Read Bafia ZYAŊ 6 Bible Online

ZYAŊ 6 - Bafia bible

ZYAŊ 6

¹Ajɛ̀m ìnɛn, Yeesus à syààghà cɛcɛɗ ki riɓày ànɛ a Galile, ànɛ ɓɛ nɗegì tì lɛ rìɓày ànɛ a Tiɓeriyaadɛ.

²Fɔɔnnɛ coo kituu ki ɓum ki nɔɔ̀tìghà nyi, lɛ ɓɛ ghɛngà dàm yi à kìkìghà ɓi ɓɛ̀roroɓ ɓɛ à wɔ̀ɔ̀wɔ̀ɔ̀zìghà.

³Nni Yeesus à ɓɔkà ɓi dòn aɗyòò, à kɔ̀rì wɔɔ ɓi zi, ri ɓɛ̀yilàg ɓii.

⁴Fɔlɔɔ a ɓaghà di tìcàɓ ti Ɓɛ̀yudɛ̀n ti lɛ Paskà ti ti jàŋbog.

⁵Yeesus à pìkà mis, à ghɛn coo kituu ki ɓum, di kɛɛ̀ yùyuiy nyi a nyoo, fɔɔnnɛ à tɔkà Filiɓ lɛ: Fennɛ tì rì lɛ tì làg bìrɛs ìnɛ lɛ ɓumɓɛ ɓɛ̀cèm ɓɛɛ ɗi?

⁶Yeesus à kpaaghà fɔlɔɔ lɛ, a feèghrɛn Filiɓ lɛ, nyimiɗ a yighà com ki à rì ɓiì kìi.

⁷Nni Filiɓ à ɓàkà nyi lɛ: Nsoò bìrɛs ì ɓɛ̀hɔnɗɛ̀ɗ ɓɛ ɓɛtɔɔsìm ɓɛɓɛɛ̀, ì yin lɛ ì ghɛ̀ɛ̀sɛ̀n lɛ mum ǹcèm à ɗi maa kìɓɛghà.[5]

⁸Fɔɔnnɛ ǹ-yilàg wìì adɛŋ ànɛ lɛ Andire, geni Simɔn Pyɛɛri à kpaaghà nyi lɛ:

⁹Maa ŋwɔɓti à baŋì àdɛŋ à rì fɛ lɛ, rì bìrɛs yitaǹ yi ɓɛ kii rì rìkuu ɗi gèŋ ɗilɛ ɔrìzɛ̀, rì ɓìzɛn ɓiɓɛɛ̀, nni ɓi ri lɛ ɓi ki cɛ ri gɛ mum ànɛ?

¹⁰Fɔɔnnɛ Yeesus à kpaaghà ɓɔ lɛ: Kɔ̀ɔ̀siina ɓumɓɛ̀n ɓi zi. Ɓyaaɓi ɓi ɓaghà ɓi jàŋ inɛ̀n lɛɛ̀gwey, nni ɓumɓɛ̀n ɓɛ kɔrìghà min ɓi zi, ɓɛ ɓaghà nunùg ɓum ɓɛ̀tɔɔsìm ɓɛtaǹ.

¹¹Fɔɔnnɛ Yeesus à tekà bìrɛs, à fa Bɛ̀ll ɓìtògsɛ̀n, à kàɓsì yɔ̀ ri ɓumɓɛ ɓɛ ɓaghà wɔɔ ɓɛǹ; fɔɔnnɛ à fatìghà girig ɓɔ ɓìzɛn gàɓ ìnɛ ɓɛ kɔnkɔ̀ngà lɛ ɓɛɛ ɗi.

¹²Yɛ̀ɛ ɓumɓɛ̀n ɓɛ wuràkà, nni Yeesus à kpaaghà ɓɛ̀yilàg ɓii lɛ: Taŋ̀zɛɛna ɓìɓɛghà ɓi bìrɛs ɓi ɓi rɔɓtaagh lɛ com kɛ̀ kɛɛ̀ ɗyoŋ.

