Read Bafia ZYAŊ 12 Bible Online

ZYAŊ 12 - Bafia bible

ZYAŊ 12

¹Yɛ̀ɛ Paskà à ɓaghà di à mɛ rɔ̀ɓ mɛru taàfog, Yeesus à kɛ̀ngà a Bɛtanii, jàŋ inɛ Lazaari ànɛ à ghèmzìghà ɓi zɔ̀ŋ à ɓaghà.

²Ɓɛ lamgà nyi ɓìɗilàg wɔɔ, Maata à kàɓkì ɓum ɓyɔ̀. Lazaari à ɓaghà kìbog ki ɓi ɓumɓɛ ɓɛ ɗiɗìghà ǹɗaŋ ri Yeesus.

³Nni Marii à tekà coo ɓeŋ à tìrààre ti ti ɓaghà tì kɛŋɛn lɛɛ̀gwey; ti ɓaghà tì kìyɛn ɗi caaɓi kidɛŋ lɛ naàr, à sùùrì Yeesus tìrààre tìn ɓi mɛ̀kòò, à ki tɔ̀si nyi mɔ rì tyòŋ tii; fɔɔnnɛ mɛ̀rùù mɛ tirààre mɛ saàghà naa bimiɗ.

⁴Nni kìbog ki ɓi ɓɛ̀yilàg ɓɛ Yeesus lɛ Zyudas Iskariyot ànɛ à ghɛ̀ɛ̀sɛ̀ngà nyi kì kàɓi, à kpaaghà lɛ:

⁵Ɓi cɛ nnɛ ɓaa kàɓi ɓi tirààre tìn ɓɛ̀tɔɔsìm ɓɛraa ɓɛ fa mɔ̀ɔ̀ni mɛ̀n ɗì ɓɛ̀soghàsogha

⁶À kpaaghà ɓi fɔlɔɔ lɛ à ɓiisɛ̀ngà kì ɓɔmì ɓɛ̀soghàsogha, wɔ̀lɛ à kpaaghà lɔŋ fɔlɔɔ lɛ, à ɓaghà wiiwìì. Nni yɛ̀ɛ nyi yɛɛ m̀ɓègì ɓàm à mɔ̀ɔ̀ni, àa ntekì mɔ̀ɔ̀ni mɛ ɓɛ nfogì miì.

⁷Nni Yeesus à kpaaghà lɛ: Càra nyi a nyam tìrààre tìn ɓi ŋwos anɛ ɓɛ ri ɓòm mɛ.

⁸Ɓì rì rì ɓɛ̀soghàsogha ɓyààmɛ̀n ɓìcèm, kìɓan kifog mɛ̀ màa ɓa ti ɓi ri mìni ɓyààmɛ̀n ɓìcèm.

⁹Kìtuu ki Ɓɛ̀yudɛ̀n lɛɛ̀gwey ki wokà lɛ Yeesus à rì a Bɛtanii, nni ɓɛ yughày wɔɔ, àa lɔŋ lɛ ɓɛɛ ghɛǹ nyi, ɓɛ yughày girig lɛ ɓɛɛ ghɛǹ Lazaari ànɛ Yeesus à ghèmzìghà ɓi zɔ̀ŋ.

¹⁰Ɓɛ̀pìrɛɛtìrɛ̀ ɓɛgwey ɓɛ rengà lɛ ɓɛɛ wey girig Lazaari.

¹¹Ɓisuulɛ Ɓɛ̀yudɛ̀n lɛɛ̀gwey ɓɛ ghɛŋìghà ɓɔ, ɓɛ kɛǹ kì gherɛɛ Yeesus lɛ kìɓan kii.

¹²Ɓi duri tana ɓum lɛɛ̀gwey ɓɛ ɓɛ yughà tìcàɓ ti Paskà ɓɛ wokà lɛ, Yeesus a yùyu a Yorisalɛm.

¹³Fɔɔnnɛ ɓɛ tekà maŋ mɛ mɛtɛn ɓɛ kpaŋ lɛ ɓɛɛ kɛǹ nyi kìɓoŋì. Ɓɛ kpaakpàà jɛ̀ɛ̀ aɗyoo lɛ: Ozana! Bɛ̀ll a maŋ rìfòm ɗi Isirayɛl, roànɛ a yùu yì ɓi ɗii ɗi Kan.

