Read Bafia MARIKUS 4 Bible Online

MARIKUS 4 - Bafia bible

MARIKUS 4

¹Nni Yeesus à tumɛ̀ngà tì rìrèèrèsàg ɗi ɓum ɓi bèn ì rìɓày. Coo kituu ki ɓum ki taŋzɛ̀n nyi a nyoo lèg ànɛ lɛ à ɓɔkà ɓi kìkɔm à kɔ̀rìì ɓi mɛ̀nig, gɛ mum ànɛ̀n bimiɗ à rɔ̀ɓ yì a cɛɗ.

²Yeesus à rèèrèsàkà ɓɔ ɓìɓan lɛɛ̀gwey ɓi dàɗkì, nni ɓi ɓìɓan ɓiǹ à kalìghà ɓɔ lɛ:

³Wooghna! Nsalì-dɛm odɛŋ yɛɛ pɛsɛ̀ngà lɛ à kɛ̀ɛ kì mìsi boo ì ɓyom ɓi dɛm.

⁴Yɛ̀ɛ à mìmìskà, gàɓ ì boo ìdɛŋ ì kpì ɓi bee aɗyoo, tììlì ti yu, ti ɗi yɔ̀ bimiɗ.

⁵Gàɓ ìmbog ì kpì ɓi jàŋ i tìcɔg ìnɛ ì ɓìɓkà ɓi, ì ghàs kì ròo ɓisuulɛ ziinɛ̀n ì fɔmgà ɓi.

⁶Wɔ̀lɛ yɛ̀ɛ ŋwos a kpagày ɓyom ɓi ɗig, mɛ̀ɗyèm mɛ wom̀dàg lɛ ɓi ɓaghà kɛ̀ɛ̀ gàŋ.

⁷Nni gàɓ ìmbog ì kɛ̀ngà kì kpìi ɓi ɓìkàrag, yɛ̀ɛ ɓìkàrag ɓi tɔɓkà, ɓi laatàg yɔ̀, ì rɔ̀ɓ yɛ̀ kɛɛ wum.

⁸Nni boo ìdɛŋ i kɛ̀ngà kì kpìi ɓi syeesyee à zi, ì ròò, ì tɔɔ, ì ki wum lɛ, nɗyèm wu wu yii ɓìɗùn rìtin ɗì ǹtɛ̀ɗ, wu wu yii ɓìɗùn mɛ̀tin mɛ̀ra, wu wu yii, ɓìɗùn mɛ̀tin mɛtaǹ.

⁹Fɔɔnnɛ Yeesus à kpaatìghà lɛ: Ŋwaànɛ à rì rì mɛ̀reè, mɛ lɛ à wog, à wog.

¹⁰Yɛ̀ɛ Yeesus à kɛ̀ngà dɛgà, nni ɓumɓɛ ɓɛ ɓaghà nyi jàŋbog, rì ɓɛ̀yilàg ɓii ɓɛ tumɛ̀ngà nyi rìtɔg ɗi mɛtɔɔ̀gtɔɔgh ɓi dàɗkì yi à tetèkà.

¹¹Nni à ɓàkà ɓɔ lɛ: Mìnii ɓɛ ki ri ki fayɛn lɛ ɓi yi ɓìɓan ɓi ɓi ɓaghà ɓì nyamɛn ɓi kìlɔ̀ŋ ki Bɛ̀ll; ɓi ɓɛg ànɛ a ɓɛ̀ro ɓɛmbog ɓɛɛ̀ wowog lɔŋ ɓiɓan ɓìcèm yɛ̀ɛ dàɗkì

¹²lɛ kɛɛ ɓa lɛ, nsoò ɓaa seesèè lɛ tɛntɛ̀ɛ̀n, ɓɛ̀ kɛɛ̀ ghɛn, ɓɛ ri ki wog lɛ syeesyee, ɓɛ̀ kɛɛ̀ yi, lɛ di ɓɛ̀ kɛɛ̀ ki ɓa lɛ ɓɛ lɔɔ̀ghrɛ̀n mɛ̀rem, Bɛ̀ll à ki cenɛn ɓɔ ɓìɓe ɓyaa.

¹³Nni Yeesus à tɔgtìghà ɓɔ lɛ: Yɛ̀ɛ ɓì woogh ɓi dàɗkì ìnɛ azi, lannɛ ɓì rì min ɓiì woògh azi a dàɗkì yimbog yìcèm?

¹⁴M̀mìsì boo à rì ŋwaànɛ a sàasaàtì Ɓɔlɛ à Bɛ̀ll.

¹⁵Ɓɛ̀roɓɛ ɓɛ ri yɛ̀ɛ tim̀ à bee ànɛ boo ì rààghà miì ɓɔ yɛɛ ri ɓɛ̀roɓɛ ɓɛ ti ɓɛ kilàg lɛ, lɔŋ yɛ̀ɛ ɓɛ woogh ɓìɓan ɓi Bɛ̀ll lɔɔ, Satàn a yùy, à pisì ɓɔ ɓyɔ ɓi ǹɗem.