¹³Nni ɓɛ ɓadɛ̀ngà ɓìɓɛghà ɓi bìrɛs ɓi ɓumɓɛ ɓɛ ɗìghà ɓɛ caɗkà, ɓɛ roòzì ɓìkàɗ ntɛ̀ɗ rì ɓiɓɛɛ̀; ɓi bìrɛs yi kitaǹ yi yi ɓaghà yiǹ yi kìyɛn ɗi ɔrìzɛ̀.

¹⁴Yɛ̀ɛ ɓumɓɛ̀n ɓɛ ghɛngà dàm ì kìɓan inɛ̀n, nni ɓɛ kpaaghà lɛ: Roànɛ à rì lɔŋ ǹkpaŋzì-ɓìɓan anɛ ɓɛ kpaaghà lɛ, à ɓiì yùu ɓi ziinɛ.

¹⁵Yɛ̀ɛ Yeesus à yighà lɛ ɓɛ ti ɓiì kìi lɛ, ɓɛɛ ɓan nyi, ɓɛɛ ɓɔgsi nyi rìfòm ɓi-tèɗ, nni à ghàghìghà à ɓɔgtì ɓi dòn cɛ̀ncii.

¹⁶Yɛ̀ɛ cɛŋkò ki kpagà, nni ɓɛ̀yilàg ɓii ɓɛ sɛngà ɓi rìɓày.

¹⁷Ɓɛ ɓɔg ɓi kìkɔm lɛ ɓɛɛ syaà cɛcɛɗ ki riɓày a Kapɛrinawum; birìm ì kpìghà di Yeesus à ka tanɛn ɓi lɔŋ ɓɔ.

¹⁸Fɔɔnnɛ bɛ̀ɓ ì fɛɛ̀fɛ̀ɓsìghà rì ìtèɗ, rìɓày à pìpìg ɓìkus.

¹⁹Yɛ̀ɛ ɓɛ ɓaghà di ɓɛ mɛ fyèè riɓày fɛlɛ yɛ̀ɛ ɓɛ̀kilòmɛɛ̀tɛ̀rɛ̀ ɓɛtaǹ nsoò lɛ taàfog, nni ɓɛ ghɛngày Yeesus di a kɛ̀ɛ̀kɛɛ yi ɓi rìɓày aɗyòò, à yùyùy jàŋbog rì kìkɔm, ìris wu ɓan ɓɔ.

²⁰Nni Yeesus à kpaaghà ɓɔ lɛ: Mɛ̀ yɛɛ ri, kɛ̀ ɓi risi.

²¹Ɓɛ mɛɛ̀ kìghà lɛ, ɓɛɛ teɗ nyi ɓi kìkɔm, nni ki ghaskà kì lomì ɓi bèn ì rìɓày jàŋ inɛ ɓɛ kɛnkɛ̀ngà.

²²Ɓi duri tana, kìtuu ki ɓum ki ki rɔɓkày cɛcɛɗ ki riɓày, ki ghɛngà lɛ, kìkɔm kìfog kɛɛ nɗì wɔɔ. Nni Yeesus àa nki ɓɔɔgh ɓi ɓi kìkɔm kiŋcèm ǹɗaŋ ri ɓɛ̀yilàg ɓii, lɔŋ ɓɔ yɛɛ nkɛ̀ɛ ɓi kìkɔm kìn cɛ̀ncaa.

²³Wɔ̀lɛ ɓìkɔm ɓidɛŋ ɓi ɓaghày a Tiɓeriyaadɛ, jàŋbog rì jàŋ inɛ ɓɛ ɗighà bìrɛs, di Kan à mɛ fa Bɛ̀ll ɓìtògsɛ̀n.

