Read Bafia ZYAŊ 11 Bible Online

ZYAŊ 11 - Bafia bible

ZYAŊ 11

¹Ŋwaàdɛŋ ɗii lɛ Lazaari, yɛɛ roròɓkà; à ɓaghà ŋwaànɛ a Bɛtanii, ɓi kìlɔ̀ŋ ki ɓɛ-Marii ɓɛɛ̀ Maata à geni.

²Marii ànɛn yɛɛ sisìŋìghà Kan tìrààre, à ki tɔ̀si nyi mɛ̀kòò ri tyòŋ tii; nni geni Marii à baŋì yɛɛ roròɓkà lɔɔ lɛ Lazaari.

³Rìgeni ɗi ɓɛ̀yiɓ ɗiǹ, ɗi romgà mum lɛ a kali Yeesus lɛ: Kan, mum wɔɔ̀ ànɛ u keesàg, à yin cem.

⁴Yɛ̀ɛ Yeesus à wokà fɔlɔɔ, nni à kpaaghà lɛ: Fìroɓ fìn fi yin nyi ɓiì wowoli, fi ri ɓisuu rikem ɗi Bɛ̀ll, lɛ Man à Bɛ̀ll a teɗ rìkem ɓi fìroɓ fìn.

⁵Yeesus à keesìghà lɛ, rì Maata rì geni à giɓ, rì Lazaari girig.

⁶Yɛ̀ɛ à wokà lɛ Lazaari à yin cem, à laatìghà mɛ̀ru mɛɓɛɛ̀ ɓi jàŋ inɛ à ɓaghà.

⁷Ajɛ̀m ìnɛn nnɛ à kalìghà ɓɛ̀yilàg ɓii lɛ: Ti sugtiina a Zyude.

⁸Ɓɛ̀yilàg ɓɛ kpaa nyi lɛ: Raɓì, ki ka finɛn ɓi yɛ̀ɛ Ɓɛ̀yudɛ̀n ɓɛ m̀mɛɛ̀ rogi wɔ gɔ̀g, wɔ̀ɔ̀ ki kɔ̀ɔ̀di lɛ u sugti wɔɔ?

⁹Yeesus à ɓàg ɓɔ lɛ: Mɛ̀ɛ nti ŋwos a rìlàg ɓɛ̀hawò ǹtɛ̀ɗ rì ɓiɓɛɛ̀? I mum a kɛ̀ɛ̀kɛɛ ri ŋwos, à yin lɛ à ɓàgtɛ̀n, ɓisuulɛ a seesee kitɛɛtɛn ki ɓi ziinɛ.

¹⁰Wɔ̀lɛ i mum a kɛ̀ɛ̀kɛɛ ri ìru, à rì lɛ à ɓàgtɛ̀n ɓisuulɛ à yin ɗi kìtɛɛtɛn ɓi nyimiɗ.

¹¹Yɛ̀ɛ à tòòghrɛ̀ngà fɔlɔɔ, nni à kpaaghà ɓɔ lɛ: Reŋkàŋ wìs Lazaari àa nlali, kìɓan kifog ǹɗì ɓiì kɛ̀ɛ nyi kìghèmzii.

¹²Ɓɛ̀yilàg ɓii ɓɛ kpaa lɛ: Kan i ki ri lɛ àa nlali di à ɓiì ɓaà lɛ syeesyee.

¹³Rìwu ɗi Lazaari ɗyɛɛ̀ɗi à kpaaghà, wɔ̀lɛ ɓɔɔ fekì nya lɛ fìlo fi zɛy fyɛɛ̀fi à kpaa.

¹⁴Fɔɔnnɛ Yeesus à kpaaghà ɓɔ lɛ tɛntɛ̀ɛ̀n lɛ: Lazaari à rì kìloŋ.

¹⁵Nni kìnyàà ki ri mɛ̀ kìronɛn ɓi nɗem ɓisu win lɛ, mɛ̀ɛ ǹ-yin wɔɔ, fɔlɔɔ yɛɛ ɓiì kìi lɛ ɓi gherɛn. Wɔ̀lɛ ti kɛ̀ɛna jàŋ inɛ à rì.

¹⁶Fɔɔnnɛ Tomas ànɛ ɓɛ nɗegì lɛ, Didim[8], à kpaaghà ɓɛ̀yilàg ɓɛmbog lɛ: Ti kɛ̀ɛna girig, ti wu nɗaŋ ɗi nyi.

