Read Bafia ZYAŊ 7 Bible Online

ZYAŊ 7 - Bafia bible

ZYAŊ 7

¹Ajɛ̀m ìnɛn, Yeesus à rerènìghà ziì Galile lɛ à kɔ̀ngà ɓi lɛ a kɛǹ kì kɛ̀ɛ̀kɛɛ a Zyude, lɛ Ɓɛ̀yudɛ̀n ɓɛ kaakààghà lɛ ɓɛɛ wey nyi.

²Tìcàɓ ti Ɓɛ̀yudɛ̀n ti lɛ tìcàɓ ti ɓilaa[6] ti ɓaghà di ti ti jàŋbog.

³Nni ɓɛ̀geni ɓɛ Yeesus ɓɛ kpaaghà nyi lɛ: Pɛ̀sɛn fɛ, u kɛǹ a Zyude, di Ɓɛ̀yilàg ɓɔɔ ɓɛɛ ghɛǹ girig ɓìɓan ɓi u kìki fɛ.

⁴Mum à yin lɛ à kìkì ɓìɓan a rìnyam di a kɔ̀nkɔn lɛ ɓɛɛ yi nyi. Nni yɛ̀ɛ u kìki ɓiɓan yɛ̀ɛ ɓi, kpaŋzi ɓyɔ mum bimiɗ a yi wɔ̀.

⁵Lɛ nsoò ɓɛ̀geni ɓii ɓɛ gherɛ̀ngà ɓi nyi.

⁶Yeesus à kalì ɓɔ lɛ: Cààmɛ̀n kɛm̀ ki ka kpaŋ ɓi, mìni yɛɛ ri rì syeesyee à cààmɛ̀n ɓyààmɛ̀n ɓìcèm.

⁷Ziinɛ ì yin lɛ ì ɓèèzɛ̀n mìni wɔ̀lɛ mɛ̀ɛnɛ yɛɛ̀ ɓèeɓeèzɛ̀n, lɛ ǹti ǹkalàg lɛ, mɛ̀kìkii mɛ yɔ̀ mɛ rɔɔtɛɛ ɓì.

⁸Mìnii ɓɔɔghna ɓi kɛǹ tìcàɓ, ɓi san wɛ̀m, mɛ̀ ǹka yin ɓiì ɓɔɓɔɔgh wɔɔ lɛ, cààmɛ̀n kɛm̀ ki ka ghɛɛ̀sɛn ɓi.

⁹Yɛ̀ɛ à kpaaghà ɓɔ fɔlɔɔ, nni à rɔ̀ɓkà a Galile.

¹⁰Yɛ̀ɛ ɓɛ̀geni ɓɛ ɓaghà di ɓɛ mɛ ɓɔg a tìcàɓ, nni nyimiɗ a ɓɔkà girig wɔɔ, wɔ̀lɛ à ɓɔkà ɓi ɓi mɛ̀tàna, lɔŋ a rìnyam nnɛ à ɓɔkà.

¹¹Nni Ɓɛ̀yudɛ̀n ɓɛ kaakààghà nyi ɓi cààmɛ̀n à tìcàɓ di ɓɛɛ̀ kpaakpaa lɛ: À rì fe?

¹²Fɔɔnnɛ ɓumɓɛ ɓi gwìy ìnɛn ɓɛ rurùmìghà lɛɛ̀gwey ɓi kìɓan kii. Ɓɛ̀ro ɓɛdɛŋ lɛ: À rì syeesyee à mum; ɓɛ̀ro ɓɛmbog lɛ: Àg! A nàanaàzì gì kɔm̀ ɓum bee.

¹³Nsoò fɔlɔɔ, mum à ghɛɛsìghà ɓi lɛ a ɓuŋ nyi fɛlɛ lɛ tɛntɛ̀ɛ̀n ɓi mɛ̀reè mɛ ɓum lɛ ɓɛ rirìsìghà Ɓɛ̀yudɛ̀n.

¹⁴Yɛ̀ɛ tìcàɓ ti ɓaghà di ti ti ɓi nyìinyìm, Yeesus à ɗiŋìghà ɓi naà-Bɛ̀ll, à tum rìrèsàg ɗi ɓum.

