Read Bafia LUKAS 9 Bible Online

LUKAS 9 - Bafia bible

LUKAS 9

¹Nni Yeesus à taŋzɛ̀ngà ɓɛ̀yilàg ɓii ǹtɛ̀ɗ rì ɓɛɓɛɛ̀, à fa ɓɔ itèɗ wu nàɓɛn ɓiɓeɓtàg ɓi mɛghay mɛ̀kuu mɛ̀cèm, rì wulɛ ɓɛɛ wɔɔ̀wɔ̀ɔ̀zì ɓɛ̀roroɓ.

²Fɔɔnnɛ à romgà ɓɔ lɛ, ɓɛɛ kɛǹ ki làalam̀ɓɛ̀n Syeesyee à Ɓɔlɛ à kìlɔ̀ŋ ki Bɛ̀ll ɓɛ ki wɔ̀ɔwɔɔ̀zì ɓɛ̀roroɓ.

³Nni à kpaaghà ɓɔ lɛ: Kɛ̀ ɓi ɓanɛn com yɛ̀ɛ ɓi kɛ̀nkɛ̀n, kɛ̀ ɓi teɗ nsoò kìgeŋ, nsoò ɓàm, nsoò com kiɗiyɛn, nsoò mɔ̀ɔ̀ni, nsoò ɓìlàà ɓiɓɛɛ̀.

⁴Naa bimiɗ ìnɛ ɓɛ ghaɓi mìni wɔɔ, kɔ̀riina ɓi naa ìnɛ̀n, à kpaŋ yɛ̀ɛ ɓi rì wɔɔ ɓiì pɛ̀sɛɛ lɛ ɓi ghaàgh.

⁵Jàŋ bimiɗ ìnɛ ɓɛ beni mìni kì ghàɓi, kùrina kùrùɓu ànɛ mìni ɓi mɛ̀kòò di ɓì ti ɓiì pɛ̀sɛɛ ɓi bàn ìncèm, rìkì ɗiǹ ɗyɛ resi zɛ̀ɗ yaà.

⁶Fɔɔnnɛ ɓɛ̀yilàg ɓɛǹ ɓɛ kɛngà, ɓɛ rereni ɓìlɔ̀ŋ di ɓɛɛ̀ kakali ɓum Syeesyee à Ɓɔlɛ, ɓɛ wɔɔ̀wɔ̀ɔ̀zì ɓum jàŋbimiɗ.

⁷Yɛ̀ɛ Eroodɛ à wokà gɛ ɓìɓan bimiɗ ànɛ Yeesus à kìkìghà ànɛn, ɗyomzɛ̀n ɗi ɗim nyi, ɓisuulɛ ɓum ɓɛdɛŋ ɓɛ kpaakpààghà lɛ: Zyaŋ ànɛ̀n yɛɛ ghem̀ɓɛɛ yì a nyɔ̀ɛ̀y.

⁸Ɓum ɓɛmbog lɛ Eli ànɛn yɛ̀ɛ resɛɛ tì; ɓɛdɛŋ tì lɛ, kìbog ki ɓi ɓɛ̀kpaŋzì-ɓìɓan ɓɛ abɛ̀y kɛɛ ghemɓɛɛ yì a nyɔ̀ɛ̀y.

⁹Fɔɔnnɛ Eroodɛ à tɔɔ̀ghtɔ̀ɔ̀ghrɛ̀ngà rì ǹɗem lɛ: Mɛ̀ɛmiɗ yɛɛ kpaaghà lɛ, ɓɛɛ ren ǹto wu Zyaŋ; nni roànɛ rìkem ɗyɛɛ̀ pàpas mɛ ànɛ, nyi ri ɓà ghɛn? Fɔɔnnɛ à kaakààghà bee inɛ lɛ a ghɛǹ Yeesus.

¹⁰Nni ɓɛ̀yilàg ɓɛ Yeesus à romgà ɓɛ sugtìghày, ɓɛ kpaa nyi ɓìɓan ɓìcèm ɓi ɓɛ kighày, fɔɔnnɛ à syògà ɓɔ lɛ ɓɛɛ kɛǹ kìpàs ɓi bàn ìdɛŋ ɗii lɛ Bɛdsayida.