¹⁴Yeesus à ghɛngà man à jàɗki, à ɓɔg mii aɗyoo lɔŋ yɛ̀ɛ ki ri kìkànɛn lɛ:

¹⁵Wɔ̀ gɔ̀n ì Siyon, kɔ̀ɔ risi, ghɛna rìfòm ɗyɔɔ ɗi riì ɓi man à jàɗki aɗyoò.

¹⁶Ɓɛ̀yilàg ɓɛ Yeesus ɓɛ yighà ɓi azi anɛ ɓi kìɓan kiǹ ɓi cààmɛ̀n kiǹ; kìɓan kifog yɛ̀ɛ Yeesus à ɓaghà di à mɛ teɗ rikem, fɔɔnnɛ ɓɛ yitìghà min lɛ, ɓìɓan ɓiǹ ɓi ɓaghà ɓìkànɛn ɓisu wii, nni ɓyɛɛ̀ɓi ɓɛ kighà nyi lɔ̀ɔ̀.

¹⁷Fɔɔnnɛ gwìy ì ɓumɓɛ ɓɛ ɓaghà ǹɗaŋ ri Yeesus, cààmɛ̀n ki à regìghà Lazaari lɛ a kpaŋ yi ɓi zɔ̀ŋ, à ghèmzì nyi, ì kalìghà kìɓan ki ɓɛ ghɛngà kiǹ.

¹⁸Fɔlɔɔ yɛɛ kighà lɛ ɓum ɓɛɛ kɛǹ nyi kìɓoŋì lɛɛ̀gwey, lɛ ɓɛ wokà lɛ à kìghà dàm ì kìɓan inɛ̀n.

¹⁹Nni Ɓɛ̀fàrìzyɛŋ ɓɛ kpaaghà min wɔɔ ɓɔ rì ɓɔ lɛ: Ɓì ghɛɛ! ɓyàa kpaŋzɛn ɓi kiɓan ki, ghɛɛnà yɛ̀ɛ ɓum ɓɛ̀cèm ɓɛ mɛ nɔ̀ɔ̀ti nyi.

²⁰Ɓum ɓɛdɛŋ ɓɛ a Gìrɛg ɓɛ ɓaghà ɓi nɗaŋ wu ɓumɓɛ ɓɛ ɓɔkày a Yorisalɛm lɛ ɓɛɛ ɓɔgsi Bɛ̀ll ɓi cààmɛ̀n à tìcàɓ.

²¹Fɔɔnnɛ ɓɛ kɛngà yɛ̀ɛ Filiɓ ànɛ à ɓaghà ŋwaànɛ a Bɛdsayida ɓi zi ì Galile, ɓɛ tɔg nyi lɛ: Kan ti kɔ̀nkɔn lɛ ti ghɛǹ Yeesus.

²²Nni Filiɓ à kɛ̀ngà kì kpaà Andire fɔlɔɔ, ɓɛ ki ɓasɛn min lɛ rì nyi rì Andire, ɓɛ kɛǹ kì kpaa Yeesus.

²³Yeesus à ɓàg ɓɔ lɛ: Cààmɛ̀n ki lɛ Man à mum a teɗ rìkem ki kpaŋi.

²⁴Ǹkalii mìni ɓi saaɗ lɛ: I ɗis ɗi bààzì ɗi kpii ɓi ɓi zi ɗi wu, di ɗi rɔɓi lɔŋ ɗyɔ rì ɗyɔ, wɔ̀lɛ i ɗi wii ɗi ɓa tì rì mis mɛdɛŋ lɛɛ̀gwey.

²⁵Nni ŋwaànɛ à keesii cɛɓ kii, à rì kɔ ɓiì ɗimzii; roànɛ à ɓèèzɛɛ cɛɓ kii ɓi ziinɛ, nnyɛɛ ri ɓiì ɓèŋi kɔ ɓisuu cɛɓ ki fiɗyàɓ fikɔ̀ɔ̀.

²⁶I mum à kɔ̀ni lɛ a ki mɛ̀ kìsay, a nɔɔ̀ti mɛ̀, fɔɔnnɛ ǹkìì-kìsay wɛm̀ à ɓiì ɓaà jàŋ inɛ mɛ̀ ǹɗì. Seŋi wɛ̀m à ɓiì ki kemzii ŋwaànɛ a kìki mɛ kìsay.

