Read Bafia ZYAŊ 14 Bible Online

ZYAŊ 14 - Bafia bible

ZYAŊ 14

¹Mɛ̀rem min mɛ̀ kɛɛ̀ ɓùùsɛn, gherɛɛna Bɛ̀ll, ɓì gherɛ̀n girig mɛ̀.

²Ɓìden ɓi naa ɓi ri lɛɛ̀gwey ɓi mɛɛ mɛ Seŋi wɛ̀m; i kɛ̀ kɛɛ̀ ɓa fɔlɔɔ, di ǹkalìghà mìni. Ǹkɛ̀ɛ mìni kì pègsɛɛ jàŋ.

³M̀ɓiì ɓaà lɛ, i ǹkɛ̀ɛ, i m̀mɛ pègsɛn mini jàŋ, ǹsugtìì lɛ nteɗ mìni a lɔ̀ŋkɛm̀, lɛ di mìni girig, ɓi ɓa jàŋ inɛ mɛ̀ ǹɗì.

⁴Ɓì yii bee inɛ ɓi jàŋ inɛ ǹkɛ̀ɛ.

⁵Nni Tomas à kpaaghà nyi lɛ: Kan! Tì yii ɓi jàŋ inɛ ù kɛ̀ɛ, nni lannɛ tì rì lɛ tì yi bee inɛ ì kɛ̀ɛ wɔ̀ɔ̀?

⁶Yeesus à ɓàg nyi lɛ: Mɛ̀ yɛɛ ri bee, rì saaɗ, rì cɛɓ. Mum à yin lɛ à kpaŋ yɛ̀ɛ Tààta di à fyee ɓi a lɔ̀ŋkɛm̀.

⁷I ɓyàa yi mɛ̀, di ɓì rì lɛ ɓì yi Seŋi wɛ̀m. Nni à tumɛ̀n ɓigomìnɛ, ɓì yii nyi, ɓì mɛ ki ghɛn nyi.

⁸Nni Filiɓ à kpaaghà nyi lɛ: Kan rèsi ɓìsi Tààta, mɛ̀rem mis mɛɛ kpi ɓi mùm.

⁹Yeesus à kpaa nyi lɛ: Filiɓ, fìɗyàɓ fi maà ɓa rì mìni, ù ka yighà ɓi mɛ? Ŋwaànɛ à mɛ ghɛn mɛ, à mɛ ghɛn Tààta, nni lannɛ ù kpaa lɛ rèsi ɓìsi Tààta?

¹⁰Ù gherɛɛ ɓi lɛ, ki ri lɛ mɛ̀ ɓi Tààta, Tààta ɓi mɛ̀? Ɓìɓan ɓi nkpaakpaa mini ɓi, ɓi yin ɓiɓan ɓi mɛ̀ɛmiɗ yɛɛ ɓekii lɛ nkpaà, lɔŋ Tààta ànɛ à rì a lɔ̀ŋkɛm̀, yɛɛ̀ kìki ɓiɓan ɓii.

¹¹Gherɛɛna mɛ̀ yɛ̀ɛ ǹkpaa mìni lɛ, ki ri lɛ mɛ̀ ɓi Tààta, Tààta ɓi mɛ̀; i ɓì ɓèni fɔlɔɔ, ɓì gherɛ̀n ɓisuu ɓiɓan ɓi nkìkì.

¹²Ǹkalii mìni saaɗ à rìkpaa lɛ, ŋwaànɛ à gherɛɛ mɛ̀, à ɓiì kìi girig ɓìɓan ɓi mɛ̀ɛ nkìkì, à ki kì kɔm̀ ɓìɓan ɓi ɓi cee ɓiǹ ɓisuulɛ ǹkɛ̀ɛ yɛ̀ɛ Tààta.

¹³Fɔɔnnɛ com kìcèm ki ɓì rì ɓiì tɔɔ̀gh rì ɗii ɗyɛ̀m, ǹɗì mìni kɔ ɓiì kìi, lɛ Tààta a teɗ rìkem ɓi Man.

¹⁴I ɓì tɔɔgh com rì ɗii ɗyɛ̀m m̀ɓiì kìi kɔ.

¹⁵I ɓì keesii mɛ̀, ɓì ɓiì ɓèŋi ɓidɔ̀gsɛna ɓyɛm̀.

¹⁶Fɔɔnnɛ m̀ɓiì ɓɔ̀ŋzii Tààta, à rom yì mìni m̀maasì mɛ̀rem adɛŋ, ànɛ à ɓa rì mìni fìɗyàɓ fikɔ̀ɔ̀.

¹⁷Nnyɛɛ ri Ǹghay à ɓɛ̀kɔɔ̀kɔɔ̀ ɓɛ ɓiɓan ànɛ ziinɛ ì yin lɛ ì teɗ, ɓisuulɛ ì ghɛɛ ɓi nyi, yɛ̀ kɛɛ̀ ki yi nyi. Lɔŋ mìni yɛɛ yii nyi ɓisuulɛ à rì ɓi mìni.

