Read Bafia LUKAS 11 Bible Online

LUKAS 11 - Bafia bible

LUKAS 11

¹Ŋwos adɛŋ, Yeesus à ɓɔ̀ɔ̀ɓɔ̀ŋzìghà ɓi jàŋ idɛŋ; yɛ̀ɛ à lègsìghà bɔ̀ŋzɛ̀n nni n-yilàg wìì adɛŋ, à kpaaghà nyi lɛ: Kan, rèsàg ɓìsi yɛ̀ɛ ti ɓɔ̀ŋzag, fɛlɛ yɛ̀ɛ Zyaŋ à rèsàkà ɓɛ̀yilàg ɓii, lannɛ ɓɛɛ ɓɔŋzag.

²Yeesus à kpaa ɓɔ lɛ: Cààmɛ̀n kìcèm ki ɓi ɓɔ̀ɔɓɔŋzàg, kaliina lɛ: Tààta! Ɗii ɗyɔɔ ɗyɛɛ ɓa ɗì tɛnɛn; kìlàmì kɔɔ kɛɛ yu.

³Ɓɛ̀ŋwos ɓɛ̀cèm faa ɓìsi ɓìɗilàg ɓi ɓi ghɛɛ̀sɛɛ rì ɓìsi ɓi bimiɗ a ŋwos.

⁴Cenɛn ɓìsi ɓìɓe ɓis, lɛ ɓìsi girig tì ti tì cenàg ŋwaànɛ à kaa ɓìsi kìɓan. Kɔ̀ɔ ki càɗ ɓisi lɛ ti kpi ɓi mɛ̀fèèghrɛn ɓiɗùm.

⁵Nni à kpaatìghà ɓɔ lɛ: I kìbog ki ɓi mìni ki ri rì rìghan, nni rìghan ɗiǹ ɗi yuù nyi kì ghɛɛ̀ rì ǹɗem-irù, ɗi kpaa nyi lɛ: Reŋkàŋ wɛ̀m, ɓɔ̀rɛn ɓà mɛ bìrɛs yiraa,

⁶lɛ reŋkàŋ wɛ̀m àdɛŋ à rìì rìkɛ̀ɛ̀, nni à kpaŋi a lɔ̀ŋkɛm̀, fɔɔnnɛ ǹki yin ɗi com ki lɛ, ǹfa nyi à ɗi.

⁷Nni i roànɛ̀n à ɓàghiì nyi wɔɔ ɓi naa lɛ: Kɔ̀ɔ̀ yeesi mɛ màa mɛ sìmdɛ̀n, rì mɛ̀ rì ɓɔn ɓɛm, tì mɛ nɔ̀ŋi ɓi zi, ǹ-yiidi lɛ m̀pɛ̀sɛ̀n tì aɗyòò lɛ ǹfa wɔ̀ bìrɛs.

⁸Ǹkalii mìni lɛ, àa soo pɛ̀sɛɛ ɓi aɗyòò lɛ a fa nyi bìrɛs, ɓi ɗii ɗi lɛ reŋkàŋ wìì, à rì ɓiì pɛ̀sɛɛ aɗyòò, à fa nyi com kìcèm ki roànɛ̀n à tɔɔgh nyi lɛ a caɗ nyi lɛ fyòoog kɛ̀ɛ yeesi nyi.

⁹Fɔɔnnɛ ǹkpaatii mìni lɛ, lɔnina, fɔlɔɔ nnɛ ɓɛ ri mìni ɓiì faà; kaana, fɔlɔɔ nnɛ ɓì ɓiì tanɛɛ, ɓooghna ìsuunaa, fɔlɔɔ nnɛ ɓɛ ri mìni wɔ ɓiì nɛmì;

¹⁰lɛ mum ǹcèm ànɛ à lɔni com, ɓɛ ti ɓɛ falàg nyi kɔ̀, roànɛ à kaa, à ti à tanàg, fɔɔnnɛ roànɛ à ɓoogh naa, ɓɛ ti ɓɛ nɛngì nyi yɔ̀.

¹¹Ghɛn anɛ ɓi mìni yɛɛrì lɛ, à ɓa rìkuu ɗi seŋi ɗi lɛ, i man à lɔni bìrɛs, nyii fa man ànɛ̀n gɔ̀g, nsoò lɛ i man à lɔni nyi kìzɛn, nyii fa man ànɛ̀n nyoo ɓi sìg à kìzɛŋ?

¹²Nsoò lɛ i à lɔni nyi ɗìg, nyii fa man fìrèè fi taataɓɓɛ̀n?

