Read Bafia MATYOO 4 Bible Online

MATYOO 4 - Bafia bible

MATYOO 4

¹Ajɛ̀m ìnɛn nnɛ Ǹghay à kèngɛ̀ rì Yeesus ɓi-reɓ lɛ Satàn a feèghrɛn nyi.

²Yɛ̀ɛ Yeesus à ghagsighà ɓɛ̀ŋwos mɛtin mɛɓɛɛ̀ rì mɛ̀ru mɛ̀tin mɛɓɛɛ̀ wɔɔ kɛ̀ɛ ɗi com, nni zày ì kɔ̀ngà nyi.

³Fɔɔnnɛ ǹfèèghrɛ̀n-ɓum à tyɛ̀ɛ̀tɛ̀ngà nyi jàŋbog, à kpaa nyi lɛ: I ù rì Man à Bɛ̀ll kali gɔ̀g yi, yɛɛ ghay ɓìɗilàg.

⁴Yeesus à ɓàg nyi lɛ: Ki ri kì kànɛn lɛ: Àa ɓìɗilàg ɓyɔ rì ɓyɔ ɓyɛɛ ri ɓiì kìi lɛ mum a ghɛɓ, lɔŋ jɛ̀ɛ̀ bimiɗ ìnɛ ì kpaŋiì ɓi ŋwɔm wu Bɛ̀ll.

⁵Nni Satàn a tekà nyi, à kɛ̀n ɗì nyi ɓi bàn ìnɛ ì rì ǹtɛnɛn, à ɓɔgsì nyi ɓi fìran fi naà-Bɛ̀ll aɗyòò,

⁶à kpaa nyi lɛ: I ù rì Man à Bɛ̀ll lɛla ɓi zi, lɛ ki ri kì kànɛn lɛ: Bɛ̀ll à ɓiì kpaà ɓum ɓii ɓɛ titom lɛ, ɓɛɛ yu wɔ̀ kì lɛ̀ŋlɛŋi ɓi ɓyàg ɓyaa, lɛ kɔ̀ɔ tuusi ikòò ɓi gɔ̀g.

⁷Yeesus à kpaa nyi lɛ: Ki ri girig kì kànɛn lɛ: Kɔ̀ɔ fèèghrɛn Kan Bɛ̀ll wɔ̀ɔ̀.

⁸Fɔɔnnɛ Satàn a tɛ̀gtìghà Yeesus lɛ leg à kɛ̀n ɗì nyi ɓi coo dòn aɗyoo à rèsi nyi ɓìlɔ̀ŋ ɓi ɓi ziinɛ ɓìcèm, rì rìkem ɗi ɓi ɓìlɔ̀ŋ ɓiǹ.

⁹À ki kpaa nyi lɛ: Ǹɗì wɔ̀ ɓiì faà ɓyom ɓi ɓìcèm di ù ɓaagh mɛ̀ mɛ̀ɗu asu, ù ɓɔgsì mɛ̀.

¹⁰Nni Yeesus à ɓàkà nyi lɛ: Satàn, pɛ̀sɛn mɛ̀ ɓi mis! Lɛ ki ri kì kànɛn lɛ: Ù ghɛ̀ɛ̀sɛɛ kì ɓɔgsii Kan Bɛ̀ll wɔ̀ɔ̀, lɔŋ nyi cɛ̀ncii nnɛ ù kì kìsay.

¹¹Fɔɔnnɛ Satàn à caɗkà min Yeesus. Ɓum ɓɛ titom ɓɛ yu nyi a nyoo, ɓɛ kikì nyi tìtom.

¹²Yɛ̀ɛ Yeesus à wokà lɛ, ɓɛ mɓani Zyaŋ, ɓɛ piìg ɓi naà-zày, nni à kɛ̀ngà a Galile.

¹³À pɛ̀sɛ̀ngà a Naazarɛt, à kɛ̀n kì kɔ̀rii a Kapɛrinawum ànɛ à rì jàŋbog rì rìɓày à kìkòn, ɓi kìden ki zi ki ɓɔn ɓɛ Zaɓulon ri ɓɛ Nɛftalii.

