Read Bafia MATYOO 26 Bible Online

MATYOO 26 - Bafia bible

MATYOO 26

¹Yɛ̀ɛ Yeesus à lègsìghà ɓìtòkì ɓiǹ ɓìcèm, nni à kpaaghà ɓɛ̀yilàg ɓii lɛ:

²Ɓì yii lɛ, Paskà à rɔ̀ɓi mɛ̀ru mɛɓɛɛ̀, ɓɛ ɓiì ki kàɓi Man à mum lɛ ɓɛɛ kpan nyi ɓi kɔrɔs aɗyòò.

³Nni ɓɛ̀pìrɛɛtìrɛ̀ ɓɛgwey rì ɓɛ̀sɛ̀ɛ̀mɛn ɓɛ kilɔ̀ŋ ɓɛ taŋzɛ̀ngà ɓi ǹlɛmɓog wu ǹlàmì-ɓɛ̀pìrɛɛtìrɛ̀ ànɛ lɛ Kayif,

⁴ɓɛ teɗ ǹɗɛli lɛ ɓɛɛ ɓaǹ Yeesus ɓi ghèy, ɓɛɛ wey.

⁵Wɔ̀lɛ ɓɛ kakàlìghà lɛ: Kìɓan kiǹ kɛ̀ kɛɛ̀ kìlɛn ɓi nyìinyìm à tìcàɓ, di ɓum ɓɛ kilɔ̀ŋ ɓɛ ri ɓiì woògh bim ɓɛ ki kìyoòyòò.

⁶Yɛ̀ɛ Yeesus à ɓaghà a Bɛtanii ɓi naa ì Simɔn ànɛ a ɓaghà kukwiy,

⁷giɓ adɛŋ à yùghà nyi a nyoo, rì ɓeŋ ànɛ a ɓaghà ǹsoɓɛn ɗi gɔ̀g ì ŋwèrim-ŋwèrim, ɓeŋ ànɛn a ɓaghà ǹɗònɛn ri ɓìsyeesyee ɓi tirààre ɓi ɓi ɓaghà ɓì kɛŋɛn; giɓ anɛ̀n à sùùrì Yeesus tìrààre tìn ɓi ǹto di a kaka à ɗiɗì.

⁸Yɛ̀ɛ ɓɛ̀yilàg ɓɛ ghɛngà kìɓan kiǹ, ki ɓeɓ ɓɔ, ɓɛ kpaa lɛ: Ki ghɛɓsii cɛ lɛ ɓɛɛ yoòyògsì ɓyom fɛlɛ?

⁹Ɓaa rì lɛ ɓɛ kaɓ tìrààre tìn dune ǹkɛŋɛn lɛɛ̀gwey, ɓɛ fa mɔ̀ɔ̀ni mɛ miì rì ɓɛ̀soghàsogha.

¹⁰Yɛ̀ɛ Yeesus à wokà fɔlɔɔ, nni à kpaaghà ɓɔ lɛ: Ɓi yeeyeèsì giɓ anɛ lɛ la? À kìi syeesyee à kìɓan ɓisu wɛ̀m

¹¹lɛ ɓì rì rì ɓɛ̀soghàsogha ɓyààmɛ̀n ɓìcèm, kìɓan kifog mɛ̀ màa ɓa ɓi ri mìni cààmɛ̀n kìcèm.

¹²Yɛ̀ɛ àa sùùrii mɛ̀ tìrààre tìn ɓi nyoo, àa pegsɛɛ rìɓòm ɗi ɓɛ ri mɛ̀ ɓiì ɓòmi.

¹³Ǹkalii mìni ɓi saaɗ lɛ, jàŋ bimiɗ ìnɛ Syeesyee à Ɓɔlɛ ànɛ à kaakàlɛɛ gɛ ɓi ziinɛ ǹcèm, ɓɛ kpaakpaa gɛ kìɓan ki giɓ anɛ à kìi ki, ɓɛ yiìyìtàg nyi miì.

