Read Bafia ZYAŊ 4 Bible Online

ZYAŊ 4 - Bafia bible

ZYAŊ 4

¹Yeesus à wokà lɛ ɓɛ nkalii Ɓɛ̀fàrìzyɛŋ lɛ nyiì syòŋsyoŋ ɓum à cee Zyaŋ lɛ ɓɛɛ ɓa ɓɛ̀yilàg ɓii, à ki ɓàaɓaɓtì ɓɔ;

²wɔ̀lɛ ɓi saaɗ à rìkpaa, Yeesus nyimiɗ a ɓààɓàɓtìghà ɓi ɓum, lɔŋ ɓɛ̀yilàg ɓii ɓɛɛ ɓààɓàɓtìghà ɓɔ.

³Fɔɔnnɛ à pɛ̀sɛ̀ngà a Zyude à sugtì a Galile.

⁴Ki ghɛɛ̀sɛ̀ngà lɛ, a fyeè a Samari.

⁵Nni à kpagà ɓi bàn ìdɛŋ ìnɛ a Samari ɗii lɛ Sikar, jàŋbog rì dɛm inɛ Yakɔɓ à faghà man wiì ànɛ lɛ Yoosɛɓ.

⁶Kìɗig ki Yakɔɓ ki ɓaghà ɓi dɛm inɛ̀n; Yeesus à kɔ̀rìghà ɓi nwɔŋì wu kiɗig kiǹ, di à mɛ fɔy rikɛ̀ɛ̀; ki ghɛɛ̀sɛ̀ngà kì ɓaà nunùg toroɓ.

⁷Fɔɔnnɛ giɓ anɛ a Samari à yùghà kì roògh mɛ̀nig, Yeesus à kpaa nyi lɛ: Faa mɛ̀ mɛ̀nig mɛ nɔyɛn.

⁸Lɛ ɓɛ̀yilàg ɓii ɓɛ kɛngà kì làghiì ɓìɗilàg ɓi bàn.

⁹Nni giɓ anɛ a Samari ànɛn à ɓàkà nyi lɛ: Lannɛ wɔ̀ muu Ɓɛ̀yudɛ̀n, ù lɔni mɛ̀ mɛ̀nig mɛ nɔyɛn, kɔm̀ lɛ mɛ̀ ǹɗì giɓ anɛ a Samari? Lɛ Ɓɛ̀yudɛ̀n ɓɛ ɓaghà ɓi lɛ ɓɛ wooghrɛ̀n ɗì ɓumɓɛ a Samari.

¹⁰Fɔɔnnɛ Yeesus à ɓàkà giɓ anɛ̀n lɛ: I wàa yii rìfa ɗi Bɛ̀ll, ù ki yi roànɛ à lɔni wɔ̀ mɛ̀nig mɛ nɔyɛn, di wɔ̀ yaa rì lɛ, ù lɔn nyi mɛ̀nig mɛ noyɛn, di àa ki faa wɔ̀ mɛ̀nig mɛ cɛɓ.

¹¹Nni giɓ anɛ̀n à kpaaghà nyi lɛ: Kan, wɛ̀ɛnɛ̀n kɛ̀ɛ̀ com ki lɛ ù rog mɛ̀nig miì, kìɗig ki ki rì kìrimɛn, nni mɛ̀nig mɛ cɛɓ mɛ ri wɔ̀ ɓiì ɓaà yì fe?

¹²U fèfeg lɛ wɔ̀ yɛɛ cee seŋi wìs a ǹsɛ̀ɛ̀ anɛ lɛ Yakɔɓ, ànɛ à faghà ɓìsi kìɗig ki, nyimiɗ, rì ɓɔn ɓii, rì ɓìtuwe ɓii, ɓɛ nɔ girig kɔ̀?

¹³Yeesus à ɓàg nyi lɛ: Mum ǹcèm ànɛ à nɔɔ mɛ̀nig mɛ, à rì ti lɔŋ ɓiì woògh kìnɔli.

¹⁴Kìɓan kifog, ŋwaànɛ à rì ɓiì nɔɔ̀ mɛ̀nig mɛ ǹɗì nyi ɓiì faà, àa wogtii gɛ ɓi kinɔli. Lɛ mɛ̀nig mɛ ǹɗì nyi ɓiì faà mɛǹ, mɛ ri ɓiì ghalì ǹsim à cɛɓ ki fiɗyàɓ fikɔ̀ɔ̀ ɓi nɗem wii.

