Read Bafia ZYAŊ 18 Bible Online

ZYAŊ 18 - Bafia bible

ZYAŊ 18

¹Yɛ̀ɛ Yeesus à kpaaghà ɓìɓan ɓiǹ, nni à pɛ̀sɛ̀ngà rì ɓɛ̀yilàg ɓii, ɓɛ kɛǹ cɛcɛɗ ki maa ǹsyòm ànɛ lɛ Sedirɔŋ. Ɓɛ ɗiŋì rì ɓɛ̀yilàg ɓii ɓi dɛm idɛŋ ìnɛ ì ɓaghà wɔɔ.

²Zyudas ànɛ à ghɛ̀ɛ̀sɛ̀ngà nyi kì kàɓi a yighà jàŋ inɛ̀n, lɛ Yeesus rì ɓɛ̀yilàg ɓii ɓɛ nti ɓɛ taŋzàg wɔɔ.

³Nni Zyudas à tekà lɛ rì nɗaŋ wu ɓɛsujàà, rì ɓɛ̀ɓèŋì-naà-Bɛ̀ll, ɓɛ ɓɛ̀pìrɛɛtìrɛ̀ ɓɛgwey rì Ɓɛ̀fàrìzyɛŋ ɓɛ romgày, à yùy rì ɓɔ wɔɔ ɓi dɛm inɛ̀n. Ɓɛ ɓaghày lɛ rì ɓɛ̀lamɓà, rì tìŋwɔkì rì ɓyom ɓi ribaŋì.

⁴Nni yɛ̀ɛ Yeesus à yighà ɓìɓan ɓìcèm ɓi ɓi ghɛɛ̀sɛ̀ngà nyi kì tanɛɛ, fɔɔnnɛ à tyɛ̀ɛ̀tɛ̀ngà ɓɔ a nyoo, à tɔg ɓɔ lɛ: Ghɛn innɛ ɓi kaakàà?

⁵Ɓɛ ɓaàg lɛ: Ti kaakaa Yeesus ànɛ a Naazarɛt. Yeesus à kpaa ɓɔ lɛ: Mɛ̀ɛ nɛ. Zyudas ànɛ à kàɓkà nyi à ɓaghà rì ɓɔ mɛ̀rɛy.

⁶Lɔŋ yɛ̀ɛ Yeesus à kpaghà ɓɔ lɛ: Mɛ̀ɛ nɛ, ɓɛ sugtìghà rì jɛ̀m ɓɛ kpilàg ɓi zi.

⁷Yeesus à tɔgtì ɓɔ lɛ: Ghɛn innɛ ɓi kaakàà? Ɓɛ ɓaàg lɛ: Ti kaakaa Yeesus ànɛ a Naazarɛt.

⁸Nni Yeesus à ɓàkà ɓɔ lɛ: Màa kalii mìni lɛ, mɛ̀ɛ nɛ. I ki ri lɛ mɛ̀ nnɛ ɓi kaakàà, càrina ɓum ɓɛmbog ɓɛǹ, ɓɛɛ ghaàgh.

⁹À kpaaghà fɔlɔɔ lɛ kɛɛ ɓa lɔŋ yɛ̀ɛ à kalìghà lɛ: Mɛ̀ɛ nɗimzii ɓi nsoò kìbog ki ɓi ɓumɓɛ ù faghà mɛ̀.

¹⁰Nni Simɔn Pyɛɛri ànɛ à ɓaghà rì gàfàg ɓi ɗyaŋ, à sɔŋìghày yɔ̀ à kpɛ̀ɛ̀ ǹkìì-kìsay a rìfòm ɗi ɓɛpìrɛɛtìrɛ̀ à syaŋ nyi ìreè wu weèlem. Ǹkìì-kìsay àǹcèm à ɓaghà ɗii lɛ Malkus.

