Read Bafia ZYAŊ 20 Bible Online

ZYAŊ 20 - Bafia bible

ZYAŊ 20

¹Ŋwosi sɔnɗì sariwa, Marii Madelɛn à pongà a zɔ̀ŋ rì tìrììriì, à ghɛn lɛ, gɔ̀g ìnɛ ì ɓaghà ɓi ŋwɔm wu zɔ̀ŋ ì ti m̀pisiyɛn.

²Fɔɔnnɛ à pɛ̀sɛ̀ngà rì mɛ̀ree, à kɛ̀n kì ghɛɛ̀ lɛ rì Simɔn Pyɛɛri, rì ǹ-yilàg àmbog ànɛ Yeesus àa nkeesàg, à kpaa ɓɔ lɛ: Ɓaa pisii Kan ɓi zɔ̀ŋ, nni tì yii ɓi fennɛ ɓaa foŋi nyi.

³Nni Pyɛɛri ɓɛɛ̀ ǹ-yilàg àmbog ɓɛ pɛsɛ̀ngà ɓɛ kɛǹ a zɔ̀ŋ.

⁴Ɓɔɔ̀cèm ɓɛ kɛnkɛ̀ngà ɗì mɛ̀ree, kìɓan kifog, ǹ-yilàg àmbog à fyàgà Pyɛɛri ɓi mɛ̀ree, à log kì kpaŋì a zɔ̀ŋ ɗì nyi.

⁵Fɔɔnnɛ à laŋmɛ̀ngà lɛ a tɛg wɔɔ ɓi ɗùm, à ghɛn ɓɛ̀ɓanɗas ɓɛ̀ nɔ̀nɔŋiyɛn, wɔ̀lɛ à ɗiŋìghà ɓi ɓi zɔ̀ŋ.

⁶Nni Simɔn Pyɛɛri ànɛ à ɓaghày nyi ajɛ̀m à kpagà, à ɗiŋì ɓi zɔ̀ŋ, à ghɛn ɓɛ̀ɓanɗas ɓɛ̀nɔ̀nɔŋiyɛn,

⁷kìlàà ki ki ɓaghà Yeesus ɓi nto, kɛ̀ kɛɛ̀ ki ɓa jàŋbog rì ɓɛ̀ɓanɗas, kɔɔ ɓa kì takakɛn fɔlɔɔ ki nɔ̀ŋziyɛn yi kìpàs.

⁸Nni ǹ-yilàg àmbog ànɛ à lokà kìkpaŋì a zɔ̀ŋ, à ɗiŋìghà girig, à ghɛn à ki gherɛn.

⁹Lɛ ɓɛ̀yilàg ɓɛ ɓaghà di ɓɛ ka wog ɓi azi anɛ ɓi rìkàn ɗi ɗi kpaakpààghà lɛ ki ghɛɛ̀sɛ̀ngà lɛ Yeesus a ghemɓɛn yì a ɓìloŋ.

¹⁰Fɔɔnnɛ ɓɛ̀yilàg ɓɛ pɛsɛ̀ngà, ɓɛ sugtì a mɛɛ.

¹¹Marii à rɛrɛ̀lìghà ɓi dan, ǹwɔŋì rì zɔ̀ŋ, à renɗèn. Yɛ̀ɛ à rènɗengà, nni à laŋmɛ̀ngà lɛ a ghɛn zɔ̀ŋ ɓi ɗùm.

¹²Fɔɔnnɛ à ghɛngà ɓum ɓɛ titom ɓɛɓɛɛ̀, rì ɓìlàà ɓi puɓ, di ɓɛ kɔkɔrii ɓi jàŋ inɛ ɓɛ nɔŋzìghà kìloŋ ki Yeesus ɓɛ ki lɛ, roànɛ a nto, roàmbog a mɛ̀kòò.

¹³Ɓum ɓɛ titom ɓɛǹ ɓɛ tɔg nyi lɛ: Giɓ anɛ, cɛ u rènɗèn? Nyii ɓaàg ɓɔ lɛ: Ɓaa pisii Kan wɛ̀m nni mɛ̀ ǹ-yii ɓi jàŋ inɛ ɓaa foŋi nyi.

¹⁴Yɛ̀ɛ à kpaaghà fɔlɔɔ, nni à lɔ̀ɔ̀ghrɛ̀ngà, à ghɛn Yeesus ǹɗɛrɛriyɛn, kìɓan kifog, à yighà ɓi lɛ Yeesus yɛɛ ri.

¹⁵Nni Yeesus à tɔkà nyi lɛ: Giɓ anɛ, ɓi cɛnnɛ u rènɗèn? Ghɛn innɛ u kaakàà? Nyii fefèkà lɛ m̀ɓèŋì-dɛm yɛɛ ri. Fɔɔnnɛ à kpaaghà nyi lɛ: Kan! i wɔ̀ yaa pisii nyi fɛ, kali mɛ̀ jàŋ inɛ wàa foŋi nyi di mɛ̀ɛ nteɗ yì nyi.

¹⁶Yeesus à kpaa nyi lɛ: Marii! nni à lɔ̀ɔ̀ghrɛ̀ngà, à kpaa Yeesus ɓi rì ebìreegh lɛ: Ràɓunì! yɛɛlɔɔ lɛ ǹɗèsàg.