¹⁴Fɔɔnnɛ Zyudas Iskariyot, kìbog ki ɓi ɓɛ̀yilàg ɓɛ Yeesus ǹtɛ̀ɗ rì ɓɛɓɛɛ̀, à kɛ̀ngà a ɓɛ̀pìrɛɛtìrɛ̀ ɓɛgwey

¹⁵à tɔg ɓɔ lɛ: Cɛ kɛɛ̀ki ɓì rì mɛ̀ ɓiì faà di ǹfaa mìni nyi? Nni ɓɛ̀roɓɛ̀n ɓɛ peeghà nyi mɔ̀ɔ̀ni tìraŋ̀ rìtin ɗì ǹtɛ̀ɗ.

¹⁶À tumɛ̀n ɓi cààmɛ̀n kiǹ, Zyudas à kaakààghà syeesyee à cààmɛ̀n ànɛ a fa ɓɔ Yeesus.

¹⁷Ŋwos a ǹtonto ànɛ ɓi mɛ̀ru mɛ ɓɛ nkìlaagh bìrɛs kɛ̀ɛ̀ nwìɗ miì, ɓɛ̀yilàg ɓɛ Yeesus ɓɛ yughà nyi kì tɔɔ̀gh lɛ: Fe nnɛ u kɔ̀nkɔn lɛ ti kɛǹ wɔ̀ kì pègsɛɛ ɓiɗilàg ɓi Paskà?

¹⁸Yeesus à ɓàg ɓɔ lɛ: Kɛ̀ɛna ɓi bàn yɛ̀ɛ tɛɛnɛ, ɓi kpaa nyi lɛ, ǹɗèsàg a kalag lɛ: Cààmɛ̀n kii ki ti jàŋbog, nni a lɔ̀ŋkɔɔ nnɛ nyii ɓiì ɗiì Paskà rì ɓɛ̀yilàg ɓii.

¹⁹Ɓɛ̀yilàg ɓɛ ki lɔŋ yɛ̀ɛ Yeesus à kpaaghà ɓɔ, ɓɛ ki pègsɛn ɓiɗilàg ɓi Paskà.

²⁰Yɛ̀ɛ cɛŋkò ki kpagà, Yeesus à kɔ̀rì ɓi ɓìɗilàg rì ɓɛ̀yilàg ɓii ǹtɛ̀ɗ rì ɓɛɓɛɛ̀.

²¹Nni yɛ̀ɛ ɓɛ ɗiɗìghà ɓyom, nni Yeesus à kpaaghà lɛ: Ǹkalii mìni ɓi saaɗ lɛ, kìbog ki ɓi mìni ki ri mɛ̀ ɓiì kàɓi.

²²Fɔɔnnɛ ɓɛ̀yilàg ɓɛ ɓɛ samgàkà lɛɛ̀gwey, mum ǹcèm à tɔg nyi lɛ: Kan, mɛ̀ nya gìn?

²³Yeesus à ɓàg ɓɔ lɛ: Ŋwaànɛ tyàa pùùsɛɛ càg ɓɛɛ̀ nyi taasà bog yɛɛ ri mɛ̀ ɓiì kàɓi.

²⁴Man à mum à ɓiì wiì lɔŋ yɛ̀ɛ ɓɛ kangà lɛ à ghɛ̀ɛ̀sɛɛ kìwiì, kìɓan kifog nyìighnyìg rì ŋwaànɛ à rì nyi ɓiì kàɓi! Ki ɓaghà kìrɔɔ ɓisuu ŋwaànɛ̀n lɛ kɛ̀ɛ yalɛn.

²⁵Nni Zyudas ànɛ à ɓaghà ɓi kìtɔ̀kɔ̀ kiǹ, à tekà jɛ̀ɛ̀, à kpaa lɛ: Raɓì, mɛ̀ nya gìn? Yeesus à ɓàg nyi lɛ: Wàa kpaà.

