Read Bafia MARIKUS 8 Bible Online

MARIKUS 8 - Bafia bible

MARIKUS 8

¹Ɓi mɛ̀ru mɛ̀n yɛ̀ɛ coo gùl ì ɓum ì taŋzɛ̀ngà, yɔ̀ kɛ̀ɛ̀ com kìɗiyɛn, nni Yeesus à reŋìghà ɓɛ̀yilàg ɓii, à kpaa ɓɔ lɛ:

²Nyìighnyìg ì kìi mɛ̀ rì gùl ìnɛ ɓisuulɛ mɛ̀ru mɛɛ ti lɛ mɛraa, yɛ̀ɛ tì rì nɗaŋ ɗi ɓumɓɛ, ɓɛ ki yiìdi ri com ki lɛ ɓɛ ɗi.

³I ǹki kpaa ɓɔ lɛ ɓɛɛ suki a ɓɛ̀mɛɛ ɓaa yɛ̀ɛ ɓɛ ri lɛ zày, ɓɛ ri ɓiì kpìi zày ɓi bee, ɓisuulɛ ɓɛ̀ro ɓɛdɛŋ ɓɛ ɓi ɓɔ ɓɛ m̀pɛ̀saagh yì tìràɓ.

⁴Nni ɓɛ̀yilàg ɓii ɓɛ ɓakà nyi lɛ: Fe nnɛ tì rì ɓiì terìì ɓìɗilàg ɓi lɛ ti fa ɓɔ, ɓɛ ɗi ɓɛ wuràg ɓi kìlɛŋ ki jàŋ ki?

⁵Yeesus à tɔg ɓɔ lɛ: Ɓì rì foo ri bìrɛs yaŋ? Ɓɛ ɓàg nyi lɛ: Tì rì fɛ rì bìrɛs taàɓɛ̀ɛ̀.

⁶Fɔɔnnɛ à kpaaghà min gùl ì ɓum ìnɛ̀n lɛ, yɛ̀ɛ kɔri ɓi zi, à teɗ kìtaàɓɛ̀ɛ̀ ki bìrɛs, à ka fa Bɛ̀ll ɓìtògsɛ̀n, à ɓɛkì min yɔ à fa rì ɓɛ̀yilàg ɓii lɛ ɓɛɛ kàɓsag; ɓɛ̀roɓɛ̀n ɓɛ kaɓsàg bìrɛs ìnɛ̀n rì gùl ìnɛn.

⁷Ɓɛ ɓatìghà rì ɓɔɔ ɓìzɛn, nni Yeesus à fatìghà Bɛ̀ll ɓìtògsɛ̀n ɓisuu ɓìzɛn ɓìn, à kpaatì lɔŋ ɓɛ̀yilàg lɛ ɓɛɛ kaɓsag tì ɓìzɛn ɓìn rì gùl ì ɓum ìnɛ̀n.

⁸Ɓumɓɛ̀n ɓɛ ɗighà ɓɛ wuràg, nni ɓìɓɛghà ɓi ɓi rɔɓtàkà ɓi rongà ɓìkàɗ taàɓɛ̀ɛ̀.

⁹Ɓumɓɛ̀n ɓɛ ɓaghà nunùg ɓum ɓɛ̀tɔɔsìm ɓɛnin. Ajɛ̀m ìnɛn nnɛ Yeesus à ghesɛ̀ngà ɓɔ, à kpaa ɓɔ lɛ, ɓɛɛ sukì.

¹⁰Fɔɔnnɛ Yeesus à ghàskà kì ɓɔɔ̀gh ɓi kìkɔm rì ɓɛ̀yilàg ɓii, à kɛ̀n ɓi kìlànà ki zi ki a Dalmanutà.

¹¹Nni Ɓɛ̀fàrìzyɛŋ ɓɛ peeghày ɓɛ tumɛn rìnyoònyòlɛ̀n rì Yeesus, ɓɛ tɔg nyi kìrèmzɛnà ki dàm ki ki resii lɛ ìtèɗ wii wu pɛsɛɛ yì yɛ̀ɛ Bɛ̀ll. Ɓɛ tɔkà fɔlɔɔ lɛ ɓɛɛ feèghrɛn nyi.

¹²Nni Yeesus à fɛmzɛ̀ngà rì ìtèɗ à kpaa lɛ: Ɓisuucɛ nnɛ bɔ̀ɓ i ɓum ìnɛ yɛ̀ɛ tɔtɔg mɛ lɛ ǹki kìrèmzɛnà ki dàm? Ǹkalii mìni ɓi saaɗ lɛ, ɓyàa ghɛn ɓi kìrèmzɛnà ki dàm nsoò kìfog.