²⁴Yɛ̀ɛ ɓumɓɛ̀n ɓɛ ghɛngà lɛ nsoò Yeesus nsoò ɓɛ̀yilàg ɓii, àdɛŋ à ɓaghà ɓi wɔɔ, fɔɔnnɛ ɓɔmiɗ ɓɛ ɓɔkà ɓi ɓìkɔm ɓìn, ɓɛ kɛǹ kì kaà Yeesus a Kapɛrinawum.

²⁵Ɓɛ kɛǹgà nyi kìtanɛɛ cɛcɛɗ ki riɓày, ɓɛ tɔg nyi lɛ: Raɓì, wɔ̀ɔ n-yùu fɛ̀ fin?

²⁶Yeesus à ɓàg ɓɔ lɛ: Ǹkpaa mìni kɔɔ̀kɔɔ̀ à rìkpaa lɛ, àa ɓisuulɛ ɓìi nghɛɛ dàm nnɛ ɓi kaakaa mɛ; ɓi kaakaa mɛ lɛ, yɛ̀ɛ ɓìi nɗii bìrɛs ɓì wuràg.

²⁷Kɛ̀ ɓi say ɓisuu ɓiɗilàg ɓi ɓi ri lɛ ɓi ɗyoŋ, salina ɓisuu ɓiɗilàg ɓi ɓi ri lɛ ɓi kɔrì à kpaŋ ɓi cɛɓ ki fiɗyàɓ fikɔ̀ɔ̀, ɓyɛɛ̀ ɓi Man à mum à rì mìni ɓiì faà, lɛ nyi nnɛ Bɛ̀ll Seŋi à fogà kìrèmzɛnà ki rilàmì ɗii ɓi nyi.

²⁸Nni ɓɛ tɔkà Yeesus lɛ: Tì ghɛ̀ɛ̀sɛɛ kì kìi cɛ ɓi ɗi lɛ ti say ɓisuu ɓiɓan ɓi Bɛ̀ll a kɔ̀nkɔ̀n?

²⁹Yeesus à ɓàg ɓɔ lɛ: Kìsay ki Bɛ̀ll ki ri lɛ, ɓi gherɛn roànɛ Bɛ̀ll à romgày.

³⁰Nni ɓɛ tɔkà nyi lɛ: Dàm ì kìɓan aɗi yɛɛ̀ nnɛ ù kìi, ìnɛ ìrì lɛ, i tì ghɛɛ, tì gherɛ̀n wɔ̀? Kìsay aɗi kɛɛ̀ki wɔ̀ɔ kìkì?

³¹Ɓɛ̀seŋi ɓis ɓɛ ɗighà manà ɓi-reɓ yɛ̀ɛ ki ri kìkànɛn lɛ: À faghà ɓɔ bìrɛs ìnɛ ì rìì aɗyoo lɛ ɓɛɛ ɗi.

³²Yeesus à kpaa ɓɔ lɛ: Ǹkalii mìni ɓi saaɗ lɛ, àa Moyis yɛɛ faghà mìni bìrɛs ìnɛ ì sɛngày aɗyòò, kìɓan kifog Seŋi wɛ̀m yɛɛ faa mìni kɔɔ̀kɔɔ̀ à bìrɛs ànɛ à rìì aɗyòò.

³³Lɛ bìrɛs ì Bɛ̀ll ì rì bìrɛs ìnɛ ì sɛniì aɗyòò, ì ki fa ziinɛ cɛɓ.

³⁴Nni ɓɛ kpaaghà min nyi lɛ Kan, falag ɓìsi bìrɛs ìnɛ̀n ɓyààmɛ̀n ɓìcèm.

³⁵Yeesus à kalìghà ɓɔ lɛ: Mɛ̀ ǹɗì bìrɛs ì cɛɓ, ŋwaànɛ à yùu a lɔ̀ŋkɛm̀ zày, yàa kɔɔdii gɛ ɓi nyi. Ŋwaànɛ à ki gherɛɛ mɛ̀, kìnɔli kaa kitii gɛ ɓi nyi.