¹⁵Nni giɓ anɛ̀n à kpaaghà nyi lɛ: Kan, faa mɛ̀ mɛ̀nig mɛǹ, di kìnɔli kɛ̀ kɛɛ̀ kìti mɛ, kɛ̀ɛ nki yùti kiroògh mɛ̀nig fɛ.

¹⁶Yeesus à pɛ̀ɛ̀zì nyi lɛ: Kɛ̀nay kìreŋii yii wɔɔ̀, di u sugtiì fɛ.

¹⁷Nni giɓ a ɓàkà nyi lɛ: Mɛ̀ ǹ-yin ɗi yii. Yeesus à kpaa nyi lɛ ù kpaa saaɗ yɔɔ̀ kalii lɛ ù yin ɗi yii;

¹⁸ɓisuulɛ, ù ti mɛ̀wɛy mɛtaǹ, nni ŋwaànɛ ù rì rì nyi ɓigomìnɛ, à yin yii wɔɔ̀, fɔɔnnɛ jɛ̀ɛ̀ ìnɛ wàa kpaa ì rì miì.

¹⁹Nni giɓ a kpaaghà nyi lɛ: Kan! Ǹghɛɛ lɛ, ù rì ǹkpaŋzì-ɓìɓan.

²⁰Ɓɛ̀seŋi ɓis ɓɛ mɓɔgsaagh Bɛ̀ll ɓi dòn ìnɛ, kìɓan kifog mìnii kpaaghì lɛ, a Yorisalɛm nnɛ ɓum ɓɛ ghɛɛ̀sɛɛ kì ɓɔgsaagh Bɛ̀ll.

²¹Fɔɔnnɛ Yeesus à kpaaghà nyi lɛ: Giɓ anɛ! Gherɛn rìkpaa ɗyɛ̀m, lɛ cààmɛ̀n ki riì, ki ɓyàa ɓɔgsi ti ɓi Tààta ɓi dòn ìnɛ, nsoò lɛ a Yorisalɛm.

²²Lɛ mìniì ɓɔɔɓɔgsì com ki ɓì yii ɓi, ɓìsiì ɓɔɔɓɔgsì com ki tì yii, lɛ gòri ì ɓum ì pɛ̀sɛɛ yì a Ɓɛ̀yudɛ̀n.

²³Wɔ̀lɛ cààmɛ̀n ki tiì, kiŋcèm ki mɛ ki kpaŋ, ki ɓɛ̀kɔɔ̀kɔɔ̀ ɓɛ ɓɛ̀ɓɔgsì Bɛ̀ll ɓɛ ri ɓiì ɓɔgsii Tààta rì nghay, rì saaɗ. Ɓumɓɛ ɓɛɛ̀ ɓɔɔ̀ɓɔ̀gsì nyi fɔlɔɔ ɓɛɛ̀ɓɛ Tààta a kaakàà.

²⁴Bɛ̀ll àrì Nghay, fɔɔnnɛ ki ghɛɛ̀sɛɛ lɛ ɓumɓɛ ɓɛɛ̀ ɓɔɔɓɔgsì nyi ɓɛɛ ɓɔgsi nyi rì nghay, rì saaɗ.

²⁵Fɔɔnnɛ giɓ anɛ̀n à kpaaghà Yeesus lɛ: Ǹ-yii lɛ Mèsii à ɓiì yùu, ànɛ à rì ɗii lɛ Kiris. Yɛ̀ɛ à ri yù, à ri kali ɓisi ɓiɓan ɓìcèm.

²⁶Yeesus à kpaa min nyi lɛ: Mɛ̀ ànɛ ntòtog anɛ rì wɔ̀, mɛ̀ yɛɛ ri Mèsii.

²⁷Ɓi cààmɛ̀n kiǹ innɛ ɓɛ̀yilàg ɓɛ Yeesus ɓɛ sugtìghày, ɓɛ kuuràg yɛ̀ɛ ɓɛ ghɛngà nyi di a tòtog ri giɓ, kìɓan kifog, kìbog ki ɓi ɓɔ ki ghɛɛsìghà ɓi lɛ, kɛɛ tɔg nyi lɛ, la yɛɛ ri? Nsoò lɛ cɛ kɛɛ̀ki u kpaakpaa ri giɓ anɛ?

