Read Bafia MARIKUS 6 Bible Online

MARIKUS 6 - Bafia bible

MARIKUS 6

¹Nni Yeesus à pɛsɛ̀ngà foo, à kɛ̀n ɓi bàn ìnɛ à tɔɔghà wɔɔ, ɓɛ̀yilàg ɓii ɓɛ nɔɔ̀tì nyi.

²Ŋwosi Saɓàt àdɛŋ, à tumɛ̀ngà ɓum rìrèsàg ɓi naà-bɔ̀ŋzɛ̀n; gɛ mum ànɛ à wowòkà ɓìtòkì ɓii à kuuràkà lɛɛ̀gwey ɓɛ tɔtɔg lɛ: À rìì fe ri kìɓan ki? Rìkuu ɗi ɗyomzɛ̀n aɗi ɗyɛɛ ri lɛ? Dàm yi a kìki yi yi ri la?

³Àa nnyɛɛ ri kaminɗà, nyi man à Marii, nyi geni ɓɛ̀-Zyag ɓɛɛ Zyoozɛ, rì Zyuudɛ rì Simɔn? Ɓɛ̀geni ɓii ɓɛ ɓɛ̀yiɓ ɓɛ yiǹ fɛ rì ɓìsi? Rìɓa ɗii ɗiǹ ɗi rekà ɓɔ lɛ, ɓɛ̀ kɛɛ̀ gherɛn nyi.

⁴Yeesus à kpaa min ɓɔ lɛ: Ǹkpaŋzì-ɓìɓan a maà kem ɓi ɓi kìlɔ̀ŋ kii; ɓɛ̀yalì ɓii rì naa yìì i ɓum ɓɛ̀ kɛɛ̀ kuurag ri nyi.

⁵Fɔɔnnɛ à kìghà ɓi dàm wɔɔ nsoò bog, i ki cee ɓi lɛ, gàɓ ì ɓɛ̀roroɓ ìnɛ a wɔ̀ɔ̀zìghà di à saghii ɓɔ ɓyàg ɓi nyòò.

⁶Yeesus à kuuràkà yɛ̀ɛ ɓumɓɛ̀n ɓɛ ɓaghà fɔlɔɔ ri nyoey, à kɛ̀n asu à rerènì ɓìlɔ̀ŋ ɓi jàŋbog, di a rèeresàg ɓum ɓìɓan ɓi Bɛ̀ll.

⁷Fɔɔnnɛ Yeesus à reŋìghà ɓɛ̀yilàg ɓii ntɛ̀ɗ rì ɓɛɓɛɛ̀, à tumɛ̀n ɓɔ rìɓaskì ɓɛ̀sɛ̀ɛ̀ ɓɛɓɛɛ̀ ɓɛɓɛɛ̀, di a ronɗom ɓɔ; à fa ɓɔ ìtèɗ wulɛ ɓɛɛ nanaɓ ɓìɓeɓtàg ɓi mɛghay;

⁸à siŋdɛ̀ngà ɓɔ lɛ, ɓɛ̀ kɛɛ̀ teɗ com ɓi rìkɛ̀ɛ̀; ɓɛɛ ɓanɛn kìgeŋ kɔrìkɔ kɛ̀ ɓɛɛ̀ teɗ bìrɛs, nsoò kaagh a ɓiɗilàg, nsoò mɔ̀ɔ̀ni, kɛ̀ ɓɛɛ̀ pìg ɓi ɓàm;

⁹kìɓan kifɔg à kpaaghà lɛ: Waatɛɛna lɔŋ ɓɛ̀siripàs ɓi mɛ̀kòò, mum kɛɛ̀ ɓɔ̀ɓtɛn ɓilàà ɓiɓɛɛ̀.

¹⁰Nni à kpaatìghà ɓɔ lɛ: Jàŋ bimiɗ ìnɛ ɓì kpaŋi, kɔ̀riina lɔŋ ɓi naa ìnɛ ɓì ɗiŋii miì, à kpaŋ yɛ̀ɛ ɓì rì ɓiì pɛ̀sɛɛ ɓi jàŋ inɛ̀n.

¹¹I ɓɛ ɓeni mìni kì ghàɓi jàŋ idɛŋ, nsoò lɛ ɓɛ ɓeni kìwoògh com ki ɓi kpaakpàà, i ɓì ti ɓiì pɛ̀sɛɛ ɓi jàŋ inɛ̀n, ɓì kwìɗ kùrùɓu ànɛ mìni ɓi mɛ̀kòò, rìkì ɗiǹ ɗyɛɛ̀ rèresi ɓumɓɛ̀n zɛ̀ɗ yaà.

