Read Bafia ZYAŊ 10 Bible Online

ZYAŊ 10 - Bafia bible

ZYAŊ 10

¹Ǹkpaa mìni kɔɔ̀kɔɔ̀ à rìkpaa lɛ ŋwaànɛ à fyee ɓi asuunaa lɛ a ɗiŋi ɓi kìlaa ki jɔ̀ɔ̀, kìɓan kifog à ɓɔg gari ɓi jàŋ idɛŋ à ɗinì ɓi kìlaa, à rì lɛ nyi wiiwìì, nyi tì zyaàzyaa.

²Lɔŋ roànɛ à ɗiŋii asuunaa yɛɛ ri syeesyee à m̀ɓèŋì-jɔ̀ɔ̀ yiǹ.

³M̀ɓèŋì-ìsuunaa à nɛm ŋwaànɛ̀n ìsuunaa lɛ a ɗiŋi, jɔ̀ɔ̀ yii yi wog jɛ̀ɛ̀ yìì; à ki regi jɔ̀ɔ̀ yii lɔŋ ɓi mii, à kɛ̀n ɗì yɔ ɓidan.

⁴I à mɛ kpaŋzi jɔ̀ɔ̀ yii yicèm, à syòŋ yɔ bee, yɔɔ nɔɔ̀nɔ̀ɔ̀tì nyi lɛ, yi yii jɛ̀ɛ̀ yìì.

⁵Yi yin lɛ yi nɔɔ̀tì ǹkèn a mum, kìɓan kifog yi ri ɓiì ghɛŋii nkèn a mum fìràɓ lɛ yi remzii ɓi jɛ̀ɛ̀ yi ɓɛ̀kèn.

⁶Yeesus à tekà ɓɔ dàɗkì ìnɛn, kìɓan kifog ɓɛ̀ kɛɛ̀ wog kiɓan ki a kpaaghà ɓɔ.

⁷Nni Yeesus à kpaatìghà ɓɔ lɛ: Ǹkpaa mìni kɔɔ̀kɔɔ̀ à rìkpaa lɛ mɛ̀ yɛɛ ri ìsuunaa wu gari ì jɔ̀ɔ̀.

⁸Ɓum ɓɛ̀cèm ɓɛ ɓɛ lokày kì yùu ri mɛ̀, ɓɛ ri, ɓɛ̀wiiwìì, rì ɓɛ̀zyaàzyaa. Wɔ̀lɛ jɔ̀ɔ̀ yi wokà ɓi rikpaa ɗyàà.

⁹Mɛ̀ yɛɛ ri ìsuunaa, ŋwaànɛ à fyee a lɔ̀ŋkɛm̀ à ɗiŋì à ɓiì ghɛɛ̀ cɛɓ. À ɓiì kìi lɛ à ɗiŋì, à kpaŋ à ki tanɛn ɓiɗilàg.

¹⁰Wiiwìì à ti à yùlàg lɔŋ lɛ, a yiì, à wey, à ki cuusi. Ɓi mɛ̀, mɛ̀ ǹ-yùghà lɛ, jɔ̀ɔ̀ yɛɛ ɓa rì cɛɓ, yi ki ɓa ri kɔ lɛɛ̀gwey.

¹¹Mɛ̀ yɛɛ ri syeesyee à m̀ɓèŋì-jɔ̀ɔ̀. Syeesyee à m̀ɓèŋì-jɔ̀ɔ̀ a falag cɛɓ kii ɓisuu jɔ̀ɔ̀ yii.

¹²Wɔ̀lɛ ŋwaànɛ a ɓèŋɓeŋ jɔ̀ɔ̀ lɛ ɓɛɛ leɓ nyi, kɛ̀ɛ ki ɓa mɓèŋì-jɔ̀ɔ̀, jɔ̀ɔ̀ yɛ̀ kɛɛ̀ ki ɓa lɛ yiŋkii, à ti à kìlàg lɛ, i à ghɛɛ ǹgɔn, à rinì jɔ̀ɔ̀, à làn. Ǹgɔn à yù kì ɓangii jɔ̀ɔ̀, à san yɔ.

¹³Ŋwaànɛ̀n à ti à làngì fɔlɔɔ ɓisuulɛ, a kìki kisay ɓisuu mɔ̀ɔ̀ni, ǹɗem wii wɛ̀ kɛɛ̀ kɛsi ri jɔ̀ɔ̀.

