Read Bafia MATYOO 25 Bible Online

MATYOO 25 - Bafia bible

MATYOO 25

¹Fɔɔnnɛ kìlɔ̀ŋ ki aɗyòò ki pisɛɛ rì ɓɛ̀gɔ̀n ɓɛ ɓɛ̀yiɓ ǹtɛ̀ɗ ɓɛ ɓɛ tekà ɓɛ̀lamɓà ɓaa lɛ ɓɛɛ kɛǹ kì ɓoŋì ŋwaànɛ à ɓaghà lɛ a wɔlɛ̀n.

²Kìtaǹ ki ɓi ɓɔ ki ɓaghà kɛ̀ɛ̀ ɗyomzɛ̀n, kìtaǹ kimbog rì ɗyomzɛ̀n.

³Ɓɛ̀roɓɛ ɓɛ ɓaghà kɛ̀ɛ̀ ɗyomzɛ̀n, ɓɛ tekà ɓɛ̀lamɓà, ɓɛ̀ kɛɛ̀ teɗ kàràsin,

⁴wɔ̀lɛ, ɓɛ̀roɓɛ ɓɛ ɓaghà rì ɗyomzɛ̀n ɓɛ tekà lɛ: rì ɓɛ̀lamɓà, rì kàràsin ɓi ɓɛ̀kɔliba.

⁵Nni yɛ̀ɛ ŋ̀waà rìwɛy à lɛ̀mzìghày, ɓɛ̀gɔ̀n ɓɛǹ ɓɛ cuu tìlo di ɓɛ mɛ fɔy.

⁶Yɛ̀ɛ nyìinyìm à-ru à kpagà, nni ɓɛ wokày jɛ̀ɛ̀ lɛ ǹwɔlì innɛ, kpaŋinay ɓi kɛǹ nyi kì ɓoŋì.

⁷Fɔɔnnɛ ɓɛ̀gɔ̀n ɓɛ ɓɛ̀yiɓ ɓɛ kìntɛ̀ɗ ɓɛǹ, ɓɛ pɛsɛ̀ngà aɗyòò, ɓɛ roòsàg ɓɛ̀lamɓà ɓaa.

⁸Nni ɓɛ̀roɓɛ ɓɛ ɓaghà kɛ̀ɛ̀ ɗyomzɛ̀n ɓɛ tɔkà ɓɛ̀roɓɛ ɗyomzɛ̀n lɛ: Faana ɓìsi kàràsin, ɓɛ̀lamɓà ɓis ɓɛ ti ɓiì ɗimii.

⁹Ɓɛ̀gɔ̀n ɓɛ ɓɛ ɓaghà rì ɗyomzɛ̀n ɓɛ ɓaàg ɓɔ lɛ: Èe èe, gàɓ ì kàràsin ìnɛ ì ghɛ̀ɛ̀sɛ̀n lɛ, rì ɓìsi, rì mìni ì yin, ɓì rì ɓiì ɓàŋi ki kɛ̀ɛ jàŋ inɛ ɓɛɛ̀ kàkàɓ, lɛ ɓì lag yì ànkìn wɔɔ.

¹⁰Yɛ̀ɛ ɓɔɔ kɛngà kì làagh kàràsin, ǹwɔlì à rɔ̀ɓ kì kpaŋì ɓɛ̀roɓɛ ɓɛ ɓaghà jàŋbog, ɓɛ ɗiŋì rì nyi ɓi kìkpanà ki riwɛy; fɔɔnnɛ ɓɛ rogà ìsuunaa.

¹¹Ɓɛ̀gɔ̀n bɛmbog ɓɛ yughày girig di cààmɛ̀n ki mɛ ghaàgh, ɓɛ kpaa lɛ: Kan, ŋ̀wàra ɓìsi naa.

¹²Nni ǹwɔlì à ɓàkà ɓɔ lɛ: Ǹkalii mìni ɓi saaɗ lɛ: Mɛ̀ ǹ-yii ɓì mini.

¹³Fɔɔnnɛ ɓì ghɛ̀ɛ̀sɛɛ kì kɔ̀rii cem, lɛ ɓì yii ɓì gòn nsoò cààmɛn.

