Read Bafia MARIKUS 10 Bible Online

MARIKUS 10 - Bafia bible

MARIKUS 10

¹Nni Yeesus à pɛ̀sɛ̀ngà foo lɛ a kɛǹ a Zyude, à kì syàà Zyuridɛŋ. Ɓìtuu ɓi ɓum ɓi taŋzɛ̀ngà tì nyi a nyoo, à tumɛ̀n tì ɓɔ rìrèsàg lɔŋ yɛ̀ɛ àa ǹti à kìlàg.

²Fɔɔnnɛ Ɓɛ̀fàrìzyɛŋ ɓɛ yughà nyi kìfèèghrɛɛ, ɓɛ tɔg nyi lɛ: Ɓìdɔ̀gsɛna ɓis ɓi gherɛɛ nya lɛ mum à rì lɛ à nàɓ giɓ wiì?

³Nni Yeesus à ɓàkà ɓɔ lɛ: Moyis à kalìghà mìni lɛ ɓi kilag la?

⁴Ɓɔɔ ɓaàg nyi lɛ: Moyis à gherɛ̀ngà lɛ baŋì yɛ̀ɛ falag giy kaàtà ànɛ lɛ a ghasɛɛ rì nyi, fɔɔnnɛ ì ki nàɓ min nyi.

⁵Nni Yeesus à ɓàkà ɓɔ lɛ: Moyis à kpaaghà fɔlɔɔ ɓisuulɛ ɓì tèri mɛ̀rem.

⁶Wɔ̀lɛ a rìtumɛ̀n, yɛ̀ɛ Bɛ̀ll à kìghà ɓyom ɓìcèm, à kìghà lɛ, rì baŋì rì giɓ;

⁷kìɓan kiǹ kɛɛ̀ki baŋì ì ɓiì càriì lɛ rì seŋi rì jɛɛ, ì ràrɛ̀n ɓɛɛ giy;

⁸kìɓɛ̀ɛ̀ ki ɓum ki sug com kìfog, fɔlɔɔ nnɛ ɓɛ yiìdi ɓum ɓɛɓɛɛ̀, ɓɛ ti lɔŋ com kìfog.

⁹Fɔɔnnɛ mum kɛ̀ɛ ghasi com ki Bɛ̀ll à ràri.

¹⁰Yɛ̀ɛ ɓɛ kpagà a mɛɛ, nni ɓɛ̀yilàg ɓɛ tɔgtìghà Yeesus mɛ̀tɔɔ̀tɔɔgh ɓi kìɓan kiǹ.

¹¹Nni à kpaaghà ɓɔ lɛ: I mum à nàɓi giy, à ki wɔɔti giɓ adɛŋ di à kìi fìsɔ̀mɔ̀g ɓi rìɓa ɗi lɛ rì nyi rì gil a ǹtonto.

¹²I giɓ a ɓèni yii à wɛy tì roàdɛŋ, di à kìi fìsɔ̀mɔ̀g.

¹³Ɓum ɓɛ yughày Yeesus rì ɓɔɓti ɓɛsàg lɛ a kom̀ ɓɔ, wɔ̀lɛ ɓɛ̀yilàg ɓɛ nyɛɛdɛ̀n ɓumɓɛ̀n.

¹⁴Yɛ̀ɛ Yeesus à ghɛngà fɔlɔɔ, ki ɓeɓ nyi, à kpaa ɓɔ lɛ: Càrina ɓɔɔɓɔɓti ɓɛɛ yuiy a lɔ̀ŋkɛm̀ ɓisuulɛ kìlɔ̀ŋ kì Bɛ̀ll ki rì ɓisuu ɓumɓɛ ɓɛ ri yɛ̀ɛ ɓɔ.

¹⁵Ǹkalii mìni ɓi saaɗ lɛ mum ǹcèm ànɛ à ghàɓi ɓi kilɔ̀ŋ ki Bɛ̀ll fɛlɛ yɛ̀ɛ maa ŋwɔɓti, àa ɗiŋi ɓi miì.