¹¹Yeesus à kpaa Pyɛɛri lɛ: Pɛ̀ɛ̀zi gàfàg ɓi ɗyaŋ. Mɛ̀ m̀ɓiì rɔ̀ɓi kɛ̀ɛ nnɔ ɓeŋ ànɛ Tààta à faghà mɛ̀ lɛ nnɔ?

¹²Fɔɔnnɛ ǹɗaŋ wu ɓɛsujàà wiǹ, rì Ǹkɔ̀mɛ̀n wàà, rì Ɓɛ̀yudɛ̀n ɓɛ ɓɛ mɓègì naà-Bɛ̀ll ɓɛ ɓangà Yeesus, ɓɛ kaŋ̀ nyi bɛn.

¹³Ɓɛ ka kɛ̀ngà ɗì nyi yɛ̀ɛ Ann; lɛ Ann à ɓaghà seŋi gili Kayif. Kayif àncèm yɛɛ ɓaghà rìfòm ɗi ɓɛpìrɛɛtìrɛ̀ ɓi bèg ìnɛn.

¹⁴Nyi yɛɛ ki reɓkà Ɓɛ̀yudɛ̀n lɛ, ki ri kìrɔɔ lɛ mum a wu bog ɓisuu kilɔ̀ŋ.

¹⁵Simɔn Pyɛɛri rì ǹ-yilàg àdɛŋ, ɓɛ nɔɔ̀nɔ̀ɔ̀tìghà Yeesus. Nni yɛ̀ɛ rìfòm ɗi ɓɛpìrɛɛtìrɛ̀ ɗi yighà ǹ-yilàg ànɛ̀n, nyii ɗiŋìghà ɓɛɛ̀ Yeesus ɓi nlɛmɓog wu rifòm ɗi ɓɛpìrɛɛtìrɛ̀.

¹⁶Wɔ̀lɛ Pyɛɛri à rɔɓkà ɓi dan, jàŋbog rì ìsuunaa. Nni ǹ-yilàg àmbog ànɛ à yisɛ̀ngà rì rìfòm ɗi bɛ̀pìrɛɛtìrɛ̀ à kpagày, à tòòghrɛ̀n ɓɛɛ̀ giɓ anɛ à ɓèŋɓèŋgà ìsuunaa, à ɗiŋzì min Pyɛɛri.

¹⁷Nni giɓ anɛ à ɓèŋɓèŋgà ìsuunaa ànɛ̀n à tɔkà Pyɛɛri lɛ ù rì girig kìbog ki ɓi ɓɛ̀yilàg ɓɛ ŋwaànɛ wa? Pyɛɛri à ɓàg lɛ: Àg, ǹ-yin n-yilàg wìì.

¹⁸Ɓɛ̀kìì-ɓìsay rì ɓɛ̀ɓèŋì naà-Bɛ̀ll ɓɛ rɛrɛ̀lìghà wɔɔ, di ɓɛɛ̀ wowog ɗuu ɗi ɓɛ ghɛŋzɛ̀ngà lɛ kìfɛɓ ki ɓaghà ɓiì kìkii. Pyɛɛri à rɛrɛ̀lìghà ǹɗaŋ ri ɓɔ, à wowòg girig ɗuu.

¹⁹Nni rìfòm ɗi ɓɛpìrɛɛtìrɛ̀ ɗi tɔkà Yeesus kìɓan ki ɓi ɓɛ̀yilàg ɓii, rì ɓìɓan ɓi à ti à rèèrèsàg ɓɔ.

²⁰Yeesus à ɓàg nyi lɛ: Mɛ̀ɛ ǹtòtoogh lɛ tɛntɛ̀ɛ̀n rì ɓumɓɛ ɓi ziinɛ. Mɛ̀ nɗèresii ɓum ɓyààmɛ̀n ɓìcèm ɓi naa yi bɔ̀ŋzɛ̀n, rì ɓi naà-Bɛ̀ll, jàŋ yi Ɓɛ̀yudɛ̀n ɓɛ ti ɓɛ taŋzàg, kɛ̀ɛ nki kpaa kiɓan kidɛŋ a rìnyam.