¹³I mìni ɓɛ ɓì rì ɓìɓeɓtàg ɓi ɓum ɓi yii rìfa ɗi ɓɔn ɓin ɓɛsyeesyee ɓɛ ɓyom, lannɛ Tààta ànɛ à rì aɗyòò à ɓiì rɔ̀ɓi kɛ̀ɛ fa Kitɛntɛ̀ɛ̀n ki Nghay a ɓumɓɛ ɓɛ tɔɔgh nyi kɔ̀?

¹⁴Yeesus à nànàɓkà kìɓeɓtàg ki nghay ki ki pɛɛ̀zìghà mum mùm-mùm, nni yɛ̀ɛ kìɓeɓtàg ki nghay kìn ki kpagà, ŋwaànɛ à ɓaghà mùm-mùm anɛ̀n à tòòghrɛ̀n; fɔɔnnɛ gwìy ì ɓum ìnɛ ì ɓaghà wɔɔ ì kuuràkà kìɓan kiǹ.

¹⁵Kìɓan kifog ɓum ɓɛdɛŋ ɓɛ kpaa lɛ: Ɓi-tèɗ wu Bɛlzeɓul ànɛ àrì rìfòm ɗi ɓiɓeɓtàg ɓi mɛghay innɛ a nànaɓ ɓiɓeɓtàg ɓi mɛghay.

¹⁶Ɓi ɗi lɛ, ɓɛɛ feèghrɛn nyi, ɓɛ̀ro ɓɛdɛŋ ɓɛ tɔkà nyi lɛ a resi ɓɔ kìrèmzɛnà kidɛŋ ki ki resii lɛ ìtèɗ wu a kìki ɓiɓan miì, wu riì aɗyòò.

¹⁷Yɛ̀ɛ Yeesus à yighà ɓɛ̀fèg ɓaa, nni à kpaaghà ɓɔ lɛ: Kìlɔ̀ŋ kìcèm ki ki ghasɛɛ gàɓ yiɓɛɛ̀ lɛ kɛɛ ɗuu rì kɔmiɗ, ki ri ɓiì cuù, à kpaŋ yɛ̀ɛ mɛɛ mɛcèm mɛ ɓi kìlɔ̀ŋ kin mɛ ɓiì kpìlaagh.

¹⁸Nni i Satàn a ti ǹghasɛn gàɓ yiɓɛɛ̀, lɛ a ɗuù rì nyimiɗ, lannɛ kìlɔ̀ŋ kii ki ri ɓiì kɛ̀ɛ asu; yɛ̀ɛ mìniì kalag lɛ, mɛ̀ɛ nànaɓ ɓìɓeɓtàg ɓi mɛghay rì ìtèɗ wu Bɛlzeɓul?

¹⁹I mɛ̀ɛ nki nànaɓ min ɓiɓeɓtàg ɓi mɛghay rì ìtèɗ wu Bɛlzeɓul, ɓɔn ɓin ɓɔɔ̀ nànaɓ ɓyɔ rì ìtèɗ wu ghɛn? Fɔɔnnɛ ɓɔn ɓin ɓɔmiɗ ɓɛɛ faa gɛ mìni zɔɔ ɓi kìɓan kiǹ.

²⁰Kìɓan kifog, i ki rì lɛ nnànaɓ ɓiɓeɓtàg ɓi mɛghay rì ìtèɗ wu Bɛ̀ll fɔlɔɔ a rèsii lɛ, kìlɔ̀ŋ ki Bɛ̀ll ki ti a lɔ̀ŋkin.

²¹I kìtèetèɗ ki mum ki ki ri rì ɓyom ɓi ribaŋì kɛɛ̀ ɓèŋɓeŋ mɛɛ mɛ kɔ, ŋwaà yin lɛ à kòm ɓyom ɓii.

²²Wɔ̀lɛ i ŋwaànɛ à cee ŋwaànɛ̀n ɓi-tèɗ à kpaŋi, à kwiy nyi, à ɓàtɛ̀n ɓyom ɓi ribaŋì ɓi ŋwaànɛ̀n àa ǹɗì rì ǹtyweeyi miì, à kàɓsag ɓyom ɓii ɓìcèm ɓi à ɓàtaagh.

²³Mum bimiɗ ànɛ à yin ɓi gàm yɛ̀m, a ɗùùɗuu ri mɛ̀, fɔɔnnɛ roànɛ à ɓasɛɛ ɓi ri mɛ̀ ɓi rìtaŋzɛ̀n, à rì roànɛ à rì ɓi rìtyàŋzì.

