Read Bafia MARIKUS 9 Bible Online

MARIKUS 9 - Bafia bible

MARIKUS 9

¹Nni à kpaatìghà ɓɔ lɛ: Ǹkalii mìni ɓi saaɗ lɛ gàɓ ì ɓum ìdɛŋ ìnɛ ɓi ɓumɓɛ ɓɛ rì fɛ, yàa wu ɓi di ì ka ghɛn ɓi yɛ̀ɛ kìlɔ̀ŋ ki Bɛ̀ll ki yùu yì rì ìtèɗ.

²Ajɛ̀m ì mɛ̀ru taàfog, Yeesus à tekà lɛ, rì Pyɛɛri, rì Zyag, rì Zyaŋ, à kɛ̀n rì ɓɔ cɛ̀ncaa ɓi coo dòn aɗyoo, à lɔ̀ɔ̀ghrɛ̀n ɓɔ ɓi mis dɛŋ.

³Ɓìlàà ɓii ɓi lɔɔ̀ghrɛ̀ngà ɓìpuɓ ɓi lonlòm lɛ syaŋ̀syaŋ̀, lèg ànɛ ŋwaàdɛŋ ànɛ ɓi ziinɛ à yin lɛ à puɓsì ɓìlàà fɔlɔɔ.

⁴Ɓɛ̀yilàg ɓɛ ghɛn di Moyis rì Eli ɓɛ ti ɓiì tòtoogh ri Yeesus.

⁵Nni Pyɛɛri à pɛ̀sìghà jɛ̀ɛ̀ à kpaa Yeesus lɛ: Raɓì, ki ri kìrɔɔ di tì kɔ̀rii fɛ̀, tì toŋ ɓìlaa ɓiraa lɛ, kifog ɓisu wɔɔ, kìfog ɓisuu Moyis, kìfog ɓisuu Eli.

⁶A yighà ɓì com ki a kpaà, lɛ ìris wu ɓangà ɓɔɔ̀cèm.

⁷Fɔɔnnɛ kìkwìɗ ki sigtɛ̀ngà ɓɔ, jɛ̀ɛ̀ ì ki kpaŋ yi ɓi kìkwìɗ kiǹ lɛ: Roànɛ à rì man wɛm̀ ànɛ ǹkeesàg, wooghna nyi.

⁸Lɔŋ ɓi cààmɛ̀n kɔm̀ kiǹ ɓɛ̀yilàg ɓɛ mɛɛ̀ kɛ̀ɛ̀sìghà tì mis fɛlɛ asu waa ɓɛ̀ kɛɛ̀ ghɛɛ̀di ŋwaàdɛŋ, lɔŋ Yeesus cɛ̀ncii nnɛ ɓɛ ɓaghà rì nyi.

⁹Nni yɛ̀ɛ ɓɛ sɛnsɛ̀ngày dòn, Yeesus à rɔ̀gsɛ̀n ɓɔ lɛ, ɓɛ̀ kɛɛ̀ kpaa mum com ki ɓaa ghɛɛ̀, à kpaŋ yɛ̀ɛ Man à mum à ri ghèmɓɛn a ɓìloŋ.

¹⁰Ɓɛ̀yilàg ɓɛ ɓegà jɛ̀ɛ̀ ìnɛn ɓi mɛ̀rem, ɓɛ ki nyoonyolɛ̀n wɔɔ ɓɔ rì ɓɔ, di ɓɛɛ tɔɔtɔɔ̀ghrɛ̀n lɛ, rìghèmɓɛ̀n ɗi a ɓìloŋ ɗi ri yɛɛ lɔɔ lɛ cɛ?

¹¹Nni ɓɛ̀yilàg ɓɛ tɔkà Yeesus lɛ: Ɓisuucɛ nnɛ ɓɛ̀rèsàg-ɓìdɔ̀gsɛna ɓɛ ti ɓɛ kpaaghì lɛ, Eli à ka rì ɓiì yùu?

¹²Yeesus à ɓàg ɓɔ lɛ: Eli à rì lɔŋ ɓiì loògh kì yùu lɛ a pegsag ɓìɓan ɓìcèm, nni lannɛ ki ri kì kànɛn lɛ Man à mum à ɓiì woògh mɛ̀tɔɓ lɛɛ̀gwey, ɓɛ ki sɛɛti nyi?

¹³Wɔ̀lɛ Eli à yùghà, ɓɛ ki kì rì nyi yɛ̀ɛ ki kɔngà ɓɔ lɛ ɓɛɛ ki, lɔŋ yɛ̀ɛ ki ri kì kànɛn ɓì ɓɛg wìì.

