Read Bafia MARIKUS 12 Bible Online

MARIKUS 12 - Bafia bible

MARIKUS 12

¹Nni Yeesus à tumɛ̀ngà min ɓɔ rìkpaa ɗi kiɓan ɓi dàɗkì lɛ: Ŋwaàdɛŋ yɛɛ salà dɛm yiì, à ɓɛ̀y viìnyɛ̀ miì, à cèŋzɛ̀n yɔ̀ ri gari, à kì wayɗ ɓi dɛm incèm, à ki toŋ ɓyoo mɛɛ wɔɔ. Fɔɔnnɛ à faghà yɔ̀ ɓi rɛntì rì ɓɛ̀kìì-ɓìsay, nyii kɛǹ rìkɛ̀ɛ̀.

²Yɛ̀ɛ viìnyɛ̀ ì ɓàgà lɛ ɓɛɛ kɛs, nni à pɛ̀sìghà mum, à rom a ɓɛ̀kìì-ɓìsay ɓɛ à faghà dɛm ri ɓɔ, lɛ ɓɛɛ fa nyi gàɓ yìi ɓyom ɓi ɓi dɛm.

³Nni ɓɛ̀kìì-ɓìsay ɓɛǹ ɓɛ ɓangà ŋwaànɛ ɓɛ romgày ànɛn, ɓɛ kwiy nyi, ɓɛ pɛɛ̀zì nyi rì jɛ̀m ɓyàg zɛy yɛ̀ɛ masà wìì.

⁴Fɔɔnnɛ ŋwaàdɛm à pɛ̀sìghà tì ŋwaàdɛŋ, à romdì tì a ɓɛ̀kìì-ɓìsay ɓɛ ɓi dɛm ɓɛǹ; ɓɛ̀roɓɛ̀n ɓɛ ɓog ŋwaàncèm ɓi ǹto, ɓɛ ki sɛmgi nyi.

⁵Nni ŋwaàdɛm à romdìghà tì lɔŋ mum ɓi gɛ̀n i kìraa, ɓumɓɛ̀n ɓɛ wey ŋwaà-fìtom ancèm; ɓɛ kitìghà tì girig ɓum ɓɛdɛŋ lɛɛ̀gwey ɓɛ ŋwaàdɛm a romgà com kìfog; ɓɛ ki lɛ: Ɓɛ kwiy ɓɛ̀roɓɛ, ɓɛ cuusì ɓɛ̀ro ɓɛmbog.

⁶Lɔŋ m̀bobog à mum ànɛ ŋwaàdɛm à ɓaghà di à mɛ rɔ̀ɓ ri nyi à ɓaghà lɔŋ lɛ man wiì ànɛ à keesìghà lɛɛ̀gwey; nyi nnɛ à siitɛ̀ngà kì romì a ɓɛ̀kìì-ɓìsay ɓɛ ɓi dɛm yiì, à fèkì lɛ, ɓɛ ri ɓiì kuuraagh man wiì.

⁷Wɔ̀lɛ ɓɛ̀kìì-ɓìsay ɓɛ wɔrɛ̀ngà ɓɛ kpaa lɛ: Roànɛ yɛɛ ri ɓiì rɔ̀ɓi ri dɛm i seŋì; yùuna, ti wey nyi di dɛm yɛ̀ɛ woòghrɛn rì ɓìsi.

⁸Fɔɔnnɛ ɓɛ ɓangà min man ànɛ̀n ɓɛ wey, ɓɛ mag kìloŋ kii jɛ̀m ì gari i dɛm.

⁹Nni ǹtɔɔ̀tɔɔgh wu ri lɛ: Cɛ kɛɛ̀ ki ŋwaàdɛm a rì ɓiì kìi? Ŋwaàdɛm a ɓiì yùu, à cuusì ɓɛ̀kìì-ɓìsay ɓɛǹ à ki reɓsɛn dɛm ri ɓum ɓɛdɛŋ lɛ ɓɛɛ sasay.

¹⁰Ɓì ka ɓala ɓì nya yɛ̀ɛ ki ri kì kànɛn lɛ: Gɔ̀g ìnɛ ɓɛ̀toŋì-mɛɛ ɓɛ makà, yɛ̀ɛ ki ghalà gɔ̀g ìnɛ yɛ̀ɛ konag kìlèmi ǹtɔn à mɛɛ?

¹¹Kìɓan kiǹ ki ɓaghày yɛ̀ɛ Kan, ki ki rì dàm ì kìɓan ìnɛ ì kìlɛɛ ɓìsi ɓi mis.

¹²Mɛ̀fòm mɛ Ɓɛ̀yudɛ̀n mɛ kaakààghà bee inɛ lɛ ɓɛɛ ɓaǹ Yeesus, kìɓan kifog, ɓɛ risìghà gùl ì ɓum; ɓɛ ghɛngà lɛ Yeesus à tekà dàɗkì ìnɛn ɓi ɓɔ, nni ɓɛ pɛsɛ̀ngà, ɓɛ ghaaghràg.