¹⁴Kìlɔ̀ŋ ki aɗyoo ki ɓaa gɛ fɛlɛ yɛ̀ɛ ŋwaàdɛŋ ànɛ à reŋìghà ɓɛ̀kìì-ɓìsay ɓii, di à ti ɓiì kɛɛ rikɛ̀ɛ̀, à reɓsɛ̀n ìkum wii ri ɓɔ.

¹⁵Fɔɔnnɛ à kìghà lɛ: à fa roànɛ tìraŋ̀ tìtaǹ, roànɛ tìraŋ̀ tiɓɛɛ̀, roàmbog fìraŋ̀ fìfog; à faghà mum bimiɗ ànɛ ɓi ɓɔ gàɓ ìnɛ ì ghɛ̀ɛ̀sɛɛ rì ìtèɗ wii, à kɛ̀n min rikɛ̀ɛ̀ ɗii.

¹⁶Nni ǹkìì-kìsay ànɛ ɓɛ faghà tìraŋ̀ titaǹ à ghàskà kì tumɛɛ dùne rì tyɔ à fɔ̀n tìraŋ̀ tidɛŋ titaǹ.

¹⁷Roànɛ ɓɛ faghà tìraŋ̀ tiɓɛɛ̀, à kì girig dùne, à fɔ̀ɔ̀dì tidɛŋ tiɓɛɛ̀.

¹⁸Roànɛ ɓɛ faghà fìraŋ̀ fìfog à kɛ̀ngà, à tim zi, à ɓòm mɔ̀ɔ̀ni mɛ masà wìì miì.

¹⁹Di ki mɛ finɛn lɛɛ̀gwey yɛ̀ɛ masà à ɓɛ̀kìì-ɓìsay ɓɛǹ à kɛ̀ngà rìkɛ̀ɛ̀, nni à sukày, à tɔg ɓɔ lɛ, ɓɛɛ resi nyi kìsay ki ɓɛ rɔɓkà kì kìi ri mɔ̀ɔ̀ni.

²⁰Fɔɔnnɛ roànɛ ɓɛ faghà tìraŋ̀ titaǹ à yughày rì tìraŋ̀ tidɛŋ titaǹ miì aɗyòò, à kpaa lɛ: Masà, ù faghà mɛ̀ tìraŋ̀ titaǹ nni tidɛŋ tyɛɛ̀ti titaǹ ti mɛ̀ɛ ǹɗɔ̀ɓi kì yaasii.

²¹Masà wìì a kpaaghà nyi lɛ: Ki rɔɔtɛɛ; ù rì syeesyee à ǹkìì-kìsay, wɔ̀ tì ǹkìì-kìsay a ǹtyweeyi. Yɛ̀ɛ ù rèsii mɛ̀ lɛ, ù rì ŋwaà-ǹtyweeyi ɓi ɓyom ɓisàg, ǹɗì wɔ̀ ɓiì rɛsii ǹlàmì ɓi ɓyom ɓigwey; ɗiŋi ɓi kìnyàà ki masà wɔ̀ɔ̀.

²²Fɔɔnnɛ roànɛ ɓɛ faghà tìraŋ̀ tiɓɛɛ̀ à yughày girig, à kpaa lɛ: Masà, ù faghà mɛ̀ tìraŋ̀ tìɓɛɛ̀, nni tidɛŋ ti mɛ̀ɛ n-yaasii tyɛɛ̀ti tiɓɛɛ̀.

²³Masà wìì a kpaa nyi lɛ: Ki rɔɔtɛɛ; ù rì syeesyee à ǹkìì-kìsay, wɔ̀ tì ǹkìì-kìsay a ǹtyweeyi; yɛ̀ɛ ù rèsii mɛ̀ lɛ, ù rì ŋwaà-ntyweeyi ɓi ɓyom ɓisàg, ǹɗi wɔ̀ ɓiì rɛsii ǹlàmì ɓi ɓyom ɓigwey fɔɔnnɛ, ɗiŋi ɓi kìnyàà ki masà wɔ̀ɔ̀.

²⁴Fɔɔnnɛ roànɛ ɓɛ faghà fìraŋ̀ fìfog, à tyòŋdɛ̀ngày min à kpaa lɛ: Masà, ǹ-yighà lɛ ù tèri mum yɛ̀ɛ mɛ̀nɔ̀ɓɔ̀, lɛ ù ti ù kɛ̀ngì kìɓùmii ɓyom ɓi dɛm inɛ ŋwaàdɛŋ à sali, ù ki sagi ɓiɗilàg ɓi jàŋ inɛ ù mìskà ɓi.