¹⁴Yɛ̀ɛ ɓɛ kpagà jàŋbog rì ɓɛ̀yilàg ɓɛ ghɛn di coo gwìy ì ɓum ì kɔ̀mi ɓɔ, ɓɛ ki nyoonyolɛ̀n rì ɓɛ̀rèsàg-ɓìdɔ̀gsɛna.

¹⁵Lɔŋ yɛ̀ɛ gùl ì ɓum ìnɛ̀n ì soɓkà mis ɓi Yeesus, ì mughìì rì mɛ̀ree lɛ yɛ̀ɛ yu nyi kì tògsii.

¹⁶Yeesus à tɔkà ɓɔ lɛ: Ɓi nyoonyolɛ̀n rì ɓɔ ɓi kìɓan aɗì?

¹⁷Fɔɔnnɛ ŋwaàdɛŋ ànɛ à ɓaghà ɓi kìtuu ki ɓum kìn, à ɓàkà nyi lɛ: Ǹɗèsàg, màa yùu yì rì ŋwɔɓti wɛ̀m à baŋì a lɔ̀ŋkɔɔ. À rì rì kìɓeɓtàg kì ǹghay ki ki pɛɛ̀zii nyi mùm-mùm.

¹⁸Jàŋbimiɗ ìnɛ ki sɛni ɓi nyi, ki roŋ nyi ɓi zi, ŋwɔɓti à fuùfùùsì tìtyɛɛ̀ di a ŋàaŋaàdì min, à nàrɛ̀n lɛ saɗ-sààɗ. Màa ɓɔ̀ŋzaagh ɓɛ̀yilàg ɓɔɔ lɛ ɓɛɛ naàɓ kìɓeɓtàg ki ǹghay kiŋcèm, kìɓan kifog kaa yaagh ɓɔ rìnàɓ.

¹⁹Nni Yeesus à kpaaghà ɓɔ lɛ: Mìni boo ì ɓum ìnɛ, ì rì kɛ̀ɛ̀ rìgherɛ̀n, ǹɗì ɓiì kɔ̀rii ǹɗaŋ ri mìni à kpaŋ fin? Ǹki rì mìni ɓiì cenɛɛ à kpaŋ fe? Yùunay mɛ̀ fɛ rì ŋwɔɓti àncèm.

²⁰Fɔɔnnɛ ɓɛ yughày rì nyi; lɔŋ yɛ̀ɛ ŋwɔɓti à rogà mis ɓi Yeesus, kìɓeɓtàg ki nghay ki ghas nyi kì nàrii, à kpì ɓi zi, à sɛɛ̀sɛ̀gɛ̀rɛ̀n di a fuufuùsì tìtyɛɛ̀.

²¹Yeesus à tɔg min seŋi ŋwɔɓti ànɛ̀n lɛ: Ki mɛ finɛn yɛ̀ɛ com ki ki tumɛ̀ngà nyi? Roànɛ̀n à ɓàg lɛ: Ki tumɛ̀ngà nyi lɔŋ ɓi rìŋwɔɓtì.

²²Ɓyààmɛ̀n lɛɛ̀gwey, kìɓeɓtàg ki nghay ki ti ki ɓokì nyi ɓi ɗuu nsoò lɛ ɓi mɛ̀nig lɛ kɛɛ wey nyi. Nni i ù rì lɛ ù kì com kìdɛŋ ɓisu wii, ghɛɓsi ɓìsi, wogha ɓà ɓisi nyìighnyìg.

²³Yeesus à ɓàg ŋwaànɛ̀n lɛ: U kpaaghi mɛ lɛ i ù rì lɛ ù kì com kidɛŋ, lɛ wɔ̀ɔ̀ yii ɓi lɛ kìɓan ki ki ri lɛ ki yaaghrɛ̀n di ŋwaà rì rì rìgherɛ̀n ki yin?

²⁴Fɔɔnnɛ seŋì ŋwɔɓtì ànɛ̀n à ghàskà kì kpaa jɛ̀ɛ̀ aɗyoo lɛ: Ǹgherɛɛ! Yu ɓà mɛ kì ghɛɓsii ɓi rìɓa ɗi lɛ ɗì kɛ̀ɛ̀ rìgherɛ̀n.

²⁵Yɛ̀ɛ Yeesus à ghɛngà di ɓum ɓɛ ti ɓiì sùusuùrɛ̀n yì rì mɛ̀ree, nni à fwààdɛ̀ngà kìɓeɓtàg ki nghay à kpaa kɔ lɛ: Kìɓeɓtàg ki nghay ki ki tì ki pɛɛzàg ɓum ɓɛ̀lɔlɔg rì ɓɛ̀mùm-mùm, ǹkalii wɔ̀ lɛ, kpaŋa ɓi ŋwutyàànɛ, kɔ̀ɔ ki ɓììti ti kì ɗiŋii ɓi nyi.

