Read Bafia MARIKUS 5 Bible Online

MARIKUS 5 - Bafia bible

MARIKUS 5

¹Nni ɓɛ kɛngà kì kpaŋì cɛcɛɗ ki riɓày ɓi kìlɔ̀ŋ ki ɓɛ-Gerazenyɛŋ.

²Lɔŋ yɛ̀ɛ Yeesus à sɛngà kìkɔm, ŋwaàdɛŋ à kpaŋ yì ɓi dɛm i zɔ̀ŋ, à yù kì tuusɛɛ ri nyi; ŋwaàncèm à ɓaghà rì kìɓeɓtàg ki nghay.

³Àa ǹti à laayì ɓi dɛm i zɔ̀ŋ, fɔɔnnɛ ŋwaàdɛŋ à ɓatìghà ɓi ri ìtèɗ wulɛ à ɓan ŋwaànɛ̀n, à kàŋ nyi nsoò rì mɛ̀sɛ̀ŋi,

⁴ɓisuulɛ, ɓyààmɛ̀n lɛɛ̀gwey, ɓɛ kagà nyi mɛ̀kòò ri bɔŋ, ɓɛ sugì nyi mɛ̀sɛ̀ŋi ɓi ɓyàg, kìɓan kifog, àa ǹti à pwagì bɔŋ, à ki rengi mɛsɛ̀ŋi; mum ànɛ à ɓaghà lɛ à cenɛ̀n ŋwaànɛ̀n à ɓaghà ɓi.

⁵Yɛ̀ɛ ìru, yɛ̀ɛ ŋwos, ŋwaànɛ̀n àa ǹdègì ɓi dɛm i zɔ̀ŋ, rì ɓi don aɗyoo di a syansyan, à ki kpɛ̀ɛkpɛɛ̀rɛ̀n nyimiɗ ri gɔ̀g.

⁶Yɛ̀ɛ à ghɛngày Yeesus fìràɓ, à gheŋmɛ̀n yì, à yù nyi kì ɓaàgh mɛ̀ɗu asu

⁷à ki syan jɛ̀ɛ̀ aɗyoo rì ìtèɗ lɛ: Yeesus, Man à Bɛ̀ll ànɛ à teŋmɛɛ kɛ̀ɛ̀ vèg cɛ kɛɛ rì wɔ̀ rì mɛ̀? M̀ɓɔ̀ŋzii wɔ̀ ɓi ɗii ɗi Bɛ̀ll lɛ, kɔ̀ɔ ki mɛ ǹtɔɓ.

⁸À kalìghà fɔlɔɔ lɛ Yeesus à kpaakpààghà nyi lɛ: Kìɓeɓtàg ki ǹghay! Kpaŋa ɓi ŋwaànɛ!

⁹Nni Yeesus à tɔkà min nyi lɛ: Ù rì ɗii lɛ ghɛn? À ɓàg nyi lɛ: Ǹɗì ɗii lɛ: Kìtuu, ɓisuulɛ tì tèghɛɛ lɛɛ̀gwey.

¹⁰Ŋwaànɛ̀n à ɓɔ̀ŋzàkà Yeesus, à sììrɛ̀n lɛ, Yeesus kɛ̀ɛ nàɓ ɓiɓeɓtàg ɓi mɛghay ɓìn lɛ ɓyɛɛ pɛsɛn ɓi kìlɔ̀ŋ kiǹ, ɓyɛɛ kɛǹ jàŋ idɛŋ.

¹¹Wɔ̀lɛ coo kìtuu ki jèè ki ɓaghà ɓiì ɗiɗii ɓyaaɓi jàŋbog rì dòn.

¹²Fɔɔnnɛ ɓìɓeɓtàg ɓi mɛghay ɓi ɓɔŋzàkà Yeesus di ɓyɛɛ kpaakpaa lɛ: Rom ɓìsi ɓi kìtuu ki jèè kinii, ti ɗiŋi ɓi yɔ.

