Read Bafia ZYAŊ 2 Bible Online

ZYAŊ 2 - Bafia bible

ZYAŊ 2

¹Ajɛ̀m ì mɛ̀ru mɛraa, kìsɛ̀nɛ̀ ki riwɛy ki ɓaghà a Kana, ɓi zi ì Galile, jɛɛ Yeesus à ɓaghà wɔɔ.

²Ɓɛ reŋìghà girig Yeesus rì ɓɛ̀yilàg ɓii a kìsɛ̀nɛ̀ kiǹ.

³Yɛ̀ɛ mɛ̀rɔ̀g mɛ lekà, nni jɛɛ Yeesus à kpaaghà nyi lɛ: Ɓɛ yiìdi ri mɛ̀rɔ̀g.

⁴Yeesus à ɓàg nyi lɛ: Giɓ anɛ, cɛ kɛɛ ri lɛ rì mɛ̀ rì wɔ̀? Cààmɛ̀n kɛm̀ ki ka kpaŋ ɓi.

⁵Jɛɛ à kpaa ɓɛ̀kìì-ɓìsay lɛ: Kìina com kìcèm ki à rì mìni ɓiì kalii.

⁶Bèè yi mɛnig yi yi ɓaghà yì yèŋɛn ɗi gɔ̀g, yi ɓaghà wɔɔ taàfog; bèè yiǹ yi ɓaghà foo lɛ, yɛɛ ghɛɓsi ɓisuu ɓisyɔ̀ɔ̀ ɓi ritɛn ɓi ɓi rìgherɛ̀n ɗi Ɓɛ̀yudɛ̀n; bog ì ɓaghà lɛ ì kpaŋ ɓɛ̀kpɛm[3] ɓɛɓɛɛ̀ nsoò lɛ ɓɛraa.

⁷Yeesus à kpaa ɓɔ lɛ: Roòziina mɛ̀nig ɓi bèè yi, fɔɔnnɛ ɓɛ roòzàkà mɛ̀nig miì, lɛ pisa.

⁸Yeesus à kpaa ɓɔ lɛ: Ɓɔ̀rina min mɔ, ɓi kɛǹ kì faà ǹkɛ̀ɛ̀sì-ɓìɓan ɓi kisɛ̀nɛ̀. Fɔɔnnɛ ɓɛ kɛngà nyi rì mɔ.

⁹Yɛ̀ɛ ǹkɛ̀ɛ̀sì-kìsɛ̀nɛ̀ à ɓoɓtìghà mɛ̀nig mɛ mɛ ɓaghà mɛǹ di maa ghay mɛrɔ̀g, kɛ̀ɛ yi jàŋ inɛ mɛ̀rɔ̀g mɛǹ mɛ ɓaa yì, kɔm̀ lɛ ɓɛ̀kìì-ɓìsay ɓɛ ɓɛ ɓwɛɗkày mɛ̀nig ɓɔɔ yighà.

¹⁰Fɔɔnnɛ à reŋìghà ŋwaànɛ à wɔlɛ̀ngà à kpaa nyi lɛ: Ɓɛ̀ro ɓɛɛ̀ loki kìfaà ɓɛ̀kèn mɛrɔ̀g mɛ syeesyee, ɓɛ siitɛ̀n ɓɔ kìfaà mɛ ɓeɓtɛn di ɓaa ŋwagì; kìɓan kifog wɔ̀ wàa ɓèŋɓeŋi mɛ̀rɔ̀g mɛ syeesyee à kpaŋ ɓigomìnɛ.

¹¹Fɔlɔɔ nnɛ Yeesus à kìghà dàm yìì i ǹtonto a Kana, ɓi zi ì Galile, à rèsì rìgwey ɗii, ɓɛ̀yilàg ɓii ɓɛ ki gherɛn nyi.

¹²Ajɛ̀m ìnɛn, nnɛ à sɛngà a Kapɛrinawum ǹɗaŋ ri jɛɛ, rì ɓɛ̀geni, rì ɓɛ̀yilàg ɓii, ɓɛ ghagsì lɔŋ ɓɔɔ mɛru wɔɔ lɛsàg.

¹³Yɛ̀ɛ tìcàɓ ti Ɓɛ̀yudɛ̀n ti lɛ Paskà ti kɛɛkɛ̀ɛ̀ghày, nni Yeesus à ɓɔkà a Yorisalɛm.

