Read Bafia ZYAŊ 3 Bible Online

ZYAŊ 3 - Bafia bible

ZYAŊ 3

¹Nni ŋwaàdɛŋ ànɛ ɓi nɗaŋ wu Ɓɛ̀fàrìzyɛŋ ɗii lɛ Nikodɛm, à ɓaghà kìbog ki ɓi ɓɛ̀lem ɓɛ ɓum ɓɛ Ɓɛ̀yudɛ̀n,

²à yùghà yɛ̀ɛ Yeesus rì ìru à kpaa nyi lɛ: Raɓì, tì yii lɛ, ù rì ǹɗèsàg ànɛ Bɛ̀ll yɛɛ romiì ɓisuulɛ, ŋwaà yin lɛ à kì dàm yi ɓiɓan yɛ̀ɛ yi wɔ̀ɔ kìki yi, di Bɛ̀ll à yin a lɔ̀ŋkii.

³Nni Yeesus à ɓàkà nyi lɛ: Ǹkpaa wɔ̀ kɔɔ̀kɔɔ̀ à rìkpaa lɛ, i mum à yalɛɛ tì ɓi nyɔɔnyɔn à rìyalɛ̀n, à yin lɛ à ghɛn kìlɔ̀ŋ ki Bɛ̀ll.

⁴Fɔɔnnɛ Nikodɛm à tɔkà nyi lɛ: Lannɛ mum à rì lɛ à yalɛ̀ntì di à ti ǹsɛ̀ɛ̀mɛn? À rì nya lɛ à sugtì ɓi ɗùm ɗi jɛɛ à yalɛ̀ntì?

⁵Yeesus à ɓàg nyi lɛ: Ǹkpaa wɔ̀ kɔɔ̀kɔɔ̀ à rìkpaa lɛ, i mum à yalɛɛ ɓi ri mɛ̀nig rì Ǹghay, à yin lɛ à ɗiŋì ɓi kìlɔ̀ŋ ki Bɛ̀ll.

⁶Lɛ ŋwaànɛ à yalɛɛ rì mɛ̀mùù, à rì lɔŋ mum à mɛ̀mùù, roànɛ à yalɛɛ rì Ǹghay à rì ǹghay.

⁷Fɔɔnnɛ kɔ̀ɔ kuurag lɛ màa kpaa wɔ̀ lɛ, ki ghɛɛ̀sɛɛ lɛ ɓi ɓiìti kì yalɛɛ.

⁸Bɛ̀ɓ ì ti ì fɛɓsag jàŋ inɛ ì kɔni, wɔ̀ɔ̀ wowòg lɔŋ lɛ rìfiŋfìŋ kɔ̀ɔ yi fennɛ ì pɛ̀sɛɛ yì, nsoò jàŋ inɛ yɛɛ̀ kɛ̀nkɛ̀n. Fɔlɔɔ nnɛ mum ǹcèm ànɛ à mɛ yalɛn ri Ǹghay à rì.

⁹Nni Nikodɛm à pɛ̀ɛ̀zìghà nyi lɛ: Kìɓan kiǹ ki ri lɛ ki kilɛ̀n di ki ɓaɓaa là?

¹⁰Yeesus à kpaa nyi lɛ: Wɔ̀ lɔŋ nɗèsàg ànɛ a Isirayɛl, kɔ̀ɔ ki yi ɓiɓan ɓi?

¹¹Ǹkpaa wɔ̀ kɔɔ̀kɔɔ̀ à rìkpaa lɛ, ɓìsiì kpaakpaa ɓiɓan ɓi tì yii, tì ki tɛɛtɛɛ̀zì ɓum ɓìɓan ɓi tì ghɛngà, kìɓan kifog kɛ̀ ɓi kɔ̀n lɛ di ɓyàa teri rìrèsì ɗis.