²⁶Nni kìɓeɓtàg ki nghay ki ɓokà ŋwɔɓti ɓi zi rì ìtèɗ, ki faŋì di kɛɛ̀ kuukugsɛ̀n, ŋwutyàà mààghràg yɛ̀ɛ kìloŋ, ɓi lèg ànɛ lɛ ɓum lɛɛ̀gwey ɓɛ fefèkà lɛ à wii.

²⁷Wɔ̀lɛ Yeesus à ɓangà nyi ɓi càg, à pɛ̀sì nyi aɗyoo, ŋwutyàà ki rɛli mɛrɛ̀y.

²⁸Yɛ̀ɛ Yeesus à ɗiŋìghà ɓi naa, nni ɓɛ̀yilàg ɓii ɓɛ tɔkà nyi di ɓaa rɔ̀ɓ ɓɔ rì ɓɔ lɛ: Ɓisuucɛ nnɛ kìɓeɓtàg ki nghay kìn kaa yaagh ɓìsi rìnàɓ?

²⁹Yeesus à ɓàg ɓɔ lɛ: Lɔŋ bɔŋ̀zɛ̀n yɛ̀ɛti ì kìlàg lɛ rìkuu ɗi nghay ɗìn ɗyɛɛ kpaŋ.

³⁰Yɛ̀ɛ Yeesus rì ɓɛ̀yilàg ɓii ɓɛ pɛsɛ̀ngà foo, ɓɛ syaà ziì Galile, ki kɔngà ɓi Yeesus lɛ ɓum ɓɛɛ yi lɛ, à rì ɓi jaŋ̀ inɛ̀n;

³¹ɓisuulɛ à rèrèsìghà ɓɛ̀yilàg ɓii ɓiɓan, à kpaakpàà ɓɔ lɛ: Ɓɛ ɓiì ɓanì Man à mum, ɓɛ fa rì ɓum, ɓumɓɛ̀n ɓɛ wey nyi; wɔ̀lɛ à ɓiì ghèmɓɛɛ ajɛ̀m ì mɛ̀ru mɛraa.

³²Kìɓan kifog ɓɛ̀yilàg ɓɛ yìghà ɓi azi anɛ ɓi jɛ̀ɛ̀ ìnɛ à kpaaghà ìnɛn, ɓɛ ki risi nyi rìtɔg.

³³Fɔɔnnɛ ɓɛ kɛngà kì kpaŋì a Kapɛrinawum, yɛ̀ɛ Yeesus à ɗiŋìghà ɓi naa, nni à tɔkà ɓɛ̀yilàg lɛ: Cɛ ɓyàa nyoonyòlɛ̀n miì bee bimiɗ?

³⁴Wɔ̀lɛ ɓɛ minɛ̀n nyi, ɓisuulɛ ɓɛ kaàkàrɛ̀ngà jɛ̀ɛ̀ lɛ ɓɛɛ yi ghɛn anɛ ɓi ɓɔ yɛɛ cee ɓɛ̀ro ɓɛmbog.

³⁵Nni Yeesus à kɔ̀rìghà ɓi zi, à reŋì ɓɛ̀yilàg ɓii ǹtɛ̀ɗ rì ɓɛɓɛɛ̀, à kpaa ɓɔ lɛ: I mum à kɔ̀ni lɛ à ɓa ǹɗɛ̀lì-asù, a terɛn nyimiɗ yɛ̀ɛ siitòn à mum ɓi nyìinyìm à ɓum ɓɛ̀cèm, à ki ɓa ǹkìì-kìsay a ɓum ɓɛ̀cèm.

³⁶Nni à tekà maa ŋwɔɓti, à rɛsì ɓɔ nyi ɓi nyìinyìm à lɔ̀ɛ̀ɗ nyi à kpaa ɓɔ lɛ:

³⁷Mum ǹcèm ànɛ à ghàɓi maa ŋwɔɓti yɛ̀ɛ ànɛ rì kìnyàà ɓisu wɛ̀m a yi lɛ mɛ̀ɛmiɗ nnɛ à ghàɓi; nni ŋwaànɛ à ghàɓi mɛ̀, a yi lɛ, àa mɛ̀ nnɛ à ghàɓi, à ghàɓi ŋwaànɛ à romgày mɛ̀.

