Read Bafia MARIKUS 1 Bible Online

MARIKUS 1 - Bafia bible

MARIKUS 1

¹Rìtumɛ̀n ɗi Syeesyee à Ɓɔlɛ à Yeesus Kiris Man à Bɛ̀ll.

²Fɛlɛ yɛ̀ɛ ki ri kìkànɛn ɓi kaàtà à ǹkpaŋzì-ɓìɓan Ezayii lɛ: Ghɛna, ǹɗomi wɔ̀ mum Wɛm̀ à fìtom beèbɛ̀y, lɛ a pegsɛn wɔ̀ bee.

³Jɛ̀ɛ̀ ìnɛ ìrì jɛ̀ɛ̀ ì roànɛ a làalamɓɛ̀n yì ɓi-reɓ lɛ: pègsɛɛna bee yi Kan ɓi rɛsàg yɔ lɛ saaɗ.

⁴Nni Zyaŋ à peeghày ɓi-reɓ, à ɓààɓàɓtì ɓum à ki làalamɓɛ̀n lɛ, ɓum, ɓɛɛ ɓɛɛ lɔɔ̀ghrɛn mɛ̀rem, ɓɛ̀ ɓaɓtɛ̀n, fɔɔnnɛ Bɛ̀ll a cenɛn mìni ɓìɓe ɓyaa.

⁵Ɓum ɓɛ̀cèm ɓɛ ɓi ziì Zyude, rì ɓɛ a Yorisalɛm, ɓɛ pɛɛ̀pɛ̀sɛ̀ngày di ɓɛɛ̀ yùyuiy a lɔ̀ŋkii, nyii ki ɓàaɓaɓtì ɓɔ ɓi ǹsyòm wulɛ Zyuridɛŋ, di ɓɛ mɛ kpàki ɓiɓe ɓyaa.

⁶Zyaŋ à ɓaghà ri kìlàà ki ɓɛ tiŋi ri nyùŋ yi syàmoo, à ŋirɛ̀n kànɗa à gòò ɓi kìɓon, à ki ɗiɗi lɛ, rì ɓìtàtàɗ, rì mɔ̀ɔ mɛ ilòò wu ɓɛ pisii yì ɓi cog.

⁷A kakàlìghà ɓum lɛ: Roànɛ à rìì mɛ̀ ajɛ̀m, à cee mɛ̀ ɓi-tèɗ, ǹkpaŋi ɓi ɓi ǹkoŋ wulɛ ǹlaŋi, ǹfùmì mɛ̀ɗig mii mɛ gòò.

⁸Mɛ̀, m̀bàɓtii mìni rì mɛ̀nig, kìɓan kifog nyii ri mìni ɓiì ɓàɓtii ri Kìtɛntɛ̀ɛ̀n ki Nghày.

⁹Lɔŋ ɓi mɛ̀ru mɛ̀n, Yeesus à pɛsɛngày a Naazarɛt, ɓi kiden ki zi ki a Galile à yùy, Zyaŋ à ki ɓàɓti nyi ɓi Zyuridɛŋ.

¹⁰Yɛ̀ɛ Yeesus à kpaŋkpàŋgày ɓi mɛ̀nig, nni à ghɛngà di ɗyoo ɗi nɛmɓɛɛ, Kìtɛntɛ̀ɛ̀n ki Nghay ki sɛnsɛ̀n yì nyi ɓi nyoo fɛ lɛ yɛ̀ɛ kuùkuù.

¹¹Jɛ̀ɛ̀ i ki ɓɔ̀ɓ yi aɗyoo lɛ: Ù ri Man wɛm̀ à ǹɗem, ɓi wɔ̀ nnɛ ǹfoŋi kìnyàà kɛm̀ kìcèm.

¹²Ajɛ̀m ìnɛn, nni Nghay à Bɛ̀ll à ghàskà kì tinii Yeesus lɛ a kɛǹ ɓi-reɓ.