²⁸Nni giɓ a càɗkà bèè yiì ì mɛ̀nig, à sugtì ɓi bàn, à kpaa ɓumɓɛ wɔɔ lɛ:

²⁹Yùuna kìghɛɛ̀ ŋwaàdɛŋ ànɛ àa kpaa mɛ̀ ɓìɓan ɓìcèm ɓi m̀mɛ kì, ɓaà yi ɓi nnyɛɛ ri Kiris.

³⁰Fɔɔnnɛ ɓum ɓɛ pɛsɛ̀ngày ɓi bàn, ɓɛ yu jàŋ inɛ Yeesus à ɓaghà.

³¹Ɓi nyìinyìm ànɛn, ɓɛ̀yilàg ɓii ɓɛ ɓɔɔ̀ɓɔ̀ŋzìghà nyi, di ɓɛɛ̀ kpaakpaa lɛ: Raɓì, ɗiya ɓà maa com.

³²Kìɓan kifog Yeesus à ɓàkà ɓɔ lɛ: Ǹɗì rì ɓìɗilàg ɓidɛŋ ɓi nɗi, ɓi mìnii yii ɓì.

³³Fɔɔnnɛ ɓɛ̀yilàg ɓɛ tɔɔ̀ghtɔ̀ɔ̀ghrɛ̀ngà wɔɔ ɓɔ rì ɓɔ lɛ: Ŋwaàdɛŋ àa rì nya lɛ, à yùy nyi rì com ki ɗiyɛn giǹ?

³⁴Yeesus à kpaa ɓɔ lɛ: Ɓìɗilàg ɓyɛm̀ ɓi ri lɛ nki rìkɔ̀n ɗi roànɛ à romgày mɛ̀, ǹki lègsi kisay ki à faghà mɛ̀.

³⁵Mìnii ti ɓì kpaaghì lɛ ɓɛ̀ŋwii ɓaa rɔ̀ɓ ɓɛnin lɛ mɛ̀saŋ mɛɛ tumɛn. Nni mɛ̀ ǹkpaa mìni lɛ, pìighna mis ɓi ghɛǹ yɛ̀ɛ ɓyom ɓyaa tèɗ ɓi ɓɛ̀dɛm lɛ, ɓɛɛ saŋ.

³⁶Ǹsaŋì-mɛ̀saŋ à mɛ teɗ mɛlèɓ mii, à ki taŋzɛn ɓiɗùn ɓisuu cɛɓ ki fiɗyàɓ fikɔ̀ɔ̀, lɛ di m̀ɓɛ̀lì-ɓyom rì ǹsaŋì-mɛ̀saŋ, ɓɛɛ nyaàrɛn ǹɗaŋ.

³⁷Ɓisuulɛ dàɗkì ìnɛ lɛ, i mum bog à ɓɛ̀li, roàmbog à saŋ, ì rì saaɗ.

³⁸Ǹɗomgà mìni lɛ ɓi kɛǹ mɛ̀saŋ ɓi dɛm inɛ ɓum ɓɛdɛŋ ɓɛɛ salà, mìnii ki ɗiŋi ɓi jàŋ inɛ ɓɔɔ mɛ say kɛ̀ɛ̀ mɛ̀tɔɓ.

³⁹Ɓumɓɛ a Samari lɛɛ̀gwey ɓɛ ɓi bàn ìnɛn, ɓɛ gherɛ̀ngà Yeesus, ɓi rìkpaa ɗi giɓ anɛ̀n à kpaaghà ɓɔ lɛ: Ŋwaànɛ àa kpaa mɛ̀ ɓìɓan ɓìcèm ɓi m̀mɛ kì.

⁴⁰Nni yɛ̀ɛ ɓumɓɛ a Samari ɓɛ yughày nyi a nyoo, ɓɛ ɓɔŋzàg nyi lɛ a kɔri a lɔ̀ŋkaa. Fɔɔnnɛ Yeesus à ghagsìghà mɛ̀ru mɛɓɛɛ̀ wɔɔ.

⁴¹Ɓum ɓɛdɛŋ lɛɛ̀gwey ɓɛ gherɛ̀ngà ɓisuu ɓiɓan ɓi Yeesus nyimiɗ a kpaakpààghà.