¹³Nni Yeesus à gherɛ̀ngà, fɔɔnnɛ ɓìɓeɓtàg ɓi mɛghay ɓìn ɓi kpagà ɓi ŋwaànɛ̀n, ɓi ɗiŋɗàg ɓi jèè; kituu ki jèè kiǹ ki pwaŋɗɛ̀n yì ɓi dòn aɗyoo ki suùrɛ̀n ɓi rìɓày; jèè yiǹ yi ɓaghà nunùg jèè ɓɛ̀tɔɔsìm ɓɛɓɛɛ̀, nni yi cuughà lɔŋ ɓi rìɓày yìcèm.

¹⁴Ɓumɓɛ ɓɛ ɓeŋɓèŋgà jèè yiǹ ɓɛ panìghà rì mɛ̀ree, ɓɛ kɛǹ kì kakalii ɓumɓɛ ɓi bàn, rì ɓɛ̀roɓɛ ɓi jɛ̀m ì kìlɔ̀ŋ kìɓan kiǹ. Ɓum ɓɛ pɛɛ̀pɛ̀sɛ̀ngày lɛ ɓɛɛ ghɛǹ kìɓan ki ki kilɛ̀ngà kiǹ.

¹⁵Ɓɛ yu Yeesus a nyoo, ɓɛ ghɛn ŋwaànɛ à ɓaghà rì ɓìɓeɓtàg ɓi mɛghay lɛɛ̀gwey ǹkɔ̀kɔriyɛn, nni ìris wu ɓangà ɓɔ.

¹⁶Ɓumɓɛ ɓɛ ɓaghà wɔɔ yɛ̀ɛ kìɓan kiǹ ki kilɛ̀ngà, ɓɛ kalìghà ɓɛ̀ro ɓɛmbog yɛ̀ɛ kaa ɓaa, à tumɛ̀n ɓi ŋwaà ɓìɓeɓtàg ɓi mɛghay, à kpaŋ ɓi jèè.

¹⁷Nni ɓɛ tumɛ̀ngà rìɓɔ̀ŋzàg ɗi Yeesus lɛ, a pɛsɛn ɓi kìlɔ̀ŋ kaa.

¹⁸Yɛ̀ɛ Yeesus à ɗiɗiŋìghà ɓi kìkɔm, nni ŋwaànɛ à ɓaghà ànɛn ri ɓìɓeɓtàg ɓi mɛghay à ɓɔ̀ŋzàkà nyi, lɛ nyi ɓa ɓi nɗaŋ waanɛ̀n.

¹⁹Yeesus à ɓèn, wɔ̀lɛ à kpaa ŋwaànɛ̀n lɛ: Sugha a ɓum ɓɔɔ, u kali ɓɔ com kìcèm ki Kan àa kìi ɓisu wɔɔ, rì yɛ̀ɛ àa woogh wɔ̀ nyìighnyìg.

²⁰Fɔɔnnɛ ŋwaànɛ̀n à kɛ̀ngà, à tumɛn rìlààlàmɓɛ̀n ɗi com kìcèm ki Yeesus à kìghà ɓisu wii ɓi kìlɔ̀ŋ ki ɓɛ nɗegi lɛ, kìlɔ̀ŋ ki bàn ǹtɛ̀ɗ. Ɓum ɓɛ̀cèm ɓɛ kuuràkà.

²¹Yeesus à sugtìghà kìsyàa ɓɛg àmbog ɓi kìkɔm, coo kituu ki ɓum ki taŋzɛ̀n nyi a nyoo yɛ̀ɛ à ɓaghà ɓi bèn ì rìɓày.

²²Fɔɔnnɛ mum ɗii lɛ Zyayirus, kìbog ki ɓi ɓumɓɛ ɓɛ lamìghà naà-bɔ̀ŋzɛ̀n, à yùghà, à ghɛn Yeesus, à kpì nyi a mɛ̀kòò.