¹⁴Mɛ̀ yɛɛ ri syeesyee à m̀ɓèŋì-jɔ̀ɔ̀. Ǹ-yii jɔ̀ɔ̀ yɛm̀, jɔ̀ɔ̀ yɛm̀ yi ki yii mɛ̀,

¹⁵lɔŋ yɛ̀ɛ Tààta à yii mɛ̀, mɛ̀ ǹki yi Tààta; mɛ̀ ǹki faa cɛɓ kɛ̀m ɓisuu jɔ̀ɔ̀ yɛm̀.

¹⁶Ǹɗì tì rì jɔ̀ɔ̀ yidɛŋ yi yi ka yin ɓi kìlaa ki. Ki ghɛɛ̀sɛɛ lɛ nteɗ yì girig yɔ; yi ri ɓiì woògh jɛ̀ɛ̀ yɛ̀m, fɔɔnnɛ kìtuu ki jɔ̀ɔ̀ ki ɓiì ɓaà kìfog, m̀ɓèŋì à ɓa bog.

¹⁷Tààta à keesii mɛ̀ ɓisuulɛ, ǹfaa cɛɓ kɛ̀m lɛ di nki teeti kɔ.

¹⁸Mum à ɓàtɛɛ ɓi mɛ cɛɓ, lɔŋ mɛ̀ɛmiɗ yɛɛ faa kɔ̀. Ǹɗì rì ìtèɗ wulɛ nfa kɔ, ǹki ɓa ti ri ìtèɗ wulɛ ǹteetì kɔ̀; kìɓan ki Seŋi wɛ̀m à reɓsìghà mɛ̀ lɛ nki kɛɛ̀ kìn.

¹⁹Fɔɔnnɛ Ɓɛ̀yudɛ̀n ɓɛ ghasɛ̀ngà tì gàɓ yiɓɛɛ̀ ɓisuu ɓitòkì ɓiǹ.

²⁰Kìgwey ki ɓi ɓɔ ki kpaakpààghà lɛ: Yeesus à rì rì kìɓeɓtàg ki nghay, à ki ɓa ti ndùŋɛn, ɓisuucɛ nnɛ ɓi wowog ɓiɓan ɓii?

²¹Ɓɛ̀ro ɓɛmbog ɓɛ kpaakpàà lɛ: Ɓìtòkì ɓi ŋwaànɛ ɓi yin ɓitòkì ɓi ŋwaànɛ à rì rì kìɓeɓtàg ki nghay. Kìɓeɓtàg ki nghay ki ri nya lɛ ki ŋwaɗ mis mɛ ɓɛɗyaŋɗyaŋ?

²²Tìcàɓ ti gòn inɛ ɓɛ faghà naà-Bɛ̀ll rì Bɛ̀ll ti ɓaghà a Yorisalɛm, ki ɓaghà ɓi cààmɛ̀n à bùmà.

²³Nni Yeesus à kɛ̀ɛ̀kɛ̀ɛ̀ghà ɓi naà-Bɛ̀ll ɓi tuùtuu anɛ ɓɛ nɗegì lɛ, tuùtuu a Salomɔŋ.

²⁴Ɓɛ̀yudɛ̀n ɓɛ taŋzɛ̀ngà nyi a nyoo, ɓɛ kpaa nyi lɛ: U kɔ̀nkɔn lɛ mɛ̀rem mɛɛ ɗiìɗìlɛ̀n ɓìsi ɓi mùm à kpaŋ ɓigomìbe? Nkòo wɔ̀ yɛɛ ri Kiris, kali ɓìsi lɛ tɛntɛ̀ɛ̀n.

²⁵Nni Yeesus à ɓakà ɓɔ lɛ: M̀mɛ kpaa mini, kɛ̀ ɓi gherɛn. Ɓiɓan ɓi nkìki ɓi ɗii ɗi Seŋi wɛ̀m, ɓyɔ yɛɛ rèresi rikuu ɗi mum ɗi ǹɗì.

²⁶Kìɓan kifog, ɓì gherɛɛ ɓi lɛ, yɛ̀ɛ ɓì yin jɔ̀ɔ̀ yɛm̀.

²⁷Jɔ̀ɔ̀ yɛm̀ yi ti yi wokì jɛ̀ɛ̀ yɛ̀m, mɛ̀ ǹ-yii yɔ, yɔɔ ki ti yi nɔɔ̀tàg mɛ̀.