²¹Nni lannɛ mɛ̀ɛnɛ u tɔtɔg mɛtɔɔ̀ghtɔɔgh? Tɔgha ɓumɓɛ ɓɛ nwowoogh ɓìɓan ɓi mɛ̀ɛ nkpaakpaa, ɓɛɛ kpaà wɔ̀ com ki mɛ̀ɛ nkpaa ɓɔ, lɛ ɓɛ yii ɓìɓan ɓi mɛ̀ɛ nkpaakpaa.

²²Yɛ̀ɛ Yeesus à kpaaghà fɔlɔɔ, nni kìbog ki ɓi ɓumɓɛ ɓɛ mɓègì naà-Bɛ̀ll ɓɛ ɓɛ rɛrɛ̀lìghà foo, ki ɓokà nyi rìɓɛn, ki kpaa lɛ: Rìɓàg ɗi u ɓàɓag rifòm ɗi ɓɛpìrɛɛtìrɛ̀ ɗyɛɛ̀ɗìn?

²³Yeesus à ɓàg nyi lɛ: I màa sɛ̀rii kìɓàagh, rèsi mɛ̀ jàŋ inɛ zɛ̀ɗ i rì, wɔ̀lɛ i màa ki konaagh kì ɓàagh, ɓi cɛ nnɛ ù ɓoogh mɛ̀?

²⁴Nni Ann à romgà nyi ǹkàŋɛn yɛ̀ɛ Kayif ànɛ à ɓaghà rìfòm ɗi ɓɛpìrɛɛtìrɛ̀.

²⁵Simɔn Pyɛɛri à ɓaghà wɔɔ, à wowòg ɗuu, nni ɓɛ tɔkà nyi lɛ: Wɔ̀ɔ̀ yin irig kìbog ki ɓi ɓɛ̀yilàg ɓii? Pyɛɛri à roòzɛ̀n, à kpaa lɛ: Àg, ǹ-yin n-yilàg wìì.

²⁶Nni kìbog ki ɓi ɓɛ̀kìì-ɓìsay ɓɛ rifòm ɗi ɓɛpìrɛɛtìrɛ̀ ki ki ɓaghà càŋàcaŋa ki ŋwaànɛ Pyɛɛri à rengà ìreè, ki kpaaghà lɛ màa ghɛɛ ɓi wɔ ɓi dɛm i ɓìte nɗaŋ ɗi nyi?

²⁷Pyɛɛri à roòzɛ̀n tì, nni ǹlem à zag a ghàskà kì rɔŋì.

²⁸Nni ɓɛ pɛsɛ̀ngà rì Yeesus yɛ̀ɛ Kayif, ɓɛ kɛǹ ɗì nyi a kìkpanà ki ɓɛyɔ̀m ɗì sariwa lɛ ɓuɓ. Ɓɔmiɗ ɓɛ ɗiŋìghà ɓi ɓi kìkpanà ki ɓɛyɔ̀m kiǹ, lɛ ɓɛ̀ kɛɛ̀ foŋɗɛn ɓɔmiɗ kìsyeg ɓi nyòò, lɛ ɓɛɛ ɗi Paskà.

²⁹Fɔɔnnɛ gɔmìnà ànɛ lɛ Pilat à kpagày, à kɛ̀n jàŋ inɛ ɓɛ ɓaghà, à kpaa lɛ: Kìɓan adi kɛɛ̀ki ɓi kpaaghì ɓì ràɗ rì ŋwaànɛ?

³⁰Ɓɛ pɛɛ̀zì nyi lɛ: I àa yin fàràfara, di tì yùu yì ɓi ri nyi a lɔ̀ŋkɔɔ.

³¹Nni Pilat à kpaaghà ɓɔ lɛ: Mìniìɓɔmiɗ terina nyi, ɓi yɔm̀ nyi ɓi ɓìdɔ̀gsɛna ɓin. Ɓɛ̀yudɛ̀n ɓɛ kpaa Pilat lɛ: Tì yin ɗi ìtèɗ wulɛ tì ren lɛ ɓɛɛ wey mum.