¹⁷Yɛ̀ɛ Yeesus à kpagà wɔɔ, à tanɛ̀n di Lazaari à ti ɓi zɔ̀ŋ mɛ̀ru mɛnin.

¹⁸Yɛ̀ɛ Bɛtanii à ɓaghà jàŋbog ɗì Yorisalɛm nunùg ɓɛ̀kilòmɛɛ̀tɛ̀rɛ̀ ɓɛraa,

¹⁹Ɓɛ̀yudɛ̀n lɛɛ̀gwey ɓɛ yughày yɛ̀ɛ ɓɛ̀-Maata ɓɛɛ̀ Marii, lɛ ɓɛɛ fɔɔ̀si ɓɔ mɛ̀rem ɓi rìwu ɗi gèni wàà.

²⁰Yɛ̀ɛ Maata à wokà lɛ Yeesus à tiì, nni à kɛ̀ngà nyi kìɓoŋì ɓi bee, Marii nyii rɔɓkà lɔŋ ki kɔ̀kɔrii ɓi nàà.

²¹Fɔɔnnɛ Maata à kpaaghà Yeesus lɛ: Kan, i wɔ̀ɔ nɗì fɛ, di gèni wɛ̀m àa yin lɛ à wu.

²²Kìɓan kifog, ǹ-yii lɛ nsoò ɓigomìnɛ, com kìcèm ki ù rì ɓiì tɔɔ̀gh Bɛ̀ll, à rì wɔ̀ kɔ ɓiì faà.

²³Yeesus à kpaa Maata lɛ: Goni à ɓiì ghèmɓɛɛ.

²⁴Maata à ɓàg nyi lɛ: Ǹ-yii lɛ à ɓiì ghèmɓɛɛ ɓi cààmɛ̀n ki ɓìloŋ ɓi ri ɓiì ghèmɓɛɛ, ɓi ŋwos a siitòn.

²⁵Yeesus à kpaa nyi lɛ: Mɛ̀ yɛɛ ri rìghèmɓɛ̀n ɗi ɓiloŋ, rì cɛɓ; ŋwaànɛ à gherɛɛ mɛ̀, à ɓiì ɓaà rì cɛɓ nsoò àa wìì.

²⁶Fɔɔnnɛ mum ǹcèm ànɛ a ghɛghɛ̀ɓ à ki gherɛn mɛ, àa wu ɓi; ù gherɛɛ nya kìɓan kiǹ?

²⁷Maata à ɓàg lɛ: Ɛ̀ɛ̀ Kan! ǹgherɛɛ lɛ wɔ̀ yɛɛ ri Kiris, Man à Bɛ̀ll ànɛ à ghɛ̀ɛ̀sɛ̀ngà kì yùu ɓi ziinɛ.

²⁸Yɛ̀ɛ Maata à kpaaghà fɔlɔɔ, nni à kɛ̀ngà kì reŋii geni à giɓ anɛ lɛ Marii, à kɔ̀ŋɗɛ̀n nyi a dwìɗ lɛ: Ǹɗèsàg à rì fɛ, a ki regi wɔ.

²⁹Lɔŋ yɛ̀ɛ Marii à wokà fɔlɔɔ, à ghàs kì pɛ̀sɛɛ, à kɛ̀n yɛ̀ɛ Yeesus.

³⁰Lɛ Yeesus à ɓaghà di à ka ɗiŋi ɓi ɓi kìlɔ̀ŋ, à ɓaghà di à kaka jàŋ inɛ Maata à tulɛ̀ngà rì nyi.

³¹Ɓɛ̀yudɛ̀n ɓɛ ɓɛ ɓaghà ɓi naa rì Marii ɓɛ fɔɔfɔ̀ɔ̀sì nyi nɗem, ɓɛ ghɛngà lɔŋ di à mɛ pɛ̀sɛn aɗyoo lɛ fòos, à kpaŋ ɓi ɗyɔ̀m; fɔɔnnɛ ɓɛ nɔɔ̀tìghà nyi, ɓɛ fekì lɛ à kɛ̀ɛ kì rèni a zɔ̀ŋ.

³²Yɛ̀ɛ Marii à kpagà jàŋ inɛ Yeesus à ɓaghà, à ghɛn Yeesus, à kpì nyi a mɛ̀kòò, à kpaa nyi lɛ: Kan i wɔ̀ɔ nɗì fɛ, di geni wɛ̀m àa ŋwii ɓi.

