Read Bafia LUKAS 7 Bible Online

LUKAS 7 - Bafia bible

LUKAS 7

¹Yɛ̀ɛ Yeesus à lègsìghà kì kalii ɓiɓan ɓi à ɓaghà lɛ a kpaa gwìy ì ɓum ɓɛ kilɔ̀ŋ, fɔɔnnɛ à kɛ̀ngà a Kapɛrinawum.

²Muu Ròmɛŋ àdɛŋ ànɛ à ɓaghà ǹkɔ̀mɛ̀n-ɓɛ̀sujàà, à ɓaghà rì ǹkìì-kìsay anɛ à keesìghà lɛɛ̀gwey; nni ǹkìì-kìsay anɛ̀n à roròɓkà, di à ti ɓiì kɔ̀ɔkɔɔ̀sì.

³Yɛ̀ɛ ǹkɔ̀mɛ̀n-ɓɛ̀sujàà ànɛn à wokà rìkem ɗi Yeesus, nni à pɛ̀sìghà ɓɛ̀sɛ̀ɛ̀mɛn ɓɛ Ɓɛ̀yudɛ̀n ɓɛdɛŋ, à rom ɓɔ a lɔŋ̀kii, lɛ ɓɛɛ kpaa nyi lɛ, à yu kì ghɛɓsii ǹkìì-kìsay wiì.

⁴Yɛ̀ɛ ɓumɓɛ̀n ɓɛ kpagà Yeesus a nyoo, nni ɓɛ ɓɔŋzàkà nyi, ɓɛ siìrɛ̀n rìkpaa lɛ: Tààta! Ù ghɛ̀ɛ̀sɛɛ kì kìi ǹkɔ̀mɛ̀n-ɓɛ̀sujàà ànɛ kìɓan ki à tɔɔgh wɔ̀ ki,

⁵ɓisuulɛ, à keesii kìlɔ̀ŋ kis, nnyɛɛ ki togà naa yìs i bɔ̀ŋzɛ̀n.

⁶Nni ɓɛ sugtɛ̀ngà min ɗi Yeesus, yɛ̀ɛ ɓɛ ɓaghà di ɓɛ ti jàŋbog rì mɛɛ nni ǹkɔ̀mɛ̀n-ɓɛ̀sujàà à romgày ɓɛ̀reŋkàŋ ɓii lɛ ɓɛɛ kpaa Yeesus lɛ: Tɛɛnɛ, kɔ̀ɔ teki ǹtɔɓ wìn; lɛ ǹkpaŋi ɓi rikuu ɗi mum ɗi lɛ ù ɗiŋì ɓi naa yɛ̀m.

⁷Fɔɔnnɛ màa ghɛɛ lɛ, ǹkpaŋi ɓi ɓi ǹɗɛli wulɛ mɛ̀ɛmiɗ n-yù wɔ̀ jàŋbog, kìɓan kifog, kali lɔŋ jɛ̀ɛ̀ ì ŋwɔm, di ǹkìì-kìsay wɛm̀ a wɔǹ.

⁸Lɛ mɛ̀ɛmiɗ ǹɗì rì ɓumɓɛ ɓɛ kɔmɛɛ mɛ̀; ǹki ɓa ti ri ɓɛ̀sujàà ɓɛ mɛ̀ ǹkɔ̀mɛɛ; i ǹkpaa adɛŋ lɛ kɛ̀na! à kɛ̀n; ǹki kpaati ambog lɛ a yu, à yù; ǹsoò màa kpaa ǹkìì-kìsay wɛm̀ lɛ, kìya fɛlɛ, à kì fɔlɔɔ.

⁹Yɛ̀ɛ Yeesus à wokà ɓìɓan ɓi ǹkɔ̀mɛ̀n-ɓɛ̀sujàà à kpaaghà ɓiǹ, à kuuràkà nyi; fɔɔnnɛ à nìmɓɛ̀ngà à fa mis rì gwìy ì ɓum à kpaa lɛ: Mìni ɓum, ǹsoò a Isirayɛl, ǹka ghɛngà ɓi mum ànɛ à rì rì coo rìgherɛ̀n yɛ̀ɛ ɗi ŋwaànɛ.