¹⁴A kìghà fɔlɔɔ lɛ, a roòzi rìkpaa ɗi ǹkpaŋzì-ɓìɓan Ezayii à kpaaghà lɛ:

¹⁵Ziì Zaɓulon rì ì Nɛftalii, jaŋ yi yi ri ɓi bèn ì rìɓày, nsoò lɛ cɛcɛɗ ki Zyuridɛŋ, Galile à ɓumɓɛ ɓɛ a yin Ɓɛ̀yudɛ̀n!

¹⁶Kìlɔ̀ŋ ki ki ɓaghà kìkɔ̀kɔriyɛn ɓi birìm, ki ǹghɛɛ coo kitɛɛtɛ̀n; fɔɔnnɛ kìtɛɛtɛn ki ǹlòmi a ɓɛ̀roɓɛ ɓɛ ǹɗì ɓi kìlɔ̀ŋ ki ɓi birìm ì rìwu ɓi ɗùm.

¹⁷Ɓi cààmɛ̀n kiǹ innɛ Yeesus à tumɛ̀ngà rìkpaakpàà ɗi ɓìɓan ɓi Bɛ̀ll, à kakàlì ɓum lɛ: Lɔ̀ɔ̀ghrɛɛna mɛ̀rem, lɛ kìlɔ̀ŋ ki aɗyoo ki ti jàŋbog.

¹⁸Yɛ̀ɛ Yeesus à kɛ̀ɛ̀kɛ̀ɛ̀ghà ɓi bèn ì rìɓày ànɛ a Galile nni à ghɛngà rìgeni ɗi lɛ rì Simɔn ànɛ ɓɛ ǹɗegì lɛ Pyɛɛri rì Andire à geni di ɓɛɛ pìpig dam ɓi rìɓày lɛ ɓɛ ɓaghà ɓɛ̀pììgh-dam.

¹⁹Nni à kpaaghà ɓɔ lɛ: Nɔ̀ɔ̀tiina mɛ̀, di ǹki lɛ ɓi ɓa ɓɛ̀syoŋì-ɓum.

²⁰Fɔɔnnɛ ɓɛ ghaskà kì naŋì dam yaa, ɓɛ nɔ̀ɔ̀tì nyi.

²¹Yɛ̀ɛ à kɛ̀ɛ̀dìghà tì beèbɛ̀y, nni à ghɛɛdìghà tì rìgeni ɗìdɛŋ ɓɛ̀sɛ̀ɛ̀ ɓɛɓɛɛ̀rɛn, lɛ rì Zyag rì Zyaŋ ɓɔn ɓɛ Zeɓede. Ɓɛ ɓaghà ɓi kìkɔm rì Zeɓede à seŋi wàà, ɓɛ ki pèeghpegsɛ̀n dam yaa, nni Yeesus à reŋìghà ɓɔ.

²²Fɔɔnnɛ ɓɛ ghaskà kì rinii lɛ rì dam yaa, rì seŋi wàà, ɓɛ nɔɔ̀tì nyi.

²³Yeesus à rerènìghà ziì Galile bimiɗ di a rèresi ɓum ɓìɓan ɓi Bɛ̀ll ɓi naa yi bɔ̀ŋzɛ̀n, à lààlàmɓɛ̀n Syeesyee à Ɓɔlɛ à kìlɔ̀ŋ ki Bɛ̀ll. À wɔ̀ɔ̀wɔ̀ɔ̀zì tìroɓ rì ɓìlɛm mɛ̀kuu mɛ̀cèm.

²⁴Rìkem ɗii ɗi saaghà jàŋbimiɗ a Sirii, fɔɔnnɛ ɓɛ yuyùghày nyi lɛ, rì ɓum ɓɛ̀cèm ɓɛ ɓɛ roròɓkà tìroɓ mɛ̀kuu mɛ̀kuu rì, ɓɛ ɓɛ wowòkà rìkɛŋ bee lɛ bee, ri ɓɛ̀roɓɛ ɓɛ ɓaghà rì ɓìɓeɓtàg ɓi mɛghay, rì ɓɛ̀roɓì kìtìs, rì ɓìsɛkɛ̀rɛ̀, Yeesus à ki wɔ̀ɔwɔɔ̀zì ɓɔ.

²⁵Ɓìtuu ɓi ɓum ɓi pɛsɛ̀ngày lɛ, rì a Galile, rì a bàn ǹtɛ̀ɗ, rì a Yorisalɛm, rì a Zyude, ri cɛcɛɗ ki Zyuridɛŋ, ɓi nɔɔ̀tì nyi.