³⁶Ǹki kpaaghà mìni fɔlɔɔ, ɓì ghɛn mɛ̀, kɛ̀ ɓi ki gherɛn.

³⁷Ɓum ɓɛ̀cèm ɓɛ Tààta à faa mɛ̀, ɓɛ ri ɓiì yùu a lɔ̀ŋkɛm̀, nni màa ki kpaŋzi ɓi ŋwaànɛ à yùu yì a lɔ̀ŋkɛm̀ ɓi ɗyɔ̀m.

³⁸Ɓisuulɛ, ǹsɛngày ɓi aɗyoo lɛ nki rìkɔ̀n ɗyɛm̀, ǹsɛngày lɔŋ lɛ nki rìkɔ̀n ɗi roànɛ à romgày mɛ̀.

³⁹Nni rìkɔ̀n ɗi roànɛ à romgày mɛ̀ ɗyɛɛ̀ɗi: Lɛ kɛ̀ɛ nɗimzi nsoò mum bog, ɓi ɓum ɓɛ̀cèm ɓɛ à faghà mɛ̀. Ǹghɛ̀ɛ̀sɛɛ lɔŋ ɓɔ kì ghèmzii, ɓi siitòn a ŋwos.

⁴⁰Lɛ rìkɔ̀n ɗi Seŋi wɛ̀m ɗyɛɛ̀ɗi: Lɛ mum ǹcèm ànɛ à ghɛɛ Man, à ki gherɛn nyi, a ɓa rì cɛɓ ki fiɗyàɓ fikɔ̀ɔ̀, mɛ̀ ǹki ghèmzii gɛ nyi ɓi siitòn a ŋwos.

⁴¹Fɔɔnnɛ Ɓɛ̀yudɛ̀n ɓɛ ŋwɔŋwɔ̀ŋìghà nyi lɛ, à kpaaghà lɛ: Mɛ̀ ǹɗì bìrɛs ìnɛ ì sɛngày aɗyòò.

⁴²Ɓɛ kpaakpààghà lɛ: Àa Yeesus à man à Yoosɛɓ yɛɛ ri lɛ? Tì yii lɛ rì seŋi rì jɛɛ, nni lannɛ a kpaaghi ɓigomìnɛ lɛ, nyii ri bìrɛs ìnɛ ì sɛngày aɗyòò?

⁴³Yeesus à pɛ̀ɛ̀zìghà ɓɔ lɛ: Kɛ̀ ɓi ŋwɔ̀ŋwɔŋi, mìni rì mìni.

⁴⁴Mum à yin lɛ à yù a lɔ̀ŋkɛm̀ di Tààta ànɛ à romgày mɛ̀ à syòŋiì ɓi nyi, mɛ̀ ǹki ghèmzii gɛ ŋwaànɛ̀n miì ɓi siitòn a ŋwos.

⁴⁵Ki ri kìkànɛn ɓi kaàtà à ɓɛ̀kpaŋzì-ɓìɓan lɛ: Bɛ̀ll à rì ɓiì rèsaagh ɓɔ ɓɛ̀sɛ̀ɛ̀ ɓɛ̀cèm, fɔɔnnɛ mum ǹcèm ànɛ à wokà jɛ̀ɛ̀ ì Tààta, à ki teɗ rirèsàg ɗii, nnyɛɛ ri lɛ à yù a lɔ̀ŋkɛm̀.

⁴⁶Fɔlɔɔ a rèsii ɓi lɛ ŋwaàdɛŋ à ka ghɛngà Tààta, lɔŋ roànɛ à ɓaghày yɛ̀ɛ Bɛ̀ll yɛɛ ghɛngà Tààta cɛ̀ncii.