²⁵Fɔɔnnɛ ǹrisìghà, ǹkɛ̀n kì ɓòmi mɔ̀ɔ̀ni mɔɔ ɓi zi, nni, tera mɔ̀ɔ̀ni mɔɔ mɛɛ̀mɛ.

²⁶Masà wìì a ɓàg nyi lɛ: Wɔ̀ ǹkìì-kìsay anɛ, ù kìi lɛ ù ɓeɓtɛ̀n ǹɗem, ù ki ɓa ɓɔɓwɛɗ! Ù yighà lɛ ǹti ǹkɛ̀ngi kìɓùmì ɓi dɛm inɛ ŋwaàdɛŋ yɛɛ sali, ǹki sagi ɓiɗilàg ɓi jàŋ inɛ m̀ɓɛ̀là ɓi.

²⁷Ù ghɛ̀ɛ̀sɛ̀ngà min ki nyamì mɔ̀ɔ̀ni mɛ̀m a baŋ̀; di yɛ̀ɛ mɛ̀ɛ ǹsughii di mɛ̀ɛ ǹkɛ̀ɛ mɔ kì terì di mɛ mɛ yay.

²⁸Ɓatɛɛna nyi fìraŋ̀ fiǹ, ɓi fa fyɔ rì ŋwaà tìraŋ̀ ntɛ̀ɗ.

²⁹Ɓisuulɛ ŋwaànɛ à rì rì ɓyom innɛ ɓɛ ɓiì fatii lɛ à ɓa rì ɓyɔ lɛɛ̀gwey, kìɓan kifog, ŋwaànɛ à rì kɛ̀ɛ̀ com, ɓɛ ɓatɛ̀n maa gàɓ ànɛ à rì rì nyi.

³⁰Ɓi ɓɛg ànɛ yɛ̀ɛ ǹkìì-kìsay a kɛ̀ɛ̀ gɛɓsɛ̀n ànɛn, pìighna nyi ɓi birìm ìnɛ ɓi dan, jàŋ inɛ ɓum ɓɛ ri rèereèdɛ̀n ɓɛ ŋaàŋààdì min.

³¹Yɛ̀ɛ Man à mum à rì ɓiì yùu, ɓì rìgwey ɗii, ǹɗaŋ ri ɓum ɓɛ titom ɓɛ̀cèm, à ɓiì kɔ̀rii ɓi-kɔ̀ɔ̀ wii wu rilàmì wu rikem.

³²Ɓìlɔ̀ŋ ɓìcèm ɓi ɓi ziinɛ ɓi kunì nyi asu; à ghasì ɓum gàɓ yiɓɛɛ̀ fɛlɛ yɛ̀ɛ m̀ɓèŋì-ɓìtuwe a ghasag lɛ, rì bwiy yi ɓɛ̀yiɓ, rì ɓìpiì;

³³à ɓiì rɛsii bwiy ɓi weèlem, ɓìpiì ɓi kìmɛŋ.

³⁴Fɔɔnnɛ rìfòm ɗi ɓiì kalii ɓɛroɓɛ ɓi weèlem ɓɛ̀n lɛ: Mìni ɓumɓɛ Seŋi wɛ̀m à màgà, yùunay, ɓi teɗ kìlɔ̀ŋ ki ɓɛ pegsɛ̀ngà ɓìsu win, à tumɛ̀n yɛ̀ɛ ɗyoo rì zi ɓi kilɛ̀ngà.

³⁵Lɛ yɛ̀ɛ zày ì kɔ̀ngà mɛ̀, ɓì faghà mɛ̀ ɓìɗilàg, kìnɔli ki ki mɛ̀, ɓì fa mɛ̀ mɛ̀nig mɛnɔyɛn; m̀ɓaghà ǹken, ɓì ghàɓ mɛ̀ a mɛɛ min.

³⁶M̀ɓaghà nyoozɛy, ɓì waasì mɛ̀ ɓìlàà, m̀ɓaghà roròɓ, ɓì yù mɛ̀ kì ghɛɛ̀. Mɛ̀ ɓi naà-zày, ɓì yù mɛ̀ kì tògsii.

