Read Bafia MATYOO 9 Bible Online

MATYOO 9 - Bafia bible

MATYOO 9

¹Yeesus à ɓɔkà kìkɔm, à syàà rìɓày à kɛ̀n ɓi bàn yìì[1].

²Fɔɔnnɛ ɓɛ yughày nyi rì kìsɛkɛ̀rɛ̀ kì nɔ̀nɔŋiyɛn ɓi kon. Yɛ̀ɛ Yeesus à ghɛngà rìgherɛ̀n ɗi ɓɛ ɓaghà rì ɗyɔ, nni à kpaaghà kìsɛkɛ̀rɛ̀ kiǹ lɛ: Man wɛm̀ kɔ̀ɔ risi, com ki yin, ɓìɓe ɓyɔɔ ɓi ti ɓì cenɛn.

³Ɓisuu rìkpaa ɗìn nnɛ ɓɛ̀rèsàg-ɓìdɔ̀gsɛna ɓɛ fekà ɓi mɛ̀rem maa lɛ: Ŋwaànɛ a feefengì Bɛ̀ll.

⁴Yeesus à yighà ɓɛ̀fèg ɓaa, nni à tɔkà ɓɔ lɛ: Ɓisuucɛ nnɛ ɓi rì rì ɓìɓeɓtàg ɓi ɓɛfèg ɓi mɛ̀rem min?

⁵Kìɓan aɗi kɛɛ yeesɛɛ fòò? Rìkpaa ɗi lɛ ɓìɓe ɓyɔɔ ɓi ti ɓìcenɛn gìn, ɗi lɛ pɛ̀sɛn aɗyoo u kɛɛ̀ghi?

⁶Nni ɓi ɗi lɛ ɓi yi lɛ, Man à mum à rì rì ìtèɗ wulɛ à cenɛ̀n ɓum ɓìɓe fɛ ɓi ziinɛ, Yeesus à kpaaghà kìsɛkɛ̀rɛ̀ kiǹ lɛ: Pɛ̀sɛn aɗyoo, u teɗ kon wɔɔ̀ u sug a mɛɛ mɔɔ.

⁷Fɔɔnnɛ ŋwaànɛ̀n à pɛ̀sɛ̀ngà aɗyoo, à sug a mɛɛ mii.

⁸Yɛ̀ɛ gwìy ì ɓum ì ghɛngà fɔlɔɔ, ìris wu ɓan yɔ̀, ì ki kemzi Bɛ̀ll lɛ, à mɛ fa ɓum rìkuu ɗi itèɗ yɛ̀ɛ ɗiǹ.

⁹Yɛ̀ɛ Yeesus à pɛ̀sɛ̀ngà foo à tumɛ̀n ɗìghaàgh, fɔɔnnɛ à ghɛngà ŋwaàdɛŋ ɗii lɛ Matyoo di à kɔ̀kɔrii jàŋ inɛ ɓɛ m̀peeghì làmpoŋ̀, à kpaa nyi lɛ: Nɔ̀ɔ̀ti mɛ̀. Matyoo à pɛ̀sɛ̀n aɗyoo, a nɔ̀ɔ̀tì nyi.

¹⁰Yeesus à ɗiɗìghà ɓìɗilàg a mɛɛ mɛ Matyoo; ɓɛ̀terì-làmpoŋ̀ lɛɛ̀gwey rì ɓɛ̀kìì-kìɓe ɓɛ yughà kì kɔ̀rii ɓi ɓyom ɓi ɗiyɛn ǹɗaŋ ri Yeesus, rì ɓɛ̀yilàg ɓii.

¹¹Yɛɛ̀ Ɓɛ̀fàrìzyɛŋ ɓɛ ghɛngà fɔlɔɔ, ɓɛ tɔg ɓɛ̀yilàg ɓii lɛ: Ɓisuucɛ nnɛ ǹɗèsàg wìn a ɗiɗi ǹɗaŋ ri ɓɛ̀terì-làmpoŋ̀ rì ɓɛ̀kìì-kìɓe?

¹²Yɛ̀ɛ Yeesus à wokà rìkpaa ɗyaa ɗiǹ, nni à kpaaghà lɛ: Ɓumɓɛ ɓɛ yin ɓiì roroɓi, ɓɛ ti ɓɛ̀ kɛɛ̀ ɓa zày rì dɔgtà, lɔŋ ɓɛ̀roroɓ ɓɛɛ ti ɓɛ ɓalàg rì zày yìì.

¹³Kɛ̀ɛna kì yilaagh azi anɛ ɓi jɛ̀ɛ̀ ìnɛ: Ǹkeesii ǹɗem wu nyìighnyìg à cee ɓìfùna ɓi ɓìtuwe. Lɛ, ǹ-yùghà ɓi ki reŋii ɓumɓɛ ɓɛ ri lɛ saaɗ, ǹ-yùghà lɔŋ ki reŋii ɓɛ̀kìì-kìɓe.