¹⁶Fɔɔnnɛ à lɔ̀ɛ̀ɗkàkà ɓɔ, à màgì ɓɔ, ɗi a sasaghi ɓɔ ɓyàg ɓi nyòò.

¹⁷Yɛ̀ɛ Yeesus à pɛ̀sɛ̀ngà ɗì rìghaàgh, nni ŋwaàdɛŋ à pwaŋìghày rì mɛ̀ree, à yù nyi kì ɓaàgh mɛ̀ɗu asu, à tɔg nyi lɛ: Syeesyee à ǹɗèsàg, cɛ kɛɛ̀ki ǹghɛ̀ɛ̀sɛɛ kì kìi ɓi ɗi lɛ ǹfɔ̀n lol a cɛɓ?

¹⁸Yeesus à kpaa nyi lɛ: Ɓisuucɛ nnɛ ù reŋii mɛ̀ lɛ syeesyee à mum? Ŋwaàdɛŋ à yin syeesyee à mum di ki yìn lɛ Bɛ̀ll cɛ̀ncii.

¹⁹Ù yii ɓìdɔ̀gsɛna ɓi lɛ: Kɔ̀ɔ wey mum, kɔ̀ɔ kì fisɔ̀mɔ̀g, kɔ̀ɔ yii com ki mum, kɔ̀ɔ pwàà mum kìɓan ɓi nyoo, kɔ̀ɔ kì mum kìɓe, nyaasi soŋi ɓɛɛ̀ gaa.

²⁰Ŋwaànɛ̀n à ɓàg nyi lɛ: Ǹɗèsàg, ǹtumɛ̀ngà rìɓèŋ ɗi ɓidɔ̀gsɛna ɓiǹ, di ǹkaka kìkeŋ ki mum.

²¹Nni Yeesus à seesèèghà ŋwaànɛ̀n à keesì nyi, fɔɔnnɛ à kpaaghà min nyi lɛ: Com kɛɛ̀ ka kaakaàrɛ̀n wɔ̀ kìfog, kɛɛ ri lɛ, u kɛǹ, u kaɓ ɓyom ɓyɔɔ ɓìcèm, u kaɓsi mɔ̀ɔ̀ni mɛ miì rì ɓɛ̀soghàsogha, fɔɔnnɛ ù ɓiì ɓaà rì ìkum ɓi kìlɔ̀ŋ ki aɗyòò; ajɛ̀m ìnɛn, u yu, u nɔɔ̀ti mɛ̀.

²²Wɔ̀lɛ yɛ̀ɛ ŋwaànɛ̀n à wokà fɔlɔɔ, à ɓeɓsì ìsu, à pɛ̀sɛ̀n à ghaàgh rì bim, ɓisuulɛ à ɓaghà rì ìkum lɛɛ̀gwey.

²³Nni Yeesus à kɛɛ̀sìghà mis ɓi ɓumɓɛ ɓɛ ɓaghà nyi jàŋbog à kpaa ɓɛ̀yilàg ɓii lɛ: Ki teèsɛɛ lɛɛ̀gwey lɛ ɓɛ̀guŋgum ɓɛɛ ɗiŋi ɓi kìlɔ̀ŋ ki Bɛ̀ll.

²⁴Yɛ̀ɛ ɓɛ̀yilàg ɓɛ wokà fɔlɔɔ, ɓɛ kuuràg. Yeesus à ki pɛ̀si ɓìtòkì à kpaa ɓɔ lɛ: Ɓɔn ɓɛm, ki teèsɛɛ yɛ̀ɛ mɛ̀nɔ̀ɓɔ̀ lɛ mum a ɗiŋi ɓi kìlɔ̀ŋ ki aɗyoo.

²⁵Rìɗiŋì ɗi syàmoo a ɗiŋi ɓi ɗyas ɗi bààtà, ɗi ri tì lɛ fɛnfɛn ɗì rìɗìŋì ɗi guŋgum a ɗiŋi ɓi kìlɔ̀ŋ ki aɗyoo.