¹³Ɓɛ rom lɛ rì Ɓɛ̀fàrìzyɛŋ ɓɛdɛŋ rì ɓum ɓɛdɛŋ ɓɛ ɓi ǹɗaŋ wu Eroodɛ yɛ̀ɛ Yeesus lɛ ɓɛɛ wɔɔ̀si nyi ɓi ɓìtòkì ɓii.

¹⁴Nni ɓumɓɛ̀n ɓɛ yughày, ɓɛ kpaa nyi lɛ: Ǹɗèsàg, ti yii lɔŋ lɛ ù rì ŋwaànɛ a kpaakpaa saaɗ, ù ki ti kɔ̀ɔ risi mum, ɓisuulɛ, wɔ̀ɔ̀ yin ɓiì nɔ̀ɔnɔɔ̀tì rìɓa ɗi mum, u rèresi ɓum bee inɛ yɛ̀ɛ Bɛ̀ll yɛ̀ɛ ki ghɛɛ̀sɛɛ. Nni kali ɓìsi ǹkòo ɓìdɔ̀gsɛna ɓis ɓi gherɛɛ lɛ ti peèghi làmpoŋ̀ rì Kaaza; ki ri kàŋbɛn lɛ ti peè gìn ki yin kàŋbɛn?

¹⁵Yeesus à yighà lɛ ɓɛ purii nyi càg ɓi ɗùm yɛɛ ri, fɔɔnnɛ à tɔkà ɓɔ lɛ: Ɓisuucɛ nnɛ ɓi fèeghfeèghrɛ̀n mɛ̀? Yùunay mɛ̀ fɛ rì fìraŋ̀ nghɛǹ.

¹⁶Nni ɓɛ yughày nyi rì fìraŋ̀, à tɔg ɓɔ lɛ: Kìfèèghrɛnà ki ghɛn kɛɛ ri lɛ miì? Ɗii ɗi ghɛn ɗyɛɛ ki rì tì lɛ? Ɓɛ ɓaàg nyi lɛ: Ɓi ri yɛɛ lɔɔ lɛ, rì kìfèèghrɛnà ki Kaaza, rì ɗii ɗìì.

¹⁷Yeesus à kpaa min ɓɔ lɛ: Pɛ̀ɛ̀ziina ɓyom ɓi Kaaza rì Kaaza, ɓì pɛ̀ɛ̀zì ɓi Bɛ̀ll rì Bɛ̀ll. Ɓɛ kuuràkà lɛɛ̀gwey yɛ̀ɛ à ɓàkà ɓɔ fɔlɔɔ.

¹⁸Ɓɛ̀sàdùsyɛŋ ɓɛ ɓɛɛ kpaaghi lɛ, com kidɛŋ ki yin lɛ rìghèmɓɛ̀n ɗi ɓilòŋ, ɓɛ yughày Yeesus a nyoo, ɓɛ tɔg nyi lɛ:

¹⁹Ǹɗèsàg, Moyis à kàngà lɛ ti kilag lɛ; i gèni mum à wii à càɗ giɓ di à ka yin ɗi man ɗì nyi, geni ŋwaànɛ à wii ànɛ̀n, à ghɛ̀ɛ̀sɛɛ kì wɔlì ǹkpɔɓ wii, à yay ɓɔn rì wɔ ɓi ɗii ɗi geni.

²⁰Wɔ̀lɛ ki kilɛ̀ngà lɛ; ɓum ɓɛdɛŋ ɓɛɛ ɓaghà ɓi rìgeni ɗyaa ɓɛsɛ̀ɛ̀ taàɓɛ̀ɛ̀, baŋì rì baŋì. Roà ǹtonto à wɔlɛ̀n, à ki wu kɛ̀ɛ càɗ man;

²¹geni à kìɓɛ̀ɛ̀ à teɗ ǹkpɔɓ wii, nyi girig à wu, kɛ̀ɛ càɗ man, ki kilɛ̀ngà tì fɔlɔɔ ri roà kìraa,

²²rì ɓɛro ɓɛmbog ɓɛ̀sɛ̀ɛ̀ ɓɛ̀cèm, nsoò mum bog ànɛ ɓi ɓɔ ɓɛ̀sɛ̀ɛ̀ taàɓɛ̀ɛ̀, à càɗkà ɓì man rì giɓ anɛ̀n. Ajɛ̀m ì kìtaàɓɛ̀ɛ̀ ki ɓum kìn, nnɛ giɓ anɛ̀n à wughà girig.