²³A ki ɓɔ̀ŋzag nyi, à sììrɛ̀n ɓi bɔ̀ŋzɛ̀n ìnɛn, à kpaakpàà lɛ: Maa ŋwɔɓti wɛ̀m à giɓ a kɔ̀ɔkɔɔ̀sì, nni yu, u saagh nyi ɓyàg ɓi nyoo, di fɔɔnnɛ à wɔǹ, à ki ɓa ti ri cɛɓ.

²⁴Fɔɔnnɛ Yeesus ɓɛ sugtɛ̀ngà ɓɛɛ Zyayirus, coo kituu ki ɓum ki nɔɔ̀nɔ̀ɔ̀tì nyi, ki kɔm̀ nyi, ki ki sìisiìrì nyi.

²⁵Nni giɓ adɛŋ ànɛ à roròɓkà fìroɓ fi lɛ, bwaɓ yi kpaŋkpàŋ nyi ɓyààmɛ̀n ɓìcèm à ɓaghà wɔɔ; fìroɓ fìn fi ɓaghà di fyaa finɛn bèg ǹtèɗ rì yiɓɛɛ̀.

²⁶Giɓ anɛ̀n à ɓaghà di à mɛ ghɛn ntɔɓ lɛɛ̀gwey ɓi rìdèŋdèŋ ɗi a ɓɛ̀kìì-boòboo lɛɛ̀gwey à ki yogsi ɓɔɔ ɓyom ɓii ɓɛ̀cèm ɓɛ à ɓaghà rì ɓɔ, ɓi fìroɓ fii, kìɓan kifog fi kɛnkɛ̀n lɔŋ nyi ɗì rìroròɓ rì ìtèɗ.

²⁷Nni yɛ̀ɛ à wokà di ɓɛɛ̀ ɓùŋɓuŋ kiɓan ki Yeesus, fɔɔnnɛ à yùghày Yeesus ajɛ̀m, di a sɔ̀ɔsɔlɛ̀n yì ɓi nyìinyìm à ɓum, à kòm nyi ɓi kìlàà;

²⁸ɓisuulɛ à kpaakpààghà ɓi ǹɗem wii lɛ: I m̀mànɛɛ kì kòmi nsoò kìlàà kii, lɔŋ lɛ ǹwɔ̀ni.

²⁹Ɓi cààmɛ̀n kɔm̀ kiǹ, bwaɓ yi ghàs kì renɛɛ rikpaŋ ɗi giɓ anɛ̀n, à wog yɛ̀ɛ nyoo yìì i fɛmɓɛɛ, à ghɛn lɛ à wɔ̀ni fìroɓ fii.

³⁰Yeesus nyii ghas kì woògh fɛlɛ yɛ̀ɛ ìtèɗ wudɛŋ wu pɛsɛɛ nyi ɓi nyoo, à nìmɓɛ̀n ɓi nyìinyìm à ɓum, à tɔg lɛ: Ghɛn yɛɛ komi mɛ̀ ɓi kìlàà?

³¹Nni ɓɛ̀yilàg ɓii ɓɛ ɓakà nyi lɛ: Ù seesèè lɔŋ yɛ̀ɛ gwìy ì ɓum yɛɛ̀ sìisiìrì wɔ̀, ù tɔgtì lɛ ghɛn yɛɛ komi wɔ̀?

³²Fɔɔnnɛ Yeesus à kɛ̀ɛ̀sìghà mis ɓi ɓumɓɛ ɓɛ kɔmgà nyi lɛ a ghɛǹ ŋwaànɛ àa kòmi nyi.

³³Nni giɓ ànɛ̀n à risìghà, à nììghnìŋdɛ̀n lɛ kpàg-kpàg lɛ à yighà com ki ki kilɛ̀ngà ɓi nyoo yìì; fɔɔnnɛ à yùghà ki kpìi Yeesus a mɛ̀kòò, à kpaa nyi saaɗ ànɛ ɓi kìɓan kiǹ kìcèm.