⁴⁷Ǹkpaa mìni kɔɔ̀kɔɔ̀ à rìkpaa lɛ ŋwaànɛ à gherɛɛ mɛ̀, à rì rì cɛɓ ki fiɗyàɓ fikɔ̀ɔ̀.

⁴⁸Mɛ̀ yɛɛ ri bìrɛs ì cɛɓ.

⁴⁹Ɓɛ̀seŋi ɓin ɓɛ ɗighà manà ɓi-reɓ, ɓɛ ki cuu.

⁵⁰Lɔŋ bìrɛs ìnɛ ì sɛngày aɗyoo, yɛɛ̀nɛ, lɛ ŋwaànɛ à ɗii yɔ̀, kɛ̀ɛ wù.

⁵¹Ǹɗì bìrɛs ì cencem ìnɛ ì sɛngày aɗyòò, ŋwaànɛ à ɗii bìrɛs ìnɛ̀n, à rì ɓiì ghɛɓì fìɗyàɓ fikɔ̀ɔ̀. Bìrɛs ìnɛ m̀ɓiì faà ìnɛ̀n, yɛ̀ɛ ri nyoo yɛ̀m ìnɛ ǹɗì ɓiì faà, lɛ ziinɛ yɛ̀ɛ ɓa rì cɛɓ.

⁵²Ɓi jɛ̀ɛ̀ ìnɛn, Ɓɛ̀yudɛ̀n ɓɛ tumɛ̀ngà rìnyoònyòlɛ̀n ɓɔ rì ɓɔ, ɓɛ kpaakpàà lɛ: Lannɛ ŋwaànɛ à rì lɛ à fa ɓìsi nyoo yìì lɛ ti ɗi yɔ̀?

⁵³Nni Yeesus à kpaaghà ɓɔ lɛ: Ǹkpaa mìni ɓi saaɗ lɛ, i ɓì ɗii ɓi nyoo ì Man à mum, kɛ̀ ɓi ki nɔ bwaɓ yii, ɓì yin lɛ ɓì ɓa rì cɛɓ ki kɔɔ̀kɔɔ̀.

⁵⁴Ŋwaànɛ à ɗii nyoo yɛ̀m, à ki nɔ bwaɓ yɛm̀, à rì rì cɛɓ ki fiɗyàɓ fikɔ̀ɔ̀, ǹɗì ɓiì ki ghèmzii nyi ɓi siitòn a ŋwos.

⁵⁵Lɛ nyoo yɛ̀m ì rì ɓìɗilàg ɓi kɔɔ̀kɔɔ̀, bwaɓ yɛm̀, kɔɔ̀kɔɔ̀ à com ki nɔyɛ̀n.

⁵⁶Ŋwaànɛ à ɗii nyoo yɛ̀m, à nɔ bwaɓ yɛm̀, à rì ǹɗàrɛn ɗi mɛ̀, mɛ̀ girig ǹɗàrɛn ɗi nyi.

⁵⁷Fɛlɛ yɛ̀ɛ Tààta ànɛ à rì cem a romgày mɛ̀, mɛ̀ ǹki ɓa ri cɛɓ lɛ nyi, fɔlɔɔ nnɛ ŋwaànɛ à ɗii mɛ̀, à ɓiì ghɛɓì lɛ mɛ̀.

⁵⁸Bìrɛs ìnɛ ì sɛngày aɗyoo yɛ̀ɛ ri lɛ; ì yin yɛ̀ɛ ìnɛ ɓɛ̀seŋi ɓin ɓɛ ɗighà ɓɛ cuu; nni ŋwaànɛ à ɗii bìrɛs ìnɛ, à rì ɓiì ghɛɓì fìɗyàɓ fikɔ̀ɔ̀.

⁵⁹Yeesus à kpaaghà ɓìɓan ɓi, yɛ̀ɛ à rèèrèsàkà ɓum ɓi naà-bɔ̀ŋzɛ̀n ìnɛ a Kapɛrinawum.

