Read Bafia MARIKUS 15 Bible Online

MARIKUS 15 - Bafia bible

MARIKUS 15

¹Rì sariwa lɛ ɓuɓ, ɓɛ̀pìrɛɛtìrɛ̀ ɓɛgwey ɓɛ taŋzɛ̀ngà rìghàdà rì ɓɛ̀sɛ̀ɛ̀mɛn, rì ɓɛ̀rèsàg-ɓìdɔ̀gsɛna, rì ɓum ɓɛ̀cèm ɓɛ ɓi Sànèdìrɛŋ, lɛ ɓɛɛ teɗ ǹɗɛli. Fɔɔnnɛ ɓɛ kagà Yeesus bɛn, ɓɛ kɛǹ ɗì nyi, ɓɛ fa rì Pilat.

²Nni Pilat à tɔkà nyi lɛ: Ù rì nya rìfòm ɗi Ɓɛ̀yudɛ̀n? Yeesus à ɓàg nyi lɛ: Wàa kpaa.

³Ɓɛ̀pìrɛɛtìrɛ̀ ɓɛgwey ɓɛ kpaaghà ǹkuni ɓiɓan di ɓɛɛ̀ ràraɗ ɗi nyi.

⁴Nni Pilat à tɔgtìghà nyi lɛ: Ù ɓàagh ɓi gɛ ɓìɓan anɛ ɓumɓɛ ɓɛ kpaa ànɛ, ɓɛ raɗ rì wɔ̀?

⁵Nni Yeesus à mìnɛ̀ngà, ki yeesì Pilat.

⁶Ɓi tìcàɓ tì Paskà tìcèm, Pilat àa ǹti à càɗkì kìmbuŋ kìfog, ki ɓum ɓɛ tɔɔgh lɛ a caɗ.

⁷Fɔɔnnɛ ŋwaàdɛŋ lɛ Ɓaraɓas, à ɓaghà ɓi naà-zày, nɗaŋ rì ɓum ɓɛdɛŋ lɛ ɓɛ wolà mum di ɓɛ ɓigtii wɛ̀y ri kìlàmì.

⁸Nni kìtuu ki ɓum ki pɛsɛ̀ngà, kì ɓɔg yɛ̀ɛ Pilat ɓɛ tɔg nyi lɛ: Kìya ɓìsi kìɓan ki ù ti ù kìlàg ɓisu wis bèg yìcèm.

⁹Pilat à tɔg ɓɔ lɛ: Ɓi kɔ̀nkɔn lɛ ǹcàɗ mìni rìfòm ɗi Ɓɛ̀yudɛ̀n?

¹⁰Pilat à tɔkà fɔlɔɔ lɛ à yighà lɛ ɓɛ̀pìrɛɛtìrɛ̀ ɓɛgwey ɓɛ sɔmɛ̀ngà Yeesus ɓi ǹɗemi-yàaka aɗyòò.

¹¹Wɔ̀lɛ ɓɛ̀pìrɛɛtìrɛ̀ ɓɛgwey ɓɛ toosìghà gɛ mum ànɛ̀n lɛ ɓɛɛ tɔg Pilat lɛ, Ɓaraɓas nnɛ a caɗ.

¹²Nni Pilat à tòòghrɛ̀ngà tì, à tɔg ɓɔ lɛ: Ɓi kɔ̀nkɔn lɛ ǹghay la ri roànɛ ɓì ti ɓì regàg lɛ rìfòm ɗi Ɓɛ̀yudɛ̀n?

¹³Ɓɔɔ̀cèm ɓɛ ɓiìtì jɛ̀ɛ̀ aɗyoo lɛ: Kpana nyi ɓi kɔrɔs.

¹⁴Pilat à tɔg ɓɔ lɛ: Cɛ à kìi? Ɓɛ teŋzì tì jɛ̀ɛ̀, ɓɛ kpaa lɛ: Kpana nyi ɓi kɔrɔs.

¹⁵Yɛ̀ɛ Pilat à kɔ̀ngà lɛ à puɓsi ɓɔ ǹɗem, fɔɔnnɛ à càɗkà Ɓaraɓas. A reɓsì lɛ ɓɛɛ ɓog Yeesus ɓi kìtòn, à fa min ɓɔ nyi, lɛ ɓɛɛ kɛǹ nyi kì kpanì ɓi kɔrɔs.

¹⁶Ɓɛ̀sujàà ɓɛ tekà Yeesus, ɓɛ kɛǹ ɗì nyi ɓi kìkpanà ki ɓɛyɔ̀m ki ɓi naa ì gɔmìnà. Ɓɛ reŋɗɛ̀n yì ǹɗaŋ wu ɓɛsujàà wùcèm.

¹⁷Ɓɛ waasì Yeesus ɓìlàà ɓi ɓàŋ lɛ pɔɔŋ, ɓɛ saàgh nyi tàm à ɓìlɔ̀ɔ̀ ànɛ ɓɛ togà ɓi ǹto.

¹⁸Ɓɛ tumɛ̀n min nyi rìkpɔŋkpɔ̀ŋ ɗi ɓɛɛ̀ kpaakpaa lɛ: Tì tògsii wɔ̀ rìfòm ɗi Ɓɛ̀yudɛ̀n.