¹²Nni ɓɛ̀yilàg ɓɛ kɛngà, ɓɛ tum rìkpaa ɗi ɓum lɛ ɓɛɛ lɔɔ̀ghrɛn mɛ̀rem.

¹³Fɔɔnnɛ ɓɛ nanàɓkà ɓìɓeɓtàg ɓi mɛghay lɛɛ̀gwey, ɓɛ ki wɔ̀ɔwɔɔ̀zì tì ɓɛ̀roroɓ di ɓɛ siŋii ɓɔ mɔ̀ɔ ɓi nyòò.

¹⁴Nni rìfòm ɗi lɛ Eroodɛ ɗi wokà kìɓan kiǹ ɓisuulɛ rìkem ɗi Yeesus ɗi ɓaghà di ɗi ti ɓiì pàpasi ɓum jàŋ bimiɗ, ɓɛ kpaakpàà lɛ, Zyaŋ Bàɓtis yɛɛ ghemɓɛɛ yì a nyɔ̀ɛ̀y, kɛɛ̀ki à rì miì rì ìtèɗ wu kìkiyɛn dàm.

¹⁵Ɓɛ̀ro ɓɛdɛŋ ɓɛ kpaakpàà lɛ Eli yɛɛ rì, ɓɛmbog lɛ à rì lɔŋ ǹkpaŋzì-ɓìɓan à Bɛ̀ll yɛ̀ɛ ɓɛ̀kpaŋzì-ɓìɓan ɓɛmbog.

¹⁶Yɛ̀ɛ Eroodɛ à wokà gɛ mɛ̀kali anɛ̀n bimiɗ, nni à kpaaghà lɛ: Zyaŋ ànɛ mɛ̀ɛ ǹɗeɓsii lɛ ɓɛɛ ren ǹto nnyɛɛ ghemɓɛɛ!

¹⁷Lɛ Eroodɛ nyimiɗ yɛɛ faghà ìtèɗ wulɛ ɓɛɛ ɓan Zyaŋ, ɓɛ ki kàŋ nyi rì mɛ̀sɛ̀ŋi, ɓɛ pig ɓi naà-zày, ɓi kìɓan ki Eroɗyaadɛ à gili geni ànɛ lɛ Filiɓ ànɛ à tekà.

¹⁸Zyaŋ à kpaakpaaghà Eroodɛ lɛ: Ki ghɛɛ̀sɛɛ ɓi lɛ u wɛs̀ gili goni.

¹⁹Eroɗyaadɛ à takàkà Zyaŋ ɓi ɗùm, à ki kaakaa bee inɛ lɛ ɓɛɛ wey nyi, kìɓan kifog, kɛ̀ɛ ɓa ri bee,

²⁰lɛ Eroodɛ àa ǹnìgàg Zyaŋ, à ki kàmag ri nyi, lɛ à yighà lɛ Zyaŋ à ɓaghà saaɗ à mum, à ki ɓa ti ǹtɛnɛn ɓi mis mɛ Bɛ̀ll. Ɗyomzɛ̀n ɗi ǹti ɗi ɗimgì Eroodɛ cààmɛ̀n kìcèm ki à woogh ɓìtòkì ɓi Zyaŋ, kɔm̀ lɛ ki ǹkɔ̀ngì nyi lɛ a wowog ɓyɔ.

²¹Wɔ̀lɛ ŋwosi mààgh à Eroɗyaadɛ à kpagà ɓi gòn ìnɛ Eroodɛ à ɓaghà ɓi kìsɔ̀g ki ɓi gòn i rìyalɛ̀n ɗìì; à taŋzɛ̀ngà kìsɛ̀nɛ̀, à reŋɗɛ̀n ɓɛ̀sasààgh ɓii, rì ɓɛ̀kɔ̀mɛ̀n-ɓɛ̀sujàà, rì ɓɛ̀lem ɓɛ ɓum ɓɛ a Galile.