¹⁰Nni ɓumɓɛ ǹkɔ̀mɛ̀n-ɓɛ̀sujàà à romgày, ɓɛ sugtìghà a mɛɛ mii, ɓɛ tanɛ̀n lɛ, ǹkìì-kìsay anɛ à roròɓkà à mɛ wɔ̀n.

¹¹Ɓi duri tana, Yeesus à kɛ̀ngà min ɓi bàn ìdɛŋ ɗii lɛ Nayin. À ɓaghà ǹɗaŋ lɛ, rì ɓɛ̀yilàg ɓii, rì coo kituu ki ɓum.

¹²Yɛ̀ɛ à ɓaghà di à ti jàŋbog rì ìsuunaa wu ɓi rìɗìŋɗàg ɗi bàn ìnɛn, nni ɓɛ kɛnkɛ̀ngà kì ɓomi kìloŋ ki mum; mum àncèm à ɓaghà m̀bobog à man à ǹkpɔɓ wu giɓ wudɛŋ. Ɓumɓɛ ɓi bàn ìnɛn, lɛɛ̀gwey ɓɛ kɛɛ̀kɛ̀ɛ̀zɛ̀ngày ǹɗaŋ rì ǹkpɔɓ wiǹ.

¹³Yɛ̀ɛ Kan à ghɛngà giɓ anɛ̀n, à wog nyi nyìighnyìg, à kpaa nyi lɛ: Kɔ̀ɔ rènɗen.

¹⁴Fɔɔnnɛ à tyoŋdɛ̀ngà, à kòm fìkɔrɔŋ fi kilòn; ɓumɓɛ ɓɛ tɛtɛ̀kà fyɔ ɓɛ rɛlì, Yeesus à kpaa lɛ: Dɛlì ì mum, ǹkpaa wɔ̀ lɛ, pɛ̀sɛn aɗyòò!

¹⁵Nni kìloŋ ki pɛsɛ̀ngà kìkɔ̀ɔ̀kɔ̀ɔ̀, ki tumɛn ɓìtòkì, Yeesus à pɛ̀ɛ̀zì nyi rì jɛɛ.

¹⁶Ɓum ɓɛ̀cèm ɓɛ ɓɛ ɓaghà wɔɔ, ɓɛ ghɛngà kìɓan kiǹ koŋnyòò. Fɔɔnnɛ ɓɛ keèkèmzìghà Bɛ̀ll ɓɛ kpaakpàà lɛ: Coo ǹkpaŋzì-ɓìɓan a ghɛnɛɛ a lɔ̀ŋkis, rì tì lɛ Bɛ̀ll à yùu kì ghɛɓsii kilɔ̀ŋ kii.

¹⁷Fɔɔnnɛ ɓɔlɛ ànɛ̀n à sààghà lɛ rì ɓi zi ì Zyude bimiɗ, rì ɓi ɓìlɔ̀ŋ ɓidɛŋ ɓi ɓi ɓaghà wɔɔ nunùg.

¹⁸Ɓɛ̀yilàg ɓɛ Zyaŋ ɓɛ kɛngà nyi kì kpaà gɛ ɓìɓan anɛ̀n.

¹⁹Fɔɔnnɛ Zyaŋ à reŋìghà ɓɛ̀yilàg ɓii ɓɛɓɛɛ̀, à rom ɓɔ yɛ̀ɛ Kan, lɛ ɓɛɛ tɔg nyi lɛ: Wɔ̀ yɛɛ ri nya roànɛ à ghɛ̀ɛ̀sɛɛ kì yùu gìn, ti ɓoŋ̀ɓoŋ tì roàdɛŋ?

²⁰Yɛ̀ɛ ɓɛ kpagà yɛ̀ɛ Yeesus, ɓɛ kpaa nyi lɛ: Zyaŋ Bàɓtis yɛɛ romiì ɓìsi lɛ, tì tɔg wɔ̀ lɛ: Wɔ̀ yɛɛ ri nya roànɛ à ghɛ̀ɛ̀sɛɛ kì yùu, gìn ti ɓoŋ̀ɓoŋ tì ŋwaàdɛŋ?

²¹Ɓi cààmɛ̀n kɔm̀ kiǹ, Yeesus à wɔ̀ɔ̀zìghà ɓɛ̀roroɓ lɛɛ̀gwey, rì ɓɛ̀lɛnlɛm, rì ɓumɓɛ ɓɛ ɓaghà rì ɓìɓeɓtàg ɓi mɛghay, à ki kì lɛ, ɓɛ̀ɗyaŋɗyàŋ lɛɛ̀gwey ɓɛ ghɛnɛ̀n tì.

²²Fɔɔnnɛ à kpaaghà ɓumɓɛ Zyaŋ à romgày ɓɛǹ a lɔ̀ŋkii lɛ: Kɛ̀ɛna kì kpaà Zyaŋ ɓìɓan ɓi ɓì ghɛɛ, rì ɓi ɓì woogh; ɓyɛɛ ri lɛ: ɓɛ̀ɗyaŋɗyàŋ ɓɛ ghɛɛghɛnɛ̀n tì, ɓɛ̀lɛnlɛm ɓɛ kɛɛ̀kɛ̀ɛ̀ lɛ syeesyee, ɓɛ̀kukwiy ɓɛ teètèètì syeesyee à nyoo, ɓɛ̀lɔlɔg ɓɛ woòwòòghrɛ̀n, ɓìloŋ ɓì gheèghèmɓɛ̀n, Syeesyee à Ɓɔlɛ à kaàkàlɛ̀n a ɓɛ̀soghàsogha.

²³Nni mààgh rì ŋwaànɛ àa kɛ̀ɓtɛn ɓi fiɓàg lɛ mɛ̀.

²⁴Yɛ̀ɛ ɓum ɓɛ fìtom ɓɛ Zyaŋ ɓɛ sugtìghà, nni Yeesus à tumɛ̀ngà ɓum rì kpaa ɗi kiɓan ki Zyaŋ, à tɔg ɓɔ lɛ: Cɛ kɛɛ̀ki ɓì kɛ̀ngà kì ghɛɛ̀ ɓi-reɓ? Kìsyòŋ ki fɛ̀ɛ̀fɛ̀ɛ̀ a nyɛ̀ɛnyɛŋzì gìn?

²⁵Nni cɛ ɓi kɛ̀ngà kì ghɛɛ̀, ɓaà yi ɓi ŋwaànɛ à rì ǹɗɛ̀ŋɗɛn lɛ syeesyee? Kìɓan kifog ɓumɓɛ ɓɛ ri ɓɛ̀rɛ̀ŋɗɛn, lɛ syeesyee ɓɛ ki ghɛghɛɓ ɓi-kum, ɓɛ ti ɓɛ kɔràg ɓi mɛɛ mɛ mɛfòm.

²⁶Nni cɛ ɓì kɛ̀ngà min ki ghɛɛ̀? Ǹkpaŋzì-ɓìɓan? Ɛ̀ɛ̀! Ǹkalii mìni lɛ, ŋwaànɛ ɓi ghɛngà ànɛn à cee gì ǹkpaŋzì-ɓìɓan.

²⁷Ɓisuulɛ Zyaŋ yɛ̀ɛ rì roànɛ ɓɛ kangà ɓi kaàtà à Bɛ̀ll lɛ: Ghɛna ǹɗomi mum wɛm̀ à fìtom wɔ asu lɛ a pegsɛn wɔ̀ bee.

²⁸Ǹkpaa mìni lɛ, ɓi ɓum ɓɛ̀cèm ɓɛ ɓɛ yalɛ̀ngà ɓi ɗùm ɗi giɓ, ŋwaànɛ à cee Zyaŋ à yin; kìɓan kifog siitòn a mum ànɛ ɓi kìlɔ̀ŋ ki Bɛ̀ll à cee nyi.

²⁹Ɓum ɓɛ̀cèm ɓɛ ɓɛ wowòkà ɓìtòkì ɓi Zyaŋ, ǹsoò ɓɛ̀terì-làmpoŋ̀, ɓɛ ghɛngà lɛ Bɛ̀ll à rì lɛ saaɗ; kɛɛ kìghà lɛ, ɓɛɛ kɛǹ, Zyaŋ a ɓaɓti ɓɔ.

³⁰Kìɓan kifog, Ɓɛ̀fàrìzyɛŋ rì ɓɛ̀rèsàg-ɓìdɔ̀gsɛna ɓi Ɓɛ̀yudɛ̀n ɓɛ ɓengà fèg ànɛ Bɛ̀ll à ɓaghà rì nyi ɓisu waa, yɛ̀ɛ ɓɛ ɓengà kì kɛ̀ɛ lɛ Zyaŋ a ɓaɓti ɓɔ.

³¹Nni ǹɗì lɛ ǹfèg ɓà gbàà ì ɓum ì gɛɛ̀nɛ rì cɛ? Ì pisɛɛ ɓà rìkuu ɗi ɓum aɗi?

³²Ì pisɛɛ ɓɔɔɓɔɓti ɓɛ ɓɛ kɔkɔ̀rii ɓi ǹlɛm̀ɓog; ɓɛdɛŋ ɓɛ kakàlì ɓɛ̀geni ɓaa lɛ: Tì mɛ kì lɛ, tì ɓog mìni mɛ̀keŋ, kɛ̀ ɓi ɗyen, tì kɛɛ̀gh mìni kìɓààsì ki riwù, kɛ̀ ɓi ki rèn.

³³Lɛ yɛ̀ɛ Zyaŋ Bàɓtis à yùghà, à ɓaghà kɛ̀ɛ ɗi bìrɛs, kɛ̀ɛ ki nɔ mɛrɔ̀g, mìni lɛ, à rì rì kìɓeɓtàg ki ǹghay.

³⁴Man à mum à yùy, à kìkì lɛ, à ɗiɗì, à nɔnɔ̀, mìni lɛ: À rì ǹɗii com, à ki ɓa ti kinɔɔ̀ mɛ̀rɔ̀g, nyi tì rìghan ɗi ɓɛterì-làmpoŋ̀ rì ɓɛ̀kìì-kìɓe.

³⁵Kìɓan kifog ɗyomzɛ̀n ɗi Bɛ̀ll ɗi mɛ ghɛnɛn lɛ ɗi ri lɛ saaɗ a ɓɔn ɓii.

³⁶Fàrìzyɛŋ adɛŋ yɛɛ reŋìghà Yeesus lɛ a kɛǹ kìɗiì a mɛɛ mii, fɔɔnnɛ Yeesus à ɗiŋìghà ɓi naa ì ŋwaànɛ̀n à kɔ̀rì ɓi ɓìɗilàg.

³⁷Nni ǹkìì-kìɓe a giɓ ànɛ à ɓaghà ɓi bàn ìnɛn à wokày lɛ, Yeesus à rì ɓi ɓyom ɓi ɗiyɛn a mɛɛ mɛ Fàrìzyɛŋ ànɛ̀n; fɔɔnnɛ à yughày rì ɓeŋ à tìrààre ǹɗonɛn lɛ pisa,

³⁸à rɛlì Yeesus ajɛ̀m fɛlɛ̀ a mɛ̀kòò mii, à rènɗèn lèg ànɛ lɛ misì mii mɛ ɓwaŋzìghà mɛ̀kòò mɛ Yeesus. Fɔɔnnɛ à tɔ̀sìghà mɔ rì tyòŋ tii, à lɛ̀ŋlɛ̀ŋ mɔ à ki sisiŋi mɔ tìrààre.

³⁹Yɛ̀ɛ Fàrìzyɛŋ ànɛ à reŋìghà Yeesus à ghɛngà fɔlɔɔ, à fèg ɓi ǹɗem wii lɛ: I Yeesus àa rì ǹkpaŋzì-ɓìɓan, di à rì lɛ, a yi lɛ, giɓ anɛ a kòmkom nyi ànɛ̀n, à rì kìɓeɓtàg ki giɓ.

⁴⁰Nni Yeesus à kpaaghà ŋwaànɛ̀n lɛ: Simɔn, ǹɗì rì kìɓan ki lɛ ǹkpaa wɔ̀, roànɛn à pɛ̀ɛ̀zì nyi lɛ: Nɗèsàg tòòghrɛn!

⁴¹Ŋwaàdɛŋ yɛ̀ɛ tɔtɔ̀kà ɓum ɓɛɓɛɛ̀ ɓɛ̀pon, roànɛ, ɓɛ̀hɔnɗɛ̀ɗ ɓɛtaǹ, roàmbog, dolà ǹtɛ̀ɗ.

⁴²Nni yɛ̀ɛ ɓɛ ɓaghà ɓi ri bee i ǹlèɓɛn nyi ɓɛ̀pon ɓɛǹ, nni à cenɛ̀ngà ɓɔ mɔ̀ɔ̀ni mɛ̀n ɓɛ̀sɛ̀ɛ̀ ɓɛ̀cèm. Nni ɓi ɓumɓɛ kiɓɛ̀ɛ̀ ɓɛǹ, roàbe yɛɛ ri lɛ à keesì ɓà ŋwaànɛ̀n à cee roàmbog?

⁴³Simɔn à ɓàg Yeesus lɛ: Mɛ̀ ǹghɛɛ lɛ, roànɛ ɓɛ cenɛ̀ngà ɓyoo mɔ̀ɔ̀ni. Yeesus à kpaa nyi lɛ: Ù kpaa saaɗ.

⁴⁴Fɔɔnnɛ Yeesus à lɔɔ̀ghrɛ̀ngà yɛ̀ɛ giɓ anɛ̀n, à ki kpaa ti Simɔn lɛ: Ù ghɛɛ giɓ anɛ? Màa yùu a lɔ̀ŋkɔɔ, kɔɔ̀ fa mɛ mɛ̀nig mɛ lɛ nsoò mɛ̀kòò miì; wɔ̀lɛ nyii soo mɛ̀ mɛ̀kòò rì misì mii, à ki tɔ̀si mɔ rì tyòŋ tii.

⁴⁵Yɛ̀ɛ maà kpaŋi a lɔ̀ŋkɔɔ, wàa lɔ̀ri ɓi mɛ, kìɓan kifog, giɓ anɛ à fɔli ɓi loo mɛ̀ rìlɔ̀ɛ̀ɗ ɗi mɛkòò.

⁴⁶Wɔ̀ wàa siŋii ɓi mɛ mɔ̀ɔ ɓi ǹto, wɔ̀lɛ nyii siŋii mɛ̀ tìrààre ɓi mɛ̀kòò.

⁴⁷Giɓ anɛ à rèsii coo geesɛ̀n lɛɛ̀gwey ɓisuulɛ, gɛ ɓìɓe wiì à tì ǹcenɛn; kìɓan kìfog ŋwaànɛ ɓɛ cenɛɛ lɛsàg, à ti a rèsàg girig geesɛ̀n lɛsàg.

⁴⁸Fɔɔnnɛ Yeesus à kpaaghà min giɓ anɛ̀n lɛ: Ɓìɓe ɓyɔɔ ɓi ti ɓìcenɛn.

⁴⁹Nni ɓumɓɛ ɓɛ ɗiɗìghà ǹɗaŋ ri nyi ɓɛ tumɛ̀ngà rìfèg ɓi mɛ̀rem maa lɛ: Rìkuu ɗi mum aɗi ɗyɛɛ ri lɛ, ɗi ɗyɛɛ̀ ceecenɛ̀n ɓum lɛ rì ɓìɓe miì?

⁵⁰Wɔ̀lɛ Yeesus à kpaaghà giɓ anɛ̀n lɛ: Rìgherɛ̀n ɗyɔɔ ɗi ghɛɓsii wɔ̀, kɛ̀na lɛ fyòoog.