¹⁹Ɓɛ ɓoòɓòkì nyi kìsyòŋ ɓì ǹto, ɓɛ tuùtùùghì nyi tìtyɛɛ̀, ɓɛ ki ɓaɓag nyi mɛ̀ɗu asu yɛ̀ɛ ɓɛɛ̀ kali lɛ ɓɛɛ̀ ɓɔɔɓɔ̀gsì nyi.

²⁰Yɛ̀ɛ ɓɛ ɓaghà di ɓɛ mɛ fengi nyi fɔlɔɔ, nni ɓɛ pisìghà nyi kìlàà ki ɓàŋ ki ɓɛ waasìghà nyi, ɓɛ pɛɛ̀zì nyi kì waasii ɓilàà ɓii, ɓɛ kɛǹ min ɗi nyi lɛ ɓɛɛ kpaǹ ɓi kɔrɔs.

²¹Ŋwaàdɛŋ ànɛ ɓi kìlɔ̀ŋ ki lɛ Sirɛn ɗii lɛ Simɔn à ghaghàghìyà wɔɔ, di à rìì a dɛm, àncèm à ɓaghà seŋi Alɛgsaŋdirɛ ɓɛɛ̀ Rufus. Ɓɛ̀sujàà ɓɛ kagà nyi lɛ a tɛg kɔrɔs à Yeesus.

²²Nni ɓɛ kɛngà rì Yeesus ɓi kòdò ànɛ lɛ Gɔlgɔta, yɛɛ lɔɔ lɛ, jàŋ i kìtɛtɛg ki ǹto.

²³Ɓɛ mɛɛ̀ kìghà lɛ ɓɛɛ nɔsi nyi mɛ̀rɔ̀g mɛ mɛ ɓaghà mɛ ɓiŋɛn ri com kidɛŋ lɛ miìr, wɔ̀lɛ à nɔghà ɓi.

²⁴Fɔɔnnɛ ɓɛ kpangà min nyi ɓi kɔrɔs ɓɛ kaɓɓɛ̀n ɓìlàà ɓii di ɓɛ mɛ pìg ntɔ̀ŋ lɛ ɓɛɛ yi kìlàà ki mum ǹcèm à ghɛ̀ɛ̀sɛɛ kì terì.

²⁵Ɓɛ kpangà nyi ɓi kɔrɔs ɓi mɛ̀kɛ̀ɛ̀ taànìn à sariwa.

²⁶Com ki ɓɛ kangà lɛ ɓɛɛ resi ǹto wu kiɓan wu ɓɛ woli nyi miì ki ɓaghà lɛ: À rì rìfòm ɗi Ɓɛ̀yudɛ̀n.

²⁷Ɓɛ kpangà nyi ǹɗaŋ ri ɓɛ̀zyaàzyaa ɓɛɓɛɛ̀ lɛ, roànɛ nyi ɓi weèlem, roànɛ nyi ɓi kìmɛŋ. [

²⁸Ki kilɛ̀ngà fɔlɔɔ lɛ kɛɛ ɓa lɔŋ yɛ̀ɛ ki ri kì kànɛn lɛ, ɓɛ fogà nyi ɓi bàlì ì ɓɛ̀zyaàzyaa.]

²⁹Ɓɛ̀ghaàgh-bee ɓɛ sɛɛ̀sɛ̀mgìghà nyi di ɓɛɛ̀ ghegheri ri mɛ̀to, ɓɛ kpaakpàà lɛ: Di ǹghɛɛ fè! wàànɛ u kalag lɛ, ù rì lɛ ù waà naà-Bɛ̀ll, ù ki pɛ̀ɛ̀zi yɔ̀ kìtoŋì ɓi mɛ̀ru mɛraa,

³⁰ghɛɓsi min wɛ̀ɛmiɗ, u sɛǹ yì ɓi kɔrɔs ànɛ̀n!

³¹Ɓɛ̀pìrɛɛtìrɛ̀ ɓɛgwey girig rì ɓɛ̀rèsàg-ɓìdɔ̀gsɛna ɓɛ wɔwɔ̀là nyi wɔɔ ɓɔ rì ɓɔ, ɓɛ kpaakpàà lɛ: Àa ǹghɛɛghɛ̀ɓsì ɓum ɓɛdɛŋ, wɔ̀lɛ kɛ̀ɛ ɓa rì bee inɛ lɛ a ghɛɓsi nyimiɗ.

³²Kiris ànɛ àrì rìfòm ɗi Isirayɛl a sɛǹ yì ɓi kɔrɔs ɓigomìnɛ, ti ghɛǹ di ti gherɛn nyi. Ɓumɓɛ ɓɛ kpangà nɗaŋ ri Yeesus, ɓɛ sɛɛ̀sɛ̀mgìghà girig nyi.

³³Birìm ì kìghà zi bimiɗ, à tumɛ̀n toroɓ, à kpaŋ mɛ̀kɛ̀ɛ̀ mɛraa.

