Read Bafia MARIKUS 11 Bible Online

MARIKUS 11 - Bafia bible

MARIKUS 11

¹Yɛ̀ɛ ɓɛ ɓaghà ɓɛ ti ɓiì wuuwuɓsɛ̀n Yorisalɛm, di ɓɛ ti jàŋbog rì bàn yi lɛ rì Bɛtfazee rì Bɛtanii, nunùg rì dòn ì ɓɛ̀òlivyee, nni Yeesus à romgà ɓɛ̀yilàg ɓii ɓɛdɛŋ ɓɛɓɛɛ̀

²à kpaa ɓɔ lɛ: Kɛ̀ɛna ɓi maa kìlɔ̀ŋ ànɛ à rì mìni ànɛnii beèbɛ̀y; yɛ̀ɛ ɓi kpaŋkpaŋ wɔɔ, ɓi taatanɛ̀n man à jàɗki ànɛ ŋwaàdɛŋ à ka ɓɔkà ɓi miì di à rì ǹsuŋɛn, ɓi fumiì, ɓi yuis̀ mɛ̀ rì nyi.

³I mum à tɔɔgh mìni lɛ, ɓì kìi fɔlɔɔ lɛ cɛ, ɓì ɓàg nyi lɛ, Kan yɛɛ̀ tɔki lɛ ɓɛɛ kɛǹ nyi rì yɔ̀. Ŋwaànɛ̀n à ɓiì ghàsi ki càri yɔ̀ lɛ yɛ̀ɛ yuis̀ fɛ.

⁴Yɛ̀ɛ ɓɛ̀yilàg ɓɛ kɛngà ɓɛ tanɛ̀ngà man à jàɗki di à rì ǹsuŋɛn ɓi ɗyɔ̀m, jàŋbog rì ìsuunaa wudɛŋ, ɓi ǹwɔŋì wu bee, fɔɔnnɛ ɓɛ fumìghày nyi.

⁵Ɓum ɓɛdɛŋ ɓɛ ɓɛ ɓaghà wɔɔ jàŋbog ɓɛ tɔkà ɓɔ lɛ: Cɛ kɛɛ̀ ki ɓi kìki lɔɔ? Ɓì ti ɓiì fùmii man à jàɗki ànɛ̀n lɛ la?

⁶Ɓɛ̀yilàg ɓɛ ɓaàg lɔŋ yɛ̀ɛ Yeesus à kalìghà ɓɔ lɛ ɓɛ ghɛɛ̀sɛɛ kì ɓàagh. Fɔɔnnɛ ɓumɓɛ̀n ɓɛ caɗkà ɓɛ̀yilàg lɛ ɓɛɛ kɛǹ.

⁷Nni ɓɛ kɛngà Yeesus rì man à jàɗki ànɛ̀n, ɓɛ ghày yɔ̀ ɓìlàà ɓyaa ɓi nyoo, Yeesus à kɔ̀rì miì.

⁸Ɓum lɛɛ̀gwey ɓɛ ghaghàlà ɓìlàà ɓyaa ɓi bee, ɓɛdɛŋ ɓɛ ghaghày maŋ mɛ mɛtɛn mɛ ɓɛ renɗèngày ɓi ɓɛ̀dɛm.

⁹Ɓumɓɛ ɓɛ ɓaghà Yeesus asu, rì ɓɛ̀roɓɛ ɓɛ nɔɔ̀nɔ̀ɔ̀tìghày nyi ajɛ̀m ɓɛ kpaàkpàgsɛ̀n jɛ̀ɛ̀ aɗyoo lɛ: Ozana! Rìkem ɗyɛɛ ɓa rì roànɛ à yùu yì ɓi ɗii ɗi Kan.

¹⁰Rìkem ɗyɛɛ ɓa rì kìlàmì ki ki yuù yì, kìlàmì ki Davit à seŋi wìs; ozana! Rìkem ɗyɛɛ ɓa ɓi ɗyoo ɓi ɗùm.

¹¹Fɔɔnnɛ Yeesus à ɗiŋìghà a Yorisalɛm, à kɛ̀n ɓi naà-Bɛ̀ll. Yɛ̀ɛ à lègsìghà kì ghɛɛ̀ ɓyom ɓìcèm, nni à kɛ̀ngà à Bɛtanii rì ɓɛ̀yilàg ɓiì ǹtɛ̀ɗ rì ɓɛɓɛɛ̀, ɓisuulɛ cààmɛ̀n ki ɓaghà di ki mɛ cee.