²³Yɛ̀ɛ ɓum ɓɛ kitaàɓɛ̀ɛ̀ ɓɛn ɓɛ wɔlà giɓ anɛ̀n ɓɔɔ̀cèm, nni à ɓaa gɛ gili ghɛn anɛ ɓì ɓɔ ŋwosi righèmɓɛ̀n ɗi ɓiloŋ?

²⁴Yeesus à ɓàkà ɓɔ lɛ: Ɓì pwààrɛɛ, ɓisuulɛ yɛ̀ɛ ɓì yii ɓi nya ɓìɓan ɓi ɓi kaàtà à Bɛ̀ll, kɛ̀ ɓi ki yi itèɗ wu Bɛ̀ll.

²⁵Lɛ ŋwosi righèmɓɛ̀n ɗi ɓilòŋ, ɓɛ̀baŋì ɓaa wɔɔti ɓi ɓɛ̀yiɓ, ɓɛ̀yiɓ ɓɛ̀ kɛ̀ɛ wɔɔti ɓɛbaŋì, kìɓan kifog ɓɔɔ̀cèm ɓɛ ɓaa gɛ lɔŋ yɛ̀ɛ ɓum ɓɛ titom ɓɛ ɓɛ ri aɗyòò.

²⁶Ɓi kìɓan ki righèmɓɛ̀n ɗi ɓiloŋ ki ɓi tɔtɔ̀g, ɓì ɓalà ɓi kaàtà à Moyis jàŋ ìnɛ Bɛ̀ll à kpaaghà nyi ɓi kìtwìɗ lɛ: Ǹɗì Bɛ̀ll à Abiraham, Bɛ̀ll à Isag, Bɛ̀ll à Yakɔɓ?

²⁷Ki rèsii lɛ Bɛ̀ll à yin Bɛ̀ll à ɓìloŋ, a rì Bɛ̀ll à ɓumɓɛ ɓɛ ri cem; ɓi rì ɓi rìnàn lɛ kɔɔ̀kɔɔ̀.

²⁸Kìbog ki ɓi ɓɛ̀rèsàg-ɓìdɔ̀gsɛna kidɛŋ ki wowòkà yɛ̀ɛ Yeesus à nyoònyòlɛ̀ngà rì ɓumɓɛ̀n, ki ki ghɛn lɛ Yeesus à konàkà ɓɔ kì ɓàagh. Nni à tyɛ̀ɛ̀tɛ̀ngày, à tɔg Yeesus lɛ: Kìdɔ̀gsɛna kibe kɛɛ cee ɓìdɔ̀gsɛna ɓìcèm?

²⁹Yeesus à ɓàkà lɛ: Kìdɔ̀gsɛna ki asu kɛɛ̀ki lɛ: Wɔ̀ Isirayɛl, wogha lɛ Kan Bɛ̀ll wìs nnyɛɛ ri lɔŋ Kan cɛ̀ncii.

³⁰Fɔɔnnɛ keesi Kan Bɛ̀ll wɔ̀ɔ̀, rì ǹɗem wɔɔ wucèm, rì ǹghay wɔɔ wucèm, rì mɛ̀yitì mɔɔ mɛcèm, rì ìtèɗ wɔɔ wucèm.

³¹Ki kiɓɛ̀ɛ̀ ki ri lɛ: Keesi romum ànɛ wɔ̀ jàŋbog lɔŋ yɛ̀ɛ wɛ̀ɛmìɗ; kìdɔ̀gsɛna kìdɛŋ kì ki cee ɓiǹ, ki yiìdi.

³²Nni ǹɗèsàg-ɓìdɔ̀gsɛna anɛ̀n à kpaaghà Yeesus lɛ: Raɓì, com ki ù kpaa ki ri miì, lɛ Bɛ̀ll à rì lɔŋ bog fɔɔnnɛ Bɛ̀ll ìdɛŋ ì yiìdi;

³³rì tì lɛ, mum à ghɛ̀ɛ̀sɛɛ kì keesii Bɛ̀ll rì nɗem wii wucèm, rì ɗyomzɛ̀n ɗii ɗicèm, rì ìtèɗ wii wucèm, à ki keesi ti romum ànɛ àrì nyi jàŋbog yɛ̀ɛ nyimìɗ; rìkì ɗiǹ ɗi rɔɔtɛɛ ɗi cee ɓìtuwe ɓi mum à rì lɛ à tɔ̀ngì ɓisuu Bɛ̀ll, nsoò ɓyom ɓi à rì lɛ à fùnɛ̀n lɛ a ɓɔgsi Bɛ̀ll miì.

³⁴Yɛ̀ɛ Yeesus à ghɛngà lɛ ŋwaànɛ̀n à ɓàagh kìɓan kiǹ rì ɗyomzɛ̀n, nni à kpaaghà nyi lɛ: Ù ràɓsɛɛ ɓi kilɔ̀ŋ ki Bɛ̀ll; ajɛ̀m ìnɛn, ŋwaàdɛŋ à ghɛɛsìghà tì ɓi lɛ a tɔg ti nyi ntɔɔ̀tɔɔgh.

