Read Bafia LUKAS 17 Bible Online

LUKAS 17 - Bafia bible

LUKAS 17

¹Nni Yeesus à kpaaghà ɓɛ̀yilàg lɛ: Ɓum ɓɛ yin lɛ ɓɛ rɔɓ lɛ ɓɛ kɛɓtɛɛ ɓi fiɓàg, kìɓan kifog, nyìighnyìg rì ŋwaànɛ à ɓiì kɛ̀ɛkɛɓtì ɓum tìɓàg.

²Ki ri kìrɔɔ ɓisu wii lɛ ɓɛɛ kaŋ̀ nyi coo gɔ̀g ì kìpɛn ɓi kìmììgh, di ɓɛɛ pig nyi ɓi rìɓày à kìkòn à cee ɗi lɛ a kɛɓti kìbog ki ɓi ɓɔɓti ɓɛ fìɓàg.

³Kɔ̀riina ɗyomzɛ̀n rì mìniì ɓɔmiɗ! I goni à kìi wɔ̀ kìɓe, rèsi nyi zɛ̀ɗ yiì, i à gherɛɛ yɔ̀, à lemgì rìkì ɗii, ù cenɛ̀n nyi.

⁴Nni aà nàni ɓìɓan taàɓɛ̀ɛ̀ ri wɔ̀ ɓi nwos bog, innɛ à sugtii yì wɔ̀ a nyoo fɔlɔɔ gɛ̀n taàɓɛ̀ɛ̀, à gherɛ̀n à ki lemgi zɛ̀ɗ yiì, ù ghɛ̀ɛ̀sɛɛ nyi kì cenɛɛ.

⁵Fɔɔnnɛ ɓɛ̀kɛ̀nì-fìtom ɓɛ kpaaghà Kan lɛ: Tègsi rìgherɛ̀n ɗis.

⁶Nni Kan à ɓàkà ɓɔ lɛ: I ɓyàarì rì rìgherɛ̀n ɗi ɗi ri lɛ ɗi teghɛ̀n lɔŋ yɛ̀ɛ zàm ì nyas, di ɓì rì lɛ, ɓì kpaa kìte ki lɛ: Pɛ̀sɛn fɛ, u kɛǹ kì ɓɛlɛɛ ɓi rìɓày à kìkòn, kìte kiǹ ki ki fɔlɔɔ.

⁷Ghɛn anɛ ɓi mìni yɛɛ ri lɛ à kì lɛ i à rì rì ŋwaànɛ a sasay nyi ɓi dɛm, nsoò lɛ a ɓèŋɓeŋ nyi ɓìtuwe, à kpaa roànɛ̀n di à sughiì a dɛm lɛ yu kì ɗii lɛ fyɛ̀ɗ.

⁸Com ki à rì lɛ à kpaa nyi ki ri lɛ: Pègsɛn ɓìɗilàg, ù ki cenɗɛn ɓilàà, di u yu mɛ̀ kì kàa, ù ɓoŋ lɛ, ǹka ɗi, ǹnɔ, fɔɔnnɛ wɔ̀ɔ siitɛn min girig kì ɗiì, ù nɔ.

⁹Ki ghɛɛ̀sɛɛ ɓi nya lɛ, a fa ǹkìì-kìsay wiì ɓìtògsɛ̀n lɛ, roànɛ̀n àa kìi ɓìɓan ɓìcèm ɓi àa kpaa nyi lɛ a ki?

¹⁰Fɔlɔɔ nnɛ, mìni girig, cààmɛ̀n ki ɓì mɛ kì ɓiɓan ɓi ɓɛ tɔɔgh mìni lɛ ɓi ki, ɓì kpaa lɛ: Tì rì ɓɛ̀kìì-ɓìsay ɓɛ zɛɛrìzɛy, lɛ kìɓan ki kaa rì lɛ ɓìsi yɛɛ ki, kɛɛ̀ki tyàa kìi.

¹¹Ɓi rìkɛ̀n ɗi a Yorisalɛm, Yeesus à fyeeghà ɓi bee inɛ ì ghaghii ɓi nyìinyìm ànɛ lɛ rì Samari, rì Galile.