²⁴Cààmɛ̀n kìcèm ki kìɓeɓtàg ki nghas̀ ki kpaŋi mum ɓi nyoo, ki kɛǹ kì dèŋdeŋi ɓi kìgbag ki jàŋ ɓi rìkaakàà ɗi rifɔɔsɛ̀n; i kaa rɔ̀ɓ kɛ̀ kɛɛ̀ ghɛn jàŋ i rìfɔɔsɛ̀n, ki kpaa lɛ: Ǹɗì ɓiì sugtii ɓi naa ìnɛ mɛ̀ɛ m̀pɛ̀sɛɛ yì miì.

²⁵I ki sugtii yì, ki tanɛ̀n lɛ mɛɛ mɛ ti lɛ, mɔ mɛ fyɔngakɛn, mɛ ki ɓa ti mɛ rɛ̀ŋɛn,

²⁶ki kɛɛ̀dì min, ki teɗtìì ɓìɓeɓtàg ɓi mɛghas̀ ɓidɛŋ taàɓɛ̀ɛ̀ ɓi ɓi cee kɔ ɓi rìnyɛn, ɓi ɗiŋì ɓi naànɛ̀n ɓi kɔrì miì. Fɔɔnnɛ siitòn a rìɓa à ŋwaànɛ̀n à rì ɓiì ɓeɓtɛɛ à cee rìɓa ɗi à ɓaghà ǹtonto.

²⁷Yɛ̀ɛ Yeesus à kpaaghà fɔlɔɔ, nni giɓ à toòghrɛ̀ngà jɛ̀ɛ̀ aɗyòò ɓi nyìinyìm à ɓum, à kpaa nyi lɛ: Mààgh rì giɓ anɛ à tɛ̀tɛ̀kà wɔ̀ ɓi ɗùm ɗii, à ki nyɔŋzi wɔ mɛlì mii.

²⁸Wɔ̀lɛ Yeesus à ɓàkà nyi lɛ: Ɓumɓɛ ɓɛɛ̀ kìki lɛ, ɓɛ wowòg jɛ̀ɛ̀ ì Bɛ̀ll ɓɛ ki ɓèŋɓeŋ yɔ̀, ɓɛɛ ri kom̀ ɗì ɓɛ̀mààgh.

²⁹Yɛ̀ɛ kìlɔ̀ŋ ki taŋzɛ̀ngà Yeesus a nyoo, nni à tumɛ̀ngà rìkpaa lɛ: Gbàà ì ɓum ì gɛɛ̀nɛ ìnɛ ì ɓeɓtɛɛ mɛ̀rem ìnɛ yɛ̀ɛ tɔtɔg mɛ lɛ ǹɗesi yɔ̀ dàm ì kìɓan, nni ɓaa ghɛn ɓi dàm ì kìɓan idɛŋ, i ki cee ɓi lɛ dàm ì kìɓan ki ǹkpaŋzì-ɓìɓan anɛ lɛ Zyonas.

³⁰Lɔŋ yɛ̀ɛ Zyonas à ɓaghà fɛlɛ yɛ̀ɛ kìrèmzɛnà ɓisuu ɓumɓɛ a Niniivɛ fɔlɔɔ nnɛ Man à mum à ɓiì ɓaa ɓisuu gbàà ì gɛɛ̀nɛ.

³¹Ŋwosi rìren ɗi ɓiɓan, giɓ anɛ à làlàmìghà kìden ki zi ki duŋzi à pɛ̀sɛɛ gɛ aɗyòò, à fa gbàà ì ɓum ì gɛɛ̀nɛ bɛ̀lɛn, ɓisuulɛ nyii pɛsɛ̀ngày ɓi jaŋ̀ inɛ zi i sugtɛɛ, lɛ a yu kì woògh ɓìtòkì ɓi ɗyomzɛ̀n ɓi Salomɔŋ à tòtòkà. Nni ghɛɛna lɛ, mìnii rì fɛ ri ŋwaànɛ à ceetii Salomɔŋ.

³²Ɓumɓɛ a Niniivɛ ɓɛ pɛsɛɛ gɛ aɗyòò ŋwosi riren ɗi ɓiɓan, ɓɛ fa gbàà ì gɛɛ̀nɛ bɛ̀lɛn ɓisuulɛ, ɓɔɔ lɔɔ̀ghrɛ̀ngà mɛ̀rem yɛ̀ɛ ɓɛ wokà ɓìɓan ɓi Bɛ̀ll ɓi Zyonas à kpaaghà ɓɔ, nni ghɛɛna lɛ, ɓì rì fɛ rì ŋwaànɛ à ceetii Zyonas.