¹⁴Nni ɓɛ̀yilàg ɓɛ Zyaŋ ɓɛ yughày Yeesus a nyoo, ɓɛ tɔg nyi lɛ: Ɓisuucɛ nnɛ ɓìsi rì Ɓɛ̀fàrìzyɛŋ tì ti tì cèlàg ɓìɗilàg ɓyààmɛ̀n ɓidɛŋ, ɓɛ̀yilàg ɓɔɔ ɓɛ̀ kɛɛ̀ cèli?

¹⁵Nni Yeesus à ɓàkà ɓɔ lɛ: Ɓumɓɛ ɓɛ ri ɓɛ̀reŋiyɛn a tìcàɓ ti riwɛy ɓɛ yin lɛ ɓɛ ɓa rì rìnɗemikɛŋɛn, cààmɛ̀n ki ŋwaà-rìwɛy à kaka ǹɗaŋ rì ɓɔ. Cààmɛ̀n ki lɛ ɓɛɛ pisi ŋwaà-rìwɛy ɓi nyìinyìm wàà ki tiì. Cààmɛ̀n kiǹ kɛɛ̀ki ɓɛ ri ɓiì cèlii ɓiɗilàg miì.

¹⁶Ŋwaà yin lɛ à teɗ Zyònà ì kìlàà ki nyɔn lɛ a raɗki kìtùg ki kilàà miì, ɓisuulɛ, Zyònà ì nyɔn ì rì ɓiì tùnii kilàà ki kitùg, ɗyas ɗi teghɛ̀n tì.

¹⁷Ɓaa ki foŋ ɓi mɛrɔ̀g mɛ nyɔn ɓi ɓìtùg ɓi ɓiren, i ù kìi fɔlɔɔ, ɓìren ɓi wulàg, mɛ̀rɔ̀g mɛ ɗyɛɛrɛn, ɓìren ɓyɔmiɗ ɓi ki ɗyaŋ. Wɔ̀lɛ ɓɛɛ̀ fogi mɛrɔ̀g mɛ nyɔn ɓi ɓìren ɓi nyɔn; fɔɔnnɛ ɓyom ɓìn ɓìcèm ɓi finɛ̀n.

¹⁸Yɛ̀ɛ Yeesus à ɓaghà di a ka tòtog fɔlɔɔ ri ɓɔ, nni rìfòm ɗi Ɓɛ̀yudɛ̀n ɗiɗɛŋ ɗi yughày ɗi ɓag nyi mɛ̀ɗu asu, ɗi kpaa lɛ: Gɔ̀n yɛ̀m ì wii yì lɔŋ ɓigomìnɛ, nni yu, u saagh yɔ̀ ɓyàg ɓi nyoo di yɛ̀ɛ ghemɓɛn.

¹⁹Yeesus à pɛ̀sɛ̀ngà aɗyoo, à nɔ̀ɔ̀tì nyi ǹɗaŋ ri ɓɛ̀yilàg ɓii.

²⁰Nni giɓ adɛŋ ànɛ à roròɓkà fìroɓ fi lɛ bwaɓ yɛɛ kpaŋkpaŋ nyi ɓyààmɛ̀n ɓìcèm, di fìroɓ fìn fi ti bèg ǹtɛ̀ɗ rì yiɓɛɛ̀, à yùghày Yeesus ajɛ̀m, à kòm rìkeɓ ɗii ɗi kilàà.

²¹À fèfèkà ɓi nɗem wii lɛ: I m̀mànɛɛ kì kòmi nsoò kìlàà kii, di ǹwɔ̀ni.

²²Yɛ̀ɛ Yeesus à lɔ̀ɔ̀ghrɛ̀ngày, à ghɛn giɓ anɛ̀n, à kpaa lɛ: Iyà kɔ̀ɔ risi, com ki yin, rìgherɛ̀n ɗyɔɔ ɗi wɔɔ̀zii wɔ̀. Fɔɔnnɛ giɓ anɛ̀n à ghàskà kì wɔ̀ni.

²³Yɛ̀ɛ Yeesus à kpagà a mɛɛ mɛ rifòm ɗiǹ à tanɛ̀n di ɓɛ̀rɔŋì-zàro ɓɛ ti wɔɔ, di gwìy ì ti lɛ nyìnì-nyìnì, ɓi riwù, nni à kpaaghà lɛ:

²⁴Ghaaghraaghnà, mutyàà giɓ anɛ, à wii ɓì, à rì yɛɛri ɓi fìlo, nni ɓumɓɛ̀n ɓɛ tumɛ̀ngà nyi rìwɔ̀wɛ̀y.

²⁵Yɛ̀ɛ gwìy ì ɓum ìnɛ̀n ì panìghà, nni à ɗiŋighà ɓi naa, à ɓan mutyàà giɓ anɛ à wughà ànɛn ɓi càg; mutyàà giɓ a pɛ̀sɛ̀n aɗyoo.