¹²Yɛ̀ɛ à ɗiŋìghà ɓi maa kìlɔ̀ŋ àdɛŋ, nni ɓɛ̀kukwiy ntɛ̀ɗ ɓɛ yughà nyi kì ɓoŋì, ɓɛ rɛlìì fìràɓ, ɓɛ kpaa jɛ̀ɛ̀ aɗyoo lɛ:

¹³Yeesus, ǹɗèsàg! Wogha ɓìsi nyìighnyìg.

¹⁴Yɛ̀ɛ Yeesus à ghɛngà ɓɔ, nni à kpaaghà ɓɔ lɛ: Kɛ̀ɛna kì rèsɛɛ ɓi mis mɛ ɓɛpìrɛɛtìrɛ̀ ɓɛgwey. Yɛ̀ɛ ɓɛ kɛɛ̀kɛ̀ngà, nni ɓɛ sigmɛ̀ngà lɛ ɓɛ mɛ wɔ̀n.

¹⁵Yɛ̀ɛ kìbog ki ɓi ɓɔ ki ghɛngà lɛ ki mɛ wɔ̀n, ki sugtìghày rì jɛ̀m di kɛɛ ɓɔɔɓɔgsì Bɛ̀ll jɛ̀ɛ̀ aɗyòò.

¹⁶À kpìghà Yeesus a mɛ̀kòò, à ruusì ìsu ɓi zi, à fa nyi ɓìtògsɛ̀n. Ŋwaàncèm à ɓaghà ŋwaànɛ a Samari.

¹⁷Yeesus à kpaa min lɛ: Ɓɛ̀kukwiy ɓɛ kiǹtɛ̀ɗ ɓaa wɔ̀ni ɓi nya ɓɛ̀sɛ̀ɛ̀ ɓɛcèm? Nni kìtaànìn kim̀bog ki ri fe?

¹⁸Lɔŋ ǹkèn a mum ànɛ yaa yitii, ɓi ɓɔɔ̀cèm, lɛ a sugtiì kì kemzii Bɛ̀ll.

¹⁹Nni à kpaaghà min ŋwaànɛ̀n lɛ: Pɛ̀sɛn aɗyòò, u kɛǹ, rìgherɛ̀n ɗyɔɔ ɗi ghɛɓsii wɔ̀.

²⁰Nni Ɓɛ̀fàrìzyɛŋ ɓɛ tɔkà Yeesus lɛ fin innɛ kìlɔ̀ŋ ki Bɛ̀ll ki ri ɓiì yùu? A ɓàg ɓɔ lɛ: Kìlɔ̀ŋ ki Bɛ̀ll kaa yù ɓi, ɓi rìkuu ɗi riyù ɗi lɛ, ɓum ɓɛ ghɛn ɗì mis.

²¹Fɔɔnnɛ ɓaa reɓ ɓi lɛ, kɛɛ̀ki fɛ, nsoò lɛ kɛɛ̀ kinii, ɓisuulɛ ɓì ghɛ̀ɛ̀sɛɛ kì yiì lɛ, kìlɔ̀ŋ ki Bɛ̀ll ki ri ɓi nyìinyìm wìn.

²²Nni à kpaaghà ɓɛ̀yilàg lɛ: Cààmɛ̀n ki tiì, ki ɓì rì ɓiì ɓaà rì zày ìnɛ lɛ, di ɓyàa ghɛɛ kìbog ki ɓi mɛ̀ru mɛ Man à mum, wɔ̀lɛ ɓyàa ki ghɛn ɓi.

²³Ɓɛ ri mìni ɓiì kpaà lɛ innɛnii, nsoò lɛ innɛ fɛ̀, kɛ̀ ɓi kɛ̀n wɔɔ, kɛ̀ ɓi mɛŋ wɔɔ ri mɛ̀ree.

²⁴Fɛlɛ yɛ̀ɛ ŋwaàŋwàɗ à ti à ŋwàɗkì, à kpeŋzì ɗyoo ɗìcèm, fɔlɔɔ nnɛ Man à mum à ɓaa gɛ ɓi ŋwosi risugtìì ɗii.