¹²I ɓì ti kɛ̀ ɓi gherɛn di ǹkpaa mìni ɓìɓan ɓi ɓi ziinɛ, lannɛ ɓì rì min ɓiì gherɛɛ di ǹkpaa mìni ɓìɓan ɓi aɗyòò?

¹³Ŋwaàdɛŋ à ka ɓɔkà ɓi aɗyòò i ki cee ɓi lɛ Man à mum ànɛ à sɛngày aɗyòò.

¹⁴Fɛlɛ yɛ̀ɛ Moyis à pɛ̀sìghà nyoo ɓi kìgeŋ aɗyoo ɓi-reɓ, fɔlɔɔ nnɛ ki ghɛɛ̀sɛɛ girig lɛ, ɓɛɛ pɛsi Man à mum aɗyoo,

¹⁵lɛ di mum ǹcèm ànɛ à gherɛɛ nyi, à ɓa rì cɛɓ ki fiɗyàɓ fikɔ̀ɔ̀.

¹⁶Lɛ Bɛ̀ll à keesìghà ziinɛ à pyàŋdàg fɔlɔɔ nnɛ à faghà m̀bobog wìì a Man lɛ ŋwaànɛ à gherɛɛ nyi kɛ̀ɛ wu, a ɓa lɔŋ ri cɛɓ ki fiɗyàɓ fikɔ̀ɔ̀.

¹⁷Lɛ Bɛ̀ll à romgày ɓi Man wiì ɓi ziinɛ lɛ a fa yɔ̀ bɛ̀lɛn, à romgày lɔŋ nyi lɛ a ghɛɓsi yɔ̀.

¹⁸Ŋwaànɛ à gherɛɛ nyi à yiìdi ri bɛ̀lɛn wɔ̀lɛ roànɛ à gherɛɛ ɓi nyi yɛɛ ti rì bɛ̀lɛn ɓisuulɛ, à gherɛ̀ngà ɓi mbobog à Man à Bɛ̀ll.

¹⁹Bɛ̀lɛn i rì ǹto lɛ: Kìtɛɛtɛn ki yughày ɓi ziinɛ, ɓum ɓɛ ki keesi birìm à cee kìtɛɛtɛn kìn, lɛ mɛ̀kìkìì maa mɛ ɓaghà mɛ̀ɓeɓtɛn.

²⁰Lɛ mum ǹcèm ànɛ a kìki kiɓe, à ti à ɓèèzàg kìtɛɛtɛn, kɛ̀ɛ ki yù jàŋ inɛ kìtɛɛtɛn ki ri, lɛ ìris wulɛ ɓìɓan ɓii ɓyɛ̀ kɛɛ̀ ki kpagi dan.

²¹Wɔ̀lɛ roànɛ à ti à kìlàg ɓìɓan ɓi saaɗ, nnyɛɛ ti à yùlàg jàŋ inɛ kìtɛɛtɛn ki ri, lɛ ɓɛɛ ghɛǹ lɛ tɛntɛ̀ɛ̀n lɛ, a kìki ɓiɓan yɛ̀ɛ kɛɛ̀ kɔ̀ngi Bɛ̀ll.

²²Ajɛ̀m ìnɛn, Yeesus à kɛ̀ngà rì ɓɛ̀yilàg ɓii ɓi ziì Zyude; à ghagsìghà cààmɛ̀n wɔɔ ri ɓɔ, à ki ɓàaɓaɓtì ɓum.

²³Zyaŋ girig à ɓààɓàɓtìghà ɓum a Enɔŋ, jàŋbog rì Salim lɛ mɛ̀nig mɛ ɓaghà wɔɔ lɛɛ̀gwey. Nni ɓum ɓɛ kɛnkɛ̀ngà wɔɔ lɛ a ɓaɓti ɓɔ.

²⁴Lɛ ki ɓaghà di ɓɛ ka pig ɓi Zyaŋ ɓi naà-zày.