¹⁸Màa càɗ ɓi mini ɓɔɔ̀zii, ǹɗì ɓiì sugtii yi a lɔ̀ŋkin.

¹⁹Cààmɛ̀n lɛsàg ziinɛ yàa ghɛɛ̀di ɓi mɛ, lɔŋ mìni yɛɛ ri mɛ̀ ɓiì seesee ɓisuulɛ ǹɗì cem, nni mìni girig ɓì ɓiì ɓaà rì cɛɓ.

²⁰Ŋwos anɛ̀n ɓì yii gɛ lɛ, ǹɗì ɓi Seŋi wɛ̀m, mìni ɓi mɛ̀, mɛ̀ ɓi mìni.

²¹Ŋwaànɛ à rì rì ɓìdɔ̀gsɛna ɓyɛm̀ à ki ɓèŋ ɓyɔ, nnyɛɛ keesii mɛ̀. Nni ŋwaànɛ à keesii mɛ̀ innɛ Seŋi wɛ̀m à ɓiì kesii, mɛ̀ ǹkeesì girig nyi, ǹki rèsɛn nyi lɛ a yi mɛ̀.

²²Fɔɔnnɛ Zyuudɛ, àa roànɛ lɛ Iskariyot, a kpaaghi nyi lɛ: Kan! Ki ɓaa la lɛ ɓìsi ɓɛɛ̀ɓɛ u resɛn lɛ ti yi wɔ̀, kɔ̀ɔ rèsɛn ziinɛ?

²³Yeesus à ɓàg nyi lɛ: I mum à keesii mɛ̀, à ɓiì ɓèŋi jɛ̀ɛ̀ yɛ̀m, Seŋi wɛ̀m à rì nyi ɓiì keesi; tì ɓiì yùu a lɔ̀ŋkii, tì pègsɛ̀n ìkɔ̀ɔ̀ wis a lɔ̀ŋkii.

²⁴Mum ànɛ à kessi ɓi mɛ, à yin lɛ à ɓèŋ ɓìɓan ɓyɛm̀; nni jɛ̀ɛ̀ ìnɛ ɓi wowog inɛ, ì yin jɛ̀ɛ̀ yɛ̀m, ì rì lɔŋ jɛ̀ɛ̀ ì Tààta ànɛ à romgày mɛ̀.

²⁵Ǹkpaa mìni ɓìɓan ɓiǹ yɛ̀ɛ ǹkaka lɛ rì mìni.

²⁶Kìɓan kifog m̀maasì mɛ̀rem ànɛ à rì Kìtɛntɛ̀ɛ̀n ki Nghay ki Tààta à ɓiì romìì ɓi ɗii ɗyɛ̀m, yɛɛ ri mìni ɓiì rèsaagh ɓiɓan ɓìcèm, à ki kì lɛ, ɓi yiti ɓìɓan ɓìcèm ɓi ǹkalìghà mìni.

²⁷Ǹcàri mìni fyòoog, ǹfaa mìni fyòoog wɛ̀m. Mɛ̀ ǹfaa ɓi mini nyi yɛ̀ɛ ziinɛ ì ti ì falàg. Mɛ̀rem min mɛ̀ kɛɛ̀ cɛɛcɛɛ̀rɛ̀n, nsoò lɛ mɛ yeèghyèèghkɛ̀n.

²⁸Ɓyàa woogh fɛlɛ yɛ̀ɛ màa kpaa mìni lɛ ǹkɛ̀ɛ, m̀ɓiì ki sugtii yi a lɔ̀ŋkin. I ɓyàa keesii mɛ̀ di ɓì rì lɛ ɓì nyààrɛ̀n lɛ, ǹkɛ̀ɛ yɛ̀ɛ Tààta ɓisuulɛ, Tààta à ceetii mɛ̀.

²⁹Ǹkpaa mìni ɓìɓan ɓiǹ ɓigomìnɛ di ɓi ka kilɛn ɓi, lɛ yɛ̀ɛ ɓi ri ɓiì kìlɛɛ, ɓì gherɛ̀n.

³⁰Tyàa tòki ti ɓi ri mìni, ɓisuulɛ rìfòm ɗi ziinɛ ɗi tiì, nni ɗi yin ɗi ìtèɗ wulɛ ɗi ki mɛ̀ com.

³¹Wɔ̀lɛ ki ghɛɛ̀sɛɛ lɛ, ziinɛ yɛ̀ɛ yi lɛ, ǹkeesii Tààta rì tì lɛ, nkìki ɓiɓan lɔŋ yɛ̀ɛ Tààta à kpaaghà mɛ̀ lɛ nki. Pɛ̀sɛɛna aɗyoo, ti pɛsɛn fɛ̀.