³³Yɛ̀ɛ Yeesus à ghɛngà di Marii a rènɗèn, Ɓɛ̀yudɛ̀n ɓɛ ɓɛ ɓaghày ǹɗaŋ ri nyi ɓɛ renɗèn girig, nni nyìinyìg ì ɓangà nyi lɛɛ̀gwey, ǹɗem wu nyɛŋɗɛ̀n nyi ɓiɗùm,

³⁴à tɔg lɛ: Fe nnɛ ɓìi mɓòmi nyi? Ɓɛ ɓaàg nyi lɛ: Kan yuiy u ghɛǹ.

³⁵Nni Yeesus à rèngà.

³⁶Ɓɛ̀yudɛ̀n ɓɛ kpaa min lɛ: Ghɛɛna yɛ̀ɛ àa nti à keesàg nyi.

³⁷Gàɓ ìdɛŋ ìnɛ ɓi ɓɔ ì kpaa lɛ: Nyi ànɛ à ŋwàɗkà ɗyaŋɗyàŋ mis, àa yin lɛ à kì lɛ Lazaari kɛ̀ɛ wu?

³⁸Fɔɔnnɛ ǹɗem wu Yeesus wu nyɛŋɗɛ̀ngà tì ɓi ɗùm, à kɛ̀n a zɔ̀ŋ. Zɔ̀ŋ ìncèm ì ɓaghà ǹtuɓɛn ɓi gɔ̀g ɓɛ simì gɔ̀g ìdɛŋ a ŋwɔm.

³⁹Nni Yeesus à kpaaghà lɛ: Pisiina gɔ̀g ìnɛ ɓi ŋwɔm wu zɔ̀ŋ. Maata, a geni Lazaari ànɛ à wughà, à kpaa Yeesus lɛ: Kan, à ti ɓiì nùnnumi; lɛ mɛ̀ru mɛnin gɛɛ̀nɛ yɛ̀ɛ ɓɛ mɓòmi nyi.

⁴⁰Yeesus à ɓàg nyi lɛ: Màa kpaa wɔ̀ lɛ i ù gherɛɛ ù ɓiì ghɛɛ rìgwey ɗi Bɛ̀ll!

⁴¹Nni ɓɛ pisìghà gɔ̀g ìnɛn, Yeesus à ɓegsì mis aɗyoo, à kpaa lɛ: Tààta ǹtògsaagh wɔ̀ ɓisuulɛ, wàa ɓàagh bɔ̀ŋzɛ̀n yɛ̀m.

⁴²Ɓi ɓɛg wɛ̀m, ǹ-yii lɛ ù ti ù ɓàkì bɔ̀ŋzɛ̀n yɛm̀ ɓyààmɛ̀n ɓìcèm, kìɓan kifog ǹkpaa fɔlɔɔ ɓisuu ɓumɓɛ ɓɛ ri fɛ, lɛ di ɓɛɛ gherɛn lɛ wɔ̀ yɛɛ romgày mɛ̀.

⁴³Yɛ̀ɛ à kpaaghà fɔlɔɔ, nni à pɛ̀sìghà jɛ̀ɛ̀ aɗyoo rì ìtèɗ à kpaa lɛ: Lazaari kpaŋay.

⁴⁴Fɔɔnnɛ kìloŋ ki kpagày, ɓyàg rì mɛ̀kòò ɓì kàgakɛn ri ɓɛ̀ɓanɗas, ìsu wù kàŋɛn ɗi sànjà. Yeesus à kpaa ɓɔ lɛ: Fùmiina nyi, ɓi caɗ nyi a kɛǹ.

⁴⁵Kìgwey ki ɓi Ɓɛ̀yudɛ̀n ɓɛ ɓɛ yuyùghà yɛ̀ɛ Marii, ɓɛ ghɛn kìɓan ki Yeesus à kìghà kiǹ, ɓɛ gherɛ̀ngà nyi.

⁴⁶Wɔ̀lɛ gàɓ ìdɛŋ ìnɛ ɓi ɓɔ ì kɛ̀ngà kì ghɛɛ̀ Ɓɛ̀fàrìzyɛŋ, ì kpaa ɓɔ kìɓan ki Yeesus à kìghà.