²⁵Nni nyoey yi kpighà lɛ rì ɓɛ̀yilàg ɓɛ Zyaŋ, rì muu Ɓɛ̀yudɛ̀n ɓi kìɓan ki ritɛn, ɓi ɓìsyɔ̀ɔ̀ ɓi righerɛ̀n ɗi Ɓɛ̀yudɛ̀n.

²⁶Fɔɔnnɛ ɓɛ̀yilàg ɓɛ kɛngà yɛ̀ɛ Zyaŋ ɓɛ kpaa nyi lɛ: Raɓì, ŋwaànɛ ɓìi nɗì rì nyi cɛcɛɗ ki Zyuridɛŋ, ànɛ wɔ̀ɔ ntɛɛzsii ɓìsi rìɓa ɗii, à ti girig ɓiì ɓàaɓaɓtì ɓum, fɔɔnnɛ ɓum ɓɛ̀cèm ɓɛɛ̀ sùusuùrɛ̀n a lɔ̀ŋkii.

²⁷Nni Zyaŋ à ɓàkà ɓɔ lɛ: Mum à yin lɛ à ɓa rì com kidɛŋ, ki ki yin ki Bɛ̀ll à faa nyi.

²⁸Mìniìɓɔmiɗ ɓì rì mɛ̀ ɓɛ̀wusìnɛ̀ɗ lɛ, ǹkpaaghà lɛ, àa mɛ̀ yɛɛ ri Kiris, kìɓan kifog, ɓɛ romgày mɛ̀ lɛ nsyoŋ̀ yì nyi bee.

²⁹Ŋwaànɛ à rì rì giɓ, yɛɛ ri yii giɓ; wɔ̀lɛ rìghan ɗi yii giɓ ɗi ɗi ri wɔɔ ɗi ti ɗi nyaàràg yɛ̀ɛ mɛ̀nɔ̀ɓɔ̀, lɛ jɛ̀ɛ̀ ì yii giɓ inɛ ɗyɛɛ̀ wowòg. Rìkuu ɗi kinyàà ɗiǹ ɗyɛɛ̀ɗi mɛ̀ ǹɗì ǹɗonɛn ri ɗyɔ̀.

³⁰Ki ghɛɛ̀sɛɛ lɛ nyii ɓɔɓɔg, mɛ̀ nsisìlì.

³¹Ŋwaànɛ à pɛ̀sɛɛ yì aɗyoo, à teŋmɛɛ à cee ɓum ɓɛ̀cèm; roànɛ à pɛ̀sɛɛ yì ɓi ziinɛ, à rì lɔŋ ŋwaànɛ ɓi ziinɛ, fɔɔnnɛ a ki kpaakpaa ɓiɓan ɓi ɓi ziinɛ. Ŋwaànɛ à pɛ̀sɛɛ yì a ɗyoo,

³²ɓìɓan ɓi à ghɛngà rì ɓi à wokà ɓyɛɛ̀ɓi a rèrèsì; nni mum à ki teri ɓi rirèsì ɗii ɗiǹ.

³³I mum à ki teri rìrèsì ɗii, di à gherɛɛ yɛɛ lɔɔ lɛ Bɛ̀ll à ti à kpaaghì saaɗ.

³⁴Ɓisuulɛ, roànɛ Bɛ̀ll à romgày, a kakali ɓiɓan ɓi Bɛ̀ll; lɛ Bɛ̀ll à ti à roòzàg nyi rì Nghay wìì lɛ pisa.

³⁵Seŋi à keesii Man, fɔɔnnɛ à faghà ɓìɓan ɓìcèm ɓi ɓyàg ɓii.

³⁶Nni mum ǹcèm ànɛ à gherɛɛ Man, à rì rì cɛɓ ki fiɗyàɓ fikɔ̀ɔ̀; ŋwaànɛ à woogh ɓi nyi, àa ghɛn ɓi cɛɓ, kìɓan kifog, rìbaŋì ɗi Bɛ̀ll ɗi kaka nyi ɓi nyòò.