¹⁷Yeesus à kpaa nyi lɛ: Kɔ̀ɔ kòm mɛ, ɓisuulɛ ǹka ɓɔg ɓi yɛ̀ɛ Seŋi wɛ̀m; kìɓan kifog kɛ̀na a ɓɛ̀geni ɓɛ̀m, u kpaa ɓɔ lɛ m̀ɓɔɔgh yɛ̀ɛ Seŋi wɛ̀m, nnyɛɛ ri girig Seŋi wìn, yɛ̀ɛ Bɛ̀ll wɛ̀m, ànɛ à rì girig Bɛ̀ll wìn.

¹⁸Fɔɔnnɛ Marii madelɛn à kɛ̀ngà kì kpaà ɓɛ̀yilàg lɛ nyaa ghɛɛ Kan, ànɛ̀n à kpaa nyi ɓìɓan ɓi nyii kpaa ɓɛǹ ɓin.

¹⁹Cɛŋkò ki ŋwosi sɔnɗì nyimiɗ anɛ̀n, mɛ̀suunaa mɛ ɓi naa ìnɛ ɓɛ̀yilàg ɓɛ ɓaghà wɔɔ ɓɛtaŋzɛn, mɛ ɓaghà mɛ̀rogakɛn lɛ, ɓɛ rirìsìghà Ɓɛ̀yudɛ̀n. Nni Yeesus à yùghà, à rɛlì ɓi nyìinyìm wàà, à kpaa ɓɔ lɛ: Fyòoog a ɓa rì mìni.

²⁰Yɛ̀ɛ à kpaaghà fɔlɔɔ, nni à rèsìghà ɓɔ lɛ, rì ɓyàg ɓii, rì bèn yìì. Ɓɛ̀yilàg ɓɛ nyaàrɛ̀n yɛ̀ɛ ɓɛ ghɛngà Kan.

²¹Yeesus à ɓììtì ɓɔ kìkpaà lɛ: Fyòoog a ɓa rì mìni. Fɛlɛ yɛ̀ɛ Tààta à romgày mɛ̀, mɛ̀ ǹɗomi girig mìni.

²²Lɔŋ yɛ̀ɛ à kpaaghà fɔlɔɔ, nni à fɛɓkà ɓɔ bɛ̀ɛ̀bɛ̀ɛ̀ ɓi nyoo, à kpaa ɓɔ lɛ: Terina Kìtɛntɛ̀ɛ̀n ki Nghay.

²³Ɓum ɓɛ̀cèm ɓɛ ɓì ɓiì cenɛɛ ɓiɓe, ɓɛɛ̀ɓɛ ɓìɓe ɓyaa ɓi ri ɓiì ɓaà ɓì cenɛn, ɓɛ̀roɓɛ ɓì cenɛɛ ɓi ɓiɓe, ɓìɓe ɓyaa ɓi rɔɓ kɛ̀ɛ̀ rìcenɛ̀n.

²⁴Tomas ànɛ ɓɛ nɗegì lɛ Didim, kìbog ki ɓi ɓɛ̀yilàg ɓɛ Yeesus ntɛ̀ɗ rì ɓɛɓɛɛ̀, à ɓaghà ɓi wɔɔ cààmɛ̀n ki Yeesus à yùghày kiǹ.

²⁵Nni ɓɛ̀yilàg ɓɛmbog ɓɛ kpaaghà nyi lɛ: Tyàa ghɛɛ Kan. Tomas à ɓàg ɓɔ lɛ: I ǹghɛɛ ɓi ɓifìlì ɓi tyɛmì ɓi ɓyàg ɓii, kɛ̀ɛ nki foŋ manàcàg wɛm̀ ɓi ɓìfìlì ɓi tyɛmì nsoò lɛ ǹfoŋ càg kɛm̀ ɓi bèn yìì, ǹ-yin lɛ ǹgherɛ̀n.

²⁶Ajɛ̀m ì mɛ̀ru taàraa, ɓɛ̀yilàg ɓɛ Yeesus ɓɛ ɓatìghà ɓɛ̀taŋzɛn ɓi naa, Tomas à ɓaghà wɔɔ ri ɓɔ. Mɛ̀suunaa mɛ ɓaghà mɛ̀rogakɛn, nni Yeesus à yùghày, à rɛlì ɓɔ ɓi nyìinyìm, à kpaa ɓɔ lɛ: Fyòoog a ɓa rì mìni.

²⁷Fɔɔnnɛ à kpaaghà Tomas lɛ: Nàmay manàcàg wɔɔ̀ fɛ, ù ki ghɛn ɓyàg ɓyɛm̀; nàmay càg u kom̀ bèn yɛ̀m; kɔ̀ɔ teteɗ nyoey, gherɛn.

²⁸Tomas à ɓàg nyi lɛ: Kan wɛ̀m, rì Bɛ̀ll wɛ̀m!

²⁹Yeesus à kpaa nyi lɛ: Ù gherɛɛ ɓisuulɛ ù mɛ ghɛn mɛ? Mààgh rì ɓɛ̀roɓɛ ɓɛ gherɛ̀ngà ɓɛ̀ kɛɛ̀ ghɛn.

³⁰Yeesus à kìtìghà dàm yi ɓiɓan yidɛŋ lɛɛ̀gwey ɓi mis mɛ ɓɛyilàg ɓii, yi yi yin fɛ yì kànɛn ɓi kaàtà ànɛ.

³¹Kìɓan kifog, gàɓ ìnɛ ì rì ǹkànɛn lɛ di ɓi gherɛn lɛ Yeesus à rì Kiris, Man à Bɛ̀ll, rì tì lɛ, i ɓì gherɛɛ, ɓì ɓa rì cɛɓ lɛ nyi.