²⁷Ɓi cààmɛ̀n ki, ǹɗem wɛ̀m wu ri wù ɓùùsɛn, ǹɗì lɛ ǹkpaa la? Nkpaà nya lɛ Tààta, ghɛɓsi mɛ̀ ɓi kìɓan ki ki yuu kì ghɛnɛɛ a lɔ̀ŋkɛm̀ ɓi cààmɛ̀n ki? Wɔ̀lɛ ɓisuu cààmɛ̀n kɔm̀ kiǹ nnɛ ǹ-yùghà.

²⁸Tààta, kemzi ɗii ɗyɔɔ. Nni jɛ̀ɛ̀ ì ɓaghày aɗyoo lɛ: M̀mɛ kemzi ɗyɔ, m̀ɓiì ki kemzii ti ɗyɔ̀.

²⁹Gwìy ì ɓum ìnɛ ì ɓaghà wɔɔ, ì wokà jɛ̀ɛ̀ ìnɛn, ì kpaa lɛ: Baàbàn yɛ̀ɛ ɓoogh. Ɓɛ̀ro ɓɛmbog lɛ: Ŋwaàfìtom yɛɛ toòghrɛɛ rì nyi.

³⁰Fɔɔnnɛ Yeesus à kpaaghà ɓɔ lɛ: Àa ɓisu wɛ̀m nnɛ jɛ̀ɛ̀ ìnɛn yàa tòòghrɛɛ.

³¹Ɓi cààmɛ̀n ki, kìɓan ki ziinɛ ki yuù kì renɛɛ, ɓigomìnɛ. Ɓɛ yuù kì màagh rifòm ɗi ziinɛ ɓi dan.

³²Nni mɛ̀ ǹɗì ɓiì ɓaà lɛ, i ɓɛ mɛ pisi mɛ ɓi zi, ɓɛ ɓɔgsì mɛ̀ aɗyoo, ǹsyòŋ yì ɓum ɓɛ̀cèm a lɔ̀ŋkɛm̀.

³³À kpaaghà fɔlɔɔ lɛ a resi rìkuu ɗi riwù ɗi à ghɛ̀ɛ̀sɛɛ kì wiì.

³⁴Nni gwìy ìnɛn ì ɓàkà nyi lɛ: Ɓìsii yilàkà ɓi ɓìdɔ̀gsɛna lɛ: Kiris à ɓiì kɔ̀rii fiɗyàɓ fikɔ̀ɔ̀. Nni lannɛ ù kpaa lɛ: Ki ghɛɛ̀sɛɛ lɛ ɓɛɛ ɓɔgsi Man à mum aɗyoo? Ghɛn yɛɛ ri kɔm̀ Man à mum àncèm?

³⁵Yeesus à kpaa ɓɔ lɛ: Kìtɛɛtɛn ki kaka a lɔ̀ŋkin ɓi maa cààmɛ̀n, fɔɔnnɛ kɛ̀ɛ̀ghiina, cààmɛ̀n ki ɓì kaka rì kìtɛɛtɛ̀n; lɛ, birìm yɛ̀ kɛɛ̀ ràɗ mini. Ŋwaànɛ a kɛ̀ɛ̀kɛɛ ɓi birìm à yii ɓi fe nnɛ a kɛ̀nkɛ̀n.

³⁶Cààmɛ̀n ki ɓì rì rì kìtɛɛtɛn, gherɛɛna kɔ, di fɔlɔɔ nnɛ ɓi ɓa ɓɔn ɓɛ kitɛɛtɛn. Yɛ̀ɛ Yeesus à kpaaghà ɓìɓan ɓiǹ, nni à pɛ̀sɛ̀ngà à kɛ̀n kìnyamzɛɛ fìràɓ.

³⁷Nsoò yɛ̀ɛ Yeesus à kìghà dàm yi ɓiɓan lɛɛ̀gwey ɓi mis maa, ɓɛ gherɛ̀ngà ɓi nyi,

³⁸lɛ kɛɛ kilɛn lɔŋ yɛ̀ɛ ǹkpaŋzì-ɓìɓan Ezayii à kpaaghà lɛ: Kan, ghɛn yɛɛ gherɛ̀ngà ɓɔlɛ ànɛ tì kpaaghà? Càg ki Kan ki resɛ̀ngà yɛ̀ɛ ghɛn?