¹²Ɓi duri tana, zày ì kɔ̀ngà Yeesus di ɓɛ mɛ pɛ̀sɛn yi a Bɛtanii.

¹³Nni à pìkà mis fìràɓ, à ghɛn ǹɗyèm wu fìgyee rì tyɛn lɛ mɔɓ-mɔɓ. Fɔɔnnɛ à kɛ̀ngà a fìgyee ànɛ̀n zi lɛ a ghɛǹ ǹkòo à rì lɛ à tanɛ̀n ɓìɗùn miì. Yɛ̀ɛ à kpagà wɔɔ azi, à tanɛ̀n lɛ à rì lɔŋ tyɛn rì tyɛn ɓisuulɛ, àa cààmɛ̀n ki lɛ ɓɛ̀fìgyee ɓɛɛ wum kɛɛ ɓaghà.

¹⁴Nni Yeesus à tòòghrɛ̀ngà, à kpaa ǹɗyèm wu fìgyee wiǹ lɛ: Mum àa ɗi ti ɓi kiɗùn kɔɔ nsoò ŋwos bog; jɛ̀ɛ̀ ìnɛ à kpaaghà ìnɛn ì kɛ̀ngà ɓɛ̀yilàg ɓi mɛ̀reè.

¹⁵Yɛ̀ɛ ɓɛ kpagà a Yorisalɛm, nni Yeesus à ɗinìghà ɓi naà-Bɛ̀ll, à tumɛ̀n rìnàɓ ri ɓumɓɛ ɓɛ kakàɓkà ɓyom ɓi naà-Bɛ̀ll, rì ɓɛ̀roɓɛ ɓɛ lalàkà; fɔɔnnɛ à ɓigtàkà ɓɛ̀teɓèrè ɓɛ ɓumɓɛ ɓɛ ceècènɗìghà mɔ̀ɔ̀ni, à ɓigtàg girig mɛ̀kɔ̀ɔ̀ mɛ ɓɛroɓɛ ɓɛ kakàɓkà ɓɛ̀kuùkuù.

¹⁶Fɔɔnnɛ Yeesus à càɗkà ɓi nsoò mum bog lɛ a ɓa rì ǹtɛ̀g wudɛŋ ɓi naà-Bɛ̀ll.

¹⁷Nni à rèrèsìghà ɓum di a kpaakpaa lɛ: Ki ri kì kànɛn lɛ: Naa yɛ̀m ì ɓiì ɓaà ɗii lɛ naà-bɔ̀ŋzɛ̀n ɓisuu ɓilɔ̀ŋ ɓìcèm. Kìɓan kifog, mìnii ghaasii yɔ̀ naa ì ɓɛ̀wiiwìì.

¹⁸Yɛ̀ɛ ɓɛ̀pìrɛɛtìrɛ̀ ɓɛgwey rì ɓɛ̀rèsàg-ɓìdɔ̀gsɛna ɓɛ wokà fɔlɔɔ, ɓɛ tumɛ̀n rìkaa ɗi bee inɛ lɛ ɓɛɛ wey nyi; ɓɛ ki rirìsìghà nyi lɛ, ɓìɓan ɓi à rèrèsìghà ɓi komkòmgà ɓum mɛ̀rem.

¹⁹Yɛ̀ɛ cɛŋkò ki kpagà, Yeesus à pɛ̀sɛ̀n ɓi bàn ìnɛn à ghaàgh.

²⁰Yɛ̀ɛ ɓɛ̀yilàg ɓɛ ghaghàghìyà rì sariwa, ɓɛ ghɛngà di fìgyee ànɛ Yeesus à cɛ̀mgà a ti ǹkporiyɛn lɛ rì gàŋ miì.

²¹Yɛ̀ɛ Pyɛɛri à yitìghà kìɓan ki ki kilɛ̀ngà ɓi rìŋkò à ŋwos anɛ̀n nni, à kpaaghà Yeesus lɛ: Raɓì! ghɛna fìgyee ànɛ wɔ̀ɔ ǹcɛ̀mi yɛ̀ɛ à kporii!

²²Fɔɔnnɛ Yeesus à tòòghrɛ̀ngà, à kpaa ɓɔ lɛ: Tyweeyiina Bɛ̀ll.