²⁶Nni yɛ̀ɛ ɓɛ ɗiɗìghà, fɔɔnnɛ Yeesus à tekà bìrɛs, à fa Bɛ̀ll ɓìtògsɛ̀n, à ɓɛg min yɔ̀, à fa ɓɛ̀yilàg ɓii, à kpaa ɓɔ lɛ: Terina, ɓi ɗi, nyoo yɛ̀m yɛ̀ɛ lɛ.

²⁷Nni à teetìghà ɓeŋ, à mɛ̀rɔ̀g à fa Bɛ̀ll ɓìtògsɛ̀n, à ceesi nyi rì ɓɛ̀yilàg ɓii, à kpaa ɓɔ lɛ: Nɔɔna ɓɛ̀sɛ̀ɛ̀ ɓɛ̀cèm

²⁸ɓisuulɛ bwaɓ yɛm̀ yɛɛ ri, bwaɓ yi ɓi rìràrɛ̀n ɗi rì Bɛ̀ll, yi yi ri ɓiì kpaŋì ɓisuu ɓum lɛɛ̀gwey, ɓisuu ricenɛ̀n ɗi ɓiɓe.

²⁹Nni mɛ̀ ǹkpaa mìni lɛ, à tumɛ̀n gɛɛ̀nɛ, màa nɔti ɓi mɛrɔ̀g mɛ viìnyɛ̀, à kpaŋ ŋwos anɛ tì nɔtii gɛ nyɔɔnyɔn à rìnɔ lɛ rì mɛ̀ rì mìni ɓi kìlɔ̀ŋ ki Seŋi wɛ̀m.

³⁰Ɓɛ ɓaghà lɛ ɓɛ mɛ ghàɓ tyem ti ɓɛsam̀ fɔɔnnɛ ɓɛ ɓɔkà min ɓi dòn ì ɓɛ̀òlìvyee.

³¹Nni Yeesus à kpaaghà ɓɛ̀yilàg lɛ: Ɓi-ru wu gɛɛ̀nɛ, ǹɗì ɓiì ɓaà fìɓàg ɓisu win ɓɛsɛ̀ɛ̀ ɓɛ̀cèm, lɛ ki ri kì kànɛn lɛ: Ǹɗì ɓiì wolì m̀ɓèŋì-jɔ̀ɔ̀, jɔ̀ɔ̀ yii yicèm yi saàtɛ̀n.

³²Kìɓan kifog, ajɛ̀m ì rìghèmɓɛ̀n ɗyɛm̀ ǹɗì ɓiì loògh kì kɛ̀ɛ ri mìni a Galile.

³³Nni Pyɛɛri à tekà jɛ̀ɛ̀, à kpaa nyi lɛ: Ǹsoò wàa rì fìɓàg ɓisuu ɓisi ɓɛsɛ̀ɛ̀ ɓɛ̀cèm, wàa ɓa ɓi fiɓàg ɓisu wɛ̀m.

³⁴Yeesus à kpaa nyi lɛ: Ǹkalii wɔ̀ ɓi saaɗ lɛ, ɓi-ru wɔm̀ wu, ù rì mɛ̀ ɓiì roòzɛɛ gɛ̀n yiraa, di ǹlem à zag a ka rɔŋ ɓi.

³⁵Pyɛɛri à pɛ̀ɛ̀zì nyi lɛ: Ǹsòò ki kpaŋi lɛ ǹwu ɓɛɛ wɔ̀ ǹɗaŋ, màa roòzɛn ɓi wɔ. Ɓɛ̀yilàg ɓɛmbog ɓɛ̀sɛ̀ɛ̀ ɓɛ̀cèm ɓɛ kpaaghà girig fɔlɔɔ.