¹³Fɔɔnnɛ à ghagsighà mɛ̀ru mɛ̀tin mɛɓɛɛ̀ ɓi-reɓ wiǹ, Satàn a fèèghrɛ̀n nyi wɔɔ. À ghɛghɛ̀ɓkà wɔɔ ri nyàm yi ɓi cog, wɔ̀lɛ ɓum ɓɛ titom ɓɛ kikìghà nyi tìtom.

¹⁴Yɛ̀ɛ ɓɛ ɓaghà di ɓɛ mɛ ɓan Zyaŋ, Yeesus à kɛ̀ngà a Galile, à kakàlì Syeesyee à Ɓɔlɛ à Bɛ̀ll.

¹⁵À kpaakpààghà ɓum lɛ: Cààmɛ̀n ki ghɛ̀ɛ̀sɛɛ, kìlɔ̀ŋ ki Bɛ̀ll ki mɛ tyɛ̀ɛ̀tɛn yi; lɔ̀ɔ̀ghrɛɛna mɛ̀rem, ɓi gherɛn Syeesyee à Ɓɔlɛ.

¹⁶Yɛ̀ɛ Yeesus à ghaghàghìyà ɓi ǹwɔŋì wu riɓày ànɛ a Galile, nni à ghɛngà ɓɛ̀-Simɔn ɓɛɛ̀ Andire à geni di ɓɛɛ̀ pìpig dam ɓi rìɓày, lɛ ɓɛ ɓaghà ɓɛ̀pììgh-dam.

¹⁷Yeesus à kpaa ɓɔ lɛ: Nɔ̀ɔ̀tiina mɛ̀, di ǹki lɛ ɓi ɓa ɓɛ̀syòŋì-ɓum.

¹⁸Fɔɔnnɛ ɓɛ ghaskà kì càri dam yaa, ɓɛ nɔɔ̀tì nyi.

¹⁹Yɛ̀ɛ à kɛ̀ɛ̀dìghà tì asu lɛsàg, nni à ghɛngà Zyag, man à Zeɓede ɓɛɛ Zyaŋ à geni; ɓɛ ɓaghà ɓi rìpègsɛ̀n ɗi dam yaa ɓi kìkɔm ɓiɗùm.

²⁰Fɔɔnnɛ Yeesus à ghaskà ɓɔ ki reŋii, ɓɛ̀roɓɛǹ ɓɛ rinì Zeɓede à seŋi wàà ɓi kìkɔm, rì ɓɛ̀kìì-ɓìsay, ɓɛ nɔɔ̀tì nyi.

²¹Nni ɓɛ kɛngà a Kapɛrinawum, Yeesus à ɗiŋì ɓi naà-bɔ̀ŋzɛ̀n ŋwosi Saɓàt; à tumɛ̀n rìrèsàg ɗi ɓum.

²²Ɓum ɓɛ kuuràkà rìrèsàg ɗii, ɓisuulɛ ɗi ɓaghà ɓi yɛ̀ɛ ɗi ɓɛ̀rèsàg-ɓìdɔ̀gsɛna ɓi Ɓɛ̀yudɛ̀n; rìrèsàg ɗii ɗi ɓaghà ɗi ŋwaànɛ ɓɛ faa ìtèɗ wulɛ a reèrèsàg ɓum.

²³Ŋwaàdɛŋ ànɛ à ɓaghà rì kìɓeɓtàg ki nghay à ɓaghà kɔmiɗ ɓi naà-bɔ̀ŋzɛ̀n ì ɓumɓɛ̀n.

²⁴Fɔɔnnɛ ŋwaànɛ̀n à syangà jɛ̀ɛ̀ aɗyoo lɛ: Ki rì wɔ̀ la ri ɓìsi, Yeesus ànɛ a Naazarɛt! wàa yùu yì fɛ lɛ u cuùsi ɓìsi? Mɛ̀ ǹkonaagh ki yiì rìkuu ɗi mum ɗi ù rì; wɔ̀ yɛɛ ri roànɛ à rì ǹtɛnɛn, lɛ Bɛ̀ll yɛɛ romiì wɔ̀.