²⁶Ɓɛ̀yilàg ɓɛ kuuràkà tì lɛɛ̀gwey à cee fɔlɔɔ, ɓɛ tɔɔ̀ghtɔ̀ɔ̀ghrɛ̀n wɔɔ ɓɔ rì ɓɔ lɛ: Ghɛn yɛɛ ri min lɛ à ghɛn cɛɓ?

²⁷Nni à pɛɓsɛ̀ngà ɓɔ à kpaa lɛ: Kìɓan kiǹ ki cee ìtèɗ wu mum, wɔ̀lɛ ɓi ɓɛg ànɛ yɛ̀ɛ Bɛ̀ll, com ki lɛ ki yaaghrɛ̀n ki yin.

²⁸Nni Pyɛɛri à tumɛ̀ngà nyi rìkpaa lɛ: Ù ghɛɛ! ɓìsii rinìghày ɓyom ɓis ɓìcèm, tì nɔ̀ɔ̀tì wɔ̀.

²⁹Yeesus à ɓàg lɛ: Ǹkalii mìni ɓi saaɗ lɛ, mum à yin lɛ à naŋ yì lɛ rì mɛɛ mii, rì ɓɛ̀geni, rì seŋì, rì jɛɛ, rì ɓɔn ɓii nsoò lɛ ɓìden ɓii ɓi zi ɓisu wɛ̀m, rì ɓisuu Syeesyee à Ɓɔlɛ,

³⁰à rɔ̀ɓ lɛ à fɔ̀ni ɓi ɓi cààmɛ̀n ki ti ka ghɛghɛɓ ki miì ɓyom hɔnɗɛ̀ɗ ɓi rìkuu ɗi com ɗìcèm ɗi à nagày lɛ rì gɛ mɛɛ, ɓɛ̀geni, ɓɛ̀jɛɛ, ɓɔn, rì ɓìden ɓì zi, à ɓùtɛ̀n mɛ̀tɔɓ mɛ ɓum ɓɛɛ̀ kìki nyi miì ɓisuu righerɛ̀n, à ki teɗ cɛɓ ki fiɗyàɓ fikɔ̀ɔ̀ ɓi mɛ̀ru mɛ mɛɛ̀ yùyuiy.

³¹Fɔɔnnɛ ɓum lɛɛ̀gwey ɓɛ ɓɛ ɓaghà beèbɛ̀y ɓɛ ɓiì rɔ̀ɓi ajɛ̀m, ɓɛ̀roɓɛ ɓɛ ɓaghà ajɛ̀m ɓɛ syoŋ̀ bee.

³²Yɛ̀ɛ ɓɛ ɓaghà ɓi bee inɛ ɓi rìɓɔg a Yorisalɛm, Yeesus yɛɛ syoŋsyòŋgà ɓɔ bee. Ɓɛ̀yilàg ɓɛ ɓaghà rì mɛ̀riighrikì, nsoò ɓumɓɛ ɓɛ nɔɔ̀nɔ̀ɔ̀tìghà ɓɔ, ɓɛ rirìsìghà girig. Nni Yeesus à tekà ɓɛ̀yilàg ɓii ǹtɛ̀ɗ rì ɓɛɓɛɛ̀rɛn a dwìɗ, à tumɛ̀n ɓɔ rìkpaa ɗi ɓiɓan ɓi ɓi ri nyi ɓiì kìi.

³³À kpaa ɓɔ lɛ: Ɓi ɗi tì rɛrɛrii ɗi, tì ɓɔɔgh yɛɛ lɛ a Yorisalɛm, wɔɔnnɛ ɓɛ ɓiì kàɓi Man à mum ɓi ɓyàg ɓi ɓɛpìrɛɛtìrɛ̀ ɓɛgwey rì ɓi ɓyàg ɓi ɓɛ̀rèsàg-ɓìdɔ̀gsɛna; ɓumɓɛ̀n ɓɛ ren lɛ ɓɛɛ wey nyi, ɓɛ ki ceesi nyi rì ɓumɓɛ ɓɛ yii ɓi Bɛ̀ll.