³³Ŋwaà yin lɛ à ròòsì lamɓà lɛ a nyam nyi, nsoò lɛ a foŋ nyi a kìbɔkɔ̀ zi, wɔ̀lɛ ɓɛɛ̀ fogi lamɓà ɓi kìrɛsì kii aɗyòò ɓi lèg ànɛ lɛ ɓumɓɛ ɓɛɛ̀ ɗiɗiŋii ɓi naa, ɓɛɛ ghɛǹ kìtɛɛtɛn.

³⁴Ɗis ɗyɔɔ ɗi ri lamɓà à nyoo yɔ̀ɔ̀; i ɗis ɗyɔɔ ɗi ri lɛ syeesyee nyoo yɔ̀ɔ̀ bimiɗ ì ɓiì ɓaà ɓi kìtɛɛtɛ̀n. Kìɓan kifog, cààmɛ̀n ki ɗis ɗyɔɔ ɗi yin lɛ syeesyee, nyoo yɔ̀ɔ̀ i ɓa ɓi birìm.

³⁵Nni kɔ̀ri min ɗyomzɛ̀n lɛ, kìtɛɛtɛn ki ù rì rì kɔ, kɛ̀ kɛɛ ghay birìm.

³⁶I nyoo bimiɗ ì rì ǹkpeŋziyɛn nsoò maa kìkàɓ àdɛŋ kɛ̀ɛ ɓa ɓi birìm, nyoo yɔ̀ɔ̀ bimiɗ ì ɓiì ɓaà lɛ kpeŋkpèèŋ lɔŋ yɛ̀ɛ lamɓà à ti à kpeŋzàg wɔ̀ rì kìtɛɛtɛn kii.

³⁷Yɛ̀ɛ Yeesus à tòtòkà, nni Fàrìzyɛŋ àdɛŋ à tɔkà nyi lɛ, a yu kì ɗiì a mɛɛ mii. Fɔɔnnɛ a ɗìŋìyà wɔɔ, ɓɛ kɔrì ɓi ɓìɗilàg.

³⁸Fàrìzyɛŋ ànɛ̀n à kuuràg lɛ, Yeesus à tumɛɛ rìɗi ɗi ɓyom kɛ̀ɛ sòò ɓyàg.

³⁹Wɔ̀lɛ, Kan à kpaa nyi lɛ: Mìni Ɓɛ̀fàrìzyɛŋ ɓɛ, ɓi ti ɓì tɔ̀sàg lɛ, rì jɛ̀m ì ɓeŋ, rì jɛ̀m ì taasà, kìɓan kifog mɛ̀rem min mɛ ron lɛ rì wii rì rìgɛn.

⁴⁰Mìni ɓìdùŋdùŋ ɓi ɓum ɓì, àa roànɛ à kìghà dan nnyɛɛ kìtìghà ɗùm?

⁴¹Com ki ɓyàa ghɛ̀ɛ̀sɛɛ kì kìi ki ri lɛ, ɓi fa ɓɛ̀soghàsogha ɓyom rì nɗem wu syeesyee, fɔɔnnɛ ɓyom ɓìcèm ɓi ɓiì ɓaà ɓìtɛnɛn ɓisu wìn.

⁴²Nni nyìighnyìg rì mìni Ɓɛ̀fàrìzyɛŋ lɛ, mìnii ɓɔɔɓɔgsì Bɛ̀ll rì gàɓ ì kìntɛ̀ɗ ìnɛ ɓi mɛ̀kuu mɛ ɓinyàa mɛ̀cèm, ɓì sɛɛ̀sɛ̀ɛ̀tì lɛ, rì saaɗ ɗì rìkeesì ri Bɛ̀ll, kɔlɛ com ki ɓyàa ghɛ̀ɛ̀sɛɛ kì nɔ̀ɔ̀tii kɛɛ̀ kìn lɔɔ, kɛ̀ ɓi ki pisi mis ɗì ɓìɓan ɓimbog.

⁴³Nyìighnyìg rì mìni Ɓɛ̀fàrìzyɛŋ, lɛ ɓì keesii rìkɔ̀rì ɓi mɛ̀kɔ̀ɔ̀ mɛ asu mɛ ɓi naa yi bɔ̀ŋzɛ̀n, ɓi ki keesi ti lɛ ɓɛɛ toòtògsì mìni rì nyaasɛ̀n ɓi ɓìyan ɓi tyèè.