³⁴Nni Yeesus à kpaaghà nyi lɛ: Iyà, rìgherɛ̀n ɗyɔɔ ɗi ghɛɓsii wɔ̀, kɛ̀na lɛ fyòoog, ù wɔni fìroɓ fyɔɔ yaà.

³⁵Di Yeesus à kaka à totòg fɔlɔɔ, nni ɓum ɓɛdɛŋ ɓɛ pɛsɛ̀ngày a mɛɛ mɛ Zyayirus, ɓɛ yu nyi ki kpaa lɛ: Zyairus, gɔ̀n yɔ̀ɔ̀ i mɛ maasì; kɔ̀ɔ yeesi ti ǹɗèsàg zɛy.

³⁶Wɔ̀lɛ Yeesus à nɔ̀ɔ̀tìghà ɓi rìkpaa ɗiǹ à kpaaghà lɔŋ ǹlàmì naà-bɔ̀ŋzɛ̀n lɛ: Kɔ̀ɔ risi, ɓaya lɔŋ ri rìgherɛ̀n.

³⁷Yeesus à gherɛ̀ngà ɓi lɛ, ŋwaàdɛŋ à kɛǹ nyi kì foŋì, lɔŋ Pyɛɛri, rì Zyag ɓɛɛ̀ geni ànɛ lɛ Zyaŋ ɓɛɛ̀ɓɛ à kɛ̀ngà rì ɓɔ.

³⁸Yɛ̀ɛ ɓɛ kpagà a mɛɛ mɛ rifòm ɗi naà-bɔ̀ŋzɛ̀n, Yeesus à tanɛ̀n coo gom ì mɛ̀kɛɛ̀gh, rì ɓìkiŋ ɓi ɓɛ rɔŋɗɔ̀ŋgà.

³⁹Fɔɔnnɛ à ɗiŋìghà ɓi naa, à kpaa ɓɔ lɛ: Ɓisuucɛ nnɛ ɓi rènɗen fɛlɛ di ɓi ɓooghɓoòghrɛ̀n, ŋwɔɓti ànɛ à wii ɓi, à rì yɛɛri ɓi fìlo.

⁴⁰Ɓumɓɛ̀n ɓɛ tumɛ̀n nyi rìwɔ̀wɛ̀y, nni à kpaŋzàkà min ɓɔ ɓɛ̀sɛ̀ɛ̀ ɓɛcèm; à teɗ lɛ rì seŋi rì jɛɛ man, ri ɓumɓɛ à ɓaghày rì ɓɔ, ɓɛ ɗiŋì ɓi naa ìnɛ ŋwɔɓti à ɓaghà miì.

⁴¹Nni à ɓangà ŋwɔɓti ɓi càg, à kpaa nyi lɛ: Talita kumi! Yɛɛ lɔɔ lɛ, Ŋwutyàà-giɓ, ǹkalii wɔ̀ lɛ pɛ̀sɛn aɗyòò.

⁴²Ŋwutyàà-giɓ anɛ̀n à ghàs kì pɛ̀sɛɛ aɗyoo, à tumɛ̀n rìkɛ̀ɛ̀kɛ̀ɛ̀, lɛ à ɓaghà di a ti bèg ntɛ̀ɗ rì yìɓɛɛ̀. Ɓum ɓɛ ghɛngà kìɓan kiǹ koŋnyoo lɛɛ̀gwey.

⁴³Wɔ̀lɛ Yeesus à rɔ̀gsɛ̀ngà ɓɔ, à siitàg ɓɔ lɛ ɓɛ̀ kɛɛ̀ kali ŋwaàdɛŋ kìɓan kiǹ. À ki kpaa ɓɔ lɛ ɓɛɛ fa ŋwutyàà-giɓ anɛ̀n com kiɗiyɛn.