³⁸Nni Zyaŋ à kpaaghà Yeesus lɛ: Ǹɗèsàg, tyàa ghɛɛ di ŋwaàdɛŋ a nànaɓ ɓiɓeɓtàg ɓi mɛghay rì ɗii ɗyɔɔ, nni tyàa rèegh nyi lɛ kɛ̀ɛ kìki fɔlɔɔ, lɛ à ti kɛ̀ɛ ɓa ɓi nɗaŋ wis.

³⁹Nni Yeesus à kpaaghà ɓɔ lɛ: Kɛ̀ ɓi règ nyi, ɓisuulɛ mum ànɛ à kìi dàm rì ɗii ɗyɛ̀m, à yin lɛ à tumɛ̀n lɔŋ mɛ rìtòtòg ɗi kiɓe lɔŋ wɔɔ foo.

⁴⁰Ɓisuulɛ ŋwaànɛ à yin ɓiì ɗùùɗuu ri ɓìsi, à rì ɓi gàm yìs.

⁴¹Ǹkalii mìni ɓi saaɗ lɛ: Ŋwaànɛ à rì mìni ɓiì faà gìras ì mɛ̀nig mɛnɔyɛn lɛ ɓìrì ɓum ɓɛ Kiris, àa mɛ̀m ɓi mɛlèɓ mɛ miì.

⁴²Wɔ̀lɛ i mum à kɛ̀ɓtii kìbog ki ɓi ɓɔɔɓɔɓti ɓɛ ɓɛ gherɛɛ mɛ̀ ɓɛ fiɓàg, ki ɓa tì kìrɔɔ lɛ ɓɛɛ suŋ nyi coo gɔ̀g ì kìpɛn ɓi kìmììgh, di ɓɛɛ pig nyi ɓi rìɓày à kìkòn.

⁴³I càg kɔɔ kɛɛ ri lɛ kɛɛ kɛɓti wɔ̀ fìɓàg, rena kɔ, lɛ ki ri wɔ̀ kìrɔɔ lɛ u ghɛn cɛɓ di ù rì càg kìfog à cee lɛ u kɛǹ ɓi kìgɛ̀ŋ ki ɗuu ɗi fiɗyàɓ fikɔ̀ɔ̀ rì ɓyàg ɓyɔɔ ɓìcèm. [

⁴⁴Jaŋ ìnɛ zyèɗ yi ti yɛ̀ kɛɛ̀ wu, ɗuu ɗyɛ̀ kɛɛ̀ ɗimi.]

⁴⁵I ìkòò wɔɔ wɛɛ ri lɛ wɛɛ kɛɓti wɔ̀ fìɓàg rena wɔ, lɛ ki rì wɔ̀ kìrɔɔ lɛ u ghɛǹ cɛɓ di ù rì ìkòò wufog à cee lɛ u kɛǹ ɓi kìgɛ̀ŋ ki ɗuu ɗi fiɗyàɓ fikɔ̀ɔ̀ rì mɛ̀kòò mɔɔ mɛcèm, [

⁴⁶jàŋ ìnɛ zyèɗ yi ti yɛ̀ kɛɛ̀ wu, ɗuu ɗyɛ̀ kɛɛ̀ ɗimi.]

⁴⁷I ɗis ɗyɔɔ ɗyɛɛ ri lɛ ɗyɛɛ kɛɓti wɔ̀ fìɓàg, sɔgha ɗyɔ, lɛ ki ri wɔ̀ kìrɔɔ lɛ u ɗiŋi ɓì kìlɔ̀ŋ ki Bɛ̀ll ɗi ù rì rì fìɗyaŋ à cee lɛ u kɛǹ ɓi kìgɛ̀ŋ ki ɗuu ɗi fiɗyàɓ fikɔ̀ɔ̀ rì mis mɔɔ mɛcèm,

⁴⁸jàŋ inɛ zyèɗ yi tì yɛ̀ kɛɛ̀ wu, ɗuu ɗyɛ̀ kɛɛ̀ ɗimi.

⁴⁹Ɓisuulɛ mum bimiɗ à ɓiì ɓaà rì kìkòn ɓi nyoo lɛ ɗuu.

⁵⁰Kìkòn ki ri syeesyee à com. Nni i kìkòn ki mɛ rɔ̀ɓ kɛ̀ kɛɛ̀ yɛ̀ɛ̀ti, ɓɛ ri lɛ ɓɛ yɛɛ̀sì tì kɔ rì cɛ? Ɓaana rì kìkòn ɓi mìniìɓɔmiɗ, ɓì ki kɔ̀ri lɛ fyòoog, ɓi nyìinyìm wìn.