²⁸Ǹti ǹfalàg yɔ cɛɓ ki fiɗyàɓ fikɔ̀ɔ̀, yàa wu ɓi nsoò ŋwos bog, mum à ki yin lɛ à ɓàtɛ̀n yɔ ɓi càg kɛm̀.

²⁹Seŋi wɛ̀m ànɛ à faghà mɛ̀ yɔ, à cee ɓum ɓɛ̀cèm, fɔɔnnɛ mum à yin lɛ à ɓàtɛ̀n yɔ ɓi càg ki Tààta.

³⁰Rì mɛ̀ rì Tààta, tì rì lɔŋ mum bog.

³¹Fɔɔnnɛ Ɓɛ̀yudɛ̀n ɓɛ ɓadɛ̀ngà tì gɔ̀g lɛ ɓɛɛ rogi nyi.

³²Nni Yeesus à kpaatìghà min ɓɔ lɛ: Mɛ̀ɛ nkìi ɓɛ̀gɛn ɓɛ ɓiɓan lɛɛ̀gwey ɓi mis min, rì ìtèɗ wu Tààta, nni ɓi ɓìɓan ɓiǹ, kibe kɛɛ̀ki ɓì ti mɛ̀ ɓiì rogii gɔ̀g miì?

³³Ɓɛ̀yudɛ̀n ɓɛ ɓag nyi lɛ: Tì yin lɛ tì rogì wɔ̀ gɔ̀g ɓi syeesyee à kìɓan anɛ ù kìi, wɔ̀lɛ tii rogì wɔ̀ gɔ̀g ɓisuu zɛɛtɛn yi ù rì rì yɔ ɓi san ànɛ yɛ̀ɛ Bɛ̀ll, ɓisuulɛ, wɛ̀ɛnɛ lɔŋ mum, ù ki kɔ̀n lɛ u terɛn wɛ̀ɛmiɗ yɛ̀ɛ Bɛ̀ll?

³⁴Nni Yeesus à ɓàkà ɓɔ lɛ: Ki yin kikànɛn ɓi ɓìdɔ̀gsɛna ɓin lɛ: Bɛ̀ll à kpaaghà lɛ ɓì rì bɛ̀ll[7]?

³⁵Tì yii lɛ mum à yin lɛ à pisì kìɓan ki ki ri kìkànɛn; nni i mɛ̀kànì mɛ regii ɓumɓɛ Bɛ̀ll à tòòghrɛ̀ngà rì ɓɔ lɛ bɛ̀ll,

³⁶mìnii kalì roànɛ Bɛ̀ll à ɓɔ̀ngà à rom yì lɛ à sɛɛtii Bɛ̀ll, ɓisuulɛ màa kalii lɛ, ǹɗì Man à Bɛ̀ll?

³⁷I ǹki rɔ̀ɓi kɛ̀ɛ nkì ɓisay ɓi Seŋi wɛ̀m, ɓì rɔ̀ɓ kɛ̀ ɓi gherɛn mɛ.

³⁸Kìɓan kifog, i nkìki ɓisay ɓii, nsoò ɓyàa gherɛɛ ɓi mɛ, gherɛɛna ɓyɔ, fɔɔnnɛ ɓì ɓiì kìi lɛ, ɓì yi, ɓì ki ghɛn lɛ Tààta à rì ɓi mɛ̀, mɛ̀ ɓi Tààta.

³⁹Fɔɔnnɛ ɓɛ mɛɛ̀ kaatìghà bee inɛ ɓɛɛ ɓaǹ nyi; wɔ̀lɛ Yeesus à sɔtɛ̀n ɓɔ ɓi ɓyàg.

⁴⁰Nni Yeesus à kɛ̀ɛ̀dìghà cɛcɛɗ ki Zyuridɛŋ, ɓi jàŋ inɛ Zyaŋ à ka ɓààɓàɓtìghà ɓum, à kɔ̀rì wɔɔ.

⁴¹Fɔɔnnɛ ɓum lɛɛ̀gwey ɓɛ yughày nyi a nyoo, ɓɛ kpaakpàà lɛ: Zyaŋ à kìghà ɓi dàm nsoò bog, kìɓan kifog, ɓìɓan ɓìcèm ɓi Zyaŋ à kpaaghà à ràɗ ɗì ŋwaànɛ ɓi ɓaghà saaɗ.

⁴²Nni ɓum lɛɛ̀gwey ɓɛ gherɛ̀ngà Yeesus.