⁴⁴Nyìighnyìg rì mìni, lɛ ɓì rì fɛlɛ yɛ̀ɛ zɔ̀ŋ yi yi ri yì tììghgɛn, ɓum ɓɛ kɛɛ̀kɛ̀ɛ̀ mii aɗyòò ɓɛ̀ kɛɛ̀ yi.

⁴⁵Fɔɔnnɛ kìbog ki ɓi ɓɛ̀rèsàg-ɓìdɔ̀gsɛna ki kpaaghà nyi lɛ: Ǹɗèsàg, i ù kpaa fɔlɔɔ, di ù sɛmgii lɔŋ lɛ rì ɓìsi miì.

⁴⁶Yeesus à ɓàg nyi lɛ: Nyìighnyìg girig rì mìni ɓɛ̀rèsàg-ɓìdɔ̀gsɛna, lɛ ɓi tɛ̀ɛghtɛgsì ɓum mɛ̀tɛ̀g mɛ mɛ rirì lɛɛ̀gwey, mìniìɓɔmiɗ kɛ̀ ɓi kòm mɔ nsoò ǹkòmɛn ri manàcàg.

⁴⁷Nyìighnyìg rì mìni, ɓisuulɛ ɓi ti bì togi ɓìsyeesyee ɓi zɔ̀ŋ ɓisuu ɓɛkpaŋzì-ɓìɓan ɓɛ ɓɛ̀seŋi ɓin ɓɛ cuusìghà.

⁴⁸Ɓì rèsii yɛɛlɔɔ lɛ, ɓì ɓɛm̀dɛɛ rìkì ɗi ɓɛseŋi ɓin ɓɛ ɓɛsɛ̀ɛ̀mɛn, lɛ ɓɔɔ wolà ɓɛ̀kpaŋzì-ɓìɓan, mìni ɓɔn ɓaa ɓì toŋ zɔ̀ŋ yi ɓɛkpaŋzì-ɓìɓan ɓɛǹ.

⁴⁹Kìɓan kìn kɛɛ̀ki Bɛ̀ll ànɛ à rì rì ɗyomzɛ̀n à kpaaghà lɛ: Ǹɗì ɓɔ ɓiì romìì lɛ, rì ɓɛ̀kpaŋzì-ɓìɓan, rì ɓɛ̀kɛ̀nì-fìtom; fɔɔnnɛ ɓɛ ri ɓiì kìi lɛ, ɓɛ wey ɓɛ̀roɓɛ, ɓɛ yeesì ɓɛ̀ro ɓɛmbog,

⁵⁰lɛ di bwaɓ yi ɓɛkpaŋzì-ɓìɓan ɓɛ̀cèm ɓɛ ɓaa wewèy à tumɛ̀n yɛ̀ɛ zi i kìlɛ̀ngà, yɛɛ kɛǹ gbàà ì ɓum ìnɛ ɓi ǹto

⁵¹à tumɛ̀n ɓi bwaɓ yi Aɓɛl, à kpaŋ ɓi yi Zakarii ànɛ ɓɛ wolà ɓi ǹlɛm̀ɓog wu naà-Bɛ̀ll, jàŋbog rì rìkùna ɗi ɓɛ ǹtɔ̀ngì ɓituwe miì ɓi rìɓɔgsì ɗi Bɛ̀ll. Ǹkpaa mìni saaɗ lɛ, kìɓan kiǹ ɓɛ tɔɔgh gɛ ɓumɓɛ ɓi gbàà ìnɛ kɔ̀.

⁵²Nyìighnyìg rì mìni ɓɛ̀rèsàg-ɓìdɔ̀gsɛna, lɛ ɓì tekà fìɗìɓà fi riyi ɗi ɓiɓan mìnii ɓɔmiɗ kɛ̀ ɓi ɗiŋi, ɓì ki règ lɛ ɓɛ̀roɓɛ ɓɛ kɔ̀nkɔ̀ngà lɛ ɓɛɛ ɗiŋi ɓɛ̀kɛɛ̀ ɗiŋi.

⁵³Yɛ̀ɛ Yeesus à kpagày ɓi jàŋ inɛ à kɛ̀ngà kì ɗiì wɔɔ inɛ̀n, ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ fasɛ̀n mis rì nyi, di ɓɛɛ̀ ɓɛɓɛni nyi rì mɛ̀tɔɔ̀ghtɔɔgh ɓi mɛ̀to mɛ ɓiɓan lɛɛ̀gwey,

⁵⁴ɓɛ ranɗàm nyi lɛ ɓɛɛ wog nkòo à nɛ̀si jɛ̀ɛ̀ ɓi kìɓan kìdɛŋ.