²²Nni gɔ̀n ì Eroɗyaadɛ ì ɗiŋìghày ɓi naa ì kìsɛ̀nɛ̀, ì tum rìɗyen. Ì rɔɔ lɛ rì Eroodɛ, rì ɓumɓɛ ɓɛ ɓaghà a kìsɛ̀nɛ̀. Rìfòm ɗì kali min ŋwutyàà gɔ̀n ànɛn lɛ: Tɔghà mɛ̀ com kìcèm ki ù kɔ̀ni ǹfa wɔ̀ kɔ.

²³Fɔɔnnɛ à kanɛ̀ngà bɛ̀ɗ, à kpaa nyi lɛ: Com kìcèm ki ù rì mɛ̀ ɓiì tɔɔgh nsoò kìlànà ki zi ìnɛ ǹlàmii kɛ yaa rì, ǹɗi wɔ̀ ɓiì faa kɔ.

²⁴Nni ŋwutyàà giɓ à kpagà ɓi dan à kɛ̀n kì tɔɔ̀gh jɛɛ lɛ: Cɛ kɛɛ̀ ki ntɔg, nni jɛɛ à ɓàkà nyi lɛ: Tɔghà ǹto wu Zyaŋ Bàɓtis.

²⁵À sugtìghày rì mɛ̀ree yɛ̀ɛ rifòm, à kpaa ɗyɔ lɛ: Nkɔ̀nkɔn lɛ u fa mɛ̀ nto wu Zyaŋ Bàɓtis ɓi taasà lɔŋ ɓigomìnɛ.

²⁶Rìfòm ɗi wokà bim, kìɓan kìfog ɗi ɓaghà ɓi lɛ ɗi ɓeǹ lɛ ɗi ɓaghà di ɗyaa kànag bɛ̀ɗ ɓi mis mɛ ɓumɓɛ ɗi reŋɗɛ̀ngà.

²⁷Fɔɔnnɛ ɗi ghaskà ki romì sujàà ɗi tɔg lɛ, a yuiy nyi rì nto wu Zyaŋ Bàɓtis.

²⁸Sujàà à kɛ̀ngà ɓi naà-zày à syaŋ ǹto wu Zyaŋ, à sugtìì rì wɔ ɓi taasà, a fa wɔ rì gɔ̀n ìnɛn, ì teɗ ì ceesì rì jɛɛ.

²⁹Yɛ̀ɛ ɓɛ̀yilàg ɓɛ Zyaŋ ɓɛ wokà ɓɔlɛ anɛ̀n, fɔɔnnɛ ɓɛ yughày kì terì kìloŋ kii, ɓɛ kɛǹ kɔ kì ɓòmi.

³⁰Ɓɛ̀kɛ̀nì-fìtom ɓɛ taŋzɛ̀ngà Yeesus a nyoo, ɓɛ kpaa nyi ɓìɓan ɓìcèm ɓi ɓɛ kighày, rì ɓi ɓɛ resàkày ɓum.

³¹Fɔɔnnɛ Yeesus à kpaaghà ɓɔ lɛ: Yùuna, ti pyerɛn jàŋ ìnɛ ɓum ɓɛ yin, tì fɔɔ̀sɛn lɛsàg, ɓisuulɛ ɓum ɓɛ ɓaghà wɔɔ lɛɛ̀gwey, ɓɛ kikì lɛ, ɓɛ̀roɓɛ ɓɛ kɛnkɛ̀n, ɓɛ̀roɓɛ ɓɛ yuyùy lèg ànɛ lɛ, ɓɛ̀yilàg ɓɛ ɓaghà ɓi ri ɓee inɛ lɛ ɓɛ ɗi còm.

³²Nni Yeesus rì ɓɛ̀yilàg ɓɛ ɓɔkà ɓi kìkɔm lɛ ɓɛɛ pyerɛn, ɓi jàŋ ìnɛ ɓum ɓɛ ɓaghà ɓì.

³³Ɓum lɛɛ̀gwey ɓɛ ghɛngà ɓɔ yɛ̀ɛ ɓɛ kɛnkɛ̀ngà, ɓɛ ki rèmi lɛ ɓɔ yɛɛ ri; fɔɔnnɛ ɓum ɓɛ pɛɛ̀pɛ̀sɛ̀ngày ɓì bàn yìcèm, ɓɛ kɛɛ̀ghì rì tìfɔg, ɓɛ log ki kpaŋì ɓi jàŋ incèm rì ɓɔ.

