n à rì ɓiì peetɛɛ yi ŋwos nyimiɗ anɛ à ɓoŋɓoŋi ɓi nyi, rì ɓi cààmɛ̀n ki nyii yii ɓi lɛ masà wìì a rì lɛ à kpaŋ.

⁵¹Masa wìì a rì nyi ɓiì pàkii mpàkakɛn , à ki foŋ nyi ɓi nɗaŋ wu ɓum ɓɛ fyɛɛ̀fyɛɛ̀ ɓi ŋwɔm ìghèy ɓi ɗùm, jàŋ ìnɛ ɓum ɓɛ ri ɓiì rèereèdɛ̀n ɓɛ ŋaàŋààdì min.