³⁶Fɔɔnnɛ Yeesus à kɛ̀ngà rì ɓɛ̀yilàg ɓii ɓi jàŋ ɗii lɛ Gɛsemane, à kpaa ɓɔ lɛ: Kɔ̀riina fɛ, mɛ̀ ǹka kɛ̀ɛ kìɓɔ̀ŋzaagh fɛnii.

³⁷Nni à tekà lɛ rì Pyɛɛri, rì kìɓɛ̀ɛ̀ ki ɓɔn ɓɛ Zeɓede, à tumɛ̀n rìwog ɗi ǹɗemi-kɛŋɛn, ɗì ìris.

³⁸Fɔɔnnɛ à kpaaghà min ɓɔ lɛ: Ǹɗì rì ǹɗemi-kɛŋɛn wu wu ri lɛ wu wey mɛ̀, nni rɔ̀ɓina fɛ, ɓi kɔri cem nɗaŋ, ri mɛ̀.

³⁹Nni à kɛ̀ɛ̀dìghà asu lɛsàg, à kpì ɓi zi guɓùg, à ɓɔ̀ŋzì lɛ: Tààta wɛ̀m i bee yàa rì lɛ ì ɓa, lɛ ɓeŋ ànɛ a raɓsɛn mɛ̀, nsoò fɔlɔɔ, kɔ̀ɔ kì rikɔ̀n ɗyɛm̀, lɔŋ rìkɔ̀n ɗyɔɔ ɗyɛɛ̀ɗi kìya.

⁴⁰Nni à sugtighày a ɓɛ̀yilàg, à tanɛ̀n di ɓaa cuu tilò, fɔɔnnɛ à tɔkà Pyɛɛri lɛ: Ɓi yin yɛɛ lɔɔ lɛ ɓì cenɛ̀n lɛ ɓi kɔri cem ɗi mɛ̀ bimiɗ à hawò?

⁴¹Kɔ̀riina cem, ɓì ki ɓɔ̀ɔɓɔ̀ŋzì lɛ, kɛ̀ ɓi tanɛn ri mɛ̀fèèghrɛn; lɛ ǹghay wu mum wu ri rì ìtèɗ, kìɓan kifog, nyoo ì mɛ̀mùù ì rì kɛ̀ɛ̀ ìtèɗ.

⁴²Ɓi gɛ̀n i kìɓɛ̀ɛ̀, à ràɓsɛ̀ngà tì ɓɛ̀yilàg, à ɓɔ̀ŋzàg lɛ: Tààta wɛ̀m, i ki ri lɔŋ lɛ ɓeŋ ànɛ àa pɛ̀sɛn ɓi di nnɔɔ ɓi nyi, rìkɔ̀n ɗyɔɔ ɗyɛɛ kilɛn.

⁴³Yɛ̀ɛ à sugtìghày a ɓɛ̀yilàg à tanɛ̀n tì ɓɔ ɓi fìlo, lɛ fìlo fì ɓaghà ɓɔ ɓi mis.

⁴⁴Nni à cààtìghà ɓɔ, à ràɓsɛ̀n tì, à ɓɔ̀ŋzì Bɛ̀ll ɓi gɛ̀n i kìraa, à ɓììtì lɔŋ ɓiɓan ɓi à lokà kì kpaa.

⁴⁵Fɔɔnnɛ à sugtìghày a ɓɛ̀yilàg, à kpaa ɓɔ lɛ: Mìnii ri lɔŋ ɓi fìlo, ɓì fɔɔ̀fɔ̀ɔ̀sɛ̀n? Cààmɛ̀n ki lɛ, ɓɛɛ fa Man à mum rì ɓɛ̀kìì-kìɓe kɛɛ kpaŋi lɛ.

⁴⁶Pɛ̀sɛɛna aɗyoo ti kɛǹ, lɛ ŋwaànɛ a kàkaɓ mɛ à tiì.

