Read Bafia LUKAS 23 Bible Online

LUKAS 23 - Bafia bible

LUKAS 23

¹Nni ɓɛ ruɓkà ɓɛ̀sɛ̀ɛ̀ ɓɛ̀cèm lɛ bùɓ, ɓɛ kɛǹ rì Yeesus yɛ̀ɛ Pilat.

²Wɔɔ nnɛ ɓɛ sɔmɛ̀ngà nyi, ɓɛ kpaa lɛ: Tìi ǹsììdii ŋwaaànɛ di a tootoòsì ɓumɓɛ ɓi kìlɔ̀ŋ kis lɛ, ɓɛ̀ kɛɛ̀ wog com ki ɓɛ̀làmì ɓɛɛ̀ kpaakpàà, à règ lɛ ɓɛ̀ kɛɛ̀ peeti làmpoŋ̀ à Kaaza, à ki reŋɗɛn nyimiɗ lɛ Kiris, yɛ̀ɛ lɔɔ lɛ rìfòm.

³Fɔɔnnɛ Pilat à tɔkà nyi ǹtɔɔ̀tɔɔgh lɛ: Ù rì nya rìfòm ɗi udɛ̀n? Yeesus à ɓàg lɛ: Wàa kpaà.

⁴Nni Pilat à kpaaghà ɓɛ̀pìrɛɛtìrɛ̀ ɓɛgwey lɛ: Ǹghɛɛ ɓi kiɓan ki ɓeɓtɛn ki ŋwaànɛ à kìi.

⁵Wɔ̀lɛ ɓɔɔ siìrɛ̀ngà lɔŋ ɓi rìkpaakpàà lɛ, àa ntoosii ɓumɓɛ ɓi kìlɔ̀ŋ lɛ ɓɛɛ ɓa rì ǹtoòtèɗ, ɓi rìrèsàg ɗi a fafa ɓɔ; à tumɛ̀ngà com kìn a Galile, à renì ziì Zyude bimiɗ, à yù fɛ kì kpaŋì.

⁶Yɛ̀ɛ Pilat à wokà fɔlɔɔ, nni à tɔkà lɛ a yi ǹkòo Yeesus à rì ŋwaànɛ a Galile.

⁷Nni yɛ̀ɛ à wokà lɛ Yeesus à rì ŋwaànɛ ɓi kìden ki zi ki Eroodɛ à làmii, fɔɔnnɛ à pɛ̀ɛ̀zìghà nyi kìromì yɛ̀ɛ Eroodɛ; lɛ Eroodɛ, à ɓaghà girig a Yorisalɛm ɓi mɛ̀ru mɛ̀n.

⁸Yɛ̀ɛ Eroodɛ à ghɛngà Yeesus, à wog kìrɔɔ lɛɛ̀gwey ɓisuulɛ, ki ɓaghà di kaa finɛn lɛɛ̀gwey yɛ̀ɛ à wowòkà Yeesus ɓi rìkem, à ki kɔ̀nkɔn lɛ di àa ghɛɛ nyi. À fèfèkà lɛ à ɓiì ghɛɛ̀ di Yeesus à kìi dàm ìdɛŋ.

⁹Fɔɔnnɛ à tɔkàkà nyi mɛ̀tɔɔ̀ghtɔɔgh à finɛ̀n, wɔ̀lɛ Yeesus kɛ̀ɛ ɓàg nyi.

¹⁰Ɓɛ̀pìrɛɛtìrɛ̀ ɓɛgwey rì ɓɛ̀rèsàg-ɓìdɔ̀gsɛna ɓɛ ɓaghà wɔɔ, ɓɛ kpaakpàà ɓìɓeɓtàg ɓi ɓiɓan di ɓɛɛ̀ ràraɗ ɗi nyi.

¹¹Fɔɔnnɛ Eroodɛ rì ɓɛ̀sujàà ɓii ɓɛ sɛɛtìghà Yeesus, ɓɛ ki sɛmgi nyi, ɓɛ waasì nyi kìlàà ki lònlomɛn, ɓɛ pɛɛ̀zì nyi kì romì yɛ̀ɛ Pilat.

¹²Ŋwos àǹcèm ànɛn innɛ Eroodɛ rì Pilat ɓɛ ɗiŋìghà rìghan, kɔlɛ ɓɛ ɓaghà ɓi bènà abɛ̀y.

¹³Nni Pilat à regàkà lɛ rì ɓɛ̀pìrɛɛtìrɛ̀ ɓɛgwey rì mɛ̀fòm, rì ɓum ɓɛ kilɔ̀ŋ.

¹⁴À kpaa ɓɔ lɛ: Ɓyàa yùu mɛ̀ rì ŋwaànɛ rì ǹkpaà lɛ a tootoòsì ɓum ɓɛ kilɔ̀ŋ lɛ ɓɛ̀ kɛɛ̀ wog rilàmì. Nni màa tɔkii nyi mɛ̀tɔɔ̀ghtɔɔgh ɓi mis min, kɛ̀ɛ ǹghɛn nsoò kìɓan kifog ki à kìi ɓi mɛ̀to mɛ ɓiɓan mɛ ɓyàa sɔmɛɛ nyi miì.

¹⁵Nsoò Eroodɛ àa ghɛɛ ɓi com ki ŋwaànɛ à kìi, fɔɔnnɛ àa pɛ̀ɛ̀zii yì nyi kì romìì. Nni ŋwaànɛ à kìi ɓi kiɓan ki ki ri lɛ ɓɛ wey nyi miì.

¹⁶Fɔɔnnɛ ǹɗì ɓiì reɓsii lɛ ɓɛɛ ɓog nyi kìtòn, di ncaɗ nyi.

¹⁷Ɓi tìcàɓ ti Paskà tìcèm, à ghɛ̀ɛ̀sɛ̀ngà ɓɔ kì càri kìmbùŋ kìfog.

¹⁸Nni ɓɛ̀sɛ̀ɛ̀ ɓɛ̀cèm ɓɛ kpaaghà jɛ̀ɛ̀ aɗyòò lɛ, wola ŋwaànɛ, u caɗ ɓìsi Ɓaraɓas.

¹⁹Ɓɛ fogà Ɓaraɓas àncèm ɓi naà-zày ɓi kìɓan ki wɛ̀y wu wu ɗuurɛ̀ngà lɛ, rì ɓum ɓɛ kilɔ̀ŋ rì gɔmìnà ɓi bàn ìnɛ̀n, rì tì lɛ à wolà mum.

²⁰Nni Pilat à ɓììtìghà ɓɔ kì kpaà lɛ a kɔ̀nkɔn lɛ, a caɗ Yeesus.

²¹Kìɓan kifog ɓɔɔ kakàlì lɔŋ jɛ̀ɛ̀ aɗyòò lɛ: Kpana nyi ɓi kɔrɔs.

²²Fɔɔnnɛ à tɔgtìghà ɓɔ ɓi gɛ̀n i kìraa lɛ: Kìɓeɓtàg ki kiɓan aɗi kɛɛ̀ki ŋwaànɛ à kìi? Lɛ mɛ̀ ǹghɛɛ ɓi kiɓan ki à kìi ki ki ri lɛ ɓɛ wey nyi miì, ǹɗì ɓiì tɔɔ̀gh lɛ ɓɛɛ ɓog nyi ɓi kìtòn, fɔɔnnɛ ǹcàɗ min nyi.

²³Wɔ̀lɛ ɓɔɔ tɔtɔ̀kà lɔŋ jɛ̀ɛ̀ aɗyòò kɛ̀ɛ̀ rìfɔɛy lɛ ɓɛɛ kpan Yeesus ɓi kɔrɔs. Fɔɔnnɛ kìyoòyòò kaa kiǹ kɛɛ ki wonìghà.

²⁴Nni Pilat à rengà lɛ à rì ɓiì kìi com ki ɓɛ tɔkà nyi lɛ a ki.

²⁵Fɔɔnnɛ à càɗkà ŋwaànɛ à ɓaghà ɓi naà-zày ɓisuu kiɓan ki wɛ̀y, rì ki lɛ à wolà mum, lɛ nyi nnɛ ɓɛ tɔkà lɛ ɓɛɛ caɗ; wɔ̀lɛ à fa ɓɔ Yeesus lɛ ɓɛɛ ki rì nyi yɛ̀ɛ ɓɛ kɔnì.

²⁶Yɛ̀ɛ ɓɛ kɛnkɛ̀ngà rì Yeesus, nni ɓɛ ɓangà ŋwaàdɛŋ ànɛ a Sirɛn ɗii lɛ Simɔn di a susug yi a dɛm, ɓɛ tɛgsì nyi kɔrɔs lɛ a nɔɔ̀nɔ̀ɔ̀tì Yeesus rì nyi ajɛ̀m.

²⁷Kìtuu ki ɓum ɓɛ kilɔ̀ŋ rì ɓɛ̀yiɓ ɓɛ nɔɔ̀nɔ̀ɔ̀tìghà Yeesus ajɛ̀m; ɓɛ̀yiɓ ɓɛǹ ɓɛ kukwìɗ ɓyàg di ɓɛɛ̀ lenlem nyi.

²⁸Fɔɔnnɛ Yeesus à lɔ̀ɔ̀ghrɛ̀ngà a ɓɛ̀yiɓ ɓɛǹ, à kpaa lɛ: Mìni ɓɛ̀gɔ̀n ɓɛ Yorisalɛm, kɛ̀ ɓi rènɗen mɛ, rènina mìniì ɓɔmiɗ, rì ɓɔn ɓin.

²⁹Ɓisuulɛ, mɛ̀ru mɛdɛŋ mɛ ɓiì ɓaà, mɛɛ̀mɛ ɓum ɓɛ ɓiì kpaakpaa lɛ: Mààgh rì ɓɛ̀nɔ̀nɔg, mààgh rì ɓɛ̀yiɓ ɓɛ ɓɛ ka yalà ɓi, rì ɓɛ ɓɛ ka nyɔŋzìghà ɓi man.

³⁰Ɓi cààmɛ̀n kiǹ innɛ ɓum ɓɛ tumɛɛ gɛ rìkpaakpàà ɗi dòn lɛ, dòn yi kpìina ɓìsi ɓi nyòò! Ɓɛ ki kpaakpaa ɓikèekèy lɛ sigtɛɛna ɓìsi.

³¹Ɓisuulɛ, i ɓɛ mɛ kì kite ki cem fɛlɛ, ki kiloŋ ki ɓa min la ɓaà?

³²Ɓɛ kɛnkɛ̀ngà girig rì ɓɛ̀zyaàzyaa ɓɛdɛŋ ɓɛɓɛɛ̀, lɛ ɓɛɛ wey ɓɔ ǹɗaŋ ri Yeesus.

³³Yɛ̀ɛ ɓɛ kpagà ɓi jàŋ inɛ ɓɛɛ̀ regi lɛ kìtɛtɛg ki nto, ɓɛ kpan lɛ rì Yeesus rì ɓɛ̀zyaàzyaa ɓɛ kiɓɛ̀ɛ̀ wɔɔ; ɓɛ ki lɛ roànɛ nyi ɓi weèlem, roàmbog ɓi kìmɛŋ.

³⁴Yeesus à kpaa lɛ: Tààta cenɛn ɓɔ, lɛ ɓɛ yii ɓi com ki ɓɛɛ̀ kìkì. Fɔɔnnɛ ɓɛ pikà ǹtɔ̀ŋ ɓi rìkàɓɓɛ̀n ɗi ɓilàà ɓi Yeesus.

³⁵Ɓum ɓɛ kilɔ̀ŋ ɓɛ ɓaghà wɔɔ, ɓɛ seesèè. Mɛ̀fòm mɛ Ɓɛ̀yudɛ̀n mɔɔ wɔwɔ̀là Yeesus, di mɛɛ̀ kpaakpaa lɛ: Àa nghɛɛ̀ghɛ̀ɓsì ɓum ɓɛdɛŋ, nni a ghɛɓsi min nyimiɗ i à rì Kiris ànɛ Bɛ̀ll à ɓɔ̀ngà.

³⁶Ɓɛ̀sujàà ɓɛ tyɛɛ̀tɛ̀ngày lɛ ɓɛɛ fengi nyi, ɓɛ ki fa nyi ɓìkpaakpam ɓi mɛrɔ̀g,

³⁷di ɓɛɛ̀ kpaakpaa lɛ: I ù yii lɛ ù rì rìfòm ɗi Ɓɛ̀yudɛ̀n, ghɛɓsi wɛ̀ɛmìɗ.

³⁸Ki ɓaghà kì kànɛn Yeesus a nto lɛ: Roànɛ à rì rìfòm ɗi Ɓɛ̀yudɛ̀n.

³⁹Fɔɔnnɛ kìbog ki ɓi ɓɛ̀zyaàzyaa ɓɛ ɓɛ ɓaghà ɓɛ̀ kpanɛn ɓi kɔrɔs ki sɛɛ̀sɛ̀mgàkà nyi di kɛɛ̀ kpaakpaa lɛ: Mɛ̀ɛ nti wɔ̀ yɛ̀ɛ ri Kiris? Nni ghɛɓsi min wɛ̀ɛmìɗ, u ki ghɛɓsi girig ɓìsi.

⁴⁰Fɔɔnnɛ geni àmbog à kpɔmdɛ̀ngà nyi, à kpaa nyi lɛ: Wɔ̀ɔ̀ risii ɓi Bɛ̀ll, wàànɛ ɓɛ faa rìkuu ɗi pɔnɔsì rìfog ɗì nyi?

⁴¹Ɓi ɓɛg, wìs ǹtɔɓ wis wu wooghrɛɛ lɛ saaɗ, ɓisuulɛ, tì teri mɛ̀lèɓ mɛ mɛ ghɛɛ̀sɛɛ rì mɛ̀kìkìì mis, wɔ̀lɛ ŋwaànɛ, àa nkìi ɓi kiɓan ki ɓeɓtɛn.

⁴²Fɔɔnnɛ à kpaaghà Yeesus lɛ: Yeesus ù yitì mɛ̀ yɛ̀ɛ ù biì yùu yi ɓi kìlàmì kɔɔ.

⁴³Nni Yeesus à ɓàkà ŋwaànɛ̀n lɛ: Ǹkalii wɔ̀ ɓi saaɗ lɛ, lɔŋ ɓi gɛɛ̀nɛ, rì mɛ̀ rì wɔ̀ tì ɓiì kpaŋì a pàràɗis.

⁴⁴Ki ɓaghà di ki ti nunùg toroɓ, nni ɓirìm ì kpìghà ɓi zi bimiɗ à kpaŋ mɛ̀kɛ̀ɛ̀ mɛraa à ŋwos nkɛ̀nɛn.

⁴⁵Fɔɔnnɛ ŋwos a ɗimìghà, coo kilàà ki ki ɓaghà ɓi naà-Bɛ̀ll ki lanì ɓi nyìinyìm.

⁴⁶Nni Yeesus à nyàmgà jɛ̀ɛ̀ aɗyòò lɛ: Tààta m̀pɛ̀ɛ̀zii ǹghay wɛ̀m ɓi ɓyàg ɓyɔɔ. Lɔŋ yɛ̀ɛ à kpaaghà fɔlɔɔ, à ghaàgh kì maasii.

⁴⁷Yɛ̀ɛ ǹkɔ̀mɛ̀n-ɓɛ̀sujàà à ghɛngà com ki ki kilɛ̀ngà kiǹ, nni à faghà Bɛ̀ll rìkem, à kpaa lɛ: Ŋwaànɛ àa nɗì lɔŋ saaɗ à mum a tààkaà.

⁴⁸Gɛ mum ànɛ à taŋzɛ̀ngà lɛ a ghɛǹ kìɓan kiǹ, à ɓaghà lɛ, à mɛ ghɛn com kìcèm ki ki kilɛ̀ngà, ɓum ɓɛ sukì di ɓɛɛ̀ kùkwiɗ ɓyàg.

⁴⁹Mɛ̀ghan mɛ Yeesus mɛ̀cèm, rì ɓɛ̀yiɓ ɓɛ ɓɛ kɛɛ̀kɛ̀ɛ̀ghà rì nyi, à tumɛ̀n a Galile, ɓɛ rɛlìghày fìràɓ ɓɛ seesèè com ki ki kiìkìlɛ̀ngà.

⁵⁰Ŋwaàdɛŋ ànɛ ɓi ntaŋzɛn wu rilàmì, wu Ɓɛ̀yudɛ̀n ɗii lɛ Yoosɛɓ, à ɓaghà rì syeesyee à ǹɗem, à ki ɓa ŋwaà saaɗ.

⁵¹Nyii tekà ɓi gàɓ ɓi rìren ɗi ɓɛ̀geni ɓɛ rengà lɛ ɓɛɛ wey Yeesus, nsoò ɓi mɛ̀tɔɓ mɛ ɓɛ kikìghà nyi. Yoosɛɓ ànɛ̀n à ɓaghà ŋwaànɛ ɓi bàn ì Ɓɛ̀yudɛ̀n ìnɛ lɛ Arimate, à ki ɓoŋɓòŋgà kìlɔ̀ŋ ki Bɛ̀ll.

⁵²Fɔɔnnɛ à kɛ̀ngà kì lɔnì kìloŋ ki Yeesus rì Pilat.

⁵³À kɔ̀sìì kɔ ɓi kɔrɔs, à lɔkì kɔ rì aloyà, à nɔ̀ŋzì kɔ ɓi zɔ̀ŋ ìnɛ ì ɓaghà ǹsoɓɛn ɓi rìɓan, ì ki ɓa zɔ̀ŋ ìnɛ ì ɓaghà ɗi ɓɛ ka ɓom̀ ɓi mum miì abɛ̀y.

⁵⁴Ki ɓaghà ŋwosi jumɓa, di Saɓàt à ti lɛ a tumɛ̀n.

⁵⁵Ɓɛ̀yiɓ ɓɔm̀ ɓɛ ɓɛ pɛsɛ̀ngày nɗaŋ ri Yeesus a Galile, ɓɛ kɛngà kì foŋì Yoosɛɓ, ɓɛ ghɛn zɔ̀ŋ, ɓɛ ki ghɛn yɛ̀ɛ ɓɛ nɔŋzìghà kìloŋ ki Yeesus miì ɓi ɗùm.

⁵⁶Fɔɔnnɛ ɓɛ sukà lɛ ɓɛɛ kɛǹ kì ɓùŋɛɛ lɛ rì mɔ̀ɔ rì tìrààre. Nni ɓɛ fɔɔsɛ̀ngà ŋwosi Saɓàt lɔŋ yɛ̀ɛ ɓìdɔ̀gsɛna ɓyɛɛ̀ kpaakpàà.