⁴²Fɔɔnnɛ ɓɛ kpaaghà giɓ anɛ̀n lɛ, àa rìkpaa ɗyɔɔ ɗyɔ rì ɗyɔ ɗyɛɛ kiì lɛ ti gherɛn. Tì gherɛɛ ɓigomìnɛ lɛ ɓìsiìɓɔmiɗ tì woogh ɓìtòkì ɓii, tì ki yi lɛ, à rì Ǹghɛɓsì-ziinɛ a tààkaà.

⁴³Yɛ̀ɛ mɛ̀ru mɛ kiɓɛ̀ɛ̀ mɛǹ mɛ ghaghìghà, nni Yeesus à pɛ̀sɛ̀ngà wɔɔ lɛ a kɛǹ a Galile.

⁴⁴Lɛ nyimiɗ a kalìghà lɛ: Ǹkpaŋzì-ɓìɓan a maà kem ɓi ɓi kìlɔ̀ŋ kii.

⁴⁵Yɛ̀ɛ à kpagà a Galile, ɓumɓɛ wɔɔ ɓɛ ghaɓ nyi lɛ syeesyee, lɛ ɓɛ ghɛngà ɓìɓan ɓìcèm ɓi à kìghà a Yorisalɛm, ɓi cààmɛ̀n à tìcàɓ ti Paskà, lɛ ɓumɓɛ̀n ɓɛ kɛǹgà girig tìcàɓ tiǹ.

⁴⁶Fɔɔnnɛ à sugtìghà min a Kana, ɓi zi ì Galile, jàŋ inɛ à ghaasìghà mɛ̀nig mɛrɔ̀g. Ǹkɔ̀mɛ̀n-ɓɛ̀sujàà ɓɛ rifòm adɛŋ à ɓaghà a Kapɛrinawum, nni man wiì à baŋì à roròɓkà.

⁴⁷Yɛ̀ɛ ŋwaànɛ̀n à wokà lɛ, Yeesus àa m̀pɛ̀sɛɛ yì a Zyude, à yù a Galile, fɔɔnnɛ à kɛ̀ngà nyi a nyoo, à ɓɔ̀ŋzàg nyi lɛ, ɓɔɔ sɛǹ a Kapɛrinawum, ànɛ̀n a wɔɔ̀zi man wiì à baŋì, ànɛ à ɓaghà di à ti ɓiì kɔ̀ɔkɔɔ̀sì.

⁴⁸Nni Yeesus à kpaaghà nyi lɛ: Mìnii ri lɔŋ lɛ, i ɓì ghɛɛ ɓi dàm yi ɓiɓan, rì ɓɛ̀koŋnyoo ɓɛ ɓiɓan, kɛ̀ ɓi gherɛn.

⁴⁹Fɔɔnnɛ ǹkɔ̀mɛ̀n-ɓɛ̀sujàà à ɓàkà nyi lɛ: Kan yuiy ɓà a mɛɛ mɛm̀ di ŋwɔɓti wɛ̀m à ka maasi ɓi.

⁵⁰Yeesus à kpaa nyi lɛ: Kɛ̀na man wɔɔ̀ à rì cem. Ŋwaànɛ̀n à gherɛ̀ngà rìkpaa ɗi Yeesus à kpaaghà nyi ɗìn, fɔɔnnɛ à pɛ̀sɛ̀ngà à kɛ̀n.

⁵¹Yɛ̀ɛ à sɛnsɛ̀ngà a mɛɛ, nni ɓɛ̀kìì-ɓìsay ɓii ɓɛ yughà nyi kìɓoŋì ɓi bee, ɓɛ kpaa nyi lɛ: Man wɔɔ̀ à rì cem.

⁵²Fɔɔnnɛ à tɔkà ɓɔ lɛ: Fin innɛ nyoo yìì yàa sààmɛɛ? Ɓɛ ɓag̀ nyi lɛ: Ìi nsààmɛɛ rìŋ̀kò ɓi cààmɛ̀n à rìkɛ̀ɛ̀ ɗìfog.

⁵³Fɔɔnnɛ seŋi man ànɛ̀n à yitìghà lɛ, cààmɛ̀n kiǹ kɛɛ̀ki Yeesus àa nkpaa nyi lɛ: Man wɔɔ̀ à rì cem. Nni à gherɛ̀ngà Yeesus rì rìmɛɛ ɗii ɗicèm.

⁵⁴Dàm ìnɛn yɛ̀ɛ ɓaghà dàm ì kìɓɛ̀ɛ̀ inɛ Yeesus à kìghà a Galile, di à ɓaa yì a Zyude.