³⁴Ɓumɓɛ̀n ɓɛ rì nyi ɓiì fengii, ɓɛ tuutùù nyì tìtyɛɛ̀ ɓi nyoo, ɓɛ ɓog nyi kìtòn, ɓɛ wey nyi, wɔ̀lɛ ajɛ̀m ì mɛ̀ru mɛraa, à rì ɓiì ghèmɓɛɛ yi a ɓìloŋ.

³⁵Kìɓɛ̀ɛ̀ ki ɓɔn ɓɛ Zeɓede lɛ rì Zyag rì Zyaŋ ki yughà Yeesus a nyoo, ki kpaa nyi lɛ: Nɗèsàg, ti kɔ̀nkɔn lɛ u ki ɓìsi com ki tì rì ɓiì tɔɔ̀gh wɔ̀.

³⁶Yeesus à tɔg ɓɔ lɛ: Cɛ kɛ̀ɛ ki ɓi kɔ̀nkɔn lɛ ǹki mìni?

³⁷Ɓɛ kpaa nyi lɛ: Yɛ̀ɛ ù ɓiì ɓaà ɓi kìlàmì kɔɔ ki rikem, u gherɛn lɛ ti kɔri lɛ roànɛ wɔ̀ ɓi weèlem, roànɛ wɔ̀ ɓi kìmɛŋ.

³⁸Yeesus à pɛ̀ɛ̀zì ɓɔ lɛ: Ɓi yii gì ɓi rikuu ɗi kiɓan ɗi ɓi tɔtɔg ɗiǹ; ɓì rì lɛ ɓì cenɛ̀n lɛ ɓi nɔ ɓeŋ ànɛ mɛ̀ ǹɗì ɓiì nɔɔ̀, nsoò lɛ ɓɛɛ ɓaɓti mìni rìkuu ɗi bàɓtis ɗi ɓɛ ri mɛ̀ ɓiì ɓàɓtii?

³⁹Ɓɛ ɓaàg nyi lɛ: Tì rì lɛ tì cenɛ̀n. Yeesus à kpaa ɓɔ lɛ: Ki ri lɔŋ saaɗ lɛ ɓì rì ɓiì nɔɔ̀ ɓeŋ ànɛ mɛ̀ m̀ɓiì nɔɔ̀, ɓɛ ki ɓàɓti mini rìkuu ɗi bàɓtis ɗi ɓɛ ri mɛ̀ ɓiì ɓàɓtii;

⁴⁰kìɓan kifog, kìɓan ki lɛ mum a kɔri mɛ̀ ɓi weèlem nsoò lɛ ɓi kìmɛŋ, ki yin kiɓan kɛm̀; mɛ̀kɔ̀ɔ̀ mɛn mɛ rì ɓisuu ɓumɓɛ mɛ ri mɛ̀ pègsɛn ɓisu wàà.

⁴¹Yɛ̀ɛ kìntɛ̀ɗ ki ɓɛyilàg kimbog ki wokà kìɓan kiǹ, mɛ̀rem maa mɛ ɓeɓtɛ̀n rì ɓɛ̀-Zyag ɓɛɛ̀ Zyaŋ.

⁴²Nni Yeesus à reŋìghà ɓɔɔ̀cèm, à kpaa ɓɔ lɛ: Ɓì yii lɛ, ɓumbɛ ɓɛro ɓum ɓɛ ti ɓɛ regì lɛ mɛ̀fòm mɛ ɓilɔ̀ŋ ɓɛ ti ɓɛ pyengì ɓum mis rì ǹciìzɛ̀n, ɓɛ̀rɛlì-asu ɓaa, ɓɛ ceesàg gin mɔ̀ɔ rì rìlàmì ɗi ɓɔ.