¹⁵Nni Ɓɛ̀yudɛ̀n ɓɛ kuùkùùghràkà ɓɛ kpaakpàà lɛ: Ki ɓaa la lɛ, a yi ɓìɓan ɓi ɓi ri ɓìkànɛ̀n, kɛ̀ɛ̀fɛ à yilaagh ɓyɔ?

¹⁶Fɔɔnnɛ Yeesus à ɓàkà ɓɔ lɛ: Ɓìɓan ɓi nɗèeresàg ɓi, ɓi yin ɓiɓan ɓyɛm̀ ɓi mɛ̀ɛmiɗ, ɓi ri lɔŋ ɓiɓan ɓi roànɛ à romgày mɛ̀.

¹⁷Ŋwaànɛ à kɔ̀ni lɛ a ki rìkɔ̀n ɗi Bɛ̀ll yɛɛ ri ɓiì yiì ǹkòo ɓìɓan ɓi Bɛ̀ll ɓyɛɛ̀ɓi nɗèrèsì, nkòo ɓiŋkɛ̀m ɓi mɛ̀ɛmiɗ.

¹⁸Ŋwaànɛ a kpaakpaa ɓiɓan ɓii ɓi nyimiɗ yɛɛ̀ kaakaa rikem ɗii, wɔ̀lɛ roànɛ a kaakaa rikem ɗi roànɛ à romgày nyi, nnyɛɛ̀ kpaakpaa saaɗ, kɛ̀ɛ ki ɓa ri kìɓan kidɛŋ ki ki ri kìtɛ̀ŋtɛ̀ŋ.

¹⁹Mɛ̀ɛ nti Moyis à faghà mìni ɓìdɔ̀gsɛna kìɓan kifog, nsoò wààdɛŋ ù ɓèŋi ɓi ɓidɔ̀gsɛna ɓiǹ; nni ɓi kaakaa lɛ ɓi wey mɛ̀ lɛ cɛ?

²⁰Nni gwìy ì ɓum ì ɓàkà nyi lɛ: Ù rì rì kìɓeɓtàg ki nghay; ghɛn yɛɛ̀ kɔ̀nkɔn lɛ a wey wɔ̀?

²¹Yeesus à pɛ̀ɛ̀zì ɓɔ lɛ: Mɛ̀ɛ ǹkìi lɔŋ kiɓan kifog, kɛɛ ǹkegsii mìni lɛ ɓɛ̀sɛ̀ɛ̀ ɓɛ̀cèm.

²²Ɓì ti ɓì kɛ̀ɗkì mum ŋwosi Saɓàt lɛ yɛ̀ɛ Moyis yɛɛ faghà mìni ìtèɗ ɓisuu kɛ̀rɛ̀n; nsoò yɛ̀ɛ ki yin lɛ Moyis yɛɛ kpagày rì nyi, lɔŋ ɓɛ̀seŋi ɓin ɓɛ ɓɛsɛ̀ɛ̀mɛn ɓɛɛ lokà kì kpaŋìì rì nyi.

²³I ɓì rì lɛ ɓì kɛ̀ɗ ŋwɔɓti ŋwosi Saɓàt, fɔlɔɔ kɛ̀ɛ ki yogsi ɓidɔ̀gsɛna ɓi Moyis, nni lannɛ ɓi woki bim ri mɛ̀ lɛ mɛ̀ɛ ǹwɔ̀ɔ̀zii mum lɛ kɔɔ̀kɔɔ̀ ŋwosi Saɓàt?

²⁴Kɛ̀ ɓi teki ɓiɓan ɗyoo rì ɗyoo, ɓàkiina kìɓan yɛ̀ɛ saaɗ a kɔ̀nkɔ̀n.

²⁵Ɓum ɓɛdɛŋ ɓɛ a Yorisalɛm ɓɛ kpaakpààghà lɛ àa ŋwaànɛ ɓɛɛ̀ kaakaa lɛ ɓɛɛ wey yɛɛ ri lɛ?

²⁶Nni ghɛɛna min yɛ̀ɛ a tòtog lɛ fwàafwàày ɓi nyìinyìm à ɓum, ɓɛ̀ kɛɛ̀ ki kpaa nyi com. Ɓɛ̀làmì ɓis ɓɛ mɛ konag nya kì yiì lɛ nnyɛɛ ri Kiris gìn?