⁴⁷Yeesus à kaka à kpaakpàà fɔlɔɔ, nni Zyudas ànɛ à ɓaghà kìbog ki ɓi ɓɛ̀yilàg ɓii ǹtɛ̀ɗ rì ɓɛɓɛɛ̀, à ghàskà kì kpaŋì. A ɓaghày rì coo kituu ki ɓum ki ɓɛ̀pìrɛɛtìrɛ̀ ɓɛgwey rì ɓɛ̀sɛ̀ɛ̀mɛn ɓɛ romgày; ɓumɓɛ̀n ɓɛ yughày lɛ rì gàfàg, rì ɓìgeŋ.

⁴⁸Ŋwaànɛ à kàɓkà nyi à faghà ɓɔ kìrèmzɛnà à kpaa ɓɔ lɛ: Ŋwaànɛ ɓì ɓiì ghɛɛ̀ di ǹlɔ̀ri, ɓì yi lɛ nnyɛɛ ri, ɓì ɓan.

⁴⁹Fɔɔnnɛ Zyudas à ghàskà kì tyòŋdɛɛ Yeesus a nyoo, à kpaa nyi lɛ: Raɓì, ǹtògsii wɔ̀, à ki lɔ̀ɗ nyi.

⁵⁰Yeesus à ɓàg nyi lɛ: Reŋkàŋ wɛ̀m! Kìya com ki wàa yùu kì kìi. Ɓumɓɛ̀n ɓɛ yuiy min, ɓɛ sɛn ɓi Yeesus, ɓɛ ɓan.

⁵¹Kìbog ki ɓi ɓumɓɛ ɓɛ ɓaghà rì Yeesus, ki nimɓɛ̀ngà, ki sɔŋìì gàfàg ɓi ɗyaŋ, ki kpɛɛ̀ ǹkìì-kìsay a ǹlàmì-ɓɛ̀pìrɛɛtìrɛ̀ àgwey, ìreè wu lɛy.

⁵²Nni Yeesus à kpaaghà nyi lɛ: Pɛ̀ɛ̀zi gàfàg yɔ̀ɔ̀ ɓi ɗyaŋ, lɛ ɓum ɓɛ̀cèm ɓɛ ɓɛ teri gàfàg, ɓɛ ɓiì wiì lɛ gàfàg.

⁵³Ù yii ɓi lɛ, ǹɗì lɛ, i ǹtɔɔgh Tààta wɛ̀m lɛ, a ghɛɓsi mɛ̀, à rì lɛ à rom yì mɛ̀ ɓum ɓɛ titom ɓigomìnɛ ɓìtuu lɛ ɓìtuu.

⁵⁴Lannɛ rìkalì ɗi kaàtà à Bɛ̀ll ɗi ri min ɓiì ronì? Lɛ kaàtà à Bɛ̀ll a kalag lɛ, ki ghɛɛ̀sɛɛ kì kìlɛɛ fɔɔlɔɔ.

⁵⁵Ɓi cààmɛ̀n kiǹ innɛ Yeesus à kpaaghà rì kìtuu ki ɓum kìn lɛ: Ɓì ghɛɛ mɛ̀ lɛ ǹɗì zyaàzyaa, nni ɓì yùu yì lɛ rì gàfàg rì ɓìgeŋ lɛ ɓi ɓaǹ mɛ̀? Kɔm̀ lɛ, mɛ̀ɛ ǹɗi ɓi naà-Bɛ̀ll ɓɛ̀ŋwos ɓɛ̀cèm ǹɗèèrèsàg ɓum, kɛ̀ ɓi ki ɓaǹ mɛ.

⁵⁶Wɔ̀lɛ ɓìɓan ɓiǹ ɓìcèm ɓi kilɛ̀ngà fɔlɔɔ lɛ di ɓìɓan ɓi ɓɛ̀kpaŋzì-ɓìɓan ɓɛ kangà ɓyɛɛ roǹ. Fɔɔnnɛ ɓɛ̀yilàg ɓɛ rinìghà nyi ɓɛ̀sɛ̀ɛ̀ ɓɛ̀cèm, ɓɛ ghɛŋɗàg.