²⁵Kìɓan kifog, ki ghɛɛ̀sɛɛ lɛ a ka log kiwoògh rìkɛŋ lɛɛ̀gwey, gbàà ì ɓum ì gɛɛ̀nɛ ìnɛ ì ɓèn nyi.

²⁶Lɔŋ yɛ̀ɛ ki kilɛ̀ngà ɓi mɛ̀ru mɛ Nowe, fɔɔlɔɔ nnɛ ki ɓiì kìlɛɛ ɓi mɛ̀ru mɛ Man à mum à ɓiì sugtii yi.

²⁷Ɓum ɓɛ kikìghà lɛ, di ɓɛɛ̀ ɗi di ɓɛɛ̀ nɔ, ɓɛ wɔwɛy ɓɛ̀yiɓ, ɓɛ fafà ɓɛ̀gɔ̀n a mɛ̀wɛy, ɓɛ yin-yìn ɓɛ̀dɛlì ɓaa ɓɛ̀yiɓ, à kpaŋ ŋwos anɛ Nowe à ɗiŋìghà ɓi kìkɔm, don i yù, ì cuusì ɓɔ ɓɛ̀sɛ̀ɛ̀ ɓɛ̀cèm.

²⁸Kìɓan ki ki kilɛ̀ngà ɓi cààmɛ̀n à Lɔt, ki kìlɛɛ gɛ tì, ɓum ɓɛ kikìghà lɛ ɓɛ ɗiɗì, ɓɛ nɔnɔ̀, ɓɛ làlag, ɓɛ ki kàkàɓ ɓyom, ɓɛ ɓɛɓɛ̀y ɓyom, ɓɛ ki tootoŋɗɛ̀n mɛɛ.

²⁹Kìɓan kifog, ŋwos anɛ Lɔt à pɛ̀sɛ̀ngà a Sɔdɔm ɗuu rì ǹdùsi ɓi nɔnɔ̀ghày ɓi ɗyoo yɛ̀ɛ bwey, ɓi cuusì ɓɔ ɓɛ̀sɛ̀ɛ̀ ɓɛ̀cèm.

³⁰Ki ɓiì ɓaà lɔŋ com kìfog ŋwos anɛ Man à mum à ri rèsɛɛgɛs̀.

³¹Ŋwos anɛ̀n, ŋwaànɛ à ɓaa gɛ ɓi bwèy aɗyòò, kɛ̀ɛ sɛɛdii lɛ a teɗ ɓyom ɓii ɓi naa; nsoò roànɛ à ɓaa gɛ ɓi dɛm, kɛ̀ɛ sugtiì a mɛɛ.

³²Yitiina gili Lɔt.

³³Ŋwaànɛ à kaa gɛ bee inɛ lɛ a ghɛɓsi cɛɓ kii, à ɗimzii gɛ kɔ. Fɔɔnnɛ roànɛ à ɗimzii gɛ cɛɓ kii nnyɛɛ ki ɓatii gɛ rì kɔ.

³⁴Ǹkalii mìni lɛ: Ki ɓaagɛ ɓi-ru wìn lɛ, i ɓum ɓɛɓɛɛ̀ ɓɛ nɔnɔŋii ɓyomɓilɔ̀ŋ ɓìfog, ɓɛ teɗ bog roàmbog à rɔ̀ɓ.

³⁵Ɓɛ̀yiɓ ɓɛɓɛɛ̀ ɓɛ wɔwɔ̀g ɓyom nɗaŋ, ɓɛ teɗ bog, bog à rɔ̀ɓ.

³⁶I ɓum ɓɛɓɛɛ̀rɛn ɓɛ ri ɓi dɛm, ɓɛ teɗ bog, bog à rɔ̀ɓ.

³⁷Fɔɔnnɛ ɓɛ̀yilàg ɓɛ tɔkà Yeesus lɛ: Kan! fe nnɛ kìɓan kiǹ ki ri kìlɛɛ gɛ? Yeesus à ɓàg bɔ lɛ: Jàŋ inɛ kìlòŋ ki com ki ri ɓa, wɔɔ nnɛ ɓɛ̀ghem ɓɛ ri taŋzàg.