⁴⁷Fɔlɔɔ nnɛ ɓɛ̀pìrɛɛtìrɛ̀ ɓɛgwey rì Ɓɛ̀fàrìzyɛŋ ɓɛ taŋzɛ̀ngà Sànèdìrɛŋ ɓɛ kpaa lɛ: Ti ki la? Lɛ ŋwaànɛ a kìki dàm lɛɛ̀gwey.

⁴⁸I tì càri nyi lɛ a kiki fɔlɔɔ, ɓum ɓɛ̀cèm ɓɛ ri ɓiì gherɛɛ nyi, à kpaŋ yɛ̀ɛ Ɓɛ̀ròmɛŋ ɓɛ ɓiì yùu, ɓɛ yogsì lɛ rì naa yìs i Bɛ̀ll, rì kìlɔ̀ŋ kis.

⁴⁹Nni mum bog ànɛ ɓi ntaŋzɛn lɛ Kayif, ànɛ à ɓaghà ǹlàmì-ɓɛ̀pìrɛɛtìrɛ̀ ɓɛgwey ɓi bèg ìnɛn, à kpaaghà ɓɔ lɛ: Ɓì yii ɓi lɔ̀ŋ com.

⁵⁰Ɓì ghɛɛ ɓi lɛ ki ri mìni kìrɔɔ lɛ mum bog a wu ɓisuu kilɔ̀ŋ di fɔlɔɔ nnɛ kìlɔ̀ŋ kìcèm kɛ̀ kɛɛ̀ ɗyaŋ?

⁵¹À kpaaghà ɓi fɔlɔɔ ɓi ɗyomzɛ̀n ɗii ɗi nyimiɗ, wɔ̀lɛ yɛ̀ɛ nnyɛɛ ɓaghà ǹlàmì-ɓɛ̀pìrɛɛtìrɛ̀ ɓi bèg ìnɛ̀n nnɛ à kalìghà kìɓan ki di ki kakay, lɛ Yeesus à ghɛ̀ɛ̀sɛɛ kì wiì ɓisuu kilɔ̀ŋ ki Ɓɛ̀yudɛ̀n.

⁵²Àa lɔŋ kìlɔ̀ŋ kiǹ kɔ rì kɔ, à ghɛ̀ɛ̀sɛɛ girig kì wiì lɛ a taŋzɛn ɓɔn ɓɛ Bɛ̀ll ɓɛ̀cèm, ɓɛ ɓɛ ri ɓɛ̀sààtɛn, ɓɛɛ ɓa kìbyɔg kìfog.

⁵³À tumɛ̀n ŋwos anɛ̀n innɛ ɓɛ rengà lɛ ɓɛɛ wey Yeesus.

⁵⁴Fɔɔnnɛ Yeesus à casɛ̀ngà kɛ̀ɛ rèsɛn ti lɛ tɛntɛ̀ɛ̀n ɓi nyìinyìm à Ɓɛ̀yudɛ̀n. À pɛ̀sɛ̀ngà foo, à kɛ̀n ɓi kòdò àdɛŋ ànɛ à ɓaghà jàŋbog rì ìreɓ, ɓi bàn ìnɛ lɛ Efirayim, à kɔ̀rì wɔɔ ri ɓɛ̀yilàg ɓii.

⁵⁵Paskà à Ɓɛ̀yudɛ̀n à ɓaghà di à ti jàŋbog; ɓum lɛɛ̀gwey ɓɛ ɓi jɛ̀m yi ɓilɔ̀ŋ ɓɛ ɓɔkày a Yorisalɛm di Paskà à kakay ɓisuu zòghɛ̀n.

⁵⁶Fɔɔnnɛ ɓɛ kaakààghà Yeesus, ɓɛ tɔɔ̀tɔ̀ɔ̀ghrɛ̀n wɔɔ ɓɔ rì ɓɔ ɓi naà-Bɛ̀ll lɛ: Mìnii ghɛɛ lɛ à rì lɛ à yù tìcàɓ gìn, àa yù ɓi?

⁵⁷Foo ɓɛ̀pìrɛɛtìrɛ̀ ɓɛgwey rì Ɓɛ̀fàrìzyɛŋ ɓɛ reɓsìghà lɛ, ŋwaànɛ à yii jàŋ inɛ Yeesus à rì, a ɓag ɓɔ gɔɔ, ɓɛɛ kɛǹ nyi kìɓanì.