⁵⁷Ɓumɓɛ ɓɛ ɓangà Yeesus ɓɛ kɛngà rì nyi yɛ̀ɛ ǹlàmì-ɓɛ̀pìrɛɛtìrɛ̀ àgwey ànɛ lɛ Kayif; wɔɔ nnɛ ɓɛ̀sɛ̀ɛ̀mɛn rì ɓɛ̀rèsàg-ɓìdɔ̀gsɛna ɓɛ taŋzɛ̀ngà.

⁵⁸Pyɛɛri à nɔɔnɔ̀ɔ̀tìghà nyi fìràɓ fìràɓ, à kpaŋ ɓi ǹlɛmɓog wu ǹlàmì-ɓɛ̀pìrɛɛtìrɛ̀ àgwey, à ɗiŋì à kɔ̀rì ɓi nyìinyìm à ɓɛ̀sujàà lɛ, à ghɛn yɛ̀ɛ ki ri ɓiì Syɔnì.

⁵⁹Ɓɛ̀pìrɛɛtìrɛ̀ ɓɛgwey, rì ɓum ɓɛ̀cèm ɓɛ ɓi sànèdìrɛŋ, ɓɛ kaakààghà kìɓan ki ɓɛpwàà ki ɓɛɛ tiri Yeesus ɓi ɗi lɛ ɓɛɛ wey nyi.

⁶⁰Kìɓan kifog, ɓɛ ghɛngà ɓi kiɓan ki ɓɛ ɓaghà lɛ ɓɛ kpaa, nsoò yɛ̀ɛ ɓum lɛɛ̀gwey ɓɛ rɛlìghà lɛ ɓɛɛ feg kìpwaà Yeesus ɓìɓan ɓi nyòò, kɛ̀ɛ̀ bee; fɔɔnnɛ ɓum ɓɛdɛŋ ɓɛ siitɛ̀ngày kì yùu ɓɛsɛ̀ɛ̀ ɓɛɓɛɛ̀, ɓɛ kpaa lɛ:

⁶¹Ŋwaànɛ̀n àa ǹkpaa lɛ: Ǹɗì lɛ ǹwàà naà-Bɛ̀ll, ǹki pɛ̀ɛ̀zi yɔ̀ ki toŋì ɓi mɛ̀ru mɛraa.

⁶²Nni ǹlàmì-ɓɛ̀pìrɛɛtìrɛ̀ àgwey a pɛ̀sɛǹgà aɗyòò à tɔg Yeesus lɛ: Kìɓan ki ɓumɓɛ ɓɛ kpaa ki ɓɛ raɗ rì wɔ̀ yòg, ù yin ɗi com ki ɓàghɛn ɓɔ?

⁶³Wɔ̀lɛ Yeesus à maamààghà lɔŋ. Nni ǹlàmì-ɓɛ̀pìrɛɛtìrɛ̀ àgwey à tɔgtìghà nyi lɛ: Ɓi ɗii ɗi Bɛ̀ll ànɛ à rì cencem ǹtɔɔgh lɛ ù kali ɓìsi ù ki kànɛn bɛ̀ɗ ǹkòo wɔ̀ yɛɛ ri Kiris Man à Bɛ̀ll

⁶⁴Yeesus à ɓàg nyi lɛ: Wàa kpaà. Nni ǹki kpaatii mìni lɛ, à tumɛ̀n ɓigomìnɛ, ɓì ri ghɛn Man à mum di à kɔ̀kɔrii ɓi weèlem à Bɛ̀ll à ìtèɗ wucèm, ɓì ki ghɛɛ̀di nyi di a yùyuiy aɗyoo ɓi ɓìkwìɗ.