¹³Fɔɔnnɛ à càɗkà ɓɔ foo, à ɓɔgtì ɓi kìkɔm lɛ a syaà cɛcɛɗ kimbog.

¹⁴Ɓɛ̀yilàg ɓɛ ɗimzɛ̀ngà rìteɗ ɗi bìrɛs, lɔŋ bìrɛs bog yɛ̀ɛnɛ ɓɛ ɓaghà rì yɔ̀ ɓi kìkɔm.

¹⁵Nni Yeesus à siŋdɛ̀ngà ɓɔ, à kpaa lɛ: Konaaghna syeesyee à rìkonàg lɛ rì nwìɗ a Ɓɛ̀fàrìzyɛŋ rì à Eroodɛ.

¹⁶Ɓɛ̀yilàg ɓɛ tum rìnyoònyòlɛ̀n wɔɔ ɓɔ rì ɓɔ ɓisuulɛ ɓɛ ɓaghà ɓi ri bìrɛs.

¹⁷Yɛ̀ɛ Yeesus à wokà di ɓɛɛ nyoonyolɛ̀n fɔlɔɔ, nni à kpaaghà ɓɔ lɛ: Ɓisuucɛ nnɛ ɓi nyoonyolɛ̀n di ɓi kpaakpaa lɛ, à kpaa fɔlɔɔ lɛ, yɛ̀ɛ tì yin ɗi bìrɛs? Yɛɛ lɔɔ lɛ ɓì ka wog ɓi, kɛ̀ ɓi ki yi wa?

¹⁸Mɛ̀rem min mɛ rì mɛ̀ tèɗkakɛn? Ɓì rì lɛ, mìni rì mis, kɛ̀ ɓì ghɛnɛn, mìni rì mɛ̀reè, kɛ̀ ɓì wooghrɛn? Ɓi ɗimzɛɛ nya

¹⁹yɛ̀ɛ m̀ɓɛkàkà bìrɛs yitaǹ ɓisuu ɓum ɓɛ̀tɔɔsìm ɓɛtaǹ, ìnɛ ì rɔ̀ɓkà ì rongà ɓìkàɗ ɓyaŋ? Ɓɛ ɓaàg lɛ: Ɓìkàɗ ǹtɛ̀ɗ rì ɓiɓɛɛ̀.

²⁰Yɛ̀ɛ m̀ɓɛkàkà bìrɛs taàɓɛ̀ɛ̀ ɓisuu ɓum ɓɛ̀tɔɔsìm ɓɛnin, ìnɛ ì rɔ̀ɓkà ì rongà ɓìkàɗ ɓyaŋ? Ɓɛ ɓaàg lɛ: Taàɓɛ̀ɛ̀.

²¹Nni à kpaaghà ɓɔ lɛ: Ɓì ka wog ɓì lɔŋ wa?

²²Yeesus rì ɓɛ̀yilàg ɓii ɓɛ kɛngà a Bɛdsayida, ɓum ɓɛ yuiy nyi rì ɗyaŋɗyàŋ àdɛŋ, ɓɛ ɓɔŋzàg nyi lɛ a kom̀ ŋwaàncèm nsoò ǹkòmɛn.

²³Yeesus à ɓan ɗyaŋɗyàŋ ànɛ̀n ɓi càg, à pɛ̀sɛ̀n ɓi kìlɔ̀ŋ kiǹ à kɛ̀n rì nyi fìràɓ; fɔɔnnɛ à fogà nyi tìtyɛɛ̀ ɓì mis à ɓaàtì nyi ɓyàg ɓì mis, à tɔg nyi lɛ: Ù tì lɛ ù ghɛnɛ̀n gàɓ?

²⁴Nni ɗyaŋɗyàŋ à ŋwàɗkà mis, à kpaa Yeesus lɛ: Nseesee ɓum, wɔ̀lɛ nseesee ɓɔ yɛ̀ɛ ɓìte, ɓɛ ki kɛ̀ɛ̀kɛɛ.

²⁵Fɔɔnnɛ Yeesus à ɓaatìghà tì nyi ɓyàg ɓi mis, yɛ̀ɛ ɗyaŋɗyàŋ à pɛɓsɛ̀ngà tì lɛ fyɛɛyi, à konàg kì ghɛɛ lɛ à mɛ wɔ̀n, à ki yi rìghasì ɗi ɓyom ɓìcèm ɓi a seesèè.

²⁶Yeesus à ghesɛ̀n min nyi lɛ a sug a mɛɛ mii, à kpaa nyi lɛ: Kɔ̀ɔ sugti ɓi kìlɔ̀ŋ.