³⁹Ɓɛ ɓaghà ɓi lɛ ɓɛ gherɛ̀n ɓisuulɛ Ezayii à kpaatìghà lɛ:

⁴⁰À ɗiŋzìghà ɓɔ tìɗyaŋ, à ki kì lɛ ɓɛ̀ kɛɛ̀ ɓa ti ri syeesyee à ɗyomzɛ̀n, lɛ ɓɛ̀ kɛɛ̀ ghɛnɛn ti rì mis maa, mɛ̀rem maa mɛ̀ kɛɛ̀ fègti kiɓan ki syeesyee, lɛ ɓɛ ɓiì ki lɔ̀ɔ̀ghrɛɛ mɛrem, ǹki wɔ̀ɔ̀zi ɓɔ.

⁴¹Kìɓan kiǹ kɛɛ̀ki Ezayii à kalìghà yɛ̀ɛ à ghɛngà rìkem ɗi Yeesus, ɓi cààmɛ̀n ki à kpaakpààghà kìɓan kii.

⁴²Nsoò fɔlɔɔ mɛ̀fòm mɛ Ɓɛ̀yudɛ̀n mɛdɛŋ lɛɛ̀gwey mɛ gherɛ̀ngà nyi, kìɓan kifog, ɓɛ resìghà ɓi kiɓan kiǹ lɛ tɛntɛ̀ɛ̀n ɓi mis mɛ ɓum, lɛ Ɓɛ̀fàrìzyɛŋ ɓɛ ɓiì ki nàɓi ɓɔ ɓi naà-bɔ̀ŋzɛ̀n.

⁴³Ɓisuulɛ ɓɛ ɓiisɛ̀ngà kì kɔ̀ni rikem ɗi ɓum à cee ɗi Bɛ̀ll.

⁴⁴Nni Yeesus à kpaaghà jɛ̀ɛ̀ aɗyoo lɛ: Ŋwaànɛ à gherɛɛ mɛ̀, à gherɛɛ ɓi lɔŋ lɛ mɛ̀, à gherɛɛ girig roànɛ à romgày mɛ̀.

⁴⁵I mum à ghɛɛ mɛ̀, di à ghɛɛ roànɛ à romgày mɛ̀.

⁴⁶Mɛ̀ ǹ-yùghà ɓi ziinɛ fɛlɛ yɛ̀ɛ kìtɛɛtɛn, lɛ mum ǹcèm ànɛ à gherɛɛ mɛ̀ kɛ̀ɛ ɓa ɓi birìm.

⁴⁷I mum à woogh ɓìɓan ɓyɛm̀, kɛ̀ɛ ɓèŋ ɓyɔ, àa mɛ̀ yɛɛ ri nyi ɓiì faà bɛ̀lɛn, lɛ ǹ-yùghà ɓi ki faà ziinɛ bɛ̀lɛn, ǹ-yùghà lɔŋ lɛ nghɛɓsi yɔ̀.

⁴⁸Nni ŋwaànɛ à ɓèni mɛ̀, kɛ̀ɛ ghàɓ ɓiɓan ɓyɛm̀, à rì rì ŋwaànɛ à ɓiì renì kìɓan kii. Ɓìɓan ɓi ǹkalìghà ɓyɛɛ ri ren kiɓan kii ɓi siitòn a ŋwos.

⁴⁹Lɛ ɓìɓan ɓi nkpaakpàà, ɓi yin ɓiɓan ɓyɛm̀ ɓi mɛ̀ɛmiɗ, lɔŋ Tààta nyimiɗ anɛ à romgày mɛ̀, nnyɛɛ siŋdɛ̀ngà mɛ̀ ɓìɓan ɓi ǹghɛ̀ɛ̀sɛɛ kì kpaà, rì ɓi ǹghɛ̀ɛ̀sɛɛ kì rèsaagh ɓum.

⁵⁰Fɔɔnnɛ ǹ-yii lɛ ǹsiŋdɛn wii wu ri cɛɓ ki fiɗyàɓ fikɔ̀ɔ̀. Nni ɓìɓan ɓi nkpaakpàà, mɛ̀ɛ nkpaakpaa lɔŋ ɓyɔ yɛ̀ɛ Tààta à kalìghà mɛ̀ lɛ ǹkpaà.