¹⁴À tanɛ̀n di ɓɛ ri ɓi naà-Bɛ̀ll lɛ rì ɓɛ̀kàɓì sanìnya, rì ɓɛ̀kàɓì bwiy, rì ɓɛ̀kàɓì ɓɛ̀kuùkuù, rì ɓumɓɛ ceeceǹɗìyɛ̀n ɓum mɔ̀ɔ̀ni.

¹⁵Yɛ̀ɛ à kìlɛ̀ngà ǹkpas rì ɓìsɔŋ, nni à nàɓkà ɓɔ ɓɛ̀sɛ̀ɛ̀ ɓɛ̀cèm ɓi naà-Bɛ̀ll, à nàɓkì girig lɛ rì bwiy yaa, rì ɓɛ̀sanìnya ɓaa; à tyàŋzì mɔ̀ɔ̀ni mɛ ɓumɓɛ ɓɛ ceècèǹɗìghà ɓum mɔ̀ɔ̀ni, à tyɔkì ɓɛ̀teɓèrè ɓaa;

¹⁶à ki kpaa ɓɛ̀kàɓì ɓɛ̀kuùkuù lɛ: Pisiina ɓyom ɓi fɛ! Kɛ̀ ɓi ghaasi naa ì Seŋi wɛ̀m mɛɛ mɛ fyèè.

¹⁷Nni Ɓɛ̀yilàg ɓii ɓɛ yitìghà lɛ ki ri kì kànɛn lɛ: Ǹkɔ̀nɛ̀n à naa yɔ̀ɔ̀ à ɓuni mɛ̀ ǹɗem.

¹⁸Ɓɛ̀yudɛ̀n ɓɛ tekà jɛ̀ɛ̀ ɓɛ tɔg nyi lɛ: Dàm ì be yɛɛ̀nɛ ù rì lɛ ù kì, lɛ u resi ɓìsi lɛ, ù rì rì ìtèɗ wulɛ u ki yɛ̀ɛ ù kìi yì lɔɔ?

¹⁹Yeesus à ɓàg ɓɔ lɛ: Wààghiina na-Bɛ̀ll ìnɛ mpɛɛ̀zi yɔ̀ ki toŋì ɓi mɛ̀ru mɛraa.

²⁰Ɓɛ̀yudɛ̀n ɓɛ pɛɛ̀zì nyi lɛ: Naà-Bɛ̀ll ìnɛ ɓɛ togà bèg mɛ̀tin mɛɓɛɛ̀ rì bèg taàfog, yɛɛ̀nɛ wɔ̀ɔ̀ rì ɓiì pɛ̀ɛ̀zii kitoŋì ɓi mɛ̀ru mɛraa?

²¹Wɔ̀lɛ naà-Bɛ̀ll ìnɛ Yeesus à kalìghà, ì ɓaghà nyoo yìì.

²²Yɛ̀ɛ à ghèmɓɛ̀ngày a nyɔ̀ɛ̀y, ɓɛ̀yilàg ɓii ɓɛ yitì lɛ à kpaaghà fɔlɔɔ, fɔɔnnɛ ɓɛ gherɛ̀ngà ɓìɓan ɓi ɓi ri ɓì kànɛn, ɓɛ ki gherɛn ti kìɓan ki Yeesus à kpaaghà kiǹ.

²³Cààmɛ̀n ki Yeesus à ɓaghà a tìcàɓ ti a Paskà Yorisalɛm, ɓum lɛɛ̀gwey ɓɛ gherɛ̀ngà nyi, yɛ̀ɛ ɓɛ ghɛngà dàm yi ɓiɓan yi à kìkìghà.

²⁴Wɔ̀lɛ Yeesus à tyweeyàkà ɓi ɓɔ ɓisuulɛ, à yighà ɓɔ ɓɛ̀sɛ̀ɛ̀ ɓɛ̀cèm,

²⁵rì tì lɛ, ki ghɛɓsìghà ɓi nyi com lɛ ɓɛɛ ka rèsi nyi rìɓa ɗi mum, lɛ nyimiɗ a yighà com ki mum a fèfeg ɓi ǹɗem ɓi ɗùm.