²⁷Ɓìsii yii jàŋ inɛ ŋwaànɛ à pɛ̀sɛɛ yì, wɔ̀lɛ yɛ̀ɛ Kiris à ri yù mum àa yi ɓi fennɛ à pɛ̀sɛɛ yì.

²⁸Yɛ̀ɛ Yeesus à rèrèsàkà ɓum fɔlɔɔ ɓi naà-Bɛ̀ll, nni à kpaaghà jɛ̀ɛ̀ aɗyoo lɛ: Ɓì yii mɛ̀, ɓì ki yi fennɛ m̀pɛ̀sɛɛ yì; kɔm̀ lɛ m̀pɛ̀sɛ̀ngày ɓi ri nto wɛ̀m, kìɓan kifog roànɛ à romgày mɛ̀ yɛɛ̀ kpaakpaa saaɗ, nyi nnɛ ɓì yii ɓi.

²⁹Mɛ̀ ǹ-yii nyi lɛ ǹɗì fɛ ɓisu wii, rì tì lɛ, nnyɛɛ romgày mɛ̀.

³⁰Fɔɔnnɛ ɓɛ kaakààghà bee inɛ ɓɛɛ ɓaǹ nyi, kìɓan kifog mum à ki saghìghà ɓi nyi càg ɓi nyoo, ɓisuulɛ, cààmɛ̀n kii ki ɓaghà di ki ka kpaŋ ɓi.

³¹Ɓi gwìy ìnɛn, ɓum lɛɛ̀gwey ɓɛ gherɛ̀ngà nyi, ɓɛ kpaakpàà lɛ: Yɛ̀ɛ Kiris à ri yù, à ri kì nya dàm yi yi cee yi ŋwaànɛ a kìkì?

³²Ɓɛ̀fàrìzyɛŋ ɓɛ wokà yɛ̀ɛ ɓum ɓɛ ŋwɔŋwɔ̀ŋìghà fɔlɔɔ ɓi kìɓan kii; nni ɓɛ̀pìrɛɛtìrɛ̀ ɓɛgwey rì Ɓɛ̀fàrìzyɛŋ ɓɛ romgà ɓɛ̀sujàà lɛ ɓɛɛ ɓaǹ nyi.

³³Yeesus à kpaa lɛ: Mɛ̀ ǹkaka tì rì mìni ɓi maa cààmɛ̀n, fɔɔnnɛ ǹɗì ɓiì kɛ̀ɛ min yɛ̀ɛ roànɛ à romgày mɛ̀.

³⁴Ɓì rì mɛ̀ ɓiì kaà, kɛ̀ ɓi ghɛn mɛ, lɛ ɓì yin lɛ ɓì kpaŋ jàŋ inɛ m̀ɓiì ɓaà.

³⁵Nni Ɓɛ̀yudɛ̀n ɓɛ tɔɔghrɛ̀ngà ɓɔmiɗ lɛ: Fennɛ àrì ɓiì kɛ̀ɛ ɓi ɗi lɛ tyɛ̀ ki ghɛn nyi? A kɛ̀n nya a Ɓɛ̀yudɛ̀n ɓɛ ɓɛ ri ɓɛ̀sààtɛn ɓi bàn yi Gìrɛg, à rèèrèsàg ɓumɓɛ ɓɛ ri Gìrɛg wɔɔ giǹ?

³⁶Jɛ̀ɛ̀ ìnɛ à kpaa lɛ: Ɓì rì mɛ̀ ɓiì kaà, ɓyɛ̀ ki ghɛn mɛ; rì ìnɛ lɛ: Jàŋ inɛ ǹɗì ɓiì ɓaà, ɓì yin lɛ ɓì kpaŋ wɔɔ, yi ri azi lɛ cɛ?

³⁷Ɓi ŋwos a siitòn, ànɛ à ɓaghà gɛn à ŋwos a tìcàɓ tiǹ, Yeesus à pɛ̀sɛ̀ngà aɗyoo, à làmɓɛ̀n lɛ: I mum a wowog kinɔli, a yu a lɔ̀ŋkɛm̀, a nɔ.

³⁸Ŋwaànɛ à gherɛɛ mɛ̀, mɛ̀syòm mɛ mɛnig mɛ cɛɓ mɛ ri nyi ɓiì ɓɛ̀nɓɛniì ɓi nɗem fɛlɛ yɛ̀ɛ ki ri kìkànɛn.