²³I ŋwaà kalii dòn ìnɛ lɛ: Pɛ̀sɛn foo, u kɛǹ kì kpìi ɓi rìɓày, nnɛ à rì kɛɛ̀ nyoey ɓi ǹɗem, à gherɛ̀n lɔŋ lɛ com ki à kpaa kɛɛ̀ kìikilɛ̀n, ǹkalii mìni ɓi saaɗ lɛ ŋwaànɛ̀n miì à ɓiì ghɛɛ̀ kìɓan kiǹ di ki kilɛ̀ɛ̀.

²⁴Kìɓan kiǹ kɛɛ̀ki kìlaaghna lɛ, com kìcèm ki ɓì tɔɔgh ɓi bɔ̀ŋzɛ̀n, ɓì gherɛ̀n lɛ ɓì ti rì kɔ, fɔɔnnɛ ɓì rì kɔ ɓiì ghɛɛ̀ di ki kilɛɛ.

²⁵Nni cààmɛ̀n kìcèm ki ɓì rɛlii lɛ ɓi ki bɔ̀ŋzɛ̀n, i ɓì ri ɓi kìɓan ri ŋwaàdɛŋ, càrina kìɓan kiǹ, fɔlɔɔ nnɛ Seŋi wìn ànɛ à rì aɗyoo, à ri cenɛn mini girig mɛ̀nànì min.

²⁶Wɔ̀lɛ i ɓì ti kɛ̀ ɓi cenɛn ɓum, Seŋi wìn ànɛ à rì aɗyoo àa cenɛn ɓì girig mìni mɛ̀nànì min.

²⁷Yeesus rì ɓɛ̀yilàg ɓii ɓɛ sugtìghà tì a Yorisalɛm. Nni yɛ̀ɛ Yeesus à kɛ̀ɛ̀kɛ̀ɛ̀ghà ɓi naà-Bɛ̀ll, fɔɔnnɛ ɓɛ̀pìrɛɛtìrɛ ɓɛgwey rì ɓɛ̀rèsàg-ɓìdɔ̀gsɛna, rì ɓɛ̀sɛ̀ɛ̀mɛn ɓɛ kilɔ̀ŋ ɓɛ yughày nyi a nyoo

²⁸ɓɛ tɔg nyi lɛ: Rì ìtèɗ aɗi nnɛ u kìki ɓiɓan ɓi, ghɛn yɛɛ faa wɔ̀ ìtèɗ wulɛ u kiki ɓyɔ?

²⁹Yeesus à ɓàg ɓɔ lɛ: Mɛ̀ɛ ntɔg girig mìni ntɔɔ̀tɔɔgh, i ɓì ɓàagh wɔ, fɔɔnnɛ mɛ̀ɛ nkali mìni, rì ìtèɗ aɗi nnɛ nkìki ɓiɓan ɓi.

³⁰Bàɓtis ì Zyaŋ ì ɓaghày aɗyoo gìn ɓum ɓɛɛ ɓaghày rì yɔ̀? Ɓàaghna mɛ̀.

³¹Wɔ̀lɛ ɓumɓɛ̀n ɓɛ fiɓìghà ǹtɔɔ̀tɔɔgh wiǹ wɔɔ ɓɔ rì ɓɔ, ɓɛ kpaa lɛ: I tì ɓàagh nyi lɛ, ì ɓaghày aɗyoo, à rì ɓìsi ɓiì tɔɔ̀gh lɛ: Nni ɓì gherɛ̀ngà ɓi yɔ̀ lɛ cɛ?

³²I tì ki pɛ̀ɛ̀zii nyi lɛ: Ɓum ɓɛɛ ɓaghày rì yɔ̀... ɓɛ̀pìrɛɛtìrɛ̀ ɓɛǹ, rì ɓɛ̀rèsàg-ɓìdɔ̀gsɛna, rì ɓɛ̀sɛ̀ɛ̀mɛn, ɓɛ rirìsìghà ɓum ɓɛ kilɔ̀ŋ, lɛ ɓum ɓɛ̀cèm ɓɛ gherìghà lɛ kɔɔ̀kɔɔ̀ lɛ, Zyaŋ à rì ǹkpaŋzì-ɓìɓan.

³³Fɔɔnnɛ ɓɛ ɓakà Yeesus lɛ: Ɓìsii yii ɓì. Nni Yeesus à kpaaghà ɓɔ lɛ: Mɛ̀ girig màa kpaa ɓi mini fe nnɛ ìtèɗ wu nkìki ɓiɓan miì, wu riì mɛ̀.