²⁵Nni Yeesus à fwààdɛ̀ngà kìɓeɓtàg ki nghay kìn, à kpaa kɔ lɛ: Maarɛn foo, ù ki pɛ̀sɛn ɓi ŋwaànɛ̀n.

²⁶Fɔɔnnɛ kìɓeɓtàg ki nghay kìn ki narìghà ŋwaànɛ̀n lɛ saɗ-sààɗ, ki kpaŋ ɓi ŋwaànɛ̀n di kɛɛ̀ syansyàn jɛ̀ɛ̀ aɗyòò.

²⁷Ìris wu ɓangà ɓum ɓɛ̀cèm ɓɛ ɓɛ ghɛngà kìɓan kiǹ ɓɛ tɔɔ̀ghtɔ̀ɔ̀ghrɛ̀n ɓɔ rì ɓɔ lɛ: Cɛ kɛɛ ri kɔmiɗ lɛ! wooghna nyɔɔnyɔn à dɔgtɛ̀n ànɛ a rèresi ri ìtèɗ wu rilàmì; a kɔ̀ɔkɔmɛ̀n lɛ rì ɓìɓeɓtàg ɓi mɛghay miì, ɓi ki kìki nyi mɛ̀wog'

²⁸Fɔɔnnɛ rìkem ɗi Yeesus ɗi ghaskà ki sàa ɓi ziì Galile bimiɗ.

²⁹Yɛ̀ɛ ɓɛ kpagày ɓi naà-bɔ̀ŋzɛ̀n, nni ɓɛ kɛngà rì ɓɛ̀-Zyag ɓɛɛ Zyaŋ a mɛɛ mɛ ɓɛ̀-Simɔn ɓɛɛ̀ Andire.

³⁰Jɛɛ gili Simɔn à ɓaghà kìnɔ̀ŋnɔ̀ŋ lɛ à ɓaghà lɛ tɔ̀gtɔ̀g. Fɔɔnnɛ ɓɛ fyɛɗmɛ̀ngà kìkpaà Yeesus fìroɓ fi giɓ anɛ̀n.

³¹Yeesus à tyòŋdɛ̀n nyi jàŋbog, à ɓan nyi ɓi càg, à pɛ̀sì nyi aɗyòò; rìɓa ɗi à ɓaghà lɛ tɔ̀gtɔ̀g ɗi leg, à tumɛ̀n ɓɔ rìkàà ɗi ɓiɗilàg.

³²Yɛ̀ɛ cɛ̀ɛŋkò ki kpagà, ɗi ŋwos a mɛ cèŋ, nni ɓɛ yughày Yeesus lɛ, rì ɓum ɓɛ̀cèm ɓɛ ɓɛ roròɓkà, ri ɓɛ ɓɛ ɓaghà rì ɓìɓeɓtàg ɓi mɛghay.

³³Fɔɔnnɛ ɓum ɓɛ̀cèm ɓɛ ɓi bàn ìnɛn ɓɛ kunìghà asuunaa.

³⁴Yeesus à wɔ̀ɔ̀zì ɓum lɛɛ̀gwey ɓɛ ɓɛ roròɓkà tìroɓ mɛ̀kuu lɛ mɛ̀kuu; à nàɓ girig ɓìɓeɓtàg ɓi mɛghay lɛɛ̀gwey, wɔ̀lɛ, à faghà ɓi ɓiɓeɓtàg ɓi mɛghay ìtèɗ wulɛ ɓyɛɛ toòghrɛn, lɛ ɓi yighà nyi lɛ syeesyee.

³⁵Yɛ̀ɛ duri i ɓaghà di ì ti jàŋbog ɗì rìtan, wɔ̀lɛ di birìm ì kaka lɛɛ̀gwey, Yeesus à pɛ̀sɛ̀ngà aɗyoo à kpaŋ ɓi dan, à kɛ̀n jàŋ inɛ ɓum ɓɛ wuɓsɛ̀ngà ɓi, à tumɛ̀n rì ɓɔ̀ŋzàg ɗi Bɛ̀ll.