³⁴Yɛ̀ɛ mɛ̀kɛ̀ɛ̀ mɛraa à kpagà, nni Yeesus à nyàmgà jɛ̀ɛ̀ aɗyoo lɛ: Elɔy, Elɔy, Lama saɓagtani, yɛɛ lɔɔ lɛ, Bɛ̀ll wɛ̀m Bɛ̀ll wɛ̀m, ù rinii ɓà mɛ lɛ cɛ?

³⁵Ɓum ɓɛdɛŋ ɓɛ ɓɛ ɓaghà wɔɔ, ɓɛ wokà com ki Yeesus à kpaghà ɓɛ kpaa lɛ: Ɓì ghɛɛ yɛ̀ɛ a rereŋi Eli?

³⁶Nni kìbog ki ɓi ɓɔ ki kɛngà rì mɛ̀ree, kì nɔg dɛ̀ɓ ɓi ɓìkpaakpam ɓi mɛrɔ̀g, ki ɓam̀ dɛ̀ɓ ìnɛ̀n ɓi kìsyòŋ ki nam̀ Yeesus lɛ a nɔ, di kɛɛ̀ kpaakpaa lɛ: Càrina ti ghɛǹ ǹkoò Eli à ɓiì yùu lɛ a kɔsi nyi ɓi kɔrɔs.

³⁷Yeesus à nyàmgà jɛ̀ɛ̀ aɗyoo, à maasì.

³⁸Fɔɔnnɛ coo kilàà ki ki ɓaghà ɓi naà-Bɛ̀ll ki lanìghà ɓìlànà ɓiɓɛɛ̀, à tumɛ̀n yì aɗyoo à kpaŋ azi.

³⁹Yɛ̀ɛ ǹkɔ̀mɛ̀n-ɓɛ̀sujàà ànɛ a ɓaghà ǹɗɛrɛliyɛn a pɛ̀ɛ̀zìì mis ɗì Yeesus à ghɛngà di Yeesus à mɛ maasi fɔlɔɔ, nni à kpaaghà lɛ: Ŋwaànɛ àa nɗì lɔŋ Man à Bɛ̀ll a tààkaà.

⁴⁰Ɓɛ̀yiɓ ɓɛdɛŋ ɓɛ ɓaghà girig wɔɔ, ɓɛ seesèè yì fìràɓ. Ɓɛ ɓaghà lɛ: Rì Marii Madelɛn, rì Marii à jɛɛ Zyag à ŋwɔɓti ɓɛɛ Zyoozɛ, rì Salome.

⁴¹Ɓɛ̀yiɓ ɓɛǹ ɓɛɛ nɔɔnɔ̀ɔ̀tìghà Yeesus ɓɛ kikì nyi tìtom cààmɛ̀n ki à ɓaghà a Galile rì kìtuu ki ɓɛ̀yiɓ kim̀bog ki ki ɓɔ̀kày rì nyi a Yorisalɛm.

⁴²Yɛ̀ɛ cɛŋkò ki ɓaghà ɗi ki ti, ki ki ɓa lɛ, ŋwos anɛ̀n innɛ ɓɛ ghɛɛsɛ̀ngà kì pègsɛɛ ticàɓ, yɛɛ lɔɔ lɛ di Saɓàt à rì yɛ̀ɛ rìduri,

⁴³Yoosɛɓ, ŋwaànɛ a Arimate à yùghày; à ɓaghà kìtèetèɗ ki mum ki ɓi Sànèdìrɛŋ; nyimiɗ a ɓoŋɓòŋgà girig kìlɔ̀ŋ ki Bɛ̀ll; à ghɛɛsìghà lɛ a kɛǹ yɛ̀ɛ Pilat, à lɔǹ nyi kìloŋ ki Yeesus.

⁴⁴Pilat à kuuràkà yɛ̀ɛ à wokà lɛ Yeesus à mɛ wu, fɔɔnnɛ à reŋìghà ǹkɔ̀mɛ̀n-ɓɛ̀sujàà, à tɔg nyi ǹkòo cààmɛ̀n ki ɓaghà di ki mɛ ghaàgh lɛɛ̀gwey yɛ̀ɛ à maasìghà.

⁴⁵Yɛ̀ɛ ǹkɔ̀mɛ̀n-ɓɛ̀sujàà à kpaaghà nyi lɛ Yeesus àa wii, fɔɔnnɛ à kpaaghà lɛ Yoosɛɓ a teɗ kìloŋ kii.

⁴⁶Yoosɛɓ à làkày aloyà, à kɔ̀sìì kìloŋ ki Yeesus ɓi kɔrɔs, à lɔg kɔ rì aloyà ànɛ̀n, à nɔ̀ŋzì kɔ ɓi zɔ̀ŋ ìdɛŋ ìnɛ ì ɓaghà ǹsoɓɛn ɓi gɔ̀g. Fɔɔnnɛ à ɓiŋzìghà min gɔ̀g ìdɛŋ ɓi ŋwɔm wu zɔ̀ŋ.

⁴⁷Marii Madelɛn, rì Marii à jɛɛ Zyag, ɓɛ seesèèghà jàŋ ìnɛ ɓɛ ɓomgà nyi.