³²Ki kilɛ̀ngà fɔlɔɔ lɛ, di jɛ̀ɛ̀ ìnɛ Yeesus à kpaaghà lɛ a resi rìkuu ɗi riwù ɗi à ghɛ̀ɛ̀sɛ̀ngà kìwiì, yɛ̀ɛ ron.

³³Nni Pilat à sugtìghà kì ɗiŋii ɓi kìkpanà ki ɓɛyɔ̀m, à reŋì Yeesus, à tɔg nyi lɛ: Ù rì nya rìfòm ɗi Ɓɛ̀yudɛ̀n?

³⁴Yeesus à ɓàg nyi lɛ: Wɔ̀ yɛɛ kpaa kìɓan kiǹ gìn, ɓum ɓɛdɛŋ ɓɛɛ kalii wɔ̀ fɔlɔɔ ɓɛ raɗ rì mɛ̀?

³⁵Pilat à ɓàg lɛ: Mɛ̀ ǹɗì muu Ɓɛ̀yudɛ̀n gìn? Ɓumɓɛ ɓi kìlɔ̀ŋ kɔɔ, rì ɓɛ̀pìrɛɛtìrɛ̀ ɓɛgwey ɓɔ yaa yùu rì wɔ̀ a lɔ̀ŋkɛm̀, nni kìɓan aɗi kɛɛ̀ki wɔ̀ɔ nkìi?

³⁶Yeesus à ɓàg nyi lɛ: Kìlɔ̀ŋ kɛm̀ ki yin fɛ ɓi ziinɛ, i kaa rì ɓi ziinɛ, di ɓɛ̀kìì-ɓìsay ɓɛm ɓɛ nfaa rìbaŋì lɛ ɓɛ̀ kɛɛ̀ kɛ̀n ɗi mɛ̀ a mɛ̀fòm mɛ Ɓɛ̀yudɛ̀n. Wɔ̀lɛ kìlɔ̀ŋ kɛm̀ ki yin fɛ ɓi ziinɛ.

³⁷Pilat à tɔg nyi lɛ: Yɛɛ lɔɔ lɛ ù rì rìfòm wa? Yeesus à ɓàg lɛ: Ù kpaa miì, ǹɗì rìfòm. Mɛ̀ ǹ-yalɛ̀ngà, ǹki yù ɓi ziinɛ lɛ ntɛɛ̀zag ɓum ɓìɓan ɓi saaɗ, fɔɔnnɛ mum ǹcèm ànɛ à rì ŋwaà saaɗ, à ti à wokì jɛ̀ɛ̀ yɛ̀m.

³⁸Nni Pilat à tɔkà nyi lɛ: Saaɗ innɛ cɛ? Yɛ̀ɛ à kpaaghà fɔlɔɔ, nni à kpaŋdìghà, à kɛ̀n jàŋ inɛ Ɓɛ̀yudɛ̀n ɓɛ ɓaghà, à kpaa ɓɔ lɛ: Mɛ̀ ǹghɛɛ ɓi kiɓan ki ɓeɓtɛn ki ŋwaànɛ à kìi.

³⁹Nni yɛ̀ɛ ki ri mìni kìsyɔ̀ɔ̀ lɛ, ncaɗ mìni kìmbùŋ kìfog ɓi cààmɛ̀n à tìcàɓ ti Paskà, nni ki kɔni mìni lɛ rìfòm ɗi Ɓɛ̀yudɛ̀n ɗyɛɛ̀ɗi ncaɗ gìn?

⁴⁰Fɔɔnnɛ ɓɛ tumɛ̀ngà tì rìkpaa jɛ̀ɛ̀ aɗyoo lɛ: Èe èe àa nyi, lɔŋ Ɓaraɓas innɛ u caɗ. Kɔlɛ Ɓaraɓas à ɓaghà zyaàzyaa.