¹¹Yɛ̀ɛ ɓìtuu ɓi ɓum ɓi wokà jàŋ inɛ à ɓaghà, nni ɓi nɔɔtàkà nyi wɔɔ, Yeesus à ghàɓ ɓɔ lɛ syeesyee, à kpaakpaa ɓɔ ɓɔlɛ̀ à kìlɔ̀ŋ ki Bɛ̀ll, à ki wɔ̀ɔwɔɔ̀zì ɓumɓɛ ɓɛ ɓaghà rì rìkɛŋ ɓi nyòò.

¹²Di ŋwos a ti ɓiì kɛ̀nkɛni, nni ɓɛ̀yilàg ɓii ǹtɛ̀ɗ rì ɓɛɓɛɛ̀ ɓɛ tyɛɛ̀tɛ̀ngày, ɓɛ kpaa nyi lɛ: Kali gwìy ì ɓum ìnɛ lɛ, yɛ̀ɛ kɛǹ ɓi ɓìlɔ̀ŋ rì ɓi jɛ̀m yi ɓilɔ̀ŋ ɓi ɓi ri fɛ jàŋbog, ɓɛɛ kaà fìlo, rì com ki ɓɛ rì lɛ ɓɛ ɗi, ɓisuulɛ jàŋ inɛ tì rì ìnɛ ì rì kɛ̀ɛ̀ com.

¹³Yeesus à ɓàg ɓɔ lɛ: Mìniìɓɔmiɗ, faana ɓɔ ɓìɗilàg; wɔ̀lɛ ɓɛ̀roɓɛǹ ɓɛ kpaa nyi lɛ: Tì rì lɔŋ fɛ lɛ bìrɛs yitaǹ, rì ɓìzɛn ɓìɓɛɛ̀; tì rì lɛ tì lam ɓumɓɛ ɓɛ̀cèm di tì ɓa tii yì nya kìlaàgh ɓiɗilàg ɓidɛŋ ɓisu wàà.

¹⁴Ɓumɓɛ̀n ɓɛ ɓaghà nunùg ɓum ɓɛ̀tɔɔsìm ɓɛtaǹ. Yeesus à kpaaghà ɓɛ̀yilàg ɓii lɛ: Kɔ̀ɔ̀siina ɓɔ ɓì gwìy ɓi gwìy; gwìy bog ɓum mɛ̀tin mɛɓɛɛ̀ rì ǹtɛ̀ɗ.

¹⁵Nni ɓɛ̀yilàg ɓɛ kìghà lɔŋ yɛ̀ɛ Yeesus à kpaaghà, ɓɛ kɔɔ̀sì ɓumɓɛ̀n ɓɛ̀cèm ɓi zi.

¹⁶Fɔɔnnɛ Yeesus à tekà bìrɛs yi kitaǹ yiǹ, rì ɓìzɛn ɓi kiɓɛ̀ɛ̀, à ɓegsì mis aɗyòò, à fa Bɛ̀ll ɓìtògsɛ̀n, à ɓɛkì bìrɛs, à syòngì ɓìzɛn, à fa min ɓyom ɓìn ɓìcèm rì ɓɛ̀yilàg ɓii, lɛ ɓɛɛ kaɓsi gwìy ì ɓum ìnɛ̀n.

¹⁷Ɓum ɓɛ̀cèm ɓɛ ɗìghà, ɓɛ wuràg ɓɛ ki taŋzɛn ɓìɓɛghà ɓi ɓi rɔ̀ɓtàkà ɓi ron ɓìkàɗ ǹtɛ̀ɗ rì ɓiɓɛɛ̀.

¹⁸Ŋwos adɛŋ, di Yeesus a kìki bɔ̀ŋzɛ̀n kìpàs nɗaŋ ri ɓɛ̀yilàg ɓii nni à tɔkà ɓɔ lɛ: Gɛ ɓìtuu ɓi ɓum ànɛ a fèki ɓaà lɛ mɛ̀ ǹɗì ghɛn?