⁴³Ki ghɛɛ̀sɛɛ ɓi ki ɓaà fɔlɔɔ ɓi nyìinyìm wìn. Kìɓan kìfog, ŋwaànɛ à kɔ̀ni lɛ a ɓa ǹlàmì ɓi nyìinyìm wìn, à ghɛ̀ɛ̀sɛɛ kì ɓaà ǹkìì-kìsay a ɓɛ̀ro ɓɛmbog.

⁴⁴Fɔɔnnɛ ŋwaànɛ à ɓiì kɔ̀ni lɛ a ɓa mìni ǹɗɛlì-asù, à ghɛ̀ɛ̀sɛɛ kì ɓaà ǹkpàn a mìni ɓɛ̀sɛ̀ɛ̀ ɓɛ̀cèm.

⁴⁵Ɓisuulɛ Man à mum à yùghà ɓi lɛ ɓum ɓɛɛ kiki nyi ɓìsay, kìɓan kifog à yughà lɛ a say ɓisuu ɓum, à ki fa cɛɓ kii lɛ a kwèɗ ɓum lɛɛ̀gwey.

⁴⁶Nni ɓɛ kpagà a Zyeriko; yɛ̀ɛ Yeesus rì ɓɛ̀yilàg ɓii ɓɛ pɛsɛ̀ngà lɛ ɓɛɛ ghaagh ǹɗaŋ ri kìtuu ki ɓum, nni ɓɛ tanɛ̀ngà ɗyaŋɗyàŋ àdɛŋ ɗii lɛ Baritimee, man à Timee, di à kɔ̀kɔrii ɓi bèn ì kìɓàà, à lɔnlɔ̀n ɓum ɓyom.

⁴⁷Yɛ̀ɛ ŋwaànɛ̀n à wokà lɛ Yeesus ànɛ a Naazarɛt yɛɛ ri ɓi rìghaàgh nni à tumɛ̀ngà nyi rìɓeràg jɛ̀ɛ̀ aɗyoo dì a kpaakpaa lɛ: Yeesus Man à Davit, wogha mɛ̀ nyìighnyìg.

⁴⁸Ɓum lɛɛ̀gwey ɓɛ kpɔmdɛ̀ngà nyi lɛ a maàrɛn wɔ̀lɛ nyii teŋzìghà tì jɛ̀ɛ̀ lɛɛ̀gwey di a kpaakpaa lɛ: Man à Davit wogha mɛ̀ nyìighnyìg.

⁴⁹Nni Yeesus à rɛrìghà, à kpaa ɓum lɛ: Reŋiinas̀ mɛ̀ nyi; ɓɛ̀roɓɛ̀n ɓɛ kɛǹ kì regii ɗyaŋɗyàŋ ànɛ̀n ɓɛ kpaa nyi lɛ: Tèèsi nyoo u pɛsɛn aɗyoo, nnyɛɛ̀ regi wɔ.

⁵⁰Nni ɗyaŋɗyàŋ ànɛ̀n à màkà rɛ̀ŋkweɗ wìì jɛ̀m lɛghɛ̀g, à pɛ̀sɛ̀n aɗyoo lɛ fàtweɗ, à kɛ̀n yɛ̀ɛ Yeesus.

⁵¹Nni Yeesus à tɔkà nyi lɛ: U kɔ̀nkɔn lɛ ǹki wɔ̀ la? Ɗyaŋɗyaŋ à ɓàg nyi lɛ: Ràɓunì! Nkɔ̀nkɔn lɛ ǹghɛnɛ̀n tì.

⁵²Yeesus a kpaa min nyi lɛ: Rìgherɛ̀n ɗyɔɔ ɗi ghɛɓsii wɔ̀, kɛ̀na yàà. Ŋwaànɛ̀n à ghàs kì ghɛnɛɛ, à tumɛ̀n rìnɔ̀ɔ̀tì ɗi Yeesus ɓi bee.