Read Bafia LUKAS 22 Bible Online

LUKAS 22 - Bafia bible

LUKAS 22

¹Tìcàɓ ti ɓɛ ǹkìlàg bìrɛs, ɓɛ̀ kɛɛ̀ foŋ nwìɗ miì, tyɛɛ̀ ti ɓɛɛ̀ regi lɛ Paskà, ti kɛɛ̀kɛ̀ɛ̀ghày.

²Ɓɛ̀pìrɛɛtìrɛ̀ ɓɛgwey, rì ɓɛ̀rèsàg-ɓìdɔ̀gsɛna ɓɛ kaakààghà bee inɛ ɓɛɛ wey Yeesus, kìɓan kifog ɓɛ rirìsìghà ɓum ɓɛ kilɔ̀ŋ.

³Satàn a ɗiŋìghà ɓi nɗem wu Zyudas ànɛ ɓɛ ndegì lɛ Iskariyot, à ɓaghà kìbog ki ɓi ɓɛ̀yilàg ǹtɛ̀ɗ rì ɓɛɓɛɛ̀.

⁴Fɔɔnnɛ Zyudas à kɛ̀ngà kì wooghrɛɛ jɛ̀ɛ̀ rì ɓɛ̀pìrɛɛtìrɛ̀ ɓɛgwey, rì mɛ̀fòm mɛ ɓɛsujàà ɓɛ ɓɛ m̀bègì naà-Bɛ̀ll, ɓi-ghèy wu a fa ɓɔ Yeesus.

⁵Ɓɛ̀roɓɛ̀n ɓɛ wokà kìrɔɔ, ɓɛ kag̀ lɛ ɓɛ ri nyi ɓiì faà mɔ̀ɔ̀ni.

⁶Zyudas à gherɛ̀n, à tumɛ̀n rìkaa ɗi kirɔŋiɗ ki lɛ a fa ɓɔ Yeesus yɛ̀ɛ kìlɔ̀ŋ kɛ̀ kɛɛ̀ yi.

⁷Yɛ̀ɛ ŋwos a rikì ɗi bìrɛs ì kɛ̀ɛ̀ nwìɗ, ànɛ ɓɛ ghɛɛ̀sɛ̀ngà kì wolì jɔ̀ɔ̀ ì Paskà à kpagà,

⁸Yeesus à romgà lɛ rì Pyɛɛri rì Zyaŋ à kpaa ɓɔ lɛ: Kɛ̀ɛna ɓìsi kì pègsɛɛ ɓiɗilàg ɓi Paskà.

⁹Ɓɛ̀roɓɛ̀n ɓɛ tɔg nyi lɛ: Fe nnɛ u kɔ̀nkɔn lɛ ti pegsɛn ɓyɔ?

¹⁰Yeesus à ɓàg ɓɔ lɛ: Ɓì yii! Yɛ̀ɛ ɓì ɓiì ɗiŋii ɓi bàn, ɓì rì ɓiì tuusɛɛ ri ŋwaàdɛŋ ɗi à tɛ̀tɛɛgh bèè i mɛ̀nig, nɔ̀ɔ̀tiina nyi a mɛɛ mɛ à rì miì ɓiì ɗiŋii,

¹¹ɓi kpaà ŋwaàmɛɛ lɛ, ǹɗèsàg lɛ: Ɓi kìden ki naa kibe nnɛ nyii ghɛɛ̀sɛɛ kì ɗiì Paskà rì ɓɛ̀yilàg ɓii?

¹²Fɔɔnnɛ à rì mìni ɓiì rèsii coo kiden ki naa ɓi mɛɛ aɗyòò kì pègsɛn. Wɔɔ nnɛ ɓì rì ɓiì lamì ɓìɗilàg ɓi Paskà.

¹³Nni ɓɛ̀-Pyɛɛri ɓɛ kɛngà, ɓɛ tanɛ̀n ɓìɓan ɓìcèm lɔŋ yɛ̀ɛ Yeesus à kpaaghà ɓɔ, ɓɛ ki lam ɓiɗilàg ɓi Paskà.

¹⁴Yɛ̀ɛ cààmɛ̀n ki riɗi ki kpagà, nni Yeesus à kɔ̀rìghà ɓi zi nɗaŋ ri ɓɛ̀yilàg ɓii lɛ ɓɛɛ ɗi.

¹⁵Fɔɔnnɛ à kpaaghà ɓɔ lɛ: Ki mɓiisɛɛ mɛ̀ kì kɔ̀ni lɛ, ǹɗi Paskà ànɛ ǹɗaŋ ɗi mìni di ǹka wog ɓi rikɛŋ.

¹⁶Lɛ̀, ǹkalii mìni lɛ, màa ɗi ti ɓi Paskà àdɛŋ à kpaŋ yɛ̀ɛ azi anɛ miì à kìlɛɛ gɛ ɓi kìlɔ̀ŋ ki Bɛ̀ll.

¹⁷Nni à tekà ɓeŋ à mɛ̀rɔ̀g à fa Bɛ̀ll ɓìtògsɛ̀n, à kpaa lɛ: Terina ɓeŋ ànɛ ɓi ceesɛn nyi di ɓi sàsàg;

¹⁸lɛ, ǹkalii mìni lɛ à tumɛ̀n gɛɛ̀nɛ, màa nɔti ɓi mɛrɔ̀g mɛ viìnyɛ̀ à kpaŋ yɛ̀ɛ kìlɔ̀ŋ ki Bɛ̀ll ki ri ɓiì yùu.

¹⁹Fɔɔnnɛ à tekà bìrɛs, à fa Bɛ̀ll ɓìtògsɛ̀n, à ɓɛg yɔ̀, à fa ɓɛ̀yilàg à kpaa lɛ: Nyoo yɛ̀m yɛ̀ɛ ri lɛ; yɛ̀ɛ ri ǹfayɛn ɓisu wìn, kìlaaghna kìɓan ki, ɓì yitàg mɛ̀.

²⁰Fɔlɔɔ nnɛ à tekà girig ɓeŋ, ajɛ̀m ì rìɗi, à fa ɓɔ a kpaa lɛ: Ɓeŋ ànɛ, à rì nyɔɔnyɔn à rìràrɛ̀n ɗi lɛ, rì Bɛ̀ll rì ɓum, ɓi bwaɓ yɛm̀ yi yi ɗyoŋi ɓisu wìn.

²¹Nni ɓì ghɛɛ! Ŋwaànɛ àa tɔ̀kɛɛ mɛ̀, a ɗiɗi fɛ ǹɗaŋ ri mɛ̀.

²²Man à mum à rì ɓiì wiì lɔŋ yɛ̀ɛ Bɛ̀ll à fèkà lɛ à ghɛ̀ɛ̀sɛɛ kì wiì, kìɓan kifog nyìighnyìg rì roànɛ à rì nyi ɓiì kàɓi.

²³Fɔɔnnɛ ɓɛ tumɛ̀ngà rìtɔɔ̀ghtɔ̀ɔ̀ghrɛ̀n wɔɔ ɓɔ rì ɓɔ lɛ, ghɛn anɛ ɓi nɗaŋ waa yɛɛ ri ɓiì kìi rikuu ɗi kiɓan yɛ̀ɛ ɗiǹ?

²⁴Nni ɓɛ̀yilàg ɓɛ ɓigtìghà ɓyoo nyoey lɛ ɓɛɛ yi ghɛn anɛ ɓi nɗaŋ waa nnɛ ɓɛ ghɛɛ̀sɛɛ kì ghɛɛ̀ yɛ̀ɛ ǹlàmì ɓɛ̀ro ɓɛm̀bog.

²⁵Fɔɔnnɛ Yeesus à kpaaghà ɓɔ lɛ: Mɛ̀fòm mɛ ɓi ɓìlɔ̀ŋ mɛ ti mɛ lamɓàg ɓyɔ mɛ ciɓtàg; ɓumɓɛ ɓɛɛ̀ tuturi ɓilɔ̀ŋ ɓɛɛ̀ɓɛ ɓìlɔ̀ŋ ɓiǹ ɓi ti ɓi kpaaghì lɛ ɓɛ ri ɓɛ̀roɓɛ ɓɛɛ̀ kìki ɓɔ kìrɔɔ.

²⁶Ki ghɛɛ̀sɛɛ ɓi ki ɓaà fɔlɔɔ ɓi nyìinyìm wìn, wɔ̀lɛ roànɛ à rì ɓiì ɓaà ǹɗɛlì-asù ɓi nyìinyìm wìn à ghɛ̀ɛ̀sɛɛ kì terɛɛ nyimìɗ yɛ̀ɛ ŋwɔɓti, ŋwaànɛ a làlàmì, à ɓa yɛ̀ɛ ǹkpàn a ɓɛ̀ro ɓɛm̀bog.

²⁷Rì ŋwaànɛ à kɔ̀kɔrii ɓi teɓèrè ɓi rìɗi ɗi ɓiɗilàg rì ŋwaànɛ a kààkaa nyi ɓìɗilàg, roàbe yɛɛ cee roàmbog? Mɛ̀ɛ ǹti nya lɛ roànɛ a ɗiɗi yɛɛ cee! Nni mɛ̀ ǹɗì min ɓi nyìinyìm wìn fɛlɛ yɛ̀ɛ ǹkìì-kìsay!

²⁸Mìni yɛɛ ri ɓɛ̀roɓɛ ɓɛ ǹsììrɛɛ lɛ ɓɛɛ nɔɔ̀ti mɛ̀ ɓi mɛ̀fèèghrɛn mɛ mɛ̀ɛ ǹtuutùlɛ̀n rì mɔ.

²⁹Fɛlɛ yɛ̀ɛ Tààta à faghà mɛ̀ rìlàmì ɗi kilɔ̀ŋ kii, fɔɔnnɛ mɛ̀ ǹfaa girig mìni ɗyɔ,

³⁰fɔlɔɔ nnɛ ɓì ɓiì kìi lɛ ɓì ɗi, ɓì ki nɔ ɓi kìkpanà kɛm̀ ɓi kìlɔ̀ŋ kɛm̀, ɓì ki kɔ̀ri ɓi mɛ̀kɔ̀ɔ̀ mɛ rilàmì, lɛ ɓi yɔm̀ mɛ̀pwìɗ ǹtɛ̀ɗ rì mɛɓɛɛ̀ mɛ a Isirayɛl.

³¹Simɔn! Simɔn! Satàn àa ntɔɔgh ìtèɗ wulɛ a fɛɓti mìni yɛ̀ɛ gèŋ,

³²wɔ̀lɛ mɛ̀ɛ m̀ɓɔ̀ŋzaagh Bɛ̀ll ɓisu wɔɔ lɛ rìgherɛ̀n ɗyɔɔ ɗyɛ̀ kɛɛ̀ fɔɛy, nni yɛ̀ɛ ù ri ɓa di ù mɛ sugtii tì a lɔ̀ŋkɛm̀, kìya lɛ ɓɛ̀goni ɓɛɛ siirɛn girig.

³³Pyɛɛri à kpaa nyi lɛ: Kan ǹɗì m̀pègsɛn lɛ, ǹkɛǹ naà-zày, ǹsoò lɛ ǹwu ǹɗaŋ ri wɔ̀.

³⁴Yeesus à ɓàg lɛ, Pyɛɛri, ǹkalii wɔ̀ lɛ, ǹlem à zag àa rɔŋ ɓi gɛɛ̀nɛ di ù ka ron ɓi lɛ, ù yii ɓi mɛ gɛ̀n yiraa.

³⁵Nni Yeesus à kpaatìghà ɓɔ lɛ: Yɛ̀ɛ ǹɗomgà mìni, ǹkpaa lɛ kɛ̀ ɓi teɗ nsoò mɔ̀ɔ̀ni, nsoò ɓàm, nsoò gòò, com kidɛŋ ki kaarɛ̀ngà nya mìni? Ɓɛ ɓaàg nyi lɛ: Èe èe.

³⁶Fɔɔnnɛ à kpaaghà min ɓɔ lɛ: Ɓi cààmɛ̀n ki nnɛ ŋwaànɛ à rì rì mɔ̀ɔ̀ni à ghɛ̀ɛ̀sɛɛ mɔ kì terì, nsoò ŋwaànɛ à rì rì ɓàm à teɗ, ŋwaànɛ à rì kɛ̀ɛ̀ gàfàg, à kàɓ kìlàà kii lɛ, a laàghrɛn yɔ̀.

³⁷Lɛ ǹkalii mìni lɛ, jɛ̀ɛ̀ ìnɛ ì rì ǹkànɛn lɛ: Ɓɛ fogà nyi ɓi bàlì ì ɓɛ̀zyaàzyaa, ì ghɛ̀ɛ̀sɛɛ kì ghɛnɛɛ ɓi mɛ̀, ɓisuulɛ, com kìcèm ki ɓɛ kangà ɓisu wɛ̀m, ki ri ɓiì kìlɛɛ.

³⁸Nni ɓɛ̀yilàg ɓɛ kpaaghà nyi lɛ: Gàfàg yɛɛ̀yi lɛ, yiɓɛɛ̀, nyii ɓaàg ɓɔ lɛ, lèg ànɛn à ghɛ̀ɛ̀sɛɛ.

³⁹Yɛ̀ɛ Yeesus à kpagày ɓi dan, nni à ɓɔkà ɓi dòn ì ɓɛ̀òlìvyee lɔŋ yɛ̀ɛ àa nti à kìlàg, ɓɛ̀yilàg ɓii ɓɛ nɔɔ̀tì nyi.

⁴⁰Yɛ̀ɛ à kpagà wɔɔ, nni à kpaaghà ɓɛ̀yilàg lɛ: Ɓɔ̀ŋziina Bɛ̀ll lɛ, kɛ̀ ɓi tanɛn ri mɛ̀fèèghrɛn.

⁴¹Nni à ràɓsɛ̀ngà ɓɔ lèg àdɛŋ, yɛ̀ɛ jàŋ inɛ gɔ̀g ì rì lɛ ì kpì di ɓɛ lɔɔ̀ yɔ̀, à ɓag mɛ̀ɗu ɓi zi, à ɓɔ̀ŋzàg Bɛ̀ll,

⁴²à kpaa lɛ: Tààta i ki kɔni wɔ̀, kìya lɛ ɓeŋ ànɛ a raɓsɛn mɛ̀, nni àa rìkɔ̀n ɗyɛm̀ ɗyɛɛ ghɛɛ̀sɛɛ kì kìlɛɛ, lɔŋ ɗinkɔ̀ɔ̀.

⁴³Fɔɔnnɛ ŋwaà-fìtom à rèsɛ̀ngày nyi ɓi ɗyoo lɛ a fa nyi ìtèɗ.

⁴⁴Yɛ̀ɛ ìris wu ɓangà Yeesus, fɔɔnnɛ à sììrɛ̀ngà lɔŋ ɓi bɔ̀ŋzɛ̀n, kìɗìg kii ki ɓa lɔŋ yɛ̀ɛ ɓɛ̀jɛɛ ɓɛ bwaɓ ɓɛɛ yɔɔyɔɔ ɓi zi.

⁴⁵Yɛ̀ɛ à lègsìghà bɔ̀ŋzɛ̀n, à pɛ̀sɛ̀n aɗyòò, à sugtìì jàŋ inɛ ɓɛ̀yilàg ɓɛ ɓaghà, à tanɛ̀n ɓɔ di ɓɛ mɛ cuu tilo, lɛ ɓɛ ɓaghà rì ǹɗemi-kɛŋɛn.

⁴⁶À kpaa ɓɔ lɛ. Ɓi lalay lɛ la? Pɛ̀sɛɛna aɗyòò, ɓi ɓɔŋzi Bɛ̀ll di kɛ̀ ɓi kpì ɓi mɛ̀fèèghrɛn.

⁴⁷Yeesus à kaka à kpaakpàà fɔlɔɔ, nni coo kituu ki ɓum ki yughày, kìbog ki ɓi ɓɛ̀yilàg ɓii ntɛ̀ɗ rì ɓɛɓɛɛ̀ ɗii lɛ Zyudas kɛɛ syogày bee. À tyòŋdɛ̀ngà Yeesus a nyoo lɛ a lɔɛɗ nyi.

⁴⁸Nni Yeesus à kpaaghà nyi lɛ: I ù ti lɛ u kaɓ Man à mum, ù ka lɔɛ̀ɗ nyi, wa?

⁴⁹Yɛ̀ɛ ɓumɓɛ Yeesus à ɓaghà rì ɓɔ ɓɛ ghɛngà kìɓan kiǹ, nni ɓɛ tɔkà nyi lɛ: Kan ti teɗ gàfàg yis lɛ ti ki rìbaŋì?

⁵⁰Fɔɔnnɛ kìbog ki ɓi ɓɔ ki ɓokà ǹkìì-kìsay a pìrɛɛtìrɛ̀ àgwey, ki syaŋ nyi ìreè wu weèlem.

⁵¹Wɔ̀lɛ Yeesus à kpaa lɛ: Càrina, lèg ànɛn à ghɛ̀ɛ̀sɛɛ; fɔɔnnɛ à kòmgà ìreè wu ŋwaànɛ̀n à wɔ̀ɔ̀zì nyi.

⁵²Nni Yeesus à kpaaghà ɓɛ̀pìrɛɛtìrɛ̀ ɓɛgwey rì ǹkɔ̀mɛ̀n ɓɛ̀sujàà ɓɛ ɓi naà-Bɛ̀ll rì ɓɛ̀sɛ̀ɛ̀mɛn ɓɛ ɓɛ yughày lɛ ɓɛɛ ɓan nyi lɛ: Ɓì ghɛɛ mɛ̀ lɛ ǹɗì zyaàzyaa nni ɓì yùu yì lɛ rì gàfàg rì ɓìgeŋ lɛ ɓi ɓaǹ mɛ̀?

⁵³Rì mɛ̀ rì mìni tìi nɗì lɔŋ ɓi naà-Bɛ̀ll ɓɛ̀ŋwos ɓɛ̀cèm, kɛ̀ ɓi ki ɓaǹ mɛ. Wɔ̀lɛ cààmɛ̀n kin kɛɛ ti lɛ, ki lɛ ìtèɗ wu birìm wɛɛ resɛ̀n.

⁵⁴Yɛ̀ɛ ɓɛ ɓangà Yeesus, ɓɛ teɗ nyi ɓɛ kɛǹ ɗì nyi a mɛɛ mɛ nkɔ̀mɛ̀n-ɓɛ̀pìrɛɛtìrɛ̀ ɓɛgwey, Pyɛɛri à nɔ̀ɔ̀nɔ̀ɔ̀tìghày ɓɔ ajɛ̀m fìràɓ.

⁵⁵Ɓɛ ghɛŋzɛ̀ngà ɗuu ɓi nyìinyìm à ǹlɛmɓòg, nni Pyɛɛri à kɛ̀ngà kì sɔ̀lɛɛ ɓi nyìinyìm à ɓumɓɛ ɓɛ kɔmzɛ̀ngà ɗuu.

⁵⁶Fɔɔnnɛ giɓ adɛŋ ànɛ à ɓaghà ǹkìì-kìsay a ghɛngà nyi ǹkɔ̀kɔriyɛn a ɗuu, à konàg nyi kì fiɓii, à kpaa lɛ: Ŋwaànɛ àa nɗì girig ǹɗaŋ ɗi Yeesus.

⁵⁷Wɔ̀lɛ Pyɛɛri à rongà kìɓan kiǹ, à kpaa lɛ: Giɓ anɛ! Ǹ-yii ɓi ŋwaànɛ u kpaakpaa anɛ̀n.

⁵⁸Yɛ̀ɛ maa cààmɛ̀n, à ghaghìghà ŋwaàdɛŋ à ghɛɛ̀dì Pyɛɛri, à kpaa lɛ: Ù rì girig kìbog ki ɓi ɓumɓɛ. Pyɛɛri à ɓàg lɛ: Ǹ-yin ŋwaànɛ ɓi nɗaŋ waa.

⁵⁹Ki finɛ̀ngà tì fɛlɛ yɛ̀ɛ bimiɗ à hawò, nni ŋwaàdɛŋ à sììrɛ̀ngà tì lɔŋ ɓi jɛ̀ɛ̀ ìnɛn, lɛ: Ki ri saaɗ lɛ ŋwaànɛ àa nɗì girig ǹɗaŋ ɗi Yeesus, ɓisuulɛ à rì ŋwaànɛ a Galile.

⁶⁰Nni Pyɛɛri à ɓàkà ŋwaànɛ̀n lɛ: Mɛ̀ ǹ-yii ɓi com ki u kɔ̀nkɔn kiǹ lɛ u kpaà. Yɛ̀ɛ nyii ɓaghà di a ka tòtog a ŋwɔm, ǹlem à zag à ghàs kì rɔŋì.

⁶¹Kan Yeesus à lɔ̀ɔ̀ghrɛ̀ngày à pɛɓsɛ̀n Pyɛɛri Fɔɔnnɛ Pyɛɛri à yitìghà jɛ̀ɛ̀ ìnɛ Kan Yeesus à kpaaghà nyi lɛ: Ǹlem à zag a rì ɓiì rɔŋì gɛɛ̀nɛ di ù mɛ roòzɛn mɛ gɛ̀n yiraa.

⁶²Fɔɔnnɛ Pyɛɛri à kpagà ɓi dan, à rèn à sìgtàg.

⁶³Ɓumɓɛ ɓɛ ɓeŋɓèŋgà Yeesus ɓɛ feèfèngàkà nyi di ɓɛɛ̀ ɓooɓokì nyi.

⁶⁴Ɓɛ lɔkà nyi kìlàà ɓi mis ɓɛ tɔg nyi lɛ: Rèmi ŋwaànɛ à ɓoogh wɔ̀.

⁶⁵Ɓɛ sɛmgàkà tì nyi tìsɛm tidɛŋ lɛɛ̀gwey.

⁶⁶Yɛ̀ɛ duri i tangà, rìghàdà ɗi ɓɛ̀sɛ̀ɛ̀mɛn ɓɛ Ɓɛ̀yudɛ̀n, rì ɓɛ̀pìrɛɛtìrɛ̀ ɓɛgwey, rì ɓɛ̀rèsàg-ɓìdɔ̀gsɛna, ɗi taŋzɛ̀ngà ɓɛ tɔg lɛ ɓɛɛ kɛǹ ɗì Yeesus a Sànèdìrɛŋ wàà.

⁶⁷Ɓɛ tɔg nyi lɛ: Kali ɓìsi ǹkòo ù rì Mèsii! Yeesus à ɓàg ɓɔ lɛ: Nsoò màa kpaa mìni, ɓyàa gherɛn ɓi.

⁶⁸I ǹki tɔɔgh mìni ǹtɔɔ̀tɔɔgh, ɓyàa ɓàg ɓi.

⁶⁹À tumɛ̀n ɓi gɛɛ̀nɛ, Man à mum à rì ɓiì kɔ̀rii ɓi weèlem à Bɛ̀ll à ìtèɗ wucèm.

⁷⁰Nni ɓɔɔ̀cèm ɓɛ tɔkà lɛ: Yɛɛ lɔɔ lɛ ù rì Man à Bɛ̀ll wa? Yeesus à ɓàg ɓɔ lɛ: Ɓì kpaa miì, ǹɗì Man à Bɛ̀ll.

⁷¹Fɔɔnnɛ ɓɛ kpaaghà min lɛ: Tì rì ɓiì kaatii ti ɓɛ̀wusìnɛ̀ɗ ɓɛdɛŋ lɛ cɛ! Ɓìsiì ɓɔmiɗ, tì woogh ɓìtòkì ɓii.