¹⁶Fɔɔnnɛ ɓumɓɛ ɓɛ ghaɓkà boo ɓi tìcɔg, ɓɔ yɛɛ ri ɓɛ̀roɓɛ ɓɛ ti lɛ, i ɓɛ woogh ɓìɓan ɓi Bɛ̀ll, ɓɛ ghas ɓyɔ kì terì rì kìnyàà;

¹⁷kìɓan kifog, ɓɔ kɛ̀ɛ gàŋ; ɓɛ ri làg lɛ ŋɛ̀ɛ̀ghŋɛ̀ɛ̀gh lɛ i ɓɛ tanɛɛ rì ntɔɓ, nsoò lɛ ǹyeèsɛ̀n àdɛŋ ɓisuu kiɓan ki Bɛ̀ll, lɔŋ lɛ ɓɛ naŋi rìgherɛ̀n.

¹⁸Ɓɛ̀roɓɛ ɓɛ ghaɓkà boo ɓi ɓìkàrag ɓɛ ri ɓumɓɛ ɓɛ ti ɓɛ wokì ɓìɓan ɓi Bɛ̀ll,

¹⁹kìɓan kifog mɛ̀tɔɓ mɛ ɓi ziinɛ, rì kìsee ki ikum, rì gɛ ɓìɓan ambog ànɛ a syòŋsyoŋ mɛrem, ɓi laatàg jɛ̀ɛ̀ ì Bɛ̀ll ìnɛn yɛ̀ kɛɛ̀ ghɛn bee inɛ lɛ yɛ̀ɛ wum ɓìdùn.

²⁰Ɓɛ̀ro ɓɛmbog ɓɛ ɓɛ ghaɓkà boo ɓi syeesyee à zi, ɓɔ yɛ̀ɛ ri ɓumɓɛ ɓɛ ti ɓɛ wokì ɓiɓan ɓi Bɛ̀ll, ɓɛ ki wum ɓidùn fɛlɛ yɛ̀ɛ boo inɛ ì kìghà lɛ, nɗyèm wu wu yii, wu wum ɓìɗùn rìtin ɗì ǹtɛ̀ɗ, wu wu yii ɓìɗùn mɛ̀tin mɛraa, wu wu yii, ɓìɗùn mɛ̀tin mɛtaǹ.

²¹Nni Yeesus à kpaatìghà ɓɔ lɛ: Mɛ̀ɛ nti ɓɛɛ saaghrag lamɓà ɓi kìrɛsì kii aɗyoo? Ɓɛɛ rɛsag nyi a kìbɔkɔ̀ zi giǹ, a ɓyom ɓilɔ̀ŋ zi?

²²Ɓisuulɛ kìɓan kidɛŋ ki ki ri a rìnyam kaa rɔ̀ɓ ɓi lɛ ki yilɛɛ ɓi; dwìɗ idɛŋ yɛ̀ kɛɛ̀ ki rɔ̀ɓ lɛ ì kpagii ɓi dan.

²³Ŋwaànɛ a rì rì mèree, mɛ lɛ à wog à ghɛ̀ɛ̀sɛɛ kì woògh.

²⁴Nni à kpatìghà ɓɔ lɛ: Kɛ̀ ɓi kì wàŋ rì ɓìɓan ɓi ɓi wowog' Lɛ vèg ìnɛ ɓì ti ɓì fèkì ɓum ɓyom miì, yɛ̀ɛnnɛ ɓɛ ri girig mìni ɓiì fèegh miì, ɓɛ ki ceesag ti ɓidɛŋ miì aɗyòò

²⁵Ɓisuulɛ ŋwaànɛ à rì rì ɓyom innɛ ɓɛ ɓiì fatii, wɔ̀lɛ roànɛ à rì kɛ̀ɛ̀ kɔ, nsoò maa gàɓ ànɛ à rì rì nyi ɓɛ ɓatɛ̀n.

²⁶Yeesus à kpaaghà tì lɛ: Kìlɔ̀ŋ ki Bɛ̀ll ki pisɛɛ rì ŋwaàdɛŋ ànɛ à mìsi ɓyom ɓi dɛm.

²⁷Àa soo lali, àa soo ki kɔ̀rii cem, ɓyom ɓìn ɓi ri ɓiì kìi lɛ, ɓi roò, ɓi tɔɔ, Ŋwaànɛ̀n kɛ̀ɛ yi lannɛ ki nkɛ̀ɛ̀kɛɛ.

²⁸Zi yɔ̀miɗ yɛ̀ɛ ri ɓiì kìi lɛ ǹɗuŋ wɛɛ roò, wu tɔɔ, wu foŋ ɓìɓàɓ, ɓìɓàɓ ɓi foŋ mis.