³⁷Fɔɔnnɛ ɓum ɓɛ saaɗ ɓɛ̀n ɓɛ pɛ̀ɛ̀zii gɛ nyi lɛ: Kan, fin innɛ tì ghɛngà wɔ̀ di zày yɛ̀ɛ kɔ̀nkɔn wɔ tì ki fa wɔ ɓìɗilàg? Nsoò lɛ di kìnɔli kɛɛ̀ kìki wɔ, tì ki fa wɔ mɛ̀nig mɛnɔyɛ̀n?

³⁸Fin innɛ tì ghɛngà wɔ̀ di ù rì ǹkèn, tì ki ghàɓ wɔ a mɛɛ mis? Nsoò lɛ di ù rì nyoozɛy, tì ki waasi wɔ ɓìlàà?

³⁹Fin innɛ ù ɓaghà ɓi cem, nsoò lɛ ɓi naà-zày, tì ki yù wɔ kì ghɛɛ̀?

⁴⁰Nni rìfòm ɗi pɛɛ̀zii gɛ ɓɔ lɛ: Ǹkalii mìni ɓi saaɗ lɛ, cààmɛ̀n kìcèm ki ɓì kìghà kìbog ki ɓi ɓɔɔ ɓɔɓti ɓɛ ɓɛ rì ɓɛ̀geni ɓɛ̀m fɔlɔɔ, mɛ̀ innɛ ɓi kìghà lɔɔ.

⁴¹Fɔɔnnɛ rìfòm ɗi kalii gɛ ɓumɓɛ ɓi kìmɛŋ kii lɛ: Mìni ɓumɓɛ ɓì rì ɓɛ̀cɛ̀mɛn, pɛ̀sɛɛna mɛ̀ ɓi mis; ɓi kɛǹ ɓi ɗuu ɗi fiɗyàɓ fikɔ̀ɔ̀ ɗi ɓɛ pegsɛ̀ngà ɓisuu Satàn, ɗì ɓum ɓii ɓɛ titòm.

⁴²Lɛ yɛ̀ɛ zày ì kɔ̀nkɔ̀ngà mɛ̀, ɓi faghà ɓi mɛ ɓìɗilàg; kìnɔli ki kikì mɛ̀ kɛ ɓi fa mɛ mɛ̀nig mɛnɔyɛ̀n;

⁴³m̀ɓaghà ǹkèn, kɛ̀ ɓi ghàɓ mɛ a mɛɛ min; mɛ̀ nyoozɛy, kɛ̀ ɓi fa mɛ ɓìlàà; ǹɗoròɓkà, mɛ̀ tì ɓi naà-zày, kɛ̀ ɓi yù mɛ kì ghɛɛ̀.

⁴⁴Fɔɔnnɛ ɓɛ̀roɓɛ̀n ɓɛ ɓàagh gɛ girig nyi lɛ: Kan, fin innɛ tì ghɛngà wɔ̀ di zày yɛ̀ɛ kɔ̀nkɔn wɔ, nsoò lɛ di kìnɔli kɛɛ̀ kìki wɔ, nsoò lɛ di ù rì ǹkèn, nsoò lɛ nyoozɛy, nsoò lɛ roròɓ, nsoò lɛ ɓi naà-zày, tì ki rɔ̀ɓ tyɛ̀ ki ghɛɓsi wɔ?

⁴⁵Nni rìfòm ɗi pɛɛ̀zii gɛ ɓɔ lɛ: Ǹkalii mìni ɓi saaɗ lɛ, cààmɛ̀n kìcèm ki ɓi ɓèngà kì kìi kibog ki ɓi ɓɔɔɓɔɓti ɓɛ fɔlɔɔ, mɛ̀ nnɛ ɓì ɓèngà kì kìi lɔɔ.

⁴⁶Fɔɔnnɛ ɓumɓɛ̀n ɓɛ teri gɛ deɓ yi fiɗyàɓ fikɔ̀ɔ̀, wɔ̀lɛ ɓum ɓɛ saaɗ ɓɔɔ teɗ cɛɓ ki fiɗyàɓ fikɔ̀ɔ̀.