¹⁹Fɔɔnnɛ ɓɛ̀yilàg ɓɛ ɓakà nyi lɛ: Ɓum ɓɛdɛŋ ɓɛɛ kpaaghi lɛ, ù rì Zyaŋ Bàɓtis, ɓɛmbog lɛ, wɔ̀ yɛɛ ri Eli, ɓɛmbog tì lɛ, ù rì kìbog ki ɓi ɓɛ̀kpaŋzì-ɓiɓan ɓɛ abɛ̀y, ki ki ghemɓɛɛ yì a nyɔ̀ɛ̀y.

²⁰Nni à tɔgtìghà ɓɔ lɛ: Mìniìɓɔmiɗ ɓi kpaaghi lɛ mɛ̀ ǹɗì ghɛn? Fɔɔnnɛ Pyɛɛri à ɓàkà nyi lɛ: Ù rì Kiris ànɛ Bɛ̀ll à romiì.

²¹Yeesus à siitɛ̀n ɓɔ, à sììràg ɓɔ kì kpaà lɛ, ɓɛ̀ kɛɛ̀ kpaa ɓum lɛ nyii ri Kiris.

²²Nni à ɓɔ̀ɓtìghà jɛ̀ɛ̀ lɛ: Ki ghɛɛ̀sɛɛ lɛ Man à mum a wog rìkɛŋ lɛɛ̀gwey; ɓɛ̀sɛ̀ɛ̀mɛn ɓɛ Ɓɛ̀yudɛ̀n rì ɓɛ̀pìrɛɛtìrɛ̀ ɓɛgwey, rì ɓɛ̀rèsàg-ɓìdɔ̀gsɛna ɓɛ rì nyi ɓiì roòzɛɛ, ɓɛ ki wey nyi; kìɓan kifog à ghèmɓɛ̀n ɓi ŋwos a kìraa.

²³Ajɛ̀m ìnɛn Yeesus à kpaaghà ɓum ɓɛ̀cèm lɛ: Ŋwaànɛ ki kɔni lɛ a nɔɔ̀ti mɛ̀, à ghɛ̀ɛ̀sɛɛ kì roòzɛɛ nyimiɗ, à ki tɛ̀g kɔrɔs wìì ŋwos anɛ aɗyòò bimiɗ, fɔɔnnɛ à nɔ̀ɔ̀tì min mɛ,

²⁴ɓisuulɛ, mum ǹcèm ànɛ à rì ɓiì kɔ̀ni lɛ a kamɛn rì cɛɓ kii à rì kɔ ɓiì ɗimzii, ŋwaànɛ à ɓiì ɗimzii cɛɓ kii lɛ mɛ̀, nnyɛ̀ɛ ri kɔ ɓiì ghɛɓsii.

²⁵Ki ghɛɓsii mum cɛ lɛ a fɔ̀n ziinɛ bimiɗ di à ɗimzii cɛɓ kìì?

²⁶Ɓisuulɛ ŋwaànɛ à rì mɛ̀ ɓiì woògh ǹtoòrìɗ, nsoò lɛ à wog ɓìɓan ɓyɛm̀ ǹtoòrìɗ, Man à mum à woogh gɛ nyi girig ǹtoòrìɗ yɛ̀ɛ à yùugɛy ɓi rìkem ɗii, rì ɗì Seŋì, rì ɗi ɓumɓɛ titom ɓɛ ɓɛ ri ɓɛ̀tɛnɛn.

²⁷Ǹkalii mìni saaɗ à rìkpàà lɛ, kìgwey ki ɓi ɓumɓɛ ɓɛ rɛrɛlii ɓɛ, kaa cuu ɓi di ki ka ghɛn ɓi kilɔ̀ŋ ki Bɛ̀ll.

²⁸Yɛ̀ɛ Yeesus à kpaaghà ɓìɓan ɓiǹ, mɛ̀ru mɛ ghaghìghà fɛlɛ yɛ̀ɛ taàraa; fɔɔnnɛ à tekà lɛ, rì Pyɛɛri, rì Zyaŋ rì Zyag ɓɛ ɓɔg ɓi dòn aɗyòò lɛ ɓɛɛ ɓɔŋzi Bɛ̀ll.