²⁹I ɓi mɛ ɓàŋ, ɓɛ tumɛ̀n rìrengì ɗi mɛɗyèm rì zɛ̀m lɛ mɛ̀saŋ mɛ kpaŋi yɛɛ lɔ̀ɔ̀.

³⁰Nni Yeesus à kpaatìghà ɓum lɛ, tì rì lɛ tì fèg ɓà kilɔ̀ŋ ki Bɛ̀ll rì cɛ? Nsoò lɛ dàɗkì ìbe yɛ̀ɛnɛ tì rì lɛ tì teɗ lɛ ti resi mìni yɛ̀ɛ kìlɔ̀ŋ kiǹ ki ri?

³¹Kìlɔ̀ŋ ki Bɛ̀ll ki pisɛɛ rì zàm ì rìwom. Zàm inɛn yɛ̀ɛ ti ì ɓiisàg ki tɛɓɓɛɛ di ɓɛ ɓɛli yɔ̀ ɓi boo yi ɓyom yìcèm yi ɓi ziinɛ;

³²kìɓan kifog i ɓɛ ɓɛli yɔ̀, ì ròò, ì tɔɔ, ì ghay coo kite ki ki ceghii ɓìɓɛ̀ɛ̀ɓɛ̀lì ɓìcèm ɓi ɓi dɛm, ki foŋ ɓyoo myaɓ lèg ànɛ lɛ tììlì ti aɗyoo ti ri lɛ ti togì ɓìlaa ɓyaa miì.

³³Rì mɛ̀kuu mɛ dàɗkì mɛ fɔlɔɔ lɛɛ̀gwey, nnɛ Yeesus à kakàlìghà ɓɔ ɓìɓan ɓi Bɛ̀ll lèg bimiɗ ànɛ ɓɛ ɓaghà lɛ ɓɛ wog.

³⁴Àa ǹti kɛ̀ɛ tòòghrɛn ri ɓum kɛ̀ɛ̀ dàɗkì, kìɓan kifog àa ǹti à kìlàg lɛ, i àa rɔ̀ɓ ri ɓɛ̀yilàg ɓii ɓɔ rì ɓɔ, à tɛɛ̀zì ɓɔ ɓìɓan ɓìcèm ɓi ɓi dàɗkì yiǹ.

³⁵Ŋwos nyimiɗ anɛ̀n, di cɛŋkò ki mɛ kpaŋ nni Yeesus à kpaaghà ɓɔ Lɛ: Ti syàana cɛcɛɗ kimbog.

³⁶Yɛ̀ɛ ɓɛ caɗkà gùl ì ɓum lɛ yɛ̀ɛ sug, nni ɓɛ kɛngà rì Yeesus ɓi kìkɔm ki à ɓaghà miì, wɔ̀lɛ ɓìkɔm ɓidɛŋ ɓi ɓaghà girig wɔɔ nɗaŋ ri nyi.

³⁷Fɔɔnnɛ coo bɛ̀ɓ ki tumɛ̀ngày rìfɛɓsìì rì ìtèɗ, ɓìkus ɓi riɓày ɓi kɛnkɛ̀n ɓi kìkɔm ɓi lèg ànɛ lɛ kìkɔm ki ɓaghà di mɛ̀nig mɛ ti miì ɓiì ronɗoni.

³⁸Yeesus à ɓaghà ɓiì lalali ɓi kìtòn ki kikɔm, à sasàghì nto ɓi kaŋdì. Ɓɛ̀yilàg ɓɛ ghemzì nyi, ɓɛ kpaa nyi lɛ: Ǹɗèsàg, ǹɗem wu kɛsii ɓi wɔ ri kìɓan ki lɛ tì yùu kì cuu yɛɛ lɛ!

³⁹Nni Yeesus à ghèmbɛ̀ngà, à fwààdɛ̀n bɛ̀ɓ, à kpaa rìɓày lɛ: Maarɛn, u kɔri lɛ fyòoog, nsoò maa m̀pɔ̀ɓ kɛ̀ɛ wooghrɛn ti.

⁴⁰Ajɛ̀m ìnɛn Yeesus à kpaaghà ɓɛ̀yilàg lɛ: Ɓisuucɛ nnɛ ɓì risii yì fɔlɔɔ? Lannɛ ɓì kaka kɛ̀ɛ̀ rìgherɛ̀n?

⁴¹Fɔɔnnɛ ìris wu ɓangà ɓɔ lɛɛ̀gwey, ɓɛ kpaakpàà wɔɔ ɓɔ rì ɓɔ lɛ: Rìkuu ɗi mum aɗi ɗyɛɛ ri lɛ, ɗi nsoò bɛ̀ɓ, nsoò rìɓày ɓyɛɛ̀ kìki mɛwog?