⁶⁰Yɛ̀ɛ ɓɛ̀yilàg ɓɛ wokà ɓìɓan ɓi Yeesus à kpaaghà ɓiǹ, nni kìgwey ki kalìghà lɛ: Ɓìtòkì ɓi ɓi teèsɛɛ, ghɛn yɛɛ ri lɛ à cenɛ̀n ɓyɔ rìwowòg?

⁶¹Yɛ̀ɛ Yeesus à yighà ɓi nɗem wii lɛ ɓɛ̀yilàg ɓii ɓɛɛ̀ ŋwɔ̀ŋwɔŋi nyi ɓi kìɓan kiǹ, nni à kpaaghà ɓɔ lɛ: Kìɓan kiǹ ki kɛɓtii mìni fìɓàg?

⁶²I ɓì ki ghɛɛ Man à mum di a ɓɔɓɔg aɗyoo jàŋ inɛ à ka ɓaghà, ki ɓa min la?

⁶³Ǹghay wɛɛ̀ fafa cɛɓ, mɛ̀mùù mɛ yin ɗi gɛɓsɛ̀n. Fɔɔnnɛ ɓìɓan ɓi màa kpaa mìni ɓi ri ɓìɓan ɓi Nghay, rì ɓi cɛɓ.

⁶⁴Kìɓan kifog, ɓum ɓɛdɛŋ ɓɛ ɓi nyìinyìm wìn ɓɛ gherɛɛ ɓi. Lɛ a rìtumɛ̀n Yeesus à yighà ɓumɓɛ ɓɛ gherɛ̀ngà ɓi, rì roànɛ à ghɛ̀ɛ̀sɛ̀ngà nyi kìkàɓi.

⁶⁵Fɔɔnnɛ à kpaaghà lɛ: Kìɓan ki kɛɛ̀ki ǹkpaaghà mìni miì lɛ mum à yin lɛ à yù a lɔ̀ŋkɛm̀ di Tààta à faa ɓi nyi fèg ànɛ̀n.

⁶⁶À tumɛ̀n ɓi cààmɛ̀n kiǹ, ɓɛ̀yilàg ɓii lɛɛ̀gwey ɓɛ ghaaghràkà, ɓɛ̀ kɛɛ̀ nɔ̀ɔ̀ti ti nyi.

⁶⁷Nni Yeesus à kpaaghà min ɓɛyilàg ɓɛ kiǹtɛ̀ɗ rì ɓɛɓɛɛ̀rɛn lɛ: Mìnii kɔni ɓi lɛ ɓi ghaàrag girig?

⁶⁸Simɔn Pyɛɛri à pɛ̀ɛ̀zìghà nyi lɛ: Kan, tì ɓiì kɛ̀ɛ yɛ̀ɛ ghɛn? Ù rì rì ɓìɓan ɓi cɛɓ ki fiɗyàɓ fikɔ̀ɔ̀.

⁶⁹Fɔɔnnɛ tì mɛ gherɛ̀n, tì ki yi lɛ wɔ̀ yɛɛ ri roànɛ à rì ǹtenɛn ànɛ à ɓaghày yɛ̀ɛ Bɛ̀ll.

⁷⁰Yeesus à pɛ̀ɛ̀zì ɓɔ lɛ: Mɛ̀ɛ nti mɛ̀ yɛɛ ɓɔngà mìni ɓɛ̀sɛ̀ɛ̀ ntɛ̀ɗ rì ɓɛɓɛɛ̀? Ǹsoò fɔlɔɔ, kìbog ki ɓi mìni ki ri Satàn.

⁷¹Zyudas à man à Simɔn Iskariyot innɛ à kpaakpààghà lɔɔ lɛ nnyɛɛ ɓaghà kìbog ki ɓi ɓɛ̀yilàg ǹtɛ̀ɗ rì ɓɛɓɛɛ̀ , ki ki ghɛɛ̀sɛ̀ngà nyi kì kàɓi.