²⁹Yɛ̀ɛ Yeesus à kìkìghà bɔ̀ŋzɛ̀n, ìsu wii wu koɓsɛ̀n, ɓìlàà ɓii ɓi sug ɓì puɓ lɛ syaŋ̀syaŋ̀.

³⁰Fɔɔnnɛ ɓɛ sigmɛ̀ngà di à ti ɓiì tòtoogh ri ɓum ɓɛdɛŋ ɓɛɓɛɛ̀; ɓɛ ɓɛ ɓaghà lɛ rì Moyis rì Eli.

³¹Ɓɔ yɛɛ resɛ̀ngày rì coo rigwey, ɓɛ kpaakpàà kìɓan ki risug ɗi Yeesus ɗi ɗi ghɛɛ̀sɛ̀ngà kì kìlɛɛ a Yorisalɛm.

³²Fɔɔnnɛ Pyɛɛri rì ɓɛ̀reŋkàŋ ɓii ɓɛ cuughà tìlo; yɛ̀ɛ ɓɛ ghemɓɛ̀ngà, ɓɛ ghɛn rìgwey ɗì Yeesus, rì ɓum ɓɛ kiɓɛ̀ɛ̀ ɓɛ à ɓaghà rì ɓɔ ɓɛ̀n.

³³Yɛ̀ɛ ɓumɓɛ̀n ɓɛ ɓaghà di ɓɛ ti lɛ ɓɛɛ ghasɛn rì Yeesus, nni Pyɛɛri à kpaaghà nyi lɛ: Ǹɗèsàg! ki rì kìrɔɔ di tì rɔ̀ɓi fɛ, tì toŋ ɓìlaa ɓiraa, kìfog ɓisuu wɔɔ, kìfog ɓisuu Moyis, kìfog ɓisuu Eli. À yighà gì ɓì com ki à kpaakpààghà.

³⁴Yɛ̀ɛ à kpaaghà fɔlɔɔ, nni kìkwìɗ ki yughà, ki riɓì ɓɔ, ìris wu ɓan ɓɛyilàg di ki ti ɓɔ ɓiì rìɓii.

³⁵Fɔɔnnɛ jɛ̀ɛ̀ ì ɓaghày ɓi kìkwìɗ lɛ: Roànɛ, à rì Man wɛm̀ ànɛ ǹɗɔ̀tɛ̀ngà, wooghna nyì.

³⁶Yɛ̀ɛ jɛ̀ɛ̀ ì tòòghrɛ̀ngà, ɓɛ sigmɛ̀n lɛ Yeesus à mɛ rɔ̀ɓ cɛ̀ncii. Ɓɛ̀yilàg ɓɛ nyamgà kìɓan ki ɓɛ ghɛngà kiǹ ɓi mɛ̀ru mɛ̀n, ɓɛ̀ kɛɛ̀ ɓùŋ mum kɔ.

³⁷Ɓi duri tana, yɛ̀ɛ Yeesus rì ɓɛ̀yilàg ɓii ɓɛ sɛngày dòn, coo gwìy ì ɓum ì yughà kì ɓoŋì Yeesus.

³⁸Nni ɓi nyìinyìm à gwìy ì ɓum ìnɛ̀n, ŋwaàdɛŋ à syangà jɛ̀ɛ̀ aɗyòò lɛ: Ǹɗèsàg! kùrùg m̀ɓɔ̀ŋzaagh wɔ̀, pɛɓsɛn ɓà mɛ ŋwɔɓti wɛ̀m ànɛ, ɓisuulɛ nnyɛɛ ri lɔŋ maa m̀bobog wɛ̀m à man.

³⁹Kìɓeɓtàg ki nghay kidɛŋ ki ti lɛ, i ki sɛni ɓi nyi, à tumɛ̀n rìsyan a kɔ̀ɔ̀ à kìkì lɛ zaɗ zaɗ, di a fuufuùsì tìtyɛɛ; ki ti ki ɓalàg kìtètèɗ ki kiɓan lɛ kìɓeɓtàg ki ǹghay kìn kɛɛ caɗ nyi, ki mɛ fɔɔsi nyi lɛ kɔɔ̀kɔɔ̀.