³⁴Yɛ̀ɛ Yeesus à kpagày ɓi kìkɔm, à ghɛn coo gùl ì ɓum di ì ti, nyìighnyìg ì ki nyi rì ɓumɓɛ̀n, lɛ ɓɛ rɔɓkà fɛlɛ yɛ̀ɛ jɔ̀ɔ̀ yi yi ri kɛ̀ɛ̀ m̀ɓèŋì. Fɔɔnnɛ à tumɛ̀ngà ɓɔ rìrèsàg ɗi ɓiɓan lɛɛ̀gwey.

³⁵Yɛ̀ɛ ŋwos a ɓaghà di à tì lɛ a mag ɓìlɛy, ɓɛ̀yilàg ɓii ɓɛ tyoŋdɛ̀n nyi a nyoo, ɓɛ kpaa nyi lɛ: Jàŋ ìnɛ ì rì kilɛŋ, ŋwos a ki kɛ̀ɛ kì màagh ɓilɛ̀y;

³⁶kali ɓumɓɛ, ɓɛɛ kɛǹ ɓi bàn rì ɓi jɛ̀m i ɓilɔ̀ŋ ɓi ɓi wuɓsɛɛ, ɓɛɛ laàghrɛn yì ɓyom ɓi ɗiyɛn.

³⁷Yeesus à ɓàg ɓɔ lɛ: Mìniì ɓɔmiɗ faana ɓɔ ɓìɗilàg. Nni ɓɛ kpaaghà nyi lɛ: Tì rì nya ɓiì kɛ̀ɛ kì laàgh bìrɛs ì ɓɛtɔɔsìm rìtin lɛ ti fa ɓɔ ɓɛɛ ɗi.

³⁸Nni Yeesus à tɔkà ɓɔ lɛ: Ɓì rì foo rì bìrɛs yaŋ? Kɛ̀ɛna kì ghɛɛ̀. Ɓɛ ɓaghà lɛ ɓɛ mɛ kaa lɛ ɓɛɛ yi gàɓ ì ɓyom ìnɛ ɓɛ ɓaghà rì yɔ̀, nni ɓɛ ɓakà Yeesus lɛ: Tì rì rì bìrɛs yitaǹ rì ɓìzɛn ɓiɓɛɛ̀.

³⁹Yeesus à kpaa min ɓɔ lɛ ɓɛɛ kɔɔ̀si ɓum ɓɛ̀n ɓɛ̀cèm ɓi ɓyaaɓi ɓi cem ɓi ɓɔɔ ɓìtuu

⁴⁰Fɔɔnnɛ ɓɛ kɔràkà ɓi zi, ɓi mɛ̀raŋ lɛ rì mɛ ɓum mɛ̀tin mɛtaǹ, rì mɛ ɓum mɛ̀tin mɛɓɛɛ̀ rì ǹtɛ̀ɗ.

⁴¹Yeesus à teɗ kìtaǹ ki bìrɛs rì kìɓɛ̀ɛ̀rɛn ki ɓìzɛn, à ɓegsì mis aɗyoo, à fa Bɛ̀ll ɓìtògsɛ̀n, à ɓɛkì min bìrɛs yiǹ, a fa yɔ rì ɓɛ̀yilàg lɛ ɓɛɛ kaɓsi ɓum. A kàɓsàkà tì girig ɓɔɔ̀cèm ɓìzɛn ɓi kìɓɛ̀ɛ̀ ɓiǹ.

⁴²Ɓɛ̀sɛ̀ɛ̀ ɓɛ̀cèm ɓɛ ɗighà ɓɛ wuràg.

⁴³Ɓɛ̀yilàg ɓɛ taŋzɛ̀n lɛ rì ɓìɓɛghà ɓi bìrɛs rì ɓìzɛn ɓi ɓi rɔɓtàkà, ɓi ron ɓìkàɗ ǹtɛ̀ɗ rì ɓiɓɛɛ̀.

⁴⁴Bàlì ì ɓumɓɛ ɓɛ ɗìghà bìrɛs ìnɛn ì ɓaghà ɓɛ̀tɔɔsìm ɓɛtaǹ.

⁴⁵Ajɛ̀m ìnɛn, Yeesus a ghàskà kì losì ɓɛ̀yilàg ɓii lɛ ɓɛɛ ɓɔg ɓi kìkɔm, ɓɛɛ log kìsyàa rì nyi cɛcɛɗ a Bɛdsayida, cààmɛ̀n ki nyii ka gheeghesɛ̀n ɓum lɛ ɓɛɛ sukì.

⁴⁶Yɛ̀ɛ à ghesɛ̀ngà ɓumɓɛ̀n, nni à kɛ̀ngà kì ɓɔ̀ŋzaagh ɓi dòn aɗyòò.

⁴⁷Cɛŋkò ki kpagà di kìkɔm ki ti ɓi nyìinyìm à rìɓày, wɔ̀lɛ Yeesus cɛ̀ncii yɛɛ ɓaghà di à kakày a cɛɗ.

⁴⁸Yɛ̀ɛ Yeesus à ghɛngà di ɓɛ̀yilàg ɓɛɛ̀ yeeghyeèghkɛ̀n ɓi rìfyèè ɗi riɓày lɛ bɛ̀ɓ ì ɓaghày ɓɔ asu, ì yeèyèèsì ɓɔ, nni à kɛ̀ngà ɓɔ a nyoo di ɓyom ɓi duri ɓi ti, à kɛ̀ɛ̀kɛ̀ɛ̀ yì ɓi mɛ̀nig aɗyòò; à mɛɛ ki kìghà lɛ a cee ɓɔ.

⁴⁹Nni yɛ̀ɛ ɓɛ̀yilàg ɓɛ ghɛngà nyi di a kɛ̀ɛ̀kɛɛ yi fɔlɔɔ ɓi mɛ̀nig aɗyoo, ɓɛ fekì lɛ ɓɛ ghɛɛ nyɔ̀ɛ̀y, ɓɛ tumɛ̀n rìkugsɛ̀n.

⁵⁰Ɓisuulɛ ɓɔɔ̀cèm ɓɛ ghɛngà nyi, ki syaŋdì ɓɔ mɛ̀rem. Yeesus à ghàs kì tòòghrɛɛ à kpaa ɓɔ lɛ: Maasiina mɛ̀rem ɓi mùm, mɛ̀ yɛɛ ri, kɛ̀ ɓi risi.

⁵¹Fɔɔnnɛ à ɓɔkà ɓi kìkɔm, bɛ̀ɓ ìnɛ ì kìkìghà ì maarɛ̀n; kìɓan kiǹ ki yag ɓɛ̀yilàg rìwog ìsuùcèm.

⁵²Ɓisuulɛ ɓɛ wokà ɓi azi ànɛ ɓi dàm ìnɛ Yeesus à kìghà, yɛ̀ɛ à tègsìghà bìrɛs, lɛ mɛ̀rem maa mɛ ɓaghà mɛ̀tèɗkakɛn.

⁵³Yɛ̀ɛ ɓɛ ratɛ̀ngà kì syaà, ɓɛ kpaŋ ɓi kìlànà ki zi ki a Zyenezarɛt ɓɛ lomzì kìkɔm ɓi bèn ì rìɓày,

⁵⁴Lɔŋ yɛ̀ɛ ɓɛ sɛngày ɓi kìkɔm, ɓum ɓɛ ghas kìrèmii Yeesus.

⁵⁵Ɓɛ tum rìkɛ̀ɛ̀kɛ̀ɛ̀ ɓi naa ɓi naa di ɓɛɛ̀, kpaakpaa ɓum lɛ Yeesus à ti fɛ; ɓɛ ki tɛ̀tɛg yi ɓɛ̀roroɓ ɓi ɓɛ̀kon, di ɓɛɛ̀, kɛ̀nkɛn ɗi ɓɔ ɓi jàŋ bimiɗ ìnɛ ɓɛ woogh lɛ Yeesus à rì.

⁵⁶Ɓi jàŋ yicèm yi Yeesus à kpagà à tumɛ̀n lɛ, ɓi ɓìlɔ̀ŋ, rì ɓi bàn nsoò lɛ ɓi jɛ̀m i ɓilɔ̀ŋ, ɓɛ ǹnɔ̀ŋzàg ɓɛ̀roroɓ ɓi jàŋ yi yɛ̀ɛ ɓìyan ɓi tyèè, ɓɛ ɓɔŋzì nyi lɛ, ɓɛ̀roroɓ ɓɛ̀n ɓɛɛ kom̀ lɔŋ nsoò rìkeɓ ɗii ɗi kilàà; fɔɔnnɛ ɓɛ̀sɛ̀ɛ̀ ɓɛ̀cèm ɓɛ ɓɛ komgà nyi ɓɛ wɔngàkà.