³⁵Yeesus à tekà jɛ̀ɛ̀, à tumɛ̀n ɓum rìrèsàg ɗi ɓiɓan ɓi naà-Bɛ̀ll, à tɔg lɛ: Ɓisuucɛ nnɛ ɓɛ̀rèsàg-ɓìdɔ̀gsɛna ɓɛ ti ɓɛ kpaaghì lɛ Kiris à rì man à Davit?

³⁶Davit nyimiɗ a kpaaghà, di Kìtɛntɛ̀ɛ̀n ki Nghay ki mɛ fa nyi ɗyomzɛ̀n lɛ: Kan àa ǹkpaa Kan wɛ̀m lɛ: Kɔ̀ri mɛ̀ fɛ ɓi weèlem à kpaŋ yɛ̀ɛ ǹɗì ɓiì ghaasii ɓɛ̀bènàbena ɓɔɔ com ki rɛsakɛn mɛkòò mɔɔ miì.

³⁷I Davit nyimiɗ a reŋii nyi lɛ Kan, Lannɛ ki kɛɛ̀dii kì kpaŋì lɛ a ɓa ti man wiì? Coo gùl ì ɓum ì wowòkà ɓìɓan ɓi Yeesus à kpaakpààghà rì kìnyàà ɓi ǹɗem.

³⁸Nni à kpaaghà ɓum ɓɛ à rèèrèsàkà ɓɛǹ lɛ: Konaaghna rì ɓɛ̀rèsàg-ɓìdɔ̀gsɛna ɓɛ ɓɛ ti ɓɛ keesàg rìrerènì ɗi jàŋ di ɓɛ waataagh ɓyoo ɓɛ̀kàɓà, ɓɛ kɔngì girig lɛ ɓɛɛ toòtògsì ɓɔ rì coo nyaasɛ̀n ɓi gwìy.

³⁹Ki rɔɔghì ɓɔ lɛ ɓɛɛ kɔri ɓi mɛ̀kɔ̀ɔ̀ mɛ asu di ɓɛ kɛɛ̀ kìsɛ̀nɛ̀, ɓɛ ki teki mɛkɔ̀ɔ̀ mɛ beèbɛ̀y ɓi naa yi bɔ̀ŋzɛ̀n.

⁴⁰Ɓumɓɛ̀n ɓɛ̀fog ɓɛɛ ti ɓɛ pumzàg mɛ̀kpɔɓ mɛ ɓɛ̀yiɓ, ɓɛ ki kìlag ɓyoo bɔ̀ŋzɛ̀n lɛ ɓum ɓɛɛ sɛsɛg ɓɔ. Ɓɛ ri teri gɛ kìtèetèɗ ki pɔnɔsì ki ki ɓaa gɛ fɔlɔɔ lɛ yoɓ.

⁴¹Yeesus à kɔ̀rìghà, a fa mis rì fìkɔrɔŋ fi ɓɛ ǹpìkì mɔ̀ɔ̀ni mɛ bɔgsì miì à seesèè yɛ̀ɛ ɓìtuu ɓi ɓum ɓi pipìkà mɔ̀ɔ̀ni; ɓɛ̀guŋgum lɛɛ̀gwey ɓɛ suùsùùrì ɓyoo mɔ̀ɔ̀ni.

⁴²Nni maa ǹkpɔɓ a giɓ a yùghày girig, à pìg ɓɔɔ tiraŋ̀ ɓɛɓɛɛ̀rɛn ɓɛ kpaŋɛn dolà yiɓɛɛ̀ ɓi fìkɔrɔŋ.

⁴³Fɔɔnnɛ Yeesus à regìghà ɓɛ̀yilàg ɓii, à kpaa ɓɔ lɛ: Ǹkpaa mìni ɓi saaɗ lɛ, rìfa ɗi maa ǹkpɔɓ a giɓ anɛ ɗi cee ri mum bimiɗ ànɛ à piìgh mɔ̀ɔ̀ni ɓi fìkɔrɔŋ;

⁴⁴ɓisuulɛ ɓɛ̀sɛ̀ɛ̀ ɓɛ̀cèm ɓaa pìigh gàɓ ì mɔ̀ɔ̀ni ìnɛ yàa mɛ rɔ̀ɓ ɓɔ kɛ̀ɛ̀ kìsay, wɔ̀lɛ giɓ anɛ nyaa foŋi gàɓ ì com bimiɗ ìnɛ àa rì rì yɔ̀, ìnɛ àa ghɛ̀ɛ̀sɛɛ lɛ à ghɛɓ miì.