³⁶Fɔɔnnɛ Simɔn, ri ɓumɓɛ ɓɛ ɓaghà rì ɓɔ, ɓɛ tumɛ̀ngà nyi rìkaa kìɓan ɗi kìɓan.

³⁷Yɛ̀ɛ ɓɛ tanɛ̀ngà nyi, ɓɛ kpaa nyi lɛ: Ɓum ɓɛ̀cèm ɓɛɛ tɔtɔg wɔ.

³⁸Yeesus à ɓàg ɓɔ lɛ: Ti kɛǹ jàŋ idɛŋ ɓi ɓɔɔ bàn ɓɛ ɓɛ wuɓsɛɛ fɛ̀, nkalì girig Ɓɔlɛ à Bɛ̀ll wɔɔ, lɛ ɓisuu kisay kiǹ innɛ màa kpaŋiì.

³⁹Fɔɔnnɛ à kɛ̀ngà di a rereni ziì Galile à kakàlì Ɓɔlɛ à Bɛ̀ll ɓi naa yi bɔ̀ŋzɛ̀n à ki nànaɓ ɓiɓeɓtàg ɓi mɛghay.

⁴⁰Kukwiy adɛŋ à yùghà Yeesus a nyoo, à kpì nyi asu rì mɛ̀ɗu, à yɛ̀gsì nyi ɓyàg à kpaa lɛ: I ki kɔni wɔ̀, ù rì lɛ ù kì lɛ m̀ɓa ti lɛ syeesyee ɓi nyoo yɛ̀m.

⁴¹Fɔɔnnɛ nyìighnyìg ì kìghà Yeesus rì ŋwaànɛ̀n, à nàm càg à kòm nyi, à kpaa lɛ: Ki kɔni mɛ̀, ɓaya lɛ syeesyee ɓi nyoo yɔ̀ɔ̀.

⁴²Nni kwiy a ŋwaànɛ̀n à ghaskà kì kùrɛɛ, nyoo yìì i sugtì lɛ syeesyee.

⁴³Yeesus à ɓaghà lɛ, à mɛ rɔgsag nyi syeesyee à rìrɔ̀gsàg, à ghàs nyi kì càri lɛ a kɛǹ.

⁴⁴À kpaa nyi lɛ: Kɔ̀ɔ fèg mum kì ɓùŋi kiɓan ki; kɛ̀na lɔŋ ki rèsɛɛ ɓi mis mɛ pìrɛɛtìrɛ̀, u ki fa rifa ɗi Moyis à kpaaghà lɛ ɓɛɛ falag ɓisuu zòghɛ̀n yɔ̀ɔ̀, lɛ kɛɛ ɓa ɓɔ kìrèmzɛna ki lɛ ù mɛ wɔ̀n.

⁴⁵Kìɓan kifog, yɛ̀ɛ ŋwaànɛ̀n à kɛ̀ngà, nni à tumɛ̀ngà rìlààlàmɓɛ̀n ɗi ɓɔlɛ à kìɓan kiǹ, à sààsààtì nyi lèg ànɛ lɛ Yeesus à ɓatìghà ɓi lɛ à ɗiŋì ɓi bàn ìdɛŋ ɓi mɛ̀tàna. Wɔ̀lɛ àa ǹti à kɔ̀ràg ɓi ɓɛ̀kòdò ɓɛ ɓɛ lɛŋzɛɛ rì bàn, rì jàŋ yi ɓum ɓɛ wuɓsɛɛ ɓi, fɔɔnnɛ ɓum ɓɛ pɛɛ̀pɛ̀sɛ̀ngày ɓɛ̀tum ɓɛ̀cèm, ɓɛ yuyù nyi kì ghɛnghɛni.