⁶⁵Fɔɔnnɛ ǹlàmì-ɓɛ̀pìrɛɛtìrɛ̀ àgwey à wokà bim, à ghàskì ɓìlàà ɓi à ɓaghà rì ɓyɔ ɓi nyoo, à ki kpaa lɛ: Ɓì woogh ɓi yɛ̀ɛ à fengii Bɛ̀ll, tì yin lɛ tì kaatì ɓɛ̀wusìnɛ̀ɗ ɓɛdɛŋ, lɛ mìniìɓɔmiɗ ɓì woogh tìfena ti à fengii Bɛ̀ll, nni ɓì kpaa la?

⁶⁶Ɓum ɓɛmbog ɓɛ ɓaàg lɛ: À ghɛ̀ɛ̀sɛɛ lɛ ɓɛɛ wey.

⁶⁷Fɔɔnnɛ ɓɛ tuughàkà Yeesus tìtyɛɛ̀ ɓisu, ɓɛ ki rogi nyi ɓìkam; ɓɛro ɓɛmbog ɓɛ ɓoɓog nyi mɛ̀ɓɛn di ɓɛɛ kpaakpaa lɛ:

⁶⁸Mèsii, rèmi ŋwaànɛ à ɓoogh wɔ̀, u kali ɓìsi.

⁶⁹Wɔ̀lɛ Pyɛɛri à kɔ̀kɔ̀rìghà ɓi ǹlɛm̀ɓog fɔɔnnɛ giɓ adɛŋ ànɛ à ɓaghà ǹkìì-kìsay à yughày nyi à nyoo, a kpaa lɛ: Wɔ̀ɔ ǹɗì gìrìg ɓi ǹɗaŋ wu Yeesus ànɛ a Galile.

⁷⁰Kìɓan kìfog Pyɛɛri à roòzɛ̀ngà kìɓan kiǹ ɓi mis mɛ ɓum ɓɛ̀cèm, à kpaa lɛ: Ǹ-yii ɓi com ki u kɔ̀nkɔn kiǹ lɛ u kpaà.

⁷¹Yɛ̀ɛ à kɛ̀nkɛni a rìɗigì ɗi gari, giɓ adɛŋ à ghɛn nyi, à kpaa ɓumɓɛ ɓɛ ɓaghà wɔɔ lɛ: ŋwaànɛ àa ǹɗì ǹɗaŋ ri Yeesus ànɛ a Naazarɛt.

⁷²Nni Pyɛɛri à roòzɛ̀ngà tì nyi, à kànɛ̀n bɛ̀ɗ, à kpaa lɛ: Ǹ-yii ɓi ŋwaànɛ̀n.

⁷³Yɛ̀ɛ maa cààmɛ̀n à ghaghìghà, nni ɓumɓɛ ɓɛ ɓaghà wɔɔ ɓɛ tyoŋdɛ̀ngày ɓɛ kpaa Pyɛɛri lɛ: Ki ri lɔŋ saaɗ lɛ, ù rì kìbog ki ɓi ɓumɓɛ̀n, ɓisuulɛ, rìtòtòg ɗyɔɔ ɗi resii fɔlɔɔ.

⁷⁴Fɔɔnnɛ Pyɛɛri à tumɛ̀ngà rìkààkànàg ɗi bɛ̀ɗ, di a kpaakpaa lɛ, i m̀pwàa, Bɛ̀ll à cɛ̀m mɛ̀; ǹ-yii ɓi ŋwaànɛ̀n. Ǹlem à zag a ghaàgh kì rɔŋì ɓi cààmɛ̀n kɔm̀ kiǹ.

⁷⁵Nni Pyɛɛri à yìtìghà min yɛ̀ɛ Yeesus à kpaaghà nyi lɛ, ù rì mɛ̀ ɓiì roòzɛɛ gɛ̀n yiraa, di ǹlem à zag à ka rɔŋ ɓi; fɔɔnnɛ à kpagà gari à rèn à sìgtàg.