³⁹Kìɓan ki Nghay ànɛ ɓumɓɛ ɓɛ gherɛɛ nyi ɓɛ ghɛɛ̀sɛ̀ngà kìterì kɛɛ̀ki à kpaakpààghà lɔɔ. Ɓisuulɛ cààmɛ̀n kiǹ ki ɓaghà di ɓɛ ka rom yi ɓi Nghay, rì tì lɛ Yeesus à ɓaghà di à ka teɗ ɓi rìkem ɗìì.

⁴⁰Ɓum lɛɛ̀gwey ɓɛ ɓaghà lɛ, ɓɛ mɛ wog ɓitòkì ɓiǹ, nni ɓɛ kpaaghà lɛ: Ki ri lɔŋ kɔɔ̀kɔɔ̀ lɛ ŋwaànɛ yɛɛ ri ǹkpaŋzì-ɓìɓan.

⁴¹Ɓɛ̀ro ɓɛdɛŋ ɓɛ kpaa lɛ: À rì Kiris, ɓɛ̀ro ɓɛmbog ɓɛ kpaa lɛ: Kiris à rì lɛ à ɓay a Galile?

⁴²Mɛ̀kànì mɛɛ̀ kpaaghi lɛ Kiris à rì ɓiì ɓaà yì ɓi boo ì mum ì Davit, ɓi bàn ì Bɛtilɛhɛm, jàŋ inɛ Davit à yalɛ̀ngà.

⁴³Nni ɓum ɓɛ rɔɓkà fɔlɔɔ, mɛ̀rɛli dɛŋ dɛ̀ŋ dɛŋ ɓi kìɓan kii.

⁴⁴Fɔɔnnɛ ɓum ɓɛdɛŋ ɓɛ ɓi nɗaŋ wu ɓumɓɛ̀n, ɓɛ mɛɛ̀ fèkà lɛ ɓɛɛ ɓaǹ nyi, kìɓan kifog mum à saghìghà ɓi nyi càg ɓi nyòò.

⁴⁵Ɓɛ̀sujàà ɓɛ sugtìghà a Ɓɛ̀pìrɛɛtìrɛ̀ ɓɛgwey rì a Ɓɛ̀fàrìzyɛŋ, ɓɛ̀roɓɛ̀n ɓɛ tɔg ɓɔ lɛ: Ɓì yùu yì ɓi ri nyi lɛ cɛ?

⁴⁶Ɓɛ̀sujàà ɓɛ ɓaàg lɛ: Mum à ka tokàkà ɓi yɛ̀ɛ ŋwaànɛ̀n.

⁴⁷Nni Ɓɛ̀fàrìzyɛŋ ɓɛ pɛɛ̀zìghà ɓɛ̀sujàà ɓɛǹ lɛ: Mìni girig ɓyàa càrɛɛ lɛ a yegsi mìni wa?

⁴⁸Mìnii mɛ ghɛn nya di ǹlàmì àdɛŋ, nsoò lɛ Fàrìzyɛŋ àdɛŋ à gherɛɛ nyi?

⁴⁹Mìni ɓumɓɛ ɓi gwìy ìnɛ ì yii ɓi ɓidɔ̀gsɛna ɓi Moyis, ɓì rì ɓumɓɛ ɓɛ ri ɓɛ̀cɛ̀mɛn.

⁵⁰Nikodɛm ànɛ à kɛ̀ngà kì ghɛɛ̀ Yeesus à ɓaghà kìbog ki ɓi ɓumɓɛ̀n, nni à kpaaghà ɓɔ lɛ:

⁵¹Ɓi ɓìdɔ̀gsɛna ɓis, ɓɛ ri nya lɛ ɓɛ ren kìɓan ki mum di ɓɛ ka wog ɓi nkpaà wii, ɓɛ ki yi kiɓan ki à kìi?

⁵²Nni ɓɛ ɓakà nyi lɛ: Wɔ̀ɔ̀ rì nya girig ŋwaànɛ a Galile? I ù konaagh kì kaà, ù ɓiì ghɛɛ̀ lɛ, Ǹkpaŋzì-ɓìɓan a ka ɓaghày ɓi a Galile. [

⁵³Nni ɓɛ sukàkà a ɓɛ̀mɛɛ ɓaa.