⁴⁰Mɛ̀ɛ m̀ɓɔ̀ŋzaagh ɓɛ̀yilàg ɓɔɔ lɛ ɓɛɛ naɓ kìɓeɓtàg ki ǹghay kìn, nni ki n-yaagh ɓɔ rìnàɓ.

⁴¹Yeesus à ɓàg lɛ: Mìni ɓumɓɛ ɓì rì kɛ̀ɛ̀ rìgherɛ̀n, ɓì ki ɓa ɓiɓeɓtàg ɓi ɓum ɓɛ! Ǹɗì ɓiì kɔ̀rii ti rì mìni ǹki nìniɗ ǹɗem rì ɓìɓan ɓin à kpaŋ fin? Yuiy fɛ rì man wɔɔ̀.

⁴²Yɛ̀ɛ mutyàànɛn à tyɛ̀ɛ̀tɛ̀ngà yɛ̀ɛ Yeesus, kìɓeɓtàg ki ǹghay ki sɛn ɓi nyi, ki roŋ ɓi zi, à tumɛ̀n rì kìkì lɛ zaɗ zaɗ; fɔɔnnɛ Yeesus à fwààdɛ̀ngà kìɓeɓtàg ki ǹghay, à wɔ̀ɔ̀zì ŋwɔɓti, à pɛ̀ɛ̀zì nyi rì seŋì.

⁴³Fɔɔnnɛ ɓum ɓɛ̀cèm ɓɛ ɓɛ ɓaghà wɔɔ ɓɛ kuuràkà rìgwey ɗi itèɗ wu Bɛ̀ll. Yɛ̀ɛ ɓum ɓɛ ɓaghà di ɓɛɛ̀ ka kuukuùghràg ɓɛ̀koŋnyoo ɓɛ ɓiɓan ɓɛ Yeesus à kìkìghà ɓɛǹ, nni à kpaaghà ɓɛ̀yilàg ɓii lɛ:

⁴⁴Ramina mɛ̀reè, ɓi wog kìɓan ki ǹ-yùu mìni kì kpaà ki. Ɓɛ ri ɓiì kàɓi Man à mum ɓi ɓyàg ɓi ɓum.

⁴⁵Kìɓan kifog, ɓɛ̀yilàg ɓii ɓɛ wokà ɓi azi anɛ ɓi rìkpaa ɗìn; ɗi rɔɓkà ɓɔ kìrìirìɓ lɛ ɓɛ̀ kɛɛ̀ yi azi anɛ miì, ɓɔɔ ki rirìsìghà nyi rìtɔg ɗi azi anɛ ɓi kìɓan kiǹ.

⁴⁶Fɔɔnnɛ ɓɛ tumɛ̀ngà rìnyoònyòlɛ̀n lɛ ɓɛɛ yi ghɛn anɛ ɓi ɓɔ yɛɛ cee ɓɛ̀ro ɓɛmɓòg.

⁴⁷Yɛ̀ɛ Yeesus à yìghà com ki ɓɛ fefèkà ɓi mɛ̀rem maa, nni à tekà maa ŋwɔɓti, à rɛsì nyi ŋwɔŋì rì nyi,

⁴⁸à kpaa ɓɔ lɛ: Ŋwaànɛ à ghàɓi maa ŋwɔɓti ànɛ ɓi ɗii ɗyɛ̀m, di mɛ̀ɛmiɗ innɛ à ghàɓi; fɔɔnnɛ mum ǹcèm ànɛ à ghàɓi mɛ̀ à ghàɓi girig roànɛ à romgày mɛ̀ ɓisuulɛ roànɛ à ɓiì ɓiisɛɛ ki ghɛnɛɛ lɛsàaag ɓi nyìinyìm wìn, nnyɛɛ cee mìniìcèm.

⁴⁹Nni Zyaŋ à tòòghrɛ̀ngà, à kpaa lɛ: Ǹɗesàg! tyàa ghɛɛ ŋwaàdɛŋ, di a nànaɓ ɓiɓeɓtàg ɓi mɛghay ɓi ɗii ɗyɔɔ, nni tyàa rèegh nyi, ɓisuulɛ à yingag ɓi nɗaŋ wis.