²⁷Nni Yeesus à kɛ̀ngà rì ɓɛ̀yilàg ɓi ɓìlɔ̀ŋ ɓi ɓi wuɓsɛɛ bàn ìnɛ lɛ Sezare à Filiɓ; fɔɔnnɛ à tɔkà ɓɔ ɓi bee lɛ: Ɓum ɓɛ ti ɓɛ kpaaghi ɓà lɛ mɛ ǹɗì ghɛn?

²⁸Nni ɓɛ ɓakà nyi lɛ: Ɓum ɓɛdɛŋ ɓɛɛ̀ kpaaghi lɛ wɔ̀ɔ̀ rì Zyaŋ Bàɓtis, ɓɛ̀ro ɓɛmbog lɛ wɔ̀ɔ̀ rì Eli, ɓɛmbog tì lɛ wɔ̀ɔ̀ rì kìbog ki ɓi ɓɛ̀kpaŋzì-ɓìɓan.

²⁹Nni Yeesus à tɔgtìghà ɓɔ lɛ: Mìniìɓɔmiɗ, ɓi kalag lɛ mɛ̀ ǹɗì ghɛn? Nni Pyɛɛri à ɓakà nyi lɛ: Ù rì Kiris.

³⁰Yeesus à rɔ̀gsɛ̀ngà ɓɔ syeesyee à rìrɔ̀gsɛ̀n lɛ, ɓɛ̀ kɛɛ̀ kpaa ŋwaàdɛŋ rìkuu ɗi mum ɗi à rì.

³¹Nni à tumɛ̀ngà ɓɔ rìrèsì lɛ: Ki ghɛɛ̀sɛɛ lɛ, Man à mum a wog mɛ̀tɔɓ lɛɛ̀gwey, ɓɛ̀sɛ̀ɛ̀mɛn ɓɛ kilɔ̀ŋ rì ɓɛ̀pìrɛɛtìrɛ̀ ɓɛgwey, rì ɓɛ̀rèsàg-ɓìdɔ̀gsɛna ɓɛɛ mag nyi, ɓɛ wey nyi, à ki ghèmɓɛn ajɛ̀m ì mɛ̀ru mɛraa.

³²À kpaakpààghà ɓìɓan ɓiǹ lɛ tɛntɛ̀ɛ̀n. Fɔɔnnɛ Pyɛɛri à tekà nyi a dwìɗ, à tumɛn nyi rìreɓ.

³³Nni Yeesus à ɓɛ̀ŋmɛ̀ngày ajɛ̀m à ghɛn ɓɛ̀yilàg ɓii, à tumɛ̀n rìfwààdɛ̀n ɗi Pyɛɛri di a kpaakpaa lɛ: Pɛ̀sɛn mɛ̀ ajɛ̀m Satàn, ɓisuulɛ, mɛ̀yitì mɔɔ mɛ yin mɛ̀yitì mɛ Bɛ̀ll, mɛ rì lɔŋ mɛyitì mɛ ɓum.

³⁴Nni à reŋìghà min lɛ rì gùl ì ɓum rì ɓɛ̀yilàg ɓii à kpaa ɓɔ lɛ: I mum à kɔ̀ni lɛ a nɔɔ̀ti mɛ̀, à ghɛ̀ɛ̀sɛɛ kì roòzɛɛ nyimiɗ, à tɛ̀gsɛ̀n kɔrɔs wìì, fɔɔnnɛ à nɔ̀ɔ̀tì mɛ̀.

³⁵Ɓisuulɛ mum ǹcèm ànɛ à ɓiì kɔ̀ni lɛ a kamɛ̀n rì cɛɓ kii, à rì kɔ ɓiì ɗimzii, wɔ̀lɛ ŋwaànɛ à rì ɓiì ɗimzii cɛɓ kii ɓisu wɛ̀m, rì ɓisuu Syeesyee à Ɓɔlɛ, nnyɛɛ ri kɔ ɓiì ghɛɓsii.

³⁶Kì ghɛɓsii mum cɛ lɛ, a fɔǹ ziinɛ bimiɗ, di à ɗimzii cɛɓ kii?

³⁷Ŋwaà rì lɛ à kwèɗ cɛɓ kii ri cɛ?

³⁸Ɓisuulɛ, ŋwaànɛ à rì mɛ̀ ɓiì woògh ǹtoòrìɗ, nsoò lɛ à wog ɓìɓan ɓyɛm̀ ǹtoòrìɗ ɓi gbàà ì ɓum ì gɛɛ̀nɛ, ìnɛ ì rì ɓɛ̀kìì-kìɓe rì ɓɛ̀kìì-tìsɔ̀mɔ̀g, Man à mum à woogh gɛ girig nyi ǹtoòrìɗ, ŋwos anɛ à yùu gɛ ɓi rìkem ɗi Seŋi wìì, ǹɗaŋ ri ɓum ɓii ɓɛ titom ɓɛ ɓɛ ri ɓɛ̀tɛnɛn.