²⁶Fɔɔnnɛ gom ì kìɓan kiǹ ì sààghà ɓi kilànà ki zi kiǹ kìcèm.

²⁷Yɛ̀ɛ Yeesus à pɛ̀sɛ̀ngà rì rìghaàgh, nni ɓɛ̀ɗyaŋɗyàŋ ɓɛɓɛɛ̀ ɓɛ nɔɔ̀tìghà nyi, ɓɛ laàlàmɓɛ̀n jɛ̀ɛ̀ aɗyoo lɛ: Man à Davit, wogha ɓìsi nyìighnyìg.

²⁸Yɛ̀ɛ à kpagà a mɛɛ, nni ɓɛ̀ɗyaŋɗyàŋ ɓɛ̀n ɓɛ tyoŋdɛ̀ngày nyi a nyoo, à kpaa ɓɔ lɛ: Ɓì gherɛɛ nya lɛ ǹɗì lɛ m̀ɓoo mìni? Ɓɛ̀roɓɛ̀n ɓɛ ɓaàg nyi lɛ: Ɛ̀ɛ̀ Kan, tì ghèrɛɛ.

²⁹Fɔɔnnɛ à kòmgà min ɓɔ ɓi mis à kpaa lɛ: Kɛɛ kilɛn lɔŋ yɛ̀ɛ ɓyàa gherɛɛ lɛ ki ri lɛ ki kilɛ̀n.

³⁰Nni mis maa mɛ ŋwarɛ̀ngà, Yeesus à rɔ̀gsɛ̀n min ɓɔ syeesyee à rìrɔ̀gsɛ̀n à kpaa ɓɔ lɛ: Kɛ̀ ɓi fèg ki kìi lɛ, ŋwaàdɛŋ a yi kìɓan ki.

³¹Lɔŋ yɛ̀ɛ ɓɛ kpagày foo, ɓɛ tum rìsààtì ɗi ɗii ɗi Yeesus kòdò ànɛn bimiɗ.

³²Lɔŋ yɛ̀ɛ ɓɛ̀ɗyaŋɗyàŋ ɓɛ̀n ɓɛ kɛngà, ɓɛ yu tì Yeesus ɗì ŋwaàdɛŋ ànɛ à ɓaghà rì kìɓeɓtàg ki nghay, nyi mùm-mùm.

³³Yɛ̀ɛ à nàɓkà kìɓeɓtàg ki nghay kìn, mùm-mùm anɛ̀n à tòòghrɛ̀n; gwìy ì ɓum ìnɛ ì ɓaghà wɔɔ i kuuràkà, ì kpaa lɛ: Rìkuu ɗi kiɓan ɗi fɛlɛ ɗi ka ghɛnɛ̀ngà ɓi a Isirayɛl cààmɛ̀n kidɛŋ.

³⁴Kìɓan kifòg Ɓɛ̀fàrìzyɛŋ ɓɔɔ kpaakpààghà lɛ: Yeesus a nànaɓ ɓiɓeɓtàg ɓi mɛghay rì ìtèɗ wu rifòm ɗi ɓiɓeɓtàg ɓi mɛghay.

³⁵Yeesus à kɛ̀ɛ̀kɛ̀ɛ̀ghà lɛ rì ɓi bàn yìcèm rì ɓi ɓɔɔ ɓilɔ̀ŋ ɓɛ̀cèm di a rèresi ɓum ɓìɓan ɓi Bɛ̀ll ɓi naa yaa yi bɔ̀ŋzɛ̀n, à kakàlì Syeesyee à Ɓɔlɛ à kìlɔ̀ŋ ki Bɛ̀ll, à ki wɔ̀ɔwɔɔ̀zì tìròɓ, rì ɓìlɛm mɛ̀kuu mɛ̀cèm.

³⁶Yɛ̀ɛ à ghɛngà ɓìtuu ɓi ɓum, nni nyìighnyìg ì kìghà nyì rì ɓyɔ, lɛ ɓumɓɛ̀n ɓɛ ɓaghà ɓɛ̀ fɔlɛn, kɛ̀ɛ̀ ìtèɗ ɓi nyoo fɛlɛ yɛ̀ɛ jɔ̀ɔ̀ yi yi ri kɛ̀ɛ̀ ɓɛ̀ɓèŋì.

³⁷Fɔɔnnɛ à kalìghà ɓɛ̀yilàg ɓii lɛ: Mɛ̀saŋ mɛ ri mɛ̀ tèghɛn, kìɓan kifog ɓɛ̀kìì-ɓìsay lɛsàg.

³⁸Ɓɔ̀ŋzaaghna min ŋwaànɛ à rì rì mɛ̀saŋ lɛ a rom yì ɓɛ̀kìì-ɓìsay ɓi dɛm yiì ì mɛ̀saŋ.