Read Bafia MARIKUS 7 Bible Online

MARIKUS 7 - Bafia bible

MARIKUS 7

¹Ɓɛ̀fàrìzyɛŋ rì ɓɛ̀rèsàg-ɓìdɔ̀gsɛna ɓɛ ɓɛ pɛsɛ̀ngày a Yorisalɛm ɓɛ taŋzɛ̀ngà Yeesus a nyòò,

²ɓɛ ghɛn di ɓɛ̀yilàg ɓii ɓɛdɛŋ ɓɛɛ ɗiɗi ɓyom, ɓyàg ri tìfin, yɛɛ lɔɔ lɛ, kɛ̀ɛ̀ kìsòo ɓyàg.

³Kɔm̀ lɛ Ɓɛ̀fàrìzyɛŋ rì Ɓɛ̀yudɛ̀n ɓɛ̀cèm ɓaa ɗi ɓi ɓiɗilàg di ɓɛ ka soò ɓi ɓyàg lɛ syeesyee, lɛ ɓɛɛ̀ ɓèŋɓeŋ kìsyɔ̀ɔ̀ ki ɓɛseŋi ɓaa.

⁴Ɓɛ kilàg tì lɛ, ì ɓɛ sughiì fyèè, ɓɛ yin lɛ ɓɛ ɗi ɓìɗilàg di ɓɛ ka sogtɛn ɓi, yɛ̀ɛ kìsyɔ̀ɔ̀ ki righerɛ̀n ɗyaa kɛɛ̀ kɔ̀nkɔ̀n. Ɓɛ roodii tì rì ɓìcèlì ɓidɛŋ, fɛ lɛ yɛ̀ɛ rìsòò ɗi ɓɛɓeŋ, rì rìsòò ɗi bèè, ɗì rìsòò ɗì tìgheŋ ti bɔŋ.

⁵Ɓɛ̀fàrìzyɛŋ rì ɓɛ̀rèsàg-ɓìdɔ̀gsɛna ɓɛ tɔkà Yeesus lɛ: Ɓisuucɛ nnɛ ɓɛ̀yilàg ɓɔɔ ɓɛ kiì ɓi yɛ̀ɛ ɓìsyɔ̀ɔ̀ ɓi ɓɛseŋi ɓìs ɓyɛɛ kpaakpàà, yɛ̀ɛ ɓɛɛ̀ ɗiɗi ɓyom kɛ̀ɛ̀ kìsòo ɓyàg?

⁶Nni Yeesus à ɓàkà ɓɔ lɛ: Mìni ɓum ɓɛ, fyɛɛ̀fyɛɛ̀ ɓi ŋwɔm ìghèy ɓi ɗùm, Ezayii à kpaaghà lɔŋ saaɗ ɓi kìɓan kin, fɛlɛ yɛ̀ɛ ki rì kì kànɛn lɛ: Ɓumɓɛ ɓi kìlɔ̀ŋ ki ɓɛɛ̀ ɓɔɔɓɔgsì lɔŋ mɛ ɓi ŋwɔm aɗyoo, mɛ̀rem maa mɛ̀ kɛɛ̀ wuɓsɛn mɛ;

⁷ɓɛɛ̀ yooyogsì cààmɛ̀n kaa lɛ ɓɛɛ̀ ɓɔɔɓɔgsì mɛ̀, lɛ dɔgtɛ̀n yi ɓɛɛ̀ rèrèsì yi ri lɔŋ ɓisyɔ̀ɔ̀ ɓi ɓum.

⁸Nni Yeesus à ɓɔ̀ɓtìghà lɛ: Ɓì càri ɓìdɔ̀gsɛna ɓi Bɛ̀ll lɛ ɓìsyɔ̀ɔ̀ ɓi ɓum ɓyɛɛ̀ɓi ɓì foŋi ǹto miì!

⁹À kpaatì ɓɔ lɛ: Ɓì naŋi ɓìdɔ̀gsɛna ɓi Bɛ̀ll ɓisuu ɓisyɔ̀ɔ̀ ɓin!

¹⁰Lɛ Moyis à kpaaghà lɛ: Mum a nyaàsi seŋi ɓɛɛ jɛɛ, rì tì lɛ ŋwaànɛ à nyɔ̀mɛɛ seŋi nsoò lɛ jɛɛ, à ghɛ̀ɛ̀sɛɛ lɛ ɓɛ wey nyi.

¹¹Kìɓan kìfog mìnii ti ɓi kpaaghì lɛ: Ì ŋwaà kalii seŋi nsoò lɛ jɛɛ lɛ, gàɓ ì com ìnɛ màa rì lɛ ǹghɛɓsì wɔ̀ rì yɔ̀ ì rì kɔ̀rìɓaŋ. Yɛɛ lɔɔ lɛ com ki ɓɛ mɛ pègsɛn lɛ ɓɛɛ cogtɛn Bɛ̀ll,

¹²i mum à kpaa fɔlɔɔ, mìnii càɗ nyi lɛ kɛ̀ɛ ghɛɓsi ti seŋi, nsoò lɛ jɛɛ.

¹³Fɔlɔɔ anɛ̀n à rì yɛɛ lɔɔ lɛ, ɓi yooyogsì jɛ̀ɛ̀ ì Bɛ̀ll rì ɓìsyɔ̀ɔ̀ ɓin ɓi ɓyaà ceècèèsɛ̀n; ɓi ki ti ɓì kìlàg tì ɓìɓan ɓidɛŋ lɛɛ̀gwey fɔlɔɔ yɛ̀ɛ ɓiǹ.

¹⁴Nni Yeesus à reŋìghà tì gùl ì ɓum, à kpaa ɓɔ lɛ: Mìniìcèm ramina mɛ̀reè, ɓi wog com ki ǹkpaakpaa minì.

¹⁵Com kìcèm ki mum à ɗii ki kɛǹ nyi ɓi ɗùm ki yin lɛ ki foŋ nyi kìsyeg ɓi nyòò; kìɓan kifog com ki ki pɛsɛɛ yì mum ɓi ɗùm, kɛɛ ri lɛ ki foŋ nyi kìsyeg ɓi nyòò.

¹⁶Ŋwaànɛ à rì rì mɛ̀reè, mɛ lɛ à wog, à wog.

¹⁷Yɛ̀ɛ à ɗiŋìghà ɓi naa, gwìy yɛ̀ kɛɛ̀ wuɓsɛn tì nyi, nni ɓɛ̀yilàg ɓii ɓɛ tɔkà nyi azi anɛ ɓi dàɗkì ìnɛn.

¹⁸À kalì ɓɔ lɛ: Mìni girig ɓi rì yɛɛ lɔɔ kɛ̀ɛ̀ ɗyomzɛ̀n yɛ̀ɛ ɓi woogh ɓi lɛ, com kìcèm ki mum à ɗii, ki kɛǹ nyì ɓi ɗùm ki yin lɛ ki foŋ nyi kìsyeg ɓi nyòò;

¹⁹ɓisuulɛ com kiŋcèm kì yin nyi ɓiì kɛ̀nkɛni ɓi ǹɗem, kɛɛ̀ kɛ̀nkɛn lɔŋ nyi ɓi ɗùm, ki sɛn, ki kpaŋ di à kɛ̀ɛ cog. Yeesus à kpaaghà yɛɛ lɔɔ lɛ ɓìɗilàg ɓìcèm ɓi rì kɛ̀ɛ̀ kìsyeg.

²⁰À kpaatìghà lɛ: Com ki ki kpaŋiì ɓi mum kɛɛ ri lɛ ki foŋ nyi kìsyèg ɓi nyoo,

²¹ɓisuulɛ lɔŋ ɓi ɗùm ɗì mum rì ɓi ǹɗem wii nnɛ ɓìɓeɓtàg ɓi mɛyitì, rì rìɓàmɓà, rì wii, rì ǹwolɛ̀n,

²²rì tìsɔ̀mɔ̀g, rì kìsee ki ikum, rì kìɓeɓtàg ki ǹɗem, rì mɛ̀ghèy, rì kìɓùùsì, rì m̀mììghrɛ̀n, rì tìfena rì kalɛn, rì kìyèg ki ɗyomzɛ̀n ɓi ti ɓi ɓalàg yì.

²³Ɓìɓeɓtàg ɓi ɓiɓan ɓyɛɛ̀ ɓalag yi mum ɓi ǹɗem, ɓi ki fogi nyi kìsyeg ɓi nyòò.

²⁴Yeesus à pɛ̀sɛ̀ngà ɓì jàŋ inɛ̀n à kɛ̀n ɓi kìlànà ki zi ki bàn ì Tiir ì ɓaghà wɔɔ. Fɔɔnnɛ à kɔ̀rìghà a mɛɛ mɛdɛŋ, lɛ à kɔ̀ngà ɓì lɛ ɓɛɛ yi lɛ à rì wɔɔ, kìɓan kifog à ɓaghà ɓi lɛ à kɔ̀rì nyamzɛn.

²⁵Ɓisuulɛ giɓ adɛŋ ànɛ gɔ̀n yìì ì ɓaghà rì kìɓeɓtàg kì nghay, a wokày Yeesus ɓi rìkem, à yù nyi kì kpìi a mɛ̀kòò;

²⁶giɓ ancèm ànɛn à ɓaghà ǹkèn a giɓ, a yalɛ̀ngà a Fenisii, ɓi kìlɔ̀ŋ ki Sirii, à tɔkà Yeesus lɛ a naɓ kìɓeɓtàg ki nghay ki gɔ̀n yìì ì ɓaghà rì kɔ.

²⁷Yeesus à ɓàg nyi lɛ: Ka càra ɓɔɓti ɓɛɛ ɗi ɓɛɛ wuri, lɛ ki ghɛɛ̀sɛɛ ɓi lɛ ɓɛɛ teɗ ɓìɗilàg ɓi ɓɔɓti, ɓɛɛ fa rì ɓɔn ɓɛ bu.

²⁸Giɓ anɛ̀n à pɛ̀ɛ̀zì nyi lɛ: Ɛ̀ɛ̀ Kan! ù kalii miì, wɔ̀lɛ, ɓɔn ɓɛ bu ɓɛɛ̀ ɗilag bubùɓ yi ɓɔɓti ɓɛ raàsii a teɓèrè zi.

²⁹Yeesus à kpaa min nyi lɛ: Ɓì jɛ̀ɛ̀ ìnɛ ù kpaa ìnɛ̀n, kɛ̀na, kìɓeɓtàg ki ǹghay ki pɛsɛɛ gɔ̀n yɔ̀ɔ̀ ɓi nyòò.

³⁰Yɛ̀ɛ̀ à sukà, à tanɛ̀n gɔ̀n yìì ǹnɔ̀nɔŋiyɛn ɓi ɓyomɓilɔ̀ŋ, ɗi kìɓeɓtàg ki ǹghay ki mɛ pɛ̀sɛn yɔ̀ ɓi nyòò.

³¹Yeesus à pɛ̀sɛ̀ngà ɓi kìlànà ki zi ki bàn ì Tiir ì ɓaghà wɔɔ à fyee à Sidɔŋ, a syàà kìlɔ̀ŋ ki bàn ǹtɛ̀ɗ lɛ a sugti ɓi bèn ì rìɓày ànɛ a Galile.

³²Ɓɛ yughày nyi rì lɔlɔg adɛŋ ànɛ à yighà ɓi ritòòghrɛ̀n, ɓɛ ɓɔŋzàg nyi lɛ a saagh ŋwaànɛ̀n ɓyàg ɓi nyòò.

³³Yeesus à tekà ŋwaànɛ̀n à kɛ̀n ɗi nyi daŋdarààŋ, à ràɓsɛ̀n ɓumɓɛ ɓɛ ɓaghà wɔɔ, à purì nyi ɓɔn ì ɓyàg ɓi mɛ̀reè, à ki teɗ tityɛɛ tii, à kòm rìlemàg ɗi ŋwaànɛ̀n miì.

³⁴Ajɛ̀m ìnɛn, nni à ɓegsìghà mis aɗyoo, à fɛmzɛ̀n, à kpaa lɛ: Èfata! Yɛɛ lɔɔ lɛ, ŋwàrɛn.

³⁵Fɔɔnnɛ mɛ̀reè mɛ ŋwaànɛ̀n mɛ ghaskà kì ŋwàrɛɛ, rìlemàg ɗii ɗi fumɓɛ̀n, à tumɛ̀n rìtòtòg lɛ tɛntɛ̀ɛ̀n.

³⁶Yeesus à rɔ̀gsɛ̀ngà ɓɔ lɛ ɓɛ̀ kɛɛ̀ kpaa mum kìɓan kiǹ, kìɓan kifog, ɓɔɔ kikìghà lɛ, di Yeesus a rɔ̀gsɛ̀n ɓɔ fɔlɔɔ, di ɓɔɔ̀ sààti ɓɔlɛ.

³⁷Ɓum ɓɛ kuuràkà lɛɛ̀gwey, ɓɛ ki kpaakpaa lɛ: Ɓìɓan ɓìcèm ɓi a kìkì ɓi ri lɛ syeesyee. A kìki lɛ, ɓɛ̀lɔlɔg ɓɛɛ woòghrɛn, ɓɛ̀mùm-mùm ɓɛ toòghrɛ̀n.