⁵⁰Fɔɔnnɛ Yeesus à ɓàkà Zyaŋ lɛ: Kɛ̀ ɓi règ nyi, ɓisuulɛ, ŋwaànɛ à yin ɓiì ɗùùɗuu ri mìni, à rì ɓi gàm yìn.

⁵¹Yɛ̀ɛ mɛ̀ru mɛ lɛ Yeesus a pɛsɛn ɓi ziinɛ mɛ ɓaghà dì mɛ ti jàŋbog, à rengà rì ǹɗem wii wucem lɛ, à kɛ̀ɛ a Yorisalɛm.

⁵²Fɔɔnnɛ à lokà kì romì ɓum beèbɛ̀y. Ɓumɓɛ̀n ɓɛ roŋì bee, ɓɛ kpaŋ ɓi maa kìlɔ̀ŋ àdɛŋ ànɛ a Samari lɛ ɓɛɛ pegsɛn ɓìɓan ɓi ɓi rìyù ɗii,

⁵³kìɓan kifog ɓɛ ghaɓkà ɓi nyi wɔɔ ɓisuulɛ à ɓaghà ɓiì kɛ̀nkɛ̀ni a Yorisalɛm.

⁵⁴Yɛ̀ɛ Zyaŋ rì Zyag ɓɛ ghɛngà fɔlɔɔ, ɓɛ tɔg nyi lɛ: Kan! tì yin lɛ tì tɔg lɛ ɗuu ɗyɛɛ sɛn yì aɗyoo ɗyɛɛ ɗigsi ɓumɓɛ?

⁵⁵Nni à lɔ̀ɔ̀ghrɛ̀ngày à nyɛɛdɛ̀n ɓɔ, à kpaa lɛ: Ɓì yii ɓi nya rìkuu ɗi ǹghay ɗi ɗi ri ɓi mìni.

⁵⁶Ɓisuulɛ, Man à mum à yùghà ɓi lɛ a ɗimzi ɓyɛɓ ɓi ɓum, à yùghà lɔŋ ɓyɔ kì ghɛɓsii. Fɔɔnnɛ ɓɛ kɛngà ɓi maa kìlɔ̀ŋ àdɛŋ.

⁵⁷Yɛ̀ɛ ɓɛ ɓaghà ɓi bee, ŋwaàdɛŋ à kpaaghà Yeesus lɛ: Ǹɗì wɔ̀ ɓiì nɔ̀ɔ̀tii jàŋbimiɗ ìnɛ ù kɛ̀ɛ.

⁵⁸Nni Yeesus à ɓàkà nyi lɛ: Ɓìbina ɓi ri rì mɛ̀kuɓi, tììlì ti aɗyòò rì ɓìlaa, kìɓan kifog, Man à mum à rì kɛ̀ɛ̀ jàŋ inɛ a fɔɔ̀sag wɔɔ.

⁵⁹Fɔɔnnɛ Yeesus à kpaaghà ŋwaàmbog lɛ: Nɔ̀ɔ̀ti mɛ̀. Roànɛ̀n à ɓàg nyi lɛ: Ka cenɛn mɛ̀, nka ɓas̀ kì ɓòmi seŋi wɛ̀m.

⁶⁰Yeesus à ɓàg nyi lɛ: Càra ɓìloŋ ɓyɛɛ ɓom̀ ɓìloŋ ɓyaa, kìɓan kifog wɔ̀ɔ̀ kɛ̀na kì kakalii ɓum ɓɔlɛ à kìlɔ̀ŋ ki Bɛ̀ll.

⁶¹Nni ŋwaàdɛŋ à kpaatìghà nyi lɛ: Kan, ǹɗì wɔ̀ ɓiì nɔ̀ɔ̀tii, nni ka càra mɛ̀, ǹghesɛn yì naa yɛ̀m ì ɓum.

⁶²Yeesus à ɓàg nyi lɛ: Ŋwaànɛ à rì lɛ, i à ɓeegh kìɓan, à tumɛn kɔ, wɔ̀lɛ kɛ̀ɛ kì kɔ lɛ, a fèfeg ɓiɓan ɓidɛŋ ɓi nyi ajɛ̀m, à ghɛ̀ɛ̀sɛɛ